Yohane 12 - Somi He Ɔ

A pɔ Yesu nu ngɛ Betania

¹ Jeha nɛ ɔ benɛ e piɛ ligbi ekpa nɛ a maa ye Hetsɔmi ɔ, Yesu ba Betania, he nɛ Lazaro, nɔ nɛ gbo nɛ e tle lɛ si kɛ je gbeje ɔ ngɛ ɔ.

² Kɛkɛ nɛ a ngmɛ lɛ okplɔɔ ngɛ lejɛ ɔ, nɛ Marta sɔmɔ; se Lazaro piɛ nihi nɛ kɛ lɛ hii si ngɛ okplɔɔ ɔ he ɔmɛ a he.

³ Kɛkɛ nɛ Maria ngɔ nardo nu ngmingmiingmi nɛ he jua wa saminya nɛ ngmɛɛ sɛni tɛ kake, nɛ e kɛ ba kpa Yesu nanehi a he, nɛ e kɛ e yi bwɔmi tsu e nane ɔmɛ a he; nɛ nu ɔ he via kpe we ɔ mi tsuo.

⁴ Kɛkɛ nɛ Yuda Iskariot, e kaseli ɔmɛ a ti nɔ kake nɛ maa tsɔɔ e se blɔ ɔ de ke:

⁵ “Mɛni he je a jua we nu nɛ ɔ cedi lafa etɛ nɛ a kɛ ha ohiafohi?”

⁶ Se enɛ ɔ nɛ e de nɛ ɔ, pi ohiafo ɔmɛ a he nɔ́ nɛ ngɛ lɛ dɔe he je, se mohu juɔ ji lɛ, nɛ lɛ lɛ e toɔ sika kpɛɛ ɔ, nɛ e juɔ nɔ́ nɛ a ngɔ woɔ mi ɔ eko.

⁷ Lɔ ɔ he ɔ, Yesu ke: “Koo doo e nya; e pee enɛ ɔ ngɔ to ye pumi ligbi ɔ.

⁸ Ejakaa ohiafo ɔmɛ ɔ, nyɛɛ kɛ mɛ ngɛ daa, se imi lɛɛ, pi daa nɛ nyɛɛ kɛ mi ngɛ.”

A so Lazaro yi nɔ

⁹ Jeha nɛ ɔ, Yudafo ɔmɛ a ti nihi fuu na le kaa Yesu ngɛ lejɛ ɔ, nɛ a ba, pi ngɛ Yesu kɛkɛ he, se mohu konɛ a na Lazaro nɔ nɛ e tle si kɛ je gbeje ɔ hulɔ.

¹⁰ Nɛ osɔfo nikɔtɔma amɛ muɔ a yi mi kpɔ kaa a maa gbe Lazaro hulɔ.

¹¹ Ejakaa e he nɛ Yudafo ɔmɛ a ti nihi fuu ya nɛ a ya he Yesu nɔ ye ɔ nɛ.

Yesu Yerusalem sɛmi

¹² E nɔ je na a, nihi babauu nɛ ba nyami ligbi ɔ yemi ɔ, benɛ a nu kaa Yesu ma Yerusalem ɔ,

¹³ a kukuɔ tã ba, nɛ a je kpo ya kpee lɛ, nɛ a wɔ lele ke: “Hosiana! A gbaa nɔ nɛ ma ngɛ Nyɔmtsɛ ɔ biɛ mi ɔ, Israel matsɛ ɔ!”

¹⁴ Se Yesu na teji bi ko nɛ e kuɔ hi nɔ, kaa bɔ nɛ a ngma a ke:

¹⁵ “Koo ye gbeye, Zion bi yo; Oʼɛ, o matsɛ ɔ ma, E hi teji bi nɔ.”

¹⁶ Se e kaseli ɔmɛ nɛ́ ni nɛ ɔmɛ a sisi mla mi, se benɛ a wo Yesu hɛ mi nyami se ɔ loko a kai kaa a ngma ni nɛ ɔmɛ ngɛ e he, nɛ lɔ ɔ a pee ha lɛ ɔ nɛ.

¹⁷ Jeha nɛ ɔ asafo ɔ nɛ kɛ lɛ ngɛ be mi nɛ e tsɛ Lazaro kɛ je yɔkɔ ɔ mi nɛ e tle lɛ si kɛ je gbeje ɔ ye he odase.

¹⁸ Enɛ ɔ he je hulɔ nɛ asafo ɔ ya kpee lɛ ɔ nɛ, mɛni he je ɔ, a nu kaa e pee nyakpɛ nɔ́ nɛ ɔ.

¹⁹ Lɔ ɔ he ɔ Farisifo ɔmɛ de ngɛ a kpɛti ke: “Tse nyɛ na kaa nyɛ nyɛ we nɔ́ ko nɛ nyɛɛ pee fɛɛ; oʼɛ, je ɔ iɛ hia hɛ nyɛɛ e se ɔ nɛ.”

Helabi komɛ ba hla Yesu

²⁰ Helabi komɛ ngɛ nihi nɛ ba nɛ a ba ja Mawu ngɛ nyami ligbi ɔ nɔ ɔmɛ a kpɛti.

²¹ Ni nɛ ɔmɛ ba Filipo nɛ je Betsaida ngɛ Galilea a ngɔ, nɛ a ba de lɛ ke: “Nyɔmtsɛ, wa ngɛ hlae kaa waa na Yesu.”

²² Filipo ba nɛ e ba de Andrea, nɛ Andrea kɛ Filipo tsuo ba de Yesu.

²³ Nɛ Yesu he nɔ nɛ e ke: “Ngmlɛfia a nɛ a maa wo Nɔmlɔ Bi ɔ hɛ mi nyam ɔ su.

²⁴ Anɔkuale mi i ngɛ nyɛ dee ke: Ke ngma ngu nɔɛ zugba nɛ e gbo ɔ, lɛɛ bɔ nɛ e ngɛ ɔ nɔuu e maa hi; se ke e gbo ɔ, e woɔ yiblii fuu.

²⁵ Nɔ nɛ suɔ e wami ɔ, e laa lɛ, se nɔ nɛ nyɛɛ e wami ngɛ je nɛ ɔ mi ɔ, e maa to lɛ kɛ maa ya neneene wami mi.

²⁶ Ke nɔ ko ngɛ mi sɔmɔe ɔ, e nyɛɛ ye se, nɛ he nɛ i ngɛ ɔ, lejɛ ɔ ye sɔmɔlɔ ɔ hu maa hi. Ke nɔ ko ngɛ mi sɔmɔe ɔ, Tsaatsɛ maa wo lɛ.”

Yesu tu e gbenɔ he munyu

²⁷ “Jeha nɛ ɔ ye klaa ngɛ haoe, nɛ mɛni ma de? Tsaatsɛ, he mi ngɛ ngmlɛfia nɛ ɔ mi! Pohu enɛ ɔ he nɔuu i ba ngɛ a ngmlɛfia nɛ ɔ mi.

²⁸ Tsaatsɛ, wo o biɛ ɔ hɛ mi nyami!” Kɛkɛ nɛ gbi ko je hiɔwe de ke: “I na wo e hɛ mi nyami momo, nɛ ma kpale wo e hɛ mi nyami ekohu.”

²⁹ Kɛkɛ nɛ nihi nɛ daa si ngɛ lejɛ ɔ nɛ a nu ɔ de ke: “Hiɔwe si;” ni komɛ hu ke: “Hiɔwe bɔfo ko kɛ lɛ tu munyu.”

³⁰ Yesu he nɔ nɛ e ke: “Tsa pi ye he nɛ gbi nɛ ɔ ba ngɛ, se nyɛ mohu nyɛ he.

³¹ Jeha nɛ ɔ je nɛ ɔ mi kojomi ɔ su; kpaako a maa hia je nɛ ɔ mi matsɛ ɔ ngɔ sake ngɔ fɔ he.

³² Nɛ imi lɛɛ, ke a wo ye nɔ kɛ je zugba a nɔ ɔ, ma gbla nihi tsuo kɛ maa ba ye ngɔ.”

³³ Se enɛ ɔ ɔ, e de kɛ tsɔɔ nɔ gbenɔ nɛ e ma gbo ɔ.

³⁴ Asafo ɔ he nɔ ke: “Wɔɔ lɛɛ wa nu ngɛ Mlaa a mi ke Kristo ɔ hii si kɛ yaa neneene; nɛ kɛ pee kɛɛ nɛ moo lɛɛ o deɔ ke: ‘Ja a wo Nɔmlɔ Bi ɔ nɔ ɔ?’ Mɛnɔ ji kikɛmɛ a Nɔmlɔ Bi nɛ ɔ?”

³⁵ Yesu de mɛ ke: “Be kpiti kɛkɛ e piɛ ha la a ngɛ nyɛ kpɛti. Be abɔ nɛ nyɛ ngɛ la a nɛ ɔ ɔ, nyɛɛ nyɛɛ, konɛ diblii ko ba na nyɛ; se nɔ nɛ nyɛɛ diblii mli ɔ, e li he nɛ e yaa.

³⁶ Be abɔ nɛ nyɛ ngɛ la a nɛ ɔ ɔ, nyɛ he la a nɔ ngɔ ye, konɛ nyɛ plɛ la bimɛ.” Yesu de ni nɛ ɔmɛ, nɛ e ho nɛ e ya laa e he.

Yudafo ɔmɛ he we yi

³⁷ E ngɛ mi kaa Yesu pee nyakpɛ ni nguahi ngɛ a hɛ mi, se kɛ ɔ a he we e nɔ yi;

³⁸ konɛ gbalɔ Yesaia munyu nɛ e tu ɔ nɛ na ba mi ke: “Nyɔmtsɛ, mɛnɔ he wa sane ɔ ye, Nɛ mɛnɔ a je Nyɔmtsɛ ɔ nine ɔ kpo ngɔ tsɔɔ?”

³⁹ Enɛ ɔ he je nɛ a nyɛ we nɛ a he ye ɔ nɛ, ejakaa Yesaia kpale de ekohu ke:

⁴⁰ “E yu a hɛngmɛ, Nɛ e wlua a tsui; Konɛ a ko na kɛ a hɛngmɛ, Nɛ a na nya kɛ a tsui, Nɛ a kpale a se, nɛ i tsa mɛ.”

⁴¹ Ni nɛ ɔmɛ Yesaia de, ejakaa e na e hɛ mi nyami ɔ, nɛ e tu he munyu.

⁴² Se kɛ ɔ, nikɔtɔma amɛ tete a ti nihi fuu he e nɔ ye, se Farisifo ɔmɛ a he ɔ, a ja je we paa, konɛ a ko fie mɛ kɛ je kpe he ɔ;

⁴³ ejakaa a suɔ nimli a hɛ mi nyami pe Mawu nɔ́.

Yesu munyu kojoɔ

⁴⁴ Yesu de boboobo ke: “Nɔ nɛ heɔ ye nɔ yeɔ ɔ, pi ye nɔ nɛ e heɔ yeɔ, se mohu nɔ nɛ tsɔ mi ɔ.

⁴⁵ Nɛ nɔ nɛ naa mi ɔ naa nɔ nɛ tsɔ mi ɔ.

⁴⁶ Imi lɛɛ i ba je ɔ mi kaa la, konɛ nɔ tsuaa nɔ nɛ heɔ ye nɔ yeɔ ɔ, e ko hi diblii ɔ mi.

⁴⁷ Nɛ ke nɔ ko nu ye munyu nɛ e yi nɔ ɔ, tsa pi imi nɛ ma kojo lɛ, ejakaa i bɛ nɛ ma ba kojo je ɔ, se mohu i ba nɛ ma ba he je ɔ yi wami.

⁴⁸ Nɔ nɛ kuaa mi nɛ e pɛtɛ we ye munyu ɔ he ɔ, e ngɛ nɔ ko nɛ kojo lɛ; munyu nɛ i tu ɔ, kɔlɔ ɔ nɔuu maa kojo lɛ ngɛ nyagbe ligbi ɔ nɔ.

⁴⁹ Ejakaa imi lɛɛ i to we imi nitsɛ ye yi mi i tu we munyu; se Tsɛ nɛ tsɔ mi ɔ, lɛ mohu e wo mi kita, nɔ́ nɛ ma de kɛ nɔ́ nɛ ma tu.

⁵⁰ Nɛ i le kaa e kita a neneene wami ʼi; lɔ ɔ he ɔ nɔ́ tsuaa nɔ́ nɛ i ngɛ dee ɔ, bɔ nɛ Tsɛ ɔ de mi ɔ, ja i deɔ.”