Yohane 14 - Somi He Ɔ

Yesu ji blɔ nɛ a kɛ yaa Tsɛ ɔ ngɔ

¹ “Nyɛ ko ye nyɛ tsui; nyɛ he Mawu nɔ nyɛɛ ye, nɛ imi hu nyɛ he ye nɔ nyɛɛ ye.

² Sihi hehi fuu ngɛ Tsaatsɛ we ɔ; ke pi ja jinɛ, i de nyɛ momo; ejakaa i yaa nɛ ma ya dla blɔ he ngɔ to nyɛ.

³ Nɛ ke i ya nɛ i ya dla blɔ he ngɔ to nyɛ ɔ, ma ba ekohu nɛ ma ba ngɔ nyɛ kɛ ya he nɛ imi nitsɛ i ngɛ ɔ, konɛ he nɛ i ngɛ ɔ, nyɛ hu nyɛɛ hi lejɛ ɔ.

⁴ Nɛ he nɛ i yaa a, nyɛ le, nɛ blɔ ɔ hu, nyɛ le.”

⁵ Toma de lɛ ke: “Mawetsɛ, wa li he nɛ o yaa, nɛ kɛ wa maa pee kɛɛ nɛ wa maa le blɔ ɔ?”

⁶ Yesu de lɛ ke: “Ami ji blɔ ɔ kɛ anɔkuale ɔ kɛ wami ɔ; nɔ ko bɛ́ Tsɛ ɔ ngɔ, kaa ja e gu ye nɔ.

⁷ Kaa nyɛ le mi jinɛ, nyɛ ko le Tsaatsɛ hulɔ; nɛ kɛ je mwɔnɛ kɛ yaa nɛ ɔ, nyɛ le lɛ, ejakaa nyɛ na lɛ.”

⁸ Filipo de lɛ ke: “Nyɔmtsɛ, tsɔɔ wɔ Tsɛ ɔ, nɛ lɔ ɔ hiɛ ha wɔ.”

⁹ Yesu de lɛ ke: “Pi mwɔnɛ nɛ i kɛ nyɛ ngɛ nɛ ɔ, o li mi lolo lo, Filipo? Nɔ nɛ na mi ɔ, e na Tsɛ ɔ, nɛ kɛ pee kɛɛ nɛ o deɔ ke: ‘Tsɔɔ wɔ Tsɛ ɔ?’

¹⁰ Anɛ o he we yi kaa i ngɛ Tsɛ ɔ mi nɛ Tsɛ ɔ hu ngɛ ye mi lo? Munyu nɛ i kɛ nyɛ tuɔ, pi imi nitsɛ ye yi mi nɛ i toɔ nɛ i deɔ; se Tsɛ ɔ nɛ hii ye mi ɔ, lɛ lɛ e tsuɔ ni tsumi ɔmɛ ɔ nɛ.

¹¹ Nyɛ he mi nyɛɛ ye kaa i ngɛ Tsɛ ɔ mi nɛ Tsɛ ɔ hu ngɛ ye mi; se ke pi ja a, nyɛ he mi nyɛɛ ye ngɛ jamɛ a ni tsumi ɔmɛ nitsɛmɛ a he.

¹² Anɔkuale mi, i ngɛ nyɛ dee ke: Nɔ nɛ heɔ ye nɔ yeɔ ɔ, ni tsumihi nɛ i tsuɔ ɔ, lɛ hu e ma tsu, nɛ e ma tsu nihi nɛ pe kɔlɔ ɔmɛ tete, ejakaa i yaa Tsɛ ɔ ngɔ.

¹³ Nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, lɔ ɔ ma pee, konɛ Tsɛ ɔ hɛ mi nɛ ba nyami ngɛ Bi ɔ mi.

¹⁴ Ke nyɛ kpa nɔ ko he pɛɛ ngɛ ye biɛ mi ɔ, ma pee.”

Mumi Klɔuklɔu ɔ he siwomi

¹⁵ “Ke nyɛ suɔ mi ɔ, nyɛ maa ye ye kita amɛ a nɔ.

¹⁶ Nɛ imi lɛɛ ma bi Tsɛ ɔ, nɛ e ma ha nyɛ Hepiɛlɔ kpa, konɛ e kɛ nyɛ nɛ hi si kɛ ya neneene;

¹⁷ anɔkuale mumi ɔ nɛ je ɔ nyɛ we lɛ nɛ e ngɔ ɔ, mɛni he je ɔ, e nɛ́ lɛ, nɛ pohu e li lɛ; se nyɛɛ lɛɛ nyɛ le lɛ, ejakaa e kɛ nyɛ lɛ ngɛ, nɛ e maa hi nyɛ mi.

¹⁸ “I be nyɛ sie ahusa, i ma nyɛ ngɔ.

¹⁹ E piɛ bɔɔ kɛkɛ nɛ je ɔ be mi nae hu; se nyɛ lɛɛ nyɛɛ ngɛ mi nae, ejakaa ye hɛ ngɛ, nɛ nyɛ hu nyɛ hɛ maa hi ngmengmle.

²⁰ Jamɛ a ligbi ɔ nɔ ɔ, nyɛ nitsɛmɛ nyɛ maa le kaa i ngɛ ye tsɛ mi nɛ nyɛ hu nyɛ ngɛ ye mi nɛ imi hu i ngɛ nyɛ mi.

²¹ “Nɔ nɛ ngɔɔ ye kita amɛ nɛ e yeɔ nɔ ɔ, lɛ ji nɔ nɛ suɔ mi; nɛ nɔ nɛ suɔ mi ɔ, Tsaatsɛ maa suɔ lɛ, nɛ imi hu ma suɔ lɛ, nɛ ma je ye he si ngɔ tsɔɔ lɛ.”

²² Yuda, pi Iskariot ɔ, bi lɛ ke “Nyɔmtsɛ, mɛni ba he je nɛ wɔ kɛkɛ o ma je o he si ngɔ tsɔɔ nɛ o be jee ngɔ tsɔɔ je ɔ?”

²³ Yesu he nɔ nɛ e de lɛ ke: “Ke nɔ ko suɔ mi ɔ, e maa ye ye munyu ɔ nɔ, nɛ Tsaatsɛ maa suɔ lɛ, nɛ wa maa ba e ngɔ, nɛ waa kɛ e ngɔ maa pee wa sihi he.

²⁴ Nɔ nɛ sume mi ɔ, e yi ye munyu nɔ. Nɛ munyu nɛ nyɛ ngɛ nue ɔ, pi ye nɔ, se mohu Tsɛ nɛ tsɔ mi ɔ nɔ ʼi.

²⁵ “I de nyɛ ni nɛ ɔmɛ be mi nɛ i kɛ nyɛ ngɛ nɛ ɔ.

²⁶ Se Hepiɛlɔ ɔ nɛ ji Mumi Klɔuklɔu ɔ, nɔ nɛ Tsɛ ɔ maa tsɔ ngɛ ye biɛ mi ɔ, lɛ e maa tsɔɔ nyɛ nihi kulaa, nɛ e ma kai nyɛ nihi tsuo nɛ i de nyɛ ɔ.

²⁷ “Hejɔmi i ngɛ sie ha nyɛ; hejɔmi nɛ ji ye nɔ ɔ i kɛ ngɛ nyɛ hae, pi bɔ nɛ je ɔ haa a nɛ i kɛ ngɛ nyɛ hae nɛ ɔ. Nyɛ ko ye nyɛ tsui, nɛ jeha nɛ ɔ hu nyɛ ko ye gbeye.

²⁸ Nyɛ nu kaa i de nyɛ ke: ‘I yaa, nɛ ma ba nyɛ ngɔ.’ Nyɛ suɔ mi jinɛ nyɛ ma na bua jɔmi kaa i yaa Tsɛ ɔ ngɔ, ejakaa Tsaatsɛ kle pe mi.

²⁹ Nɛ jeha nɛ ɔ, i de nyɛ loko e ba mi, konɛ ke e ba mi ɔ, nɛ nyɛ he nyɛɛ ye.

³⁰ I kɛ nyɛ be munyu tue fuu hu, ejakaa je ɔ mi matsɛ ɔ ma, se e be he wami ko nyɛ nyɛ nɔ.

³¹ I peɔ bɔ nɛ Tsɛ ɔ fa mi ɔ konɛ je ɔ nɛ na le kaa i suɔ Tsɛ ɔ. Nyɛɛ te si, nyɛɛ ba waa je hiɛ ɔ!”