Yohane 11 - Somi He Ɔ

Lazaro gbenɔ

¹ Nyumu ko nɛ a tsɛɛ lɛ Lazaro, nɛ je Betania, Maria kɛ e nyɛmi Martamɛ a kɔpe ɔ ngɛ gboe.

² (Maria nɛ ngɔ nu kɛ e he via kɛ kpa Nyɔmtsɛ ɔ nɛ e kɛ e yi bwɔmi tsu e nan ehe ɔ nyɛmi Lazaro lɛ ngɛ gboe nɛ ɔ ne.)

³ Lɔ ɔ he ɔ, e nyɛmi yi ɔmɛ tsɔ kɛ ba Yesu ngɔ ba de lɛ ke: “Mawetsɛ, oʼɛ, nɔ nɛ o suɔ ɔ ngɛ gboe.”

⁴ Se benɛ Yesu nu enɛ ɔ ɔ, e ke: “Kikɛmɛ a hiɔ nɛ ɔ pi gbenɔ hiɔ, se mohu Mawu hɛ mi nyami ɔ he je, benɛ pee nɛ a wo Mawu Bi ɔ hɛ mi nyami.”

⁵ Yesu suɔ Maria kɛ e nyɛmi yo ɔ kɛ Lazaro tsuo.

⁶ Benɛ e nu e hiɔ ɔ he ɔ, e hi si ngɛ he nɛ e ngɛ ɔ ligbi enyɔ.

⁷ Nɛ lɔ ɔ se ɔ, e de e kaseli ɔmɛ ke: “Nyɛ ha waa ya Yudea ekohu.”

⁸ Kaseli ɔmɛ de lɛ ke: “Rabi, e sui be ko nɛ Yudafo ɔmɛ ngɛ hlae nɛ a fia mo tɛ, nɛ o yaa lejɛ ɔ ekohu nɛ ɔ?”

⁹ Yesu he nɔ ke: “Anɛ pi ngmlɛfia nyɔngma kɛ enyɔ nɛ ngɛ ligbi kake mi lo? Ke nɔ ko nyɛɛ piani ɔ, e tɛ we si, mɛni he je ɔ, e naa je nɛ ɔ mi la a.

¹⁰ Se ke nɔ ko nyɛɛ nyɔ mi ɔ e tɛɔ si, ejakaa la be e mi.”

¹¹ Yesu tu munyu nɛ ɔmɛ, nɛ lɔ ɔ se ɔ e de mɛ ke: “Wa huɛ Lazaro hwɔ mahɛ; se i yaa nɛ ma ya tsɛ̃ɛ lɛ ngɛ mahɛ ɔ mi.”

¹² Kɛkɛ nɛ e kaseli ɔmɛ ke: “Nyɔmtsɛ, ke mahɛ e ngɛ hwɔeɔ, lɛɛ e ma na he wami mɔ.”

¹³ Se e gbenɔ he munyu Yesu tu ɔ nɛ; se mɛɛ lɛɛ a susu kaa mahɛ nitsɛ he munyu e ngɛ tue ɔ nɛ.

¹⁴ Jeha nɛ ɔ Yesu de mɛ paa ke: “Lazaro gbo;

¹⁵ nɛ nyɛ he ɔ e ngɔ ye nya kaa i be lejɛ ɔ, benɛ pee nɛ nyɛ he ye. Nyɛ ha waa ya e ngɔ.”

¹⁶ Kɛkɛ nɛ Toma, nɔ nɛ a tsɛɛ Didimo ɔ, de e nyamimɛ kaseli ɔmɛ ke: “Nyɛ ha wɔ hu waa ya nɛ waa kɛ lɛ ya gbo.”

Yesu ji sitemi ɔ kɛ wami ɔ

¹⁷ Jeha nɛ ɔ benɛ Yesu su lejɛ ɔ, e ba na kaa Lazaro ye ligbi eywiɛ momo ngɛ muɔ ɔ mi.

¹⁸ Betania kɛ Yerusalem kpɛti kɛmi maa pee si tomi nya enyɔ.

¹⁹ Nɛ Yudafo ɔmɛ a ti nihi fuu ba Marta kɛ Mariamɛ a ngɔ konɛ a ba ye mɛ kɔmɔ ngɛ a nyɛmi nyumu ɔ gbenɔ ɔ he.

²⁰ Kɛkɛ nɛ, benɛ Marta nu kaa Yesu ma a, e te si nɛ e kɛ lɛ ya kpe; se Maria lɛɛ e hii si ngɛ we ɔ mi.

²¹ Kɛkɛ nɛ Marta de Yesu ke: “Mawetsɛ, kaa o ngɛ hiɛ ɔ jinɛ, mami ɔ ko gbo we.

²² Se jeha nɛ hu ɔ, i le kaa nɔ́ tsuaa nɔ́ nɛ o ma bi Mawu ɔ, e ma ha mo.”

²³ Yesu de lɛ ke: “O nyɛmi nyumu ɔ maa te si.”

²⁴ Marta de lɛ ke: “I le kaa e maa te si ngɛ ni gbogboehi a si temi ɔ mi ngɛ nyagbe ligbi ɔ nɔ.”

²⁵ Yesu de lɛ ke: “Imi ji sitemi ɔ kɛ wami ɔ nɛ; nɔ nɛ heɔ ye nɔ yeɔ ɔ, ke e gbo tete po ɔ, e hɛ maa hi ngmengmle,

²⁶ nɛ nɔ tsuaa nɔ nɛ hɛ ngɛ nɛ e heɔ ye nɔ yeɔ ɔ, e be gboe gblegbleegblee. O heɔ enɛ ɔ yeɔ lo?”

²⁷ Marta de lɛ ke: “Ee, Nyɔmtsɛ, i heɔ yeɔ kaa mo ji Kristo, Mawu Bi nɛ ma je ɔ mi ɔ nɛ.”

Yesu fo ya

²⁸ Nɛ benɛ Marta de lɛ kikɛ ɔ, e pue nɔ kɛ ho, nɛ e ya tsɛ e nyɛmi Maria a zaa, nɛ e de lɛ ke: “Nyɔmtsɛ ɔ ba, nɛ e ngɛ mo tsɛe.”

²⁹ Benɛ Maria nu ɔ, e te si oya nɛ e ba e ngɔ.

³⁰ Se Yesu na we nɛ e su kɔpe ɔ, se e ngɛ he nɛ Marta kɛ lɛ kpe ngɛ ɔ kɛ mwɔɔ.

³¹ Kɛkɛ ɔ, benɛ Yudafo ɔmɛ nɛ kɛ lɛ ngɛ we ɔ mi nɛ a ngɛ lɛ kɔmɔ yee ɔ na kaa Maria sa e he kɛ je kpo ɔ, a fie e se, a susu kaa be nɛ ɔ mi piɔ, e yaa yɔkɔ ɔ nɔ nɛ e ya fo ya ngɛ lejɛ ɔ.

³² Benɛ Maria ba he nɛ Yesu ngɛ ɔ nɛ e na lɛ ɔ, e nɔ e nane nya nɛ e de lɛ ke: “Nyɔmtsɛ, kaa o ngɛ hiɛ ɔ jinɛ, mami ɔ ko gbo we.”

³³ Jeha nɛ ɔ benɛ Yesu na lɛ kaa e ngɛ ya foe kɛ Yudafo ɔmɛ hu nɛ kɛ lɛ ba a, kaa mɛ hu a ngɛ ya foe ɔ, e wo bua ngɛ e mumi mi nɛ e hao.

³⁴ Nɛ e bi ke: “Jije nyɛ to lɛ ngɛ?” A de lɛ ke: “Nyɔmtsɛ, ba nɛ o ba hyɛ.”

³⁵ Nɛ Yesu fo ya.

³⁶ Kɛkɛ nɛ Yudafo ɔmɛ ke: “Hyɛ bɔ nɛ e suɔ lɛ ha!”

³⁷ Se a ti ni komɛ ke: “Nyumu nɛ ɔ nɛ bli hɛ yuyuilɔ ɔ hengmɛ ɔ, anɛ e be nɔ́ ko nyɛe maa pee konɛ nyumu nɛ ɔ ko gbo lo?”

Yesu tle Lazaro si

³⁸ Kɛkɛ nɛ Yesu kpale wo bua ngɛ e mi ekohu, nɛ e ya yɔkɔ ɔ nɔ; se tɛ puɔ ʼi, nɛ tɛ tsi nya.

³⁹ Yesu ke: “Nyɛ je tɛ ɔ.” Marta, nɔ nɛ gbo ɔ nyɛmi yo ɔ, de lɛ ke: “Nyɔmtsɛ, be nɛ ɔ mi ɔ, nɔ ɔ puɛ, ejakaa e ye ligbi eywiɛ.”

⁴⁰ Yesu de lɛ ke: “Anɛ i de we mo ke ke o he ye ɔ, o maa na Mawu hɛ mi nyami ɔ lo?”

⁴¹ Kɛkɛ nɛ a je tɛ ɔ ngɛ he nɛ nɔ gbogboe ɔ fɔɔ si ngɛ ɔ. Nɛ Yesu wo e hɛ nɔ nɛ e hyɛ hiɔwe, nɛ e ke: “Tsaatsɛ, i naa mo si kaa o bu mi tue.

⁴² Se imi lɛɛ i le kaa o buɔ mi tue; se asafo ɔ nɛ daa si ɔ he nɛ i ngɛ dee, konɛ a he ye kaa mo lɛ o tsɔ mi.”

⁴³ Nɛ benɛ e de kikɛ ɔ, e tsɛ lɛ kɛ gbi wawɛɛ ke: “Lazaro leee, jee kpo!”

⁴⁴ Nɛ nɔ gbogboe ɔ je kpo, bo nɛ a kɛ pu lɛ ɔ blaa e nane, nɛ duku fi e hɛ mi. Yesu de mɛ ke: “Nyɛɛ pɛne lɛ nɛ nyɛ ha e ya.”

A so Yesu yi nɔ

⁴⁵ Lɔ ɔ he ɔ, Yudafo ɔmɛ nɛ ba Maria ngɔ ɔ a ti nihi fuu he Yesu nɔ ye, benɛ a na nihi nɛ e pee ɔ.

⁴⁶ Se a ti ni komɛ pue nɔ kɛ ho Farisifo ɔmɛ a ngɔ ya nɛ a ya sɛɛ ha mɛ nihi nɛ Yesu pee ɔ.

⁴⁷ Lɔ ɔ he ɔ, osɔfo nikɔtɔma amɛ kɛ Farisifo ɔmɛ tsɛ kpe, nɛ a ke: “Kɛ wa ngɛ pee kɛɛ? Nyumu nɛ ɔ ngɛ okadi slɔɔtohi fuu pee.

⁴⁸ Ke wa ngmɛ lɛ blɔ kikɛ ɔ, ni ɔmɛ tsuo ma he e nɔ maa ye; nɛ Romabi ɔmɛ maa ba nɛ a ma ba kpɔ wa sɔlemi we ɔ kɛ wa zugba a kulaa.”

⁴⁹ Se a ti nɔ kake, Kaifa nɛ ngɛ osɔfo nɔkɔtɔma yee ngɛ jamɛ a jeha a mi ɔ, de mɛ ke: “Nyɛ li nɔ ko kulaa,

⁵⁰ nɛ pohu nyɛ susuu we kaa e hi wa wɔ kaa nɔ kake nɛ gbo ngɛ ma a nane mi, pe nɔ́ nɛ ma a tsuo hɛ mi ma kpata.”

⁵¹ Se enɛ ɔ ɔ, pi lɛ nitsɛ nɛ e to e yi mi nɛ e de; se mohu osɔfo nɔkɔtɔma nɛ ji lɛ ngɛ jamɛ jeha a nɔ ɔ he je; pe e gba kaa Yesu ma gbo ngɛ ma a nane mi;

⁵² nɛ pi ngɛ ma a kɛkɛ nane mi, se benɛ pee nɛ e bua Mawu bimɛ nɛ gbɛ fia a hu nya ngɔ pee kake.

⁵³ Nɛ kɛ je lɛ ligbi ɔ nɔ ɔ, a to a yi mi ke a maa gbe; lɛ.

⁵⁴ Lɔ ɔ he ɔ Yesu ji paa nɛ e nyɛɛ ngɛ Yudafo ɔmɛ a kpɛti hu, se e je lejɛ ɔ kɛ ho zugba ko nɛ ngɛ nga a nya a nɔ ya, ngɛ ma ko nɛ a tsɛɛ lɛ Efraim ɔ mi, nɛ e kɛ e kaseli ɔmɛ ya hi lejɛ ɔ.

⁵⁵ Jeha nɛ ɔ Yudafo ɔmɛ a Hetsɔmi ɔ su ta. Nɛ nihi babauu je zugba a tsuo nɔ kɛ ho Yerusalem ya, konɛ a ya tsukɔ a he loko Hetsɔmi ɔ nɛ su.

⁵⁶ Kɛkɛ nɛ a bɔni Yesu hlami, nɛ benɛ a daa si ngɛ sɔlemi we ɔ, a de a he ke: “Kɛ nyɛ susuu kɛɛ; anɛ e be Nyami ligbi ɔ bae?”

⁵⁷ Se osɔfo nikɔtɔma amɛ kɛ Farisifo ɔmɛ wo si ke, ke nɔ ko le he nɛ e ngɛ ɔ, e ba wo a tue nɔ, konɛ a ya nu lɛ.