Yohane 3 - Somi He Ɔ

Yesu kɛ Nikodemo

¹ Nyumu ko ngɛ nɛ je Farisifo ɔmɛ a kpɛti nɛ a tsɛɛ lɛ Nikodemo nɛ ji Yudafo ɔmɛ a nɔkɔtɔma.

² Lɛ lɛ e ba Yesu ngɔ nyɔ mi, nɛ e ba de lɛ ke: “Rabi, wa le kaa tsɔɔlɔ nɛ je Mawu ngɔ ba ji mo, ejakaa nɔ ko nɔ ko be nyɛe maa pee nyakpɛ nihi nɛ o ngɛ pee nɛ ɔmɛ, kaa ja Mawu kɛ nɔ ɔ ngɛ.”

³ Yesu he nɔ nɛ e de lɛ ke: “I ngɛ mo dee anɔkuale mi ke: Ke a ji hiɔwe fɔ we nɔ ko ɔ, e be Mawu matsɛ yemi ɔ nae.”

⁴ Nikodemo bi lɛ ke: “Kɛ e maa pee kɛɛ nɛ benɛ nɔmlɔ bwɔ ɔ nɛ a ma fɔ lɛ hu? Anɛ e ma nyɛ e nyɛ muklii mi maa sɛ ekohu nɛ a fɔ lɛ lo?”

⁵ Yesu he nɔ ke: “I ngɛ mo dee anɔkuɛle mi ke: Ke a ji nyu kɛ Mumi mi fɔ we nɔ ko ɔ, e be Mawu matsɛ yemi ɔ mi nyɛe maa sɛ.

⁶ Nɔ́ nɛ a je he lo mi fɔ ɔ, he lo ʼi; nɛ nɔ́ nɛ a je Mumi mi fɔ ɔ, Mumi ʼi.

⁷ O hɛ mi ko pee mo yaa kaa i de mo enɛ ɔ ke: ‘Ja a je hiɔwe fɔ nyɛ’ ɔ.

⁸ Kɔɔhiɔ ɔ, he nɛ e suɔ e fiaa kɛ yaa, nɛ e fiami o nuɔ, se o li he nɛ e jee kɛ he nɛ e yaa: ja ji nɔ tsuaa nɔ nɛ a je Mumi mi fɔ lɛ.”

⁹ Nikodemo he nɔ nɛ e de lɛ ke: “Kɛ maa pee kɛɛ nɛ ni nɛ ɔmɛ maa ba mi?”

¹⁰ Yesu he nɔ nɛ e de lɛ ke: “Tse Israel tsɔɔlɔ ji mo nɛ o li enɛ ɔmɛ?

¹¹ I ngɛ mo dee anɔkuale mi ke: Nɔ́ nɛ wa le ɔ, kɔlɔ ɔ wa deɔ; nɛ nɔ́ nɛ wa na a, kɔlɔ ɔ he odase wa yeɔ, se nyɛ ngɔɛ wa odase ɔ.

¹² Ke i de nyɛ zugba nɔ nihi nɛ nyɛ he we yi ɔ, kɛ maa pee kɛɛ nɛ ke ide nyɛ hiɔwe nihi ɔ nɛ nyɛ ma he ye?

¹³ Nɔ ko kue kɛ yɛ hiɔwe, kaa ja nɔ nɛ je hiɔwe kple si ɔ, Nɔmlɔ Bi ɔ nɛ ngɛ hiɔwe ɔ.”

¹⁴ Nɛ bɔ nɛ Mose wo sinɔ ɔ nɔ ngɛ nga a nɔ ɔ, ja nɔuu sa kaa a wo Nɔmlɔ Bi ɔ nɔ.

¹⁵ Konɛ nɔ tsuaa nɔ nɛ heɔ e nɔ yeɔ ɔ hɛ mi ko kpata, se mohu e na neneene wami.

¹⁶ Ejakaa Mawu suɔ je ɔ saminya, nɛ e ngɔ e bi kake ɔ ngɔ ha, konɛ nɔ tsuaa nɔ nɛ heɔ e nɔ yeɔ ɔ hɛ mi ko kpata, se mohu e na neneene wami.

¹⁷ Ejakaa Mawu tsɔɛ e bi ɔ kɛ bɛ je ɔ mi konɛ e ba kojo je ɔ, se mohu konɛ a gu e nɔ kɛ he je ɔ yi wami.

¹⁸ Nɔ nɛ heɔ e nɔ yeɔ, a kojo we lɛ, se nɔ nɛ he we yi ɔ, a kojo lɛ momo, ejakaa e he we Mawu bi kake ɔ nɔ yi.

¹⁹ Se kojomi ɔ ji nɛ ɔ nɛ, kaa la a ba je ɔ mi, nɛ nimli suɔ diblii ɔ mohu pe la a, ejakaa a ni tsumi ɔmɛ ɔ yayami ʼi;

²⁰ nɛ nɔ tsuaa nɔ nɛ tsuɔ ni yayamihi ɔ nyɛɛ la a, nɛ e bɛ la a he, konɛ a ko je e ni tsumi ɔmɛ kpo.

²¹ Se nɔ nɛ peɔ anɔkuale nihi ɔ baa la a he, konɛ e ni tsumi ɔmɛ nɛ je kpo, ejakaa Mawu mi a tsu mɛ ngɛ.

Yesu kɛ Yohane

²² Ni nɛ ɔmɛ a se ɔ, Yesu kɛ e kaseli ɔmɛ ba Yudea zugba a nɔ, nɛ e kɛ mɛ ba hi lejɛ ɔ nɛ e baptisii.

²³ Nɛ Yohane hu ngɛ baptisie ngɛ Ainon, ngɛ Salim kasa nya, ejakaa nyu fuu ngɛ lejɛ ɔ, nɛ nihi baa nɛ a baptisii mɛ;

²⁴ ejakaa lɛ be ɔ mi ɔ a wui Yohane tsu mi lolo.

²⁵ Jeha nɛ ɔ nya sami ba te si ngɛ Yohane kaseli ɔmɛ kɛ Yudafono ko kpɛti ngɛ he tsukɔmi he.

²⁶ Nɛ a ba Yohane ngɔ nɛ a ba de lɛ ke: “Rabi, nɔ nɛ kɛ mo hi Yordan se nɛ o ye e he odase ɔ, oʼɛ, lɛ nitse e ngɛ baptisie, nɛ nihi tsuo ngɛ e ngɔ yae.”

²⁷ Yohane he nɔ nɛ e ke: “Nɔmlɔ be nyɛe ma na nɔ́ ko, ja a je hiɔwe ngɔ ha lɛ.

²⁸ Nyɛ nitsɛmɛ nyɛ ngɛ odase yee ha mi kaa i de ke ‘Pi imi ji Kristo ɔ, se mohu a tsɔ mi kɛ sɛ e hlami.’

²⁹ Nɔ nɛ nɔ́ ji ayɛflo ɔ, lɛ ji ayɛflo huno; se ayɛflo huno ɔ huɛ nɛ daa si ngɛ lɛ tue bue ɔ, nya e nyaa ngɛ ayɛflo huno ɔ gbi he. Lɔ ɔ he ɔ ye kikɛmɛ a nyami nɛ ɔ ba mi.

³⁰ Ja lɛɛ e ya nɔ, nɛ imi lɛɛ i ba si.”

Nɔ nɛ je hiɔwe kɛ ba a

³¹ Nɔ nɛ je hiɔwe ba a pe nihi kulaa. Nɔ nɛ je zugba a nɔ ɔ, zugba a nɔ e je, nɛ zugba a he munyu e tuɔ. Nɔ nɛ je hiɔwe ba a pe nihi kulaa,

³² nɛ nɔ́ nɛ e na nɛ e nu ɔ, lɔ ɔ he odase e yeɔ; nɛ nɔ ko nɔ ko ngɔɛ e odase ɔ.

³³ Nɔ tsuaa nɔ nɛ heɔ e odase ɔ yeɔ ɔ maa nɔ mi kaa anɔkualetsɛ ji Mawu.

³⁴ Ejakaa nɔ nɛ Mawu tsɔ ɔ, Mawu munyu e tuɔ; ejakaa Mawu haa lɛ e Mumi ɔ faa.

³⁵ Tsɛ ɔ suɔ Bi ɔ, nɛ e tu nihi kulaa ngɔ wo e dɛ.

³⁶ Nɔ nɛ heɔ Bi ɔ nɔ yeɔ ɔ, e ngɛ neneene wami; se nɔ nɛ bui Bi ɔ tue ɔ, e be wami nae, se mohu Mawu mi mi fumi hii e nɔ.