Yakobo 2 - Somi He Ɔ

Hɛ mi hyɛmi he kɔkɔ bɔmi

¹ Mamimɛ, nyɛɛ kɛ nihi a hɛ mi hyɛmi ko futu wa Nyɔmtsɛ Yesu Kristo nɛ ji hɛ mi nyami Nyɔmtsɛ ɔ hemi kɛ yemi ɔ mi.

² Ejakaa ke nyumu ko nɛ wo sika ga kɛ tade nɛ ngɛ fɛu ba sɛ nyɛ kpe he ɔ, nɛ ohiafo ko hu nɛ wo tade yaya ba sɛ mi,

³ nɛ nyɛ bu nɔ nɛ wo tade nɛ ngɛ fɛu ɔ, nɛ nyɛ de lɛ ke: “Moo lɛɛ ba hi he kpakpa nɛ ɔ;” nɛ ohiafo ɔ lɛɛ nyɛ de lɛ ke: “Moo lɛɛ da lejɛ ɔ,” aloo “Ba hi ye nane nya ngɛ hiɛ ɔ” ɔ,

⁴ anɛ pi nihi a mi nɛ nyɛ ngɛ hlae ngɛ nyɛ kpɛti, nɛ nyɛɛ kɛ juɛmi yayami ngɛ kojoe nɛ ɔ lo?

⁵ Mamimɛ nɛ i suɔ, nyɛɛ bu tue! Anɛ pi je nɛ ɔ mi ohiafohi nɛ ji niatsɛmɛ ngɛ hemi kɛ yemi blɔfami ɔ nɛ Mawu hla, konɛ matsɛyemi nɛ e wo he si ngɔ ha ninɛmɛ nɛ a suɔ lɛ ɔ nɛ e pee a nɔ lo?

⁶ Nɛ nyɛɛ lɛɛ nyɛ gbee ohiafo ɔ he guɛ. Anɛ pi niatsɛmɛ ɔmɛ nɛ yeɔ nyɛ nɔ wawɛɛ, nɛ mɛ nɔuu lɛ a kpakaa nyɛ kɛ yaa kojomi he ɔmɛ?

⁷ Anɛ pi mɛ nɔuu nɛ a gbee biɛ kpakpa nɛ a kɛ tsɛɔ nyɛ ɔ he guɛ ɔ lo?

⁸ Lɔ ɔ he ɔ, ke nyɛ ye kita nɛ ji Mlaa a mi go nɛ deɔ ke: “Suɔ o nyɛmi kaa bɔ nɛ o suɔ mo nitsɛ o he” ɔ nɔ ngɛ ngmami ɔ nya a, lɛɛ nyɛ ngɛ pee saminya.

⁹ Se ke nihi a hɛ mi nyɛ hyɛɛ ɔ, lɔ ɔ lɛɛ nyɛ ngɛ yayami pee nɛ Mlaa a buu nyɛ fɔ kaa mlaa tɔli.

¹⁰ Ejakaa nɔ nɛ maa ye Mlaa mluku ɔ kulaa nɔ tete, se e ma tɔ ngɛ kake mi ɔ, e tɔ kulaa nɔ.

¹¹ Ejakaa nɔ nɛ de ke: “Koo bɔ ajuama” a, lɛ nɔuu lɛ de ke: “Koo gbe nɔmlɔ.” Nɛ ke o bɔɛ ajuama, se o gbee nɔmlɔ ɔ, mlaa tɔlɔ ji mo.

¹² Nyɛɛ tu munyu nɛ nyɛɛ pee nyɛ nihi kaa nihi nɛ he yemi mlaa a kɛ maa kojo mɛ.

¹³ Ejakaa kojomi mi ɔ, nɔ nɛ nɛ́ mɔbɔ ɔ, a be lɛ mɔbɔ nae; mɔbɔ nalɔ yi kojomi gbeye.

Hemi kɛ yemi kɛ ni tsumi

¹⁴ Mamimɛ, ke nɔ ko ke e ngɛ hemi kɛ yemi, se e be ni tsumihi ɔ mɛni se nami lɛ ngɛ mi? Anɛ hemi kɛ yemi ɔ ma nyɛ e yi wami ma he lo?

¹⁵ Ke nyɛmi nyumu ko loo nyɛmi yo ko hɛɛ e he gu nɛ e nɛ e nya mi ngma,

¹⁶ nɛ nyɛ ti nɔ ko ya de mɛ ke: “Nyɛɛ ya ngɛ he jɔmi mi; nyɛ ya hlue la, nɛ nyɛ ya ye ni nɛ nyɛɛ tɔ” — se e ha we mɛ nihi nɛ ngɛ nɔmlɔ tso ɔ hiae ɔ, mɛni se nami lɛ ngɛ mi?

¹⁷ Ja nɔuu hemi kɛ yemi hu, ke ni tsumihi be he ɔ, e ji hemi kɛ yemi gbogboe.

¹⁸ Se nɔ ko ma de ke: “Moo lɛɛ o ngɛ hemi kɛ yemi, nɛ imi lɛɛ, i ngɛ ni tsumihi;” tsɔɔ mi o hemi kɛ yemi nɛ ni tsumihi be he ɔ, nɛ imi hu ma je ye ni tsumi ɔmɛ a mi ma tsɔɔ mo ye hemi kɛ yemi ɔ.

¹⁹ Moo lɛɛ o heɔ yeɔ kaa Mawu ɔ nɔ kake ʼi. O pee saminya! Mumi yayami ɔmɛ hu heɔ yee ja, nɛ a he doo kɛ gbeye yemi.

²⁰ Oo, kuasia, o ngɛ hlaɔ nɛ o le kaa hemi kɛ yemi nɛ ni tsumihi be he ɔ, hemi kɛ yemi gbogboe ʼi lo?

²¹ Wa tsɛ Abraham ɔ, anɛ pi ni tsumihi a nɔ nɛ a da kɛ wo lɛ nguɔ, benɛ e kɛ e bi Isak ya fɔ bɔ sami latɛ ɔ nɔ ɔ lo?

²² Tse o na kaa hemi kɛ yemi kɛ e ni tsumi ɔmɛ nɛ nyɛɛ, nɛ e ni tsumi ɔmɛ a mi e je nɛ e hemi kɛ yemi ɔ hi kɛ pi si ɔ nɛ,

²³ nɛ ngmami ɔ nɛ deɔ ke: “Nɛ Abraham he Mawu nɛ ɔ ye nɛ a bu enɛ ɔ dami ha lɛ” ɔ ba mi, nɛ a tsɛ lɛ ke “Mawu huɛ.”

²⁴ Lɔ ɔ he ɔ, nyɛ na kaa ni tsumihi a mi a jee kɛ woɔ nɔmlɔ nguɔ, se pi hemi kɛ yemi kɛkɛ mi.

²⁵ Ja nɔuu Rahab, ajuama a hu, anɛ pi ni tsumihi a nɔ nɛ a da kɛ wo lɛ nguɔ, benɛ e he bɔfo ɔmɛ atuu nɛ e je mɛ blɔ kɛ gu blɔ kpa nɔ ɔ lo?

²⁶ Ejakaa kaa bɔ nɛ nɔmlɔ tso nɛ mumi be mi ɔ ji gbogboe ɔ, ja nɔuu hemi kɛ yemi nɛ ni tsumihi be he ɔ ji hemi kɛ yemi gbogboe.