Yakobo 1 - Somi He Ɔ

¹ Yakobo, nɛ ji Mawu kɛ Mawetsɛ Yesu Kristo sɔmɔlɔ ɔ, ngma ya ha wɛtso nyɔngma kɛ enyɔ nɛ gbɛ fia a: Nyɛ he manye!

Hemi kɛ yemi kɛ nilemi

² Mamimɛ, ke nyɛ sɛ ka slɔɔtohi fuu a mi ɔ, nyɛɛ bu lɛ kaa bua jɔmi sɔuu;

³ ejakaa nyɛ le kaa kami nɛ a kaa nyɛ hemi kɛ yemi ɔ tsɛɛ tsui si tomi kɛ baa.

⁴ Nyɛ ha tsui si tomi ɔ nɛ gbe e nitsumi nya kɛ pi si, konɛ nyɛɛ hi kɛ pi si, nɛ nyɛɛ su, nɛ e ko piɛ nyɛ nɔ́ ko nɔ́ ko.

⁵ Se ke e hia nyɛ ti nɔ ko ni lemi ɔ, e kpa Mawu nɛ haa nihi kulaa faa kɛ bua jɔmi nɛ e ka we nɔ hɛ mi ɔ pɛɛ, nɛ e ma ngɔ ha lɛ.

⁶ Se e kpa pɛɛ ngɛ hemi kɛ yemi mi, nɛ e ko je nɔ́, ejakaa nɔ jelɔ ɔ e ngɛ kaa oslɔke nɛ kɔɔhiɔ fiaa kɛ yaa kɛ baa.

⁷ Jamɛ a nɔmlɔ ko ko susu kaa e ma na nɔ́ ko kɛ je Nyɔmtsɛ ɔ dɛ mi;

⁸ juɛmi enyɔenyɔtsɛ ko nyɛɛ we tutuutu ngɛ e blɔhi a nɔ.

Ohia kɛ ninami

⁹ Nyɛmi nɛ ji ohiafo ɔ, e fia ke Mawu wo e nɔ ɔ,

¹⁰ nɛ niatsɛ ɔ, e fia ke Mawu ba lɛ si, ejakaa e ma ngla kaa nga mi mɔmɔ.

¹¹ Ejakaa pu tee si nɛ e tsoo nɛ e gbliɔ nga a, nɛ e mɔmɔ ɔmɛ wɔleɔ pueɔ si nɛ e fɛu ɔ puɛɔ. Ja nɔuu niatsɛ hu hɛ mi ma kpata ngɛ e blɔ ɔmɛ a nɔ.

Kami

¹² Agbaa nyumu nɛ toɔ e tsui si ngɛ ka mi, ejakaa ke a ka lɛ nɛ e nyɛ nya da a, e ma na wami jlasi nɛ Nyɔmtsɛ ɔ wo he si ha ninɛmɛ nɛ suɔ lɛ ɔ.

¹³ Ke a ka nɔ ko ɔ, e ko de ke: ‘Mawu ngɔ a je kɛ ka mi.’ Ejakaa Mawu ɔ a kɛ́ lɛ ngɛ ni yayamihi a mi, nɛ lɛ nitsɛ hu e kɛ́ nɔ ko.

¹⁴ Se nɔ tsuaa nɔ ɔ, lɛ nitsɛ e kɔnɔ nɛ gblaa lɛ nɛ mlɔɔ lɛ ɔ lɛ kaa lɛ.

¹⁵ Lɔ ɔ se ɔ akɔnɔ ɔ, ke e ngɔ ho ɔ, e fɔɔ yayami, nɛ yayami hu, ke e wa a, e fɔɔ gbenɔ.

¹⁶ Nyɛ ko ha nɛ a mlɔɔ nyɛ, mamimɛ nɛ i suɔ.

¹⁷ Dloomi ni kpakpahi kulaa kɛ nike ni nɛ hi kɛ pi si kulaa a, hiɔwe e jee kɛ kpleɔ si, kɛ jee Mawu nɛ ji lahi a tsɛ ɔ ngɔ, nɔ nɛ mi nɛ su tsakemi kɛ plɛmi ko be ɔ.

¹⁸ Lɛ nitsɛ e suɔmi nya a kɛ anɔkuale munyu ɔ fɔ wɔ, konɛ waa pee e nibɔ ni ɔmɛ a mi kekleekle yiblii.

Numi kɛ peemi

¹⁹ Mamimɛ nɛ i suɔ, nyɛ kai enɛ ɔ nɛ nyɛ hɛ nɛ ko je nɔ. Nɔ tsuaa nɔ he nɛ sɔ kɛ nɔ numi, e humi si kɛ munyu tumi, e muklii mi nɛ ko fu mla.

²⁰ Ejakaa nyumu muklii mi fumi tsu we Mawu dami nya ni.

²¹ Lɔ ɔ he ɔ, nyɛ sake mu ni tsumi kɛ subai yayamihi kulaa ngɔ pue he, nɛ nyɛɛ kɛ he si bami nɛ he munyu ɔ nɛ a du ngɛ nyɛ mi nɛ ngɛ he wami nɛ e kɛ ma he nyɛ klaa yi wami ɔ.

²² Nyɛɛ pee munyu ɔ nɔ yeli, se pi munyu ɔ nuli kɛkɛ, nɛ nyɛɛ kɛ mlɔɔ nyɛ nitsɛmɛ nyɛ he.

²³ Ejakaa ke nɔ ko ji munyu ɔ nulɔ kɛkɛ se pi e nɔ yelɔ hulɔ ɔ, kikɛmɛ a nɔmlɔ nɛ ɔ ngɛ kaa nyumu ko nɛ hyɛɛ e hɛ mi su ɔ ngɛ ahuhuɛ mi;

²⁴ ejakaa e hyɛɛ e he, nɛ e jee kɛ yaa nɛ amlɔ ɔ nɔuu ɔ, e hɛ jee bɔ nɛ e ngɛ ɔ nɔ.

²⁵ Se nɔ nɛ hyɛɛ he yemi mlaa nɛ hi kɛ pi si kãii, nɛ e hɛ hii he be tsuaa be, nɛ e pi nɔ nɛ nuɔ nɛ e hɛ jee nɔ, se mohu e ji e nɔ yelɔ nɛ tsuɔ he ni ɔ, jamɛ a tsɛ ɔ Mawu maa gbaa lɛ ngɛ e nɔ́ tsuaa nɔ́ peemi mi.

²⁶ Se ke e peɔ nyɛ ti nɔ ko kaa Mawu jalɔ ji lɛ nɛ e kɔɛ e lilɛ mi ɔ, e ngɛ e he sisie, nɛ kikɛmɛ a nɔmlɔ nɔ jami ɔ ji yaka.

²⁷ Mawu jami nɛ he tsɔ nɛ he be mu ko ngɛ Mawu tsɛ ɔ hɛ mi ji nɛ ɔ nɛ, kaa a slaa ahusahi kɛ yalɔyi ngɛ a hiamihi a mi, nɛ e to e he nɛ je ɔ ko wo e he mu.