Yohane 20 - Somi He Ɔ

Yɔkɔ mi gu ɔ

¹ Jeha nɛ ɔ, otsi ɔ mi kekleekle ligbi ɔ nɔ makɛ mla benɛ zugba mi tɛ̃ lolo ɔ, Maria Magdalena ba yɔkɔ ɔ he, nɛ e na kaa a je tɛ ɔ kɛ je muɔ ɔ nya.

² Kɛkɛ nɛ e sa fo, nɛ e ba Simon Petro kɛ kaselɔ kake nɛ Yesu suɔ ɔ ngɔ, nɛ e ba de mɛ ke: “A wo Nyɔmtsɛ ɔ kɛ je muɔ ɔ mi, nɛ wa li he nɛ a kɛ lɛ ya fɔ.”

³ Lɔ ɔ he ɔ Petro kɛ jamɛ a kaselɔ kake ɔ je kpo, nɛ a pue nɔ kɛ yaa yɔkɔ ɔ he.

⁴ Mɛ ni enyɔ ɔ tsuo wo fo; se kaselɔ kake ɔ be Petro he, nɛ lɛ kekle e ya su yɔkɔ ɔ he;

⁵ nɛ benɛ e kɔkɔ e yi si nɛ e hyɛ mi ɔ, e na kploba amɛ nɛ a pueɔ si, se e sɛ we yɔkɔ ɔ mi.

⁶ Kɛkɛ nɛ Simon nyɛɛ e se kɛ ba, nɛ e ba sɛ muɔ ɔ mi, nɛ e na kploba amɛ nɛ a pueɔ si;

⁷ se duku nɛ a kɛ fi e yi ɔ fɔ we si ngɛ kploba amɛ a kasa nya, se mohu e fɔɔ si ngɛ he kpa banee bɔ nɛ a fi ɔ.

⁸ Kɛkɛ nɛ jeha nɛ ɔ kaselɔ kake ɔ hu nɛ ba yɔkɔ ɔ he kekle ɔ sɛ mi, nɛ e na, nɛ e he ye;

⁹ (ejakaa a na we nɛ a le ngami ɔ nɛ deɔ ke ja e te si kɛ je gbeje ɔ.)

¹⁰ Kɛkɛ nɛ kaseli ɔmɛ kpale a se kɛ ho a we mi ya.

Yesu je e he kpo tsɔɔ Maria Magdalena (Mateo 28.9-10; Marko 16.9-11)

¹¹ Se Maria daa si ngɛ yɔkɔ ɔ se je ngɛ ya foe. Nɛ benɛ e ngɛ ya a foe ɔ, e kɔkɔ e yi si nɛ e hyɛ muɔ ɔ mi,

¹² nɛ e na hiɔwe bɔfohi enyɔ nɛ a wo ni hiɔ nɛ a hii si ngɛ he nɛ Yesu gbogboe ɔ fɔ si ngɛ ɔ, nɔ kake ngɛ e yi je, nɛ nɔ kake hu ngɛ e nane si je.

¹³ Nɛ a de lɛ ke: “Maa, mɛni he je o ngɛ ya foe?” E de mɛ ke: “Ejakaa a wo ye Nyɔmtsɛ ɔ kɛ ho, nɛ i li he nɛ a kɛ lɛ ya fɔ.”

¹⁴ Nɛ benɛ e de enɛ ɔ ɔ, e plɛ e he nɛ e hyɛ e se, nɛ e na Yesu daa si, se e li kaa Yesu.

¹⁵ Yesu bi lɛ ke: “Maa, mɛni he je o ngɛ ya foe? Mɛnɔ o ngɛ hlae?” Maria susu kaa be nɛ ɔ mi ɔ abɔɔ mi dlalɔ ɔ ʼi, nɛ e de lɛ ke: “Etsɛ ke mo lɛ o wo lɛ kɛ je hiɛ ɔ ɔ, tsɔɔ mi he nɛ o kɛ lɛ ya fɔ̃, konɛ ma ya wo lɛ.”

¹⁶ Yesu de lɛ ke: “Maria!” Nɛ Maria plɛ e he, nɛ e de lɛ ngɛ Hebri mi ke: “Rabuni” (e sisi ji: Tsɔɔlɔ.)

¹⁷ Yesu de lɛ ke: “Koo ta ye he; ejakaa i na we ma ya hiɔwe ngɛ Tsaatsɛ ngɔ lolo; se yaa ye nyɛmimɛ ɔmɛ a ngɔ nɛ o ya de mɛ ke: I yaa hiɔwe ngɛ Tsaatsɛ kɛ nyɛ hu nyɛ tsɛ kɛ ye Mawu kɛ nyɛ hu nyɛ Mawu ɔ ngɔ.”

¹⁸ Lɔ ɔ he ɔ, Maria Magdalena ba nɛ e ba sɛɛ ha kaseli ɔmɛ ke e na Nyɔmtsɛ ɔ, nɛ bɔ nɛ e kɛ lɛ tu munyu ha ji nɛ ɔ nɛ.

Yesu je e he kpo tsɔɔ e kaseli ɔmɛ

¹⁹ Jeha nɛ ɔ jamɛ a ligbi ɔ nɛ ji otsi ɔ mi kekleekle ligbi ɔ nɔ gbɔkuɛ ɔ nɔuu, benɛ Yudafo ɔmɛ a he gbeye he je ɔ a nga he nɛ kaseli ɔmɛ bua a he nya ɔ sinya amɛ ɔ, Yesu ba nɛ e ba da a kpɛti nɛ e de mɛ ke: “Nyɛ he manye!”

²⁰ Nɛ benɛ e de ja a, e ngɔ e dɛ mi kɛ e kasa a ngɔ tsɔɔ mɛ. Kɛkɛ nɛ kaseli ɔmɛ na bua jɔmi kaa a na Nyɔmtsɛ ɔ.

²¹ Jeha nɛ ɔ Yesu kpale de mɛ ekohu ke: “Nyɛ he manye! Bɔ nɛ Tsɛ ɔ tsɔ mi ɔ, ja imi hj i ngɛ nyɛ tsɔe ɔ nɛ.”

²² Nɛ benɛ e de ja a, e mu ngɔ pue a nɔ, nɛ e de mɛ ke: “Nyɛ he Mumi Klɔuklɔu ɔ!

²³ Nihi a he yayami nɛ nyɛ ma ngɔ pa a, a ngɔ pa; nɛ nihi a he yayami nɛ nyɛɛ kɛ maa to ɔ, a ngɔ to.”

Yesu kɛ Toma

²⁴ Se Toma, ni nyɔngma kɛ enyɔ ɔmɛ a kpɛti nɔ kake nɛ a tsɛɛ lɛ Didimo (hayo) ɔ be a kpɛti nɛ Yesu ba a.

²⁵ Lɔ ɔ he ɔ kaseli kpa amɛ de lɛ ke: “Wa na Nyɔmtsɛ ɔ.” Se e de mɛ ke: “Ja i na e dɛ mi plɛkobi ɔmɛ a nya, nɛ i kɛ ye nguɛ sia plɛkobi ɔmɛ a nya, nɛ i kɛ ye nine hɔ e kasa mi ɔ loko ma he ye.”

²⁶ Nɛ ligbi kpaanyɔ se ekohu ɔ, e kaseli ɔmɛ ngɛ tsu mi, nɛ Toma hu piɛ a he. Nɛ a nga sinya amɛ, nɛ Yesu ba, nɛ e ba da a kpɛti nɛ e ke: “Nyɛ he manye!”

²⁷ Lɔ ɔ se ɔ, e de Toma ke: “O kɛ o nine nguɛ nɛ ba hiɛ ɔ nɛ o ba hyɛ ye dɛ mi ɔ, nɛ o kɛ o nine ba hɔ ye kasa mi ɔ, nɛ o ko je nɔ́, se mohu o he ye.”

²⁸ Toma he nɔ nɛ e de lɛ ke: “Ye Nyɔmtsɛ kɛ ye Mawu.”

²⁹ Yesu de lɛ ke: “Toma, nɛ o na mi he je ɔ o he ye; a gbaa ninɛmɛ nɛ a nɛ se kɛ̃ ɔ a heɔ yeɔ ɔ.”

Nɔ nɛ he je nɛ a ngma womi nɔ

³⁰ Jeha nɛ ɔ okadi kpahi fuu hu ngɛ nɛ Yesu pee ngɛ e kaseli ɔmɛ a hɛ mi nɛ a ngmɛ ngɛ womi nɛ ɔ mi;

³¹ se enɛ ɔmɛ lɛɛ a ngma, konɛ nyɛ he ye kaa Yesu ji Kristo, Mawu bi ɔ nɛ, nɛ ke nyɛ he ye ɔ, nɛ nyɛ na wami ngɛ e biɛ ɔ mi.