Yohane 18 - Somi He Ɔ

Yesu numi

¹ Benɛ Yesu tu munyu nɛ ɔmɛ se ɔ, e kɛ e kaseli ɔmɛ je kpo nɛ a ya po Kedron pa a kɛ ho he nɛ abɔɔ ko ngɛ ɔ ya, nɛ e kɛ e kaseli ɔmɛ sɛ mi.

² Se Yuda, nɔ nɛ ya tsɔɔ e se blɔ ɔ, hu le lejɛ ɔ, ejakaa Yesu kɛ e kaseli ɔmɛ pɔɔ kpemi ngɛ lejɛ ɔ.

³ Jeha nɛ ɔ Yuda ya ngɔ aslaafohi kɛ tsɔli kɛ je osɔfo nikɔtɔma amɛ kɛ Farisifo ɔmɛ a ngɔ, nɛ a hɛɛ kanehi kɛ hahi kɛ dadehi kɛ ba lejɛ ɔ.

⁴ Akɛnɛ Yesu le nihi tsuo nɛ ma e nɔ ɔ, e je kpo nɛ e bi mɛ ke: “Mɛnɔ nyɛ ngɛ hlae?”

⁵ A he nɔ ke: “Yesu Nazareno ɔ.” Yesu de mɛ ke: “Imi ji nɛ ɔ nɛ.” Se Yuda, nɔ nɛ ya tsɔɔ e se blɔ ɔ hu kɛ mɛ daa si.

⁶ Jeha nɛ ɔ benɛ e de mɛ ke: “Imi ji nɛ ɔ” ɔ, a gbee senya senya nɛ a ya pue si.

⁷ Kɛkɛ nɛ e kpale bi mɛ ekohu ke: “Mɛnɔ nyɛ ngɛ hlae?” Nɛ a ke: “Yesu, Nazareno ɔ.”

⁸ Yesu he nɔ nɛ e de mɛ ke: “I de nyɛ ke: Ami ʼi; lɔ ɔ he ɔ ke imi nyɛ ngɛ hlae ɔ, lɛɛ nyɛ ha ni nɛ ɔmɛ nɛ a ya.”

⁹ (Konɛ munyu nɛ a tu ke: “Nihi nɛ o ngɔ ha mi ɔ, i ha we nɛ a ti nɔ ko nɛ laa” a nɛ ba mi.)

¹⁰ Kɛkɛ nɛ Simon Petro nɛ hɛɛ klaate ɔ hia nɛ e kɛ ja osɔfo nɔkɔtɔma a nyɔguɛ ɔ nɛ e po e hiɛ ɔ nɔ tue; se nyɔguɛ ɔ biɛ ji Malko.

¹¹ Lɔ ɔ he ɔ Yesu de Petro ke: “Ngɔɔ o klaate ɔ ngɔ wo e kpo ɔ mi. Anɛ kplu nɛ Tsaatsɛ ngɔ ha mi ɔ, ma ko nu lo?”

Yesu ngɛ Hana hɛ mi

¹² Kɛkɛ nɛ aslaafo ɔmɛ kɛ asafoatsɛ nɔkɔtɔma a kɛ Yudafo ɔmɛ a tsɔli ɔmɛ nu Yesu nɛ a fi lɛ,

¹³ nɛ a kpaka lɛ kɛ ho Hana ngɔ ya kekle, ejakaa Kaiafa nɛ ngɛ osɔfo nɔkɔtɔma yee ngɛ lɛ jeha a nɔ ɔ ngatsɛ ji lɛ.

¹⁴ Kaiafa ji nɔ nɛ wo Yudafo ɔmɛ ga kaa e hi kaa nɔ kake gboɔ ngɛ ma a nane mi ɔ nɛ.

Petro kua Yesu

¹⁵ Nɛ Simon Petro kɛ kaselɔ kpa ko hu nyɛɛ Yesu se. Se osɔfo nɔkɔtɔma a le jamɛ a kaselɔ ɔ, nɛ e kɛ Yesu sɛ osɔfo nɔkɔtɔma a mɔ ɔ kpo ɔ kpɛti;

¹⁶ se Petro daa si ngɛ agbo ɔ se. Lɔ ɔ he ɔ jamɛ a kaselɔ kpã a nɛ osɔfo nɔkɔtɔma a le ɔ je kpo, nɛ e ya de yo nɛ ngɛ sinya a nya bue ɔ, nɛ e ngɔ Petro kɛ ba we ɔ mi.

¹⁷ Kɛkɛ nɛ yiheyo ɔ nɛ ngɛ sinya a nya bue ɔ de Petro ke: “Tse mo hu nyumu nɛ ɔ kaseli ɔmɛ eko ji mo?” E ke: “Dɛbi.”

¹⁸ Se nyɔguɛ ɔmɛ kɛ sɔmɔli ɔmɛ daa si ngɛ lejɛ ɔ, a kɛ hã slɛ la, ejakaa fiɛ ngɛ, nɛ a ngɛ la hluee; nɛ Petro hu kɛ mɛ daa si ngɛ la a eko hluee.

Osɔfo nɔkɔtɔma a bi Yesu sane

¹⁹ Jeha nɛ ɔ osɔfo nɔkɔtɔma a bi Yesu e kaseli ɔmɛ kɛ e tsɔɔmi ɔ he munyu.

²⁰ Yesu he nɔ nɛ e de lɛ ke: “Pãa i tuɔ munyu kɛ tsɔɔ je ɔ. Daa nɛ ɔ i tsɔɔ ni ngɛ kpe he ɔmɛ kɛ sɔlemi we ɔ, he nɛ Yudafo ɔmɛ tsuo kpee ngɛ ɔ, nɛ i de we nɔ́ ko nɔ́ ko ngɛ laami mi.

²¹ Mɛni he je o ngɛ imi mohu bie? Bi ninɛmɛ nɛ ba buɔ mi tue ɔ nɔ́n ɛ i deɔ mɛ; oʼɛ, ni nɛ ɔmɛ le nihi nɛ i deɔ ɔ.”

²² Se benɛ e de kikɛ ɔ, sɔmɔli nɛ daa si ɔmɛ a ti nɔ kake gba Yesu ma nɛ e ke: “Heto nɛ o ha osɔfo nɔkɔtɔma a ji nɛ ɔ?”

²³ Yesu he nɔ ke: “Ke i de nɔ́ yaya ko ɔ, ye nɔ́ yaya a he odase, se ke kpakpa a, mɛni he je o ngɛ mi gbee?”

²⁴ Nɛ Hana ha a kɛ lɛ ya osɔfo nɔkɔtɔma Kaiafa ngɔ ngɛ kpa mi.

Petro kua Yesu ekohu

²⁵ Se Simon Petro daa si nɛ e ngɛ la hluee. Jeha nɛ ɔ a de lɛ ke: “Tse mo hu e kaseli ɔmɛ e ko ji mo?” E kua nɛ e ke: “Dɛbi.”

²⁶ Osɔfo nɔkɔtɔma a nyɔguɛ ɔmɛ a ti nɔ kake nɛ ji nɔ nɛ Petro po e tue ɔ wekuno ɔ, ke: “Anɛ i nɛ o kɛ lɛ ngɛ abɔɔ ɔ mi lo?”

²⁷ Nɛ Petro kua ekohu, kɛkɛ nɛ nɔuu nɛ kungwɔ kpa nɔ.

Yesu ngɛ Pilato hɛ mi

²⁸ Kɛkɛ nɛ a kpaka Yesu kɛ je Kaiafa ngɔ kɛ ho kojomi he ɔ ya. Nɛ e su makɛ. Mɛ nitsɛmɛ ɔ lɛɛ a sɛ we kojomi he ɔ, konɛ a ko ble a he, benɛ pee nɛ a nyɛ nɛ a ye Hetsɔmi ɔ.

²⁹ Jeha nɛ ɔ Pilato je kpo kɛ ba a ngɔ nɛ e ke: “Mɛni sane nyɛɛ kɛ ba ngɛ nyumu nɛ ɔ nɔ fɔe?”

³⁰ A he nɔ nɛ a de lɛ ke: “Pi yayami peelɔ ji lɛ jinɛ waa kɛ lɛ ba be mo hae.”

³¹ Kɛkɛ nɛ Pilato de mɛ ke: “Nyɛɛ ngɔ lɛ nɛ nyɛ nitsɛmɛ nyɛ ya kojo lɛ ngɛ nyɛ mlaa a nya.” Yudafo ɔmɛ de lɛ ke: “Wɔɔ lɛɛ wa be he blɔ kaa wa gbee nɔ ko.”

³² (Konɛ Yesu munyu nɛ e tu kɛ tsɔɔ nɔ gbenɔ nɛ e ma gbo ɔ nɛ ba mi.)

³³ Kɛkɛ nɛ Pilato kpale sɛ kojomi he ɔ ekohu, nɛ e tsɛ Yesu nɛ e bi lɛ ke: “Anɛ mo ji Yudafo ɔmɛ a matsɛ ɔ lo?”

³⁴ Yesu he nɔ ke: “Mo nitsɛ o yi mi o to ngɛ enɛ ɔ dee nɛ ɔ, aloo ni komɛ lɛ a de mo ja ngɛ ye he?”

³⁵ Pilato he nɔ nɛ e de lɛ ke: “Anɛ Yuda no ji mi lo? Mo nitsɛ o ma mi bi kɛ osɔfo nikɔtɔma amɛ lɛ a ngɔ mo ha mi. Mɛni o pee?”

³⁶ Yesu he nɔ ke: “Ye matsɛ yemi ɔ ji je nɛ ɔ mi; ye matsɛ yemi ɔ je je nɛ ɔ mi jinɛ, ye sɔmɔli ɔmɛ maa plee he, konɛ a ko ngɔ mi ngɔ ha Yudafo ɔmɛ; se enɛ ɔ ɔ, ye matsɛ yemi ɔ ji hiɛ ɔ.”

³⁷ Lɔ ɔ he ɔ Pilato bi lɛ ke: “Lɛɛ matsɛ ji mo kɛ̃ lo?” Yesu he nɔ ke: “Jã o de ɔ nɛ; ejakaa matsɛ ji mi. Imi lɛɛ enɛ ɔ he a fɔ mi, nɛ enɛ ɔ he nɔuu i ba je ɔ mi ngɛ, konɛ ma ba ye anɔkuale ɔ he odase. Nɔ tsuaa nɔ nɛ je anɔkuale ɔ mi ɔ nuɔ ye gbi.”

³⁸ Pilato bi lɛ ke: “Mɛni ji anɔkuale?” Nɛ benɛ e de enɛ ɔ ɔ, e je kpo kɛ ho Yudafo ɔmɛ a ngɔ ya ekohu, nɛ e ya de mɛ ke: “Imi lɛɛ i nɛ fɔ bumi sane ko kulaa ngɛ e he.

A bu Yesu gbenɔ fɔ

³⁹ Se nyɛ ngɛ blɔ nya ko kaa i ngmɛɔ nɔ kake he haa nyɛ ngɛ Hetsɔmi nyami ligbi ɔ nɔ; lɔ ɔ he ɔ, nyɛ suɔ nɛ ma ngmɛɛ Yudafo ɔmɛ a matsɛ ɔ he ha nyɛ lo?”

⁴⁰ Kɛkɛ nɛ mɛ tsuo a kpa ngmlaa ekohu ke: “Tsa pi nɔ nɛ ɔ, se Baraba mohu!” Kpahu Baraba a ojo fialɔ ji lɛ.