Yakobo 4 - Somi He Ɔ

Je ɔ kɛ huɛbɔmi

¹ Jije tahi kɛ kunɔhi nɛ ngɛ nyɛ kpɛti ɔ je? Anɛ pi nyɛ kɔnɔhi nɛ hwuɔ ta ngɛ nyɛ he ni ɔmɛ a mi ɔ mi nɛ a je lo?

² Nihi peɔ nyɛ akɔnɔ, se nyɛ na we; lɔ ɔ he ɔ nyɛ gbee nɔ; nyɛ jee hunga, se nyɛ nine nyɛ we nɔ nɛ e su; lɔ ɔ he ɔ nyɛ nɔɔ kunɔ nɛ nyɛ pɛɛ; nyɛ na we nɔ́ nɛ nyɛ ngɛ hlae ɔ, ejakaa nyɛ kpa we he pɛɛ.

³ Nyɛ kpaa pɛɛ, nɛ nyɛ na we, ejakaa nyɛ kpaa pɛɛ yaya konɛ nyɛ kpata ni ɔmɛ a hɛ mi ngɛ nyɛ kɔnɔ ɔmɛ a mi.

⁴ Gbapuɛli! Nyɛ li kaa je nɛ ɔ kɛ huɛbɔmi ɔ Mawu nyɛmi ʼi lo? Lɔ ɔ he ɔ, nɔ tsuaa nɔ nɛ suɔ nɛ e kɛ je ɔ nɛ bɔ huɛ ɔ, e ji Mawu henyɛlɔ.

⁵ Aloo nyɛ susu kaa yaka nɛ ngmami ɔ deɔ ke: “Hunga jemi se mumi nɛ hii wa mi ɔ dii” ɔ?

⁶ Se Mawu dloɔ nɔ babauu. Ejakaa ngmami ɔ deɔ ke: “Mawu ɔ, e kuɔ he woli a nya, se he si bali e dloɔ.”

⁷ Lɔ ɔ he ɔ, nyɛɛ ba nyɛ he si ha Mawu; nyɛɛ te si ngɔ wo Abosiami, nɛ e maa tu nyɛ nya fo.

⁸ Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he Nyɛ fɔ nyɛ dɛ, nyɛ yayami peeli, nɛ nyɛ ha nyɛ tsui he nɛ tsɔ, nyɛ juɛmi enyɔenyɔtsɛmɛ.

⁹ Nyɛɛ ye kɔmɔ, nyɛɛ wo ya nɛ nyɛ fo; nyɛ muɔ ɔ nɛ plɛ kɔmɔ yemi, nɛ nyɛ bua jɔmi ɔ hu nɛ plɛ hɛ mi si puemi.

¹⁰ Nyɛɛ ba nyɛ he si ngɛ Nyɔmtsɛ ɔ hɛ mi, nɛ e ma wo nyɛ nɔ.

Nyɛmi kojomi he kɔkɔbɔmi

¹¹ Nyɛ ko ye nyɛ sibi a he sieku, mamimɛ. Nɔ nɛ tuɔ e nyɛmi he munyu aloo e kojoɔ e nyɛmi ɔ, Mlaa a e ngɛ munyu tue kɛ ngɛ sie, nɛ Mlaa a e ngɛ kojoe ɔ nɛ. Ke o ngɛ Mlaa a kojoe, ɔ pi Mlaa a nɔ yelɔ ji mo, se Mlaa a kojolɔ mohu ji mo.

¹² Nɔ kake ji mlaa wolɔ kɛ kojolɔ, nɔ nɛ ngɛ he wami nɛ e kɛ heɔ nɔ yi wami nɛ e kɛ kpataa nɔ hɛ mi hulɔ; se moo lɛɛ, mɛnɔ ji mo nɛ o kojoɔ o nyɛmi?

Fiami he kɔkɔbɔmi

¹³ Jehanɛ, nyɛ ninɛmɛ nɛ nyɛ deɔ ke: “Mwɔnɛ loo hwɔɔ ɔ wa maa ya kikɛmɛ a ma nɛ ɔ loo kikɛmɛ a ma nɛ ɔ mi, nɛ wa ya ye jeha kake ngɛ lejɛ ɔ, nɛ wa ya ye jua, nɛ wa na se,”

¹⁴ kpahu nyɛ li hwɔɔ sane. Ejakaa mɛni ji nyɛ wami ɔ? E ji afua nɛ woɔ be bɔɔ ko, nɛ ke pee se ɔ e laa.

¹⁵ Lɔ ɔ he ɔ, e sa mohu nɛ nyɛ deɔ ke: “Ke Nyɔmtsɛ ɔ suɔ nɛ wa yi na wami ɔ, lɔ ɔ lɛɛ wa maa pee enɛ ɔ loo enɛ.”

¹⁶ Se jehanɛ nyɛ fiaa ngɛ nyɛ he womi ɔmɛ a mi; kikɛmɛ a fiami nɛ ɔ kulaa a yayami ʼi.

¹⁷ Lɔ ɔ he ɔ, nɔ nɛ le kpakpa peemi nɛ e pee we ɔ, e ji yayami ha lɛ.