Yohane 16 - Somi He Ɔ

¹ I de nyɛ ni nɛ ɔmɛ benɛ pee nɛ nyɛ nane nɛ ko kpata. O

² A maa fie nyɛ kɛ maa je kpe he ɔmɛ. Nɛ be maa ba tete nɛ nɔ tsuaa nɔ nɛ gbee nyɛ ɔ a ma susu kaa e kɛ ngɛ Mawu jae.

³ Nɛ a maa pee enɛ ɔmɛ, ejakaa a li Tsɛ ɔ loo imi hulɔ.

⁴ Se i de nyɛ ni nɛ ɔmɛ, konɛ ke be ɔ su ɔ nɛ nyɛ kai kaa i wo nɔ ta de nyɛ, se kɛ je sisije ɔ i de we nyɛ ni nɛ ɔmɛ, ejakaa i kɛ nyɛ lɛ ngɛ.

Mumi Klɔuklɔu ɔ nitsumi

⁵ “Se jeha nɛ ɔ ɔ, fi yaa nɔ nɛ tso mi ɔ ngɔ, nɛ nyɛ ti nɔ ko bi we mi ke: ‘Jije o yaa?’

⁶ Se nɛ i wo ni nɛ ɔmɛ a nɔ ta de nya he je ɔ, kɔmɔ yemi hyi nyɛ tsui mi.

⁷ Se kɛ̃ ɔ, i ngɛ nyɛ anɔkuale dee: e hi ha nyɛ kaa ma je; mɛni he je ɔ, ke i ji ɔ, Hepiɛlɔ ɔ be nyɛ ngɔ bae; se ke i je ɔ, ma ha e ba nyɛ ngɔ.

⁸ Nɛ lɛɛ, ke e ba a, e ma kã je ɔ ngɛ yayami he kɛ dami he kɛ kojomi he:

⁹ Yayami he, ejakaa a he we ye nɔ yi;

¹⁰ dami he, ejakaa i yaa Tsɛ ɔ ngɔ, nɛ nyɛ be mi nae hu;

¹¹ kojomi he, ejakaa a kojo je ɔ mi matsɛ ɔ.

¹² “I ngɛ nihi fuu nɛ piɛ nɛ ma de nyɛ; se nyɛ be nyɛe he maa pɛtɛ amlɔ nɛ ɔ;

¹³ se ke anɔkuale Mumi ɔ na ba a, e maa tsɔɔ nyɛ anɔkuale ɔ kulaa mi blɔ; ejakaa e be lɛ nitsɛ e yi mi toe kɛ tu munyu, se mohu nɔ́ tsuaa nɔ́ nɛ e maa nu ɔ, kɔlɔ ɔ e ma de, nɛ nihi nɛ ma a, e maa wo nɔ ta de nyɛ.

¹⁴ Lɛ e maa wo ye hɛ mi nyami, ejakaa e maa ngɔ ye nɔ ɔ eko nɛ e maa wo nɔ ta de nyɛ.

¹⁵ Nihi tsuo nɛ ji Tsɛ ɔ nɔ ɔ, ye nɔ ʼi; lɔ ɔ he nɛ i de ke: ‘E maa ngɔ ye nɔ ɔ eko nɛ e wo nɔ ta de nyɛ’ ɔ nɛ.”

Kɔmɔ kɛ buajɔmi

¹⁶ “E piɛ bɔɔ nɛ nyɛ be mi nae, nɛ jeha nɛ ɔ hu e piɛ bɔɔ nɛ nyɛ maa na mi; ejakaa i yaa Tsɛ ɔ ngɔ.”

¹⁷ Kɛkɛ nɛ e kaseli ɔmɛ a ti ni komɛ bi a he ke: “Mɛni ji nɔ́ nɛ e ngɛ wɔ dee nɛ ɔ: ‘Epiɛ bɔɔ nɛ nyɛ be mi nae hu, nɛ jeha nɛ ɔ hu, e piɛ bɔɔ nɛ nyɛ maa na mi,’ nɛ jeha nɛ ɔ hu; ‘I yaa Tsɛ ɔ ngɔ’?

¹⁸ Lɔ ɔ he ɔ a ke: “Mɛni ji nɔ́ nɛ e ngɛ dee nɛ ɔ: ‘E piɛ bɔɔ’? Wa li nɔ́ nɛ e ngɛ dee nɛ ɔ.”

¹⁹ Jeha nɛ ɔ Yesu na kaa a ngɛ hlae nɛ a bi lɛ, nɛ e de mɛ ke: “Nɛ i ke e piɛ bɔɔ nɛ nyɛ be mi nae hu, nɛ jeha nɛ ɔ hu e piɛ bɔɔ nɛ nyɛ maa na mi ɔ, lɔ ɔ nyɛ ngɛ nyɛ he bie nɛ ɔ?

²⁰ I ngɛ nyɛ dee anɔkuale mi ke: Nyɛɛ lɛɛ nyɛ ma fo nɛ nyɛ maa wo ya, se je ɔ ma nya. Nyɛ lɛɛ nyɛ maa ye kɔmɔ, se nyɛ kɔmɔ yemi ɔ ma plɛ bua jɔmi.

²¹ Ke yo nu kɔɔmi ɔ, e haoɔ, ejakaa e ngmlɛfia a su. Se benɛ e fɔ bi ɔ se ɔ, e kai we dengme ɔ hu ngɛ bua jɔmi nɛ e naa kaa e fɔ nɔmlɔ kɛ ba je ɔ mi ɔ he.

²² Lɔ ɔ he ɔ nyɛ hu, jeha nɛ ɔ nyɛ ngɛ kɔmɔ yee mohu, se ma na nyɛ ekohu, nɛ nyɛ tsui maa nɔ nyɛ mi, nɛ nyɛ bua jɔmi ɔ, na ko be kpɔe ngɛ nyɛ dɛ.

²³ “Jamɛ a ligbi ɔ nɔ ɔ, nyɛ be mi nɔ́ ko nɔ́ bie. I ngɛ nyɛ dee anɔkuale mi ke: Nɔ́ tsuaa nɔ́ he pɛɛ nɛ nyɛ ma kpa Tsɛ ɔ ngɛ ye biɛ mi ɔ, e ma ha nyɛ.

²⁴ Kɛ ba si amlɔ nɛ ɔ ɔ, nyɛ kpa we nɔ́ ko he pɛɛ ngɛ ye biɛ mi; nyɛ kpa pɛɛ nɛ nyɛ ma na, konɛ nyɛ bua jɔmi ɔ nɛ hyi.”

Je ɔ nɔ kunimiyemi

²⁵ “Ni nɛ ɔmɛ ɔ, abɛhi a mi i kɛ nyɛ ngɛ tue ngɛ ɔ nɛ; se be ma nɛ i kɛ nyɛ be munyu tue ngɛ abɛhi a mi hu, se mohu paa ma jaje tsɛ ɔ he sane ngɔ tsɔɔ nyɛ.

²⁶ Jamɛ a ligbi ɔ nɔ ɔ, nyɛ ma kpa pɛɛ ngɛ ye biɛ mi, se i de we nyɛ ke imi lɛ ma bi Tsɛ ɔ ha nyɛ,

²⁷ ejakaa Tsɛ ɔ nitsɛ suɔ nyɛ, mɛni he je ɔ, nyɛ hu nyɛ suɔ mi, nɛ nyɛ he ye kaa Mawu ngɔ i je.

²⁸ Tsɛ ɔ ngɔ i je kɛ ba je ɔ mi, jeha nɛ ɔ hu, i ngɛ je ɔ mi jee kɛ yaa Tsɛ ɔ ngɔ.”

²⁹ Ekaseli ɔmɛ de lɛ ke: “Oʼɛ, jeha nɛ ɔ o tu munyu faii nɛ o tu we munyu ngɛ abɛhi a mi.

³⁰ Jeha nɛ ɔ wa kɔ se kaa o le nihi tsuo nɛ e hia we kaa nɔ ko nɛ bi mo sane ko. Enɛ ɔ waa kɛ heɔ yeɔ kaa Mawu ngɔ o je.”

³¹ Yesu he nɔ nɛ e ke: “Jeha nɛ ɔ nyɛ ngɛ hee ngɛ yee lo?

³² oʼɛ, ngmlɛfia a ma, nɛ e su po, nɛ nyɛ maa gbɛ fia nɛ nɔ tsuaa nɔ maa ngɔ e blɔ, nɛ nyɛ maa je ye nɔ kake he; se pi ye nɔ kake ʼi, ejakaa Tsɛ ɔ kɛ mi ngɛ.

³³ I de nyɛ ni nɛ ɔmɛ, konɛ nyɛɛ wo nyɛ bua ngɛ ye mi. Je nɛ ɔ mi ɔ he hiami nyɛ ma na, se kɛ ɔ, nyɛ tsui nɛ nɔ nyɛ mi. I ye je ɔ nɔ kunimi!”