Yohane 17 - Somi He Ɔ

Yesu kpa pɛɛ kɛ ha e kaseli ɔmɛ

¹ Benɛ Yesu de ni nɛ ɔmɛ se ɔ, e wo e hɛ nɔ kɛ ya hiɔwe, nɛ e ke: “Tsaatsɛ, ngmlɛfia a su. Wo o bi ɔ hɛ mi nyami, konɛ o bi ɔ hu nɛ wo o hɛ mi nyami.

² Ejakaa o ha lɛ he blɔ ngɛ he lo tsuo nɔ, konɛ nihi tsuo nɛ o ngɔ ha lɛ ɔ, e ha mɛ neene wami.

³ Se enɛ ɔ ji neneene wami ɔ nɛ, kaa a le mo, anɔkuale Mawu kake ɔ, kɛ Yesu Kristo nɔ nɛ o tsɔ ɔ.

⁴ Imi lɛɛ i wo o hɛ mi nyami ngɛ zugba a nɔ, akɛnɛ ni tsumi ɔ nɛ o ha mi tsumi ɔ i gbe nya a.

⁵ Nɛ jeha nɛ ɔ, Tsaatsɛ, ngɔɔ hɛ mi nyami nɛ i ngɛ ngɛ o ngɔ loko a bɔ je ɔ ngɔ wo ye hɛ mi nyami.

⁶ “I je o biɛ ɔ si ngɔ tsɔɔ nimli nɛ o ngɔ kɛ je je ɔ mi ha mi ɔ. O nihi ji mɛ, nɛ o ngɔ mɛ ngɔ ha mi, nɛ a ye o munyu ɔ nɔ.

⁷ Jeha nɛ ɔ a le kaa nihi kulaa nɛ o ngɔ ha mi ɔ, o ngɔ a je,

⁸ ejakaa munyu ɔmɛ nɛ ɔ ngɔ ha mi ɔ, i ngɔ ha mɛ; nɛ a he, nɛ a na le faii kaa o ngɔ i je, nɛ a he ye kaa mo lɛ o tsɔ mi.

⁹ Imi lɛɛ, mɛ i ngɛ pɛɛ kpae kɛ ngɛ hae; tsa pi je ɔ nɛ i ngɛ pɛɛ kpae kɛ ngɛ hae, se mohu nihi nɛ o ngɔ ha mi ɔ, ejakaa o nihi ji mɛ;

¹⁰ nɛ ye nihi tsuo kulaa a, o nɔ ʼi, nɛ o nɔ hu ɔ, ye nɔ ʼi, nɛ ye hɛ mi ba nyami ngɛ a mi.

¹¹ Nɛ i be je ɔ mi hu, se ni nɛ ɔmɛ ngɛ je ɔ mi, nɛ imi lɛɛ i ma o ngɔ. Tsaatsɛ klɔuklɔu, nihi nɛ o ngɔ ha mi ɔ, to mɛ ngɛ o biɛ ɔ mi, benɛ pee nɛ a pee kake kaa wɔ.

¹² Benɛ i kɛ mɛ ngɛ je ɔ mi ɔ, i to mɛ ngɛ o biɛ ɔ mi; nihi nɛ o ngɔ ha mi ɔ, i bu a he, nɛ a ti nɔ ko nɔ ko laa we, ja laami bi ɔ, konɛ nɔ́ nɛ a ngma a nɛ ba mi.

¹³ Se jeha nɛ ɔ ɔ, i ma o ngɔ, nɛ i ngɛ ni nɛ ɔmɛ dee ngɛ je ɔ mi, konɛ a na ye bua jɔmi ɔ nɛ e nu si ngɛ a mi?

¹⁴ I ngɔ o munyu ɔ ngɔ ha mɛ, nɛ je ɔ ngɛ mɛ nyɛe, ejakaa a ji je ɔ mi, kaa bɔ nɛ imi hu i ji je ɔ mi ɔ?

¹⁵ I bi we kaa o je mɛ kɛ je je ɔ mi, se mohu kaa o bu a he kɛ je nɛ ɔ yayami ɔ dɛ mi.

¹⁶ A ji je ɔ mi kaa bɔ nɛ imi hu i ji je ɔ mi ɔ.

¹⁷ Pee mɛ klɔuklɔu ngɛ anɔkuale ɔ mi; o munyu ɔ anɔkuale ʼi.

¹⁸ Kaa bɔ nɛ o tsɔ mi je ɔ mi ɔ, ja nɔuu imi hu i ngɛ mɛ je ɔ mi tsɔe.

¹⁹ Nɛ a he nɛ imi nitsɛ i peɔ ye he klɔuklɔu ɔ nɛ, konɛ mɛ hu a pee mɛ klɔuklɔu ngɛ anɔkuale mi.

²⁰ “Se pi ni nɛ ɔmɛ a he kɛkɛ nɛ i ngɛ pɛɛ kpae ngɛ ɔ, se nihi nɛ ma he ye nɔ maa ye ngɛ a munyu ɔ nya a hulɔ.

²¹ Konɛ mɛ tsuo a pee kake, kaa bɔ nɛ mo, Tsaatsɛ, o ngɛ ye mi nɛ imi hu i ngɛ o mi ɔ, konɛ mɛ hu a pee kake ngɛ wa mi, konɛ je ɔ nɛ he ye kaa mo lɛ o tsɔ mi.

²² Nɛ hɛ mi nyami nɛ o ngɔ ha mi ɔ, i ngɔ ha mɛ, konɛ sa pee kake, kaa bɔ nɛ wɔ hu wa ngɛ kake ɔ.

²³ I ngɛ a mi, nɛ mo hu o ngɛ yɛ mi, konɛ a pee kake kɛ pi si, nɛ je ɔ nɛ le kaa mo lɛ o tsɔ mi, nɛ o suɔ mɛ kaa bɔ nɛ o suɔ mi ɔ.

²⁴ “Tsaatsɛ, nihi nɛ o ngɔ ha mi ɔ i suɔ kaa he nɛ i ngɛ ɔ mɛ hu a kɛ mi ba hi lejɛ ɔ, konɛ a na ye hɛ mi nyami nɛ o ngɔ ha mi ɔ, ejakaa o suɔ mi loko a to je ɔ sisi.

²⁵ Tsaatsɛ dalɔ, je ɔ li mo, se imi lɛɛ i le mo, nɛ ni nɛ ɔmɛ le kaa mo lɛ o tsɔ mi;

²⁶ nɛ i je o biɛ ɔ si ngɔ tsɔɔ mɛ, nɛ ma kpale je lɛ si ngɔ tsɔɔ, konɛ suɔmi nɛ o kɛ suɔ mi ɔ nɛ hi a mi nɛ imi hu ma hi a mi.”