Tito 2 - Somi He Ɔ

Tsɔɔmi kpakpa

¹ Se moo lɛɛ tsɔɔ tsɔɔmi kpakpa a.

² Nimowi ɔmɛ ɔ, kãa a hɛ nɛ ka si, a pee nihi nɛ a hɛ mi jiɔ, a juɛmi nɛ ka si, a he nɛ wa ngɛ hemi kɛ yemi kɛ suɔmi kɛ tsui si tomi mi.

³ Yimowi hu ja nɔuu kãa a ba a je mi bɔ nɛ sa ni klɔuklɔu ɔmɛ. A ko tu nihi a he munyu a ko pee dadeli, a pee nihi nɛ tsɔɔ ni kpakpahi,

⁴ konɛ a tsɔɔ yihewi ɔmɛ nɛ a suɔ a hunomɛ, a suɔ a bimɛ,

⁵ a hɛ nɛ ka si, a he nɛ tsɔ, a baa a we yi saminya, a mi mi nɛ jɔ, a ba a he si ha a hunomɛ, konɛ a ko tu Mawu munyu ɔ he musu bɔmi munyu.

⁶ Nihewi hu ja nɔuu, tu munyu tsɔɔ mɛ konɛ a juɛmi nɛ ka si.

⁷ Nɛ nihi kulaa blɔfami ɔ, ngɔɔ mo nitsɛ o he ngɔ to mɛ okadi ngɛ ni tsumi kpakpahi a he, nɛ ni tsɔɔmi mi ɔ, o tsɔɔ tsɔɔmi klɔuu, nihi nɛ haa nɔ hɛ mi jiɔ,

⁸ munyu kpakpa nɛ a be he nɔ yaya ko nae nɛ a ma de, benɛ pee nɛ zo nɛ gbe nɔ nɛ kɛ wɔ yi ɔ, ejakaa e be wa he nɔ́ yaya ko nɛ e ma de.

⁹ Sɔmɔli ɔmɛ ɔ, de mɛ ke a ba a he si ngɔ ha a nyɔmtsɛmɛ ɔmɛ, a sa a hɛ mi ngɛ nihi tsuo mi, a ko je munyu nya,

¹⁰ a ko ju, se mohu a kɛ anɔkuale yemi nitsɛ nɛ tsɔɔ mɛ, konɛ a kɛ wo Mawu nɛ ji wa yi wami helɔ ɔ tsɔɔmi ɔ hɛ mi nyami ngɛ nihi kulaa mi.

¹¹ Ejakaa Mawu dloomi nɛ a kɛ heɔ nimli kulaa a yi wami ɔ je kpo,

¹² nɛ e tsɔseɔ wɔ konɛ wa kua nɔ yaya peemi kɛ je nɛ ɔ mi akɔnɔ ɔmɛ, nɛ waa kɛ juɛmi kpakpa kɛ dami kɛ Mawu gbeye yemi nɛ hi si ngɛ je nɛ ɔ mi,

¹³ nɛ waa hyɛ Mawu Ope ɔ kɛ wa yiwami helɔ Yesu Kristo gbaami nɛ wa hɛ ngɛ nɔ ɔ kɛ e hɛ mi nyami ɔ he kpo jemi ɔ blɔ;

¹⁴ nɔ nɛ ngɔ nitsɛ e he ngɔ ha ngɛ wa nane mi, konɛ e kpɔ wɔ kɛ je nɔ tɔmi kulaa mi, nɛ e tsukɔ wa he ngɔ pee lɛ nitsɛ e ma klɔuu nɛ hɛ dɔɔ ngɛ ni tsumi kpakpahi a he.

¹⁵ De mɛ ni nɛ ɔmɛ, nɛ o wo mɛ ga ngɛ he, nɛ o kã a hɛ mi ngɛ he kɛ he wami tsuo. Ko ha nɔ ko nɛ ngɔ mo kaa nɔ nɛ sɛ bumi.