Yakobo 3 - Somi He Ɔ

Lilɛ

¹ Mamimɛ, nyɛ fuu nyɛ ko pee nyɛ he tsɔɔli, ejakaa nyɛ le kaa wɔ tsɔɔli ɔmɛ ɔ, wa kojomi nya maa wa.

² Ejakaa wɔ tsuo kulaa wa tɔɔ fuu. Ke nɔ ko tɔ we ngɛ munyu mi ɔ, lɛɛ nɔmlɔ nɛ hi kɛ pi si ji lɛ, nɛ e ngɛ he wami nɛ e kɛ maa ye e nɔmlɔ tso mluku ɔ kulaa nɔ.

³ Ke waa kɛ okpɔngɔ nya mi dade woɔ a nya mi konɛ a bu wɔ tue ɔ, wa ma nyɛ kpaka mɛ kɛ ya he nɛ wa suɔ.

⁴ Oʼɛ, lɛhi hu, e ngɛ mi kaa a kle hluu, nɛ kɔɔhiɔ nɛ nya wa kpakaa mɛ, se kudɔɔ nyafii ko kɛkɛ a kɛ kudɔɔ mɛ kɛ yaa he tsuaa he nɛ lɛ kudɔɔtsɛ ɔ suɔ.

⁵ Ja nɔuu lilɛ hu, e ji nɔmlɔ tso he nɔ ko nyafii, se efiãa ni nguahi, oʼɛ, la nyafii hu, nyɛɛ hyɛ hue abɔ sɔuu nɛ e saa!

⁶ Nɛ lilɛ ɔ hu la ʼi, wa he ni ɔmɛ a kpɛti ɔ, lilɛ ji ni yayahi a je nɛ bleɔ nɔmlɔ tso mluku ɔ kulaa. E maa ma je mi si himi kulaa nya la kɛ la nɛ jee abosiami a je nitsɛ.

⁷ Nɔmlɔ nyɛɔ jɔɔ nga mi lohwehi kɛ lohwe pɛlitsɛmɛ kɛ nihi nɛ waa kɛ nihi nɛ ngɛ wo mi ɔmɛ a su tsuaa su he;

⁸ se lilɛ ɔ, nɔmlɔ ko nɔmlɔ ko nyɛ we e he jɔɔmi; nɔ́ yayami nɛ plegeje nɛ e hyi tɔ kɛ duɔ nɛ gbee nɔ ʼi.

⁹ Lɔ ɔ nɔuu waa kɛ gbaa Nyɔmtsɛ ɔ kɛ Tsɛ ɔ, nɛ lɔ ɔ nɔuu hulɔ waa kɛ gbiɛɛ nimli nɛ a bɔ ngɛ Mawu subai nɔ ɔ.

¹⁰ Nya kake ɔ nɔuu mi gbaami kɛ gbiɛmi jee. Mamimɛ, enɛ ɔmɛ ɔ, e sɛ́ nɛ e baa ja.

¹¹ Anɛ nyu hɛngmɛ baa nyu mua kɛ ngo nyu kɛ jee e hɛngmɛ kake ɔ nɔuu mi lo?

¹² Mamimɛ, anɛ ngmɔkɔ tso ma nyɛ nu tso yiblii maa wo, aloo wai tso maa wo ngmɔkɔ? Ja nɔuu kɛ́ ngo nyu ko be nyu mua nyɛe maa pee.

Ni lemi nɛ je hiɔwe

¹³ Mɛnɔ ji ni lelɔ kɛ sane se kɔlɔ ngɛ nyɛ kpɛti? Ha nɛ e kɛ je mi bami kpakpa nɛ tsɔɔ lɛ nitsɛ e nitsumi ɔmɛ ngɛ kpoo peemi kɛ ni lemi mi.

¹⁴ Se ke hunga jemi yaya kɛ pɛ, kɛ he suɔmi ngɛ nyɛ mi ɔ, nyɛ ko fia nɛ nyɛɛ ye lakpa ngɔ si anɔkuale ɔ.

¹⁵ Kikɛmɛ a ni lemi nɛ ɔ, pi hiɔwe nɛ e je, se mohu zugba nɛ ɔ nɔ nɔ́ ʼi, he lo nya nɔ́ ʼi, mumi yayamihi a nɔ́ ʼi.

¹⁶ Ejakaa he nɛ hunga jemi kɛ pɛ ngɛ ɔ, lejɛ ɔ sakasaka peemi kɛ ni yayahi kulaa ngɛ.

¹⁷ Se ni lemi nɛ je hiɔwe ɔ, kekleekle ɔ, e he tsɔ, lɔ ɔ se ɔ, e he jɔ, e hɛ ka si, e buɔ tue, e hyi tɔtɔɔtɔ kɛ mɔbɔ nami kɛ yiblii kpakpahi, e ji nɔ́, e pee we osato.

¹⁸ Dami yiblii ɔ, nihi nɛ peɔ he jɔmi nihi ɔ, mɛ lɛ a duɔ ngɛ he jɔmi mi.