Tito 3 - Somi He Ɔ

Kristofohi a jemibami

¹ Kaii mɛ nɛ a ba a he si ngɔ ha nikɔtɔmahi kɛ nɔ yeli ɔmɛ, a bu mɛ tue, a dla a he kɛ ha ni tsumi kpakpa tsuaa ni tsumi kpakpa,

² a ko tu nɔ ko he munyu yaya, a ko hla pɛ; se mohu a pee kpoo, nɛ a kɛ a he nɛ tsɔɔ nɔ fɛɛ nɔ kaa a he jɔ.

³ Ejakaa sa a wɔ hu wa li nɔ́ ko, tue gboli, blɔ dali, nihi nɛ sɔmɔɔ akɔnɔ ni kɛ helo se di ni slɔɔtohi fuu, nɛ wa baa wa je mi ngɛ ni yayahi kɛ he tsɛmi mi, wa he ngɛ tai, nɛ wa nyɛɛ wa he.

⁴ Se benɛ Mawu nɛ ji yi wami helɔ ɔ mi mi jɔmi kɛ e nimli a he dɔmi ɔ je kpo ɔ,

⁵ lɔ ɔ lɛɛ pi dami ni tsumihi nɛ wa tsu nya, se mohu lɛ nitsɛ e mɔbɔ nami nya, kɛ gu ehe fɔmi, he dumi kɛ Mumi Klɔuklɔu ɔ ehe peemi ɔ nɔ he wa yiwami,

⁶ nɔ nɛ gu Yesu Kristo wa yi wami helɔ ɔ nɔ plɛ pue wa nɔ babauu ɔ,

⁷ konɛ bɔ nɛ a wo wɔ nguɔ ngɛ lɛ nɔuu e dloomi nya a, a ha waa pee neneene wami ɔ yeli ngɛ hɛ kɛ nɔ fɔmi ɔ nya.

⁸ Anɔkuale munyu ji nɛ ɔ nɛ. Kikɛmɛ a ni nɛ ɔmɛ a nɔ mi i ngɛ hlae kaa o ma, konɛ ninɛmɛ nɛ a he Mawu nɔ ye ɔ, a bɔ nitsumi kpakpahi a he mɔde. Enɛ ɔmɛ ji nihi nɛ ngɛ fɛu nɛ hi ha nimli.

⁹ Se kuasiahi a nɔ jemi kɛ weku sisi tsɔɔmi kɛ pɛ kɛ mlaa he kunɔ nɔmi ɔ, sã o he kɛ je he, ejakaa a he be senami nɛ a pi nɔ́ ko.

¹⁰ Nɔ ko nɛ kɛ mi gbami baa a, ke o bɔ lɛ kɔkɔ si kake kɛ si enyɔ ɔ, kua lɛ;

¹¹ ejakaa o le kaa nɔ ko nɛ ngɛ ja a e je e glɔ nɔ, nɛ e he yayami ɔ buu lɛ fɔ.

Nyagbe nitsɔɔmi

¹² Ke i tsɔ Artema loo Tihiko kɛ ba o ngɔ ɔ, bɔɔ mɔde nɛ o ba ye ngɔ ngɛ Nikopoli, ejakaa lejɛ ɔ i to kaa ma ya ye fiɛ be ɔ ngɛ.

¹³ Bɔɔ mɔɔde nɛ o wo Zena, mlaa tsɔɔlɔ ɔ kɛ Apolo blɔ saminya nɛ nɔ́ ko nɔ́ ko he ko hia mɛ.

¹⁴ Se ha nɛ wɔ nitsɛmɛ wa ni ɔmɛ hu nɛ kase ni tsumi kpakpahi a he mɔde bɔmi, ke e fi loo e hia nɔ ko ɔ, konɛ a ko pee nihi nɛ wui yiblii.

¹⁵ Ninɛmɛ nɛ kɛ mi ngɛ ɔ kulaa ke a biɔ mo. Wa biɔ ninɛmɛ nɛ suɔ wɔ ngɛ hemi kɛ yemi mi ɔ. Mawu dloomi ɔ kɛ nyɛ tsuo nɛ hi si! Amen.