Yakobo 5 - Somi He Ɔ

Kɔkɔbɔmi ha niatsɛmɛ

¹ Jehanɛ, nyɛ niatsɛmɛ, nyɛɛ bu tue, nyɛ fo ya nɛ nyɛ wɔ lele ngɛ dengmehi nɛ maa ba nyɛ nɔ ɔmɛ a he!

² Nyɛ ni babauu ɔ sa, nɛ nyɛ tade ɔmɛ hu wɔyewɔyehi ye.

³ Nyɛ sika tsu kɛ nyɛ sika hiɔ ɔmɛ nɔ kana, nɛ a he kana amɛ maa ye nyɛ he odase, nɛ e maa sã nyɛ he womi mi kaa la. Nyɛ bua juetli nya ngɔ to ngɛ nyagbe ligbi ɔmɛ a mi.

⁴ Oʼɛ, ni tsuli nɛ kpa nyɛ ngmɔ ni nɛ nyɛ wui mɛ hiɔ ngɛ sisimi nya a ngɛ ngmlaa kpae, nɛ nihi nɛ bua nyɛ ni ɔmɛ a nya amɛ a ngmlaa a sɛ Asafo Nyɔmtsɛ ɔ tue mi.

⁵ Nyɛ ye nyɛ nya ni ngɛ zugba a nɔ, nɛ nyɛ ho ya. Nyɛ lɛ nyɛ tsui hluu kɛ ya su gbemi ligbi ɔ nɔ.

⁶ Nyɛ bu dalɔ ɔ fɔ, nɛ nyɛ gbe lɛ, nɛ e tsi we nyɛ nya.

Tsuisitomi kɛ sɔlemi

⁷ Lɔ ɔ he ɔ mamimɛ, nyɛɛ to nyɛ tsui si, kɛ ya su Nyɔmtsɛ ɔ bami be ɔ. Nyɛɛ hyɛ bɔ nɛ hulɔ ɔ mlɛɔ zugba a ni bami nɛ he jua wa, nɛ e toɔ e tsui si ngɛ he kɛ ya suu be nɛ gbo kɛ gbiɛ nyu nɛɛ ɔ;

⁸ nyɛ hu nyɛɛ to nyɛ tsui si; nyɛɛ da si tutuutu, ejakaa Nyɔmtsɛ ɔ bami be ɔ su ta.

⁹ Mamimɛ, nyɛ ko pia nyɛ sibi konɛ Mawu ko kojo nyɛ. Oʼɛ, kojolɔ ɔ daa si ngɛ sinya a nya.

¹⁰ Mamimɛ, nyɛɛ ngɔ gbali nɛ tu munyu ngɛ Nyɔmtsɛ ɔ biɛ mi ɔ ngɔ pee amanehlu kɛ tsui si tomi nɔ hyɛmi nɔ.

¹¹ Wa tsɛɔ ninɛmɛ nɛ toɔ a tsui si ɔ ke nihi nɛ a gbaa. Nyɛ nu Hiob tsui si tomi ɔ he, nɛ nyɛ na bɔ nɛ Nyɔmtsɛ ɔ to lɛ ha ngɛ nyagbe mi ɔ, ejakaa Nyɔmtsɛ ɔ mi mi saa lɛ babauu nɛ e muklii mi jɔ hulɔ.

¹² Se titli ɔ, mamimɛ, nyɛ ko ka kita, hiɔwe jio, zugba jio, aloo kita kpa ko jio; nyɛ “Ee” nɛ pee ee, nɛ “Dɛbi” nɛ pee dɛbi, konɛ nyɛ ko sɛ kojomi mi.

¹³ Ke nyɛ ti nɔ ko ngɛ amanehlu mi ɔ, e sɔle; kɛ nɔ ko bua jɔ ɔ, e la yi jemi la.

¹⁴ Ke nyɛ ti nɔ ko be he wami ɔ, e tsɛ asafo ɔ mi nikɔtɔma amɛ kɛ ba e ngɔ nɛ a pɔ lɛ nu ngɛ Nyɔmtsɛ ɔ biɛ mi nɛ a sɔle ha lɛ,

¹⁵ nɛ hemi kɛ yemi sɔlemi nɛ ɔ ma he hiɔtsɛ ɔ yi wami, nɛ Nyɔmtsɛ ɔ ma tle lɛ si, nɛ ke e pee yayami ɔ, a kɛ maa pa lɛ.

¹⁶ Nyɛɛ jaje nyɛ he yayami ɔmɛ ngɔ tsɔɔ nyɛ he, nɛ nyɛɛ sɔle ngɔ ha nyɛ he, konɛ a tsa nyɛ. Dalɔ sɔlemi nɛ mi wa a nyɛɔ nihi babauu tsuɔ.

¹⁷ Elia ji nɔmlɔ adesa kaa wɔ nɔuu, nɛ e sɔle sɔlemi ko konɛ hiɔmi ko nɛ, nɛ e nɛ́ ngɛ zugba a nɔ jeha etɛ kɛ hlami ekpa sɔuu.

¹⁸ Nɛ e kpale sɔle, nɛ Mawu ha hiɔmi nɛ, nɛ zugba a ba ni.

¹⁹ Mamimɛ, ke nyɛ ti nɔ ko tla blɔ kɛ je anɔkuale ɔ mi nɛ nɔ ko ngɛ lɛ kpalee ekohu ɔ,

²⁰ ha nɛ e le kaa nɔ nɛ kpaleɔ yayami peelɔ kɛ jee e blɔ tlami mi ɔ ma he yayami peelɔ ɔ klaa yi wami kɛ je gbenɔ mi, nɛ e maa ha yayamihi fuu nɔ.