Tito 1 - Somi He Ɔ

¹ Paulo, Mawu sɔmɔlɔ, kɛ Yesu Kristo bɔfo. Ahla mi nɛ a tsɔ mi nɛ ma ya ye bua ninɛmɛ nɛ Mawu hla amɛ a hemi kɛ yemi, nɛ ma kɛ mɛ nɛ ba anɔkuale nɛ wa jami ɔ tsɔɔ,

² nɛ maa si ngɛ neneene wami ɔ he hɛ kɛ nɔ fɔmi ɔ mi. Mawu nɛ yi lakpa a wo wɔ kikɛmɛ a wami nɛ ɔ he si loko a bɔ je mi be ɔmɛ,

³ nɛ ngɛ be nɛ sa mi ɔ, e je lɛ si ngɛ e munyu ɔ mi. Fiɛmi sane nɛ ɔ a tu ngɔ wo ye dɛ ngɛ Mawu nɛ ji wa yi wami helɔ ɔ fami nya.

⁴ I ngma ya ha Tito nɛ ji ye bi nitsɛ ngɛ hemi kɛ yemi kake ɔ nɔuu blɔfami ɔ: Dloomi, mɔbɔ nami kɛ he jɔmi nɛ je Tsɛ Mawu ɔ kɛ Mawetsɛ Yesu Kristo, wa yiwami helɔ ɔ, dɛ mi ɔ ha mo!

Tito nitsumi ngɛ Kreta

⁵ Nɔ́ nɛ he je nɛ i si mo ngɛ Kreta a ji konɛ o to nihi nɛ piɛ ɔ blɔ nɔ pɛpɛɛpɛ, nɛ o wo nikɔtɔmahi ngɛ ma tsuaa ma mi, kaa bɔ nɛ i de mo momo ɔ:

⁶ lɔ ɔ ji, a ti nɔ tsuaa nɔ nɛ pee nɔ ko nɛ piami ko be e he, nɛ e ji nɔ nɛ ngɛ yo kake, nɛ e ngɛ bimɛ nɛ heɔ yeɔ nɛ a tui a he munyu yaya kaa yaholi loo tuegboli ji mɛ.

⁷ Ejakaa nɔ hyɛlɔ ɔ, e sɛ kaa piami ko hii e he, akɛnɛ Mawu we mi sɔmɔlɔ nɔkɔtɔma ji lɛ he je ɔ; pi nɔ nɛ peɔ lɛ nitsɛ e tsui nya ni, pi mi mi latsɛ, pi da nulɔ, pi nine kpokpookpotsɛ, pi kpɛletsɛ,

⁸ se mohu nibwɔ peelɔ, nɔ nɛ suɔ nɔ́ nɛ hi, nɔ nɛ juɛmi ka si, dalɔ, nɔ nɛ he tsɔ, nɔ nɛ hɛ mi ka si,

⁹ nɔ nɛ hɛɛ anɔkuale tsɔɔmi ɔ mi, konɛ e nyɛ nɛ e tu munyu ngɔ tsɔɔ nihi ngɛ ni tsɔɔmi nɛ tsaa nɔ ɔ mi, nɛ ninɛmɛ nɛ tee si siɔ munyu ɔ hu, e ka a hɛ mi.

¹⁰ Ejakaa nihi fuu ngɛ nɛ ji atua tsɔli kɛ yakayaka munyu tuli nɛ sisiɔ nɔ, titli ɔ, ninɛmɛ nɛ je nihi nɛ a po mɛ ɔmɛ a kpɛti ɔ;

¹¹ nihi nɛ sa kaa a ku a nya, ejakaa a butuu we mlukuhi kulaa, nɛ zo nihi a se nami he ɔ a tsɔɔ tsɔɔmihi nɛ dɛ.

¹² A ti nɔ ko nɛ ji mɛ nitsɛmɛ a gbalɔ ɔ de ke: “Kretabi yeɔ lakpa daa; lohwe yayamihi kɛ jiklɔɔtsɛmɛ kɛ hejɔli.”

¹³ Odase nɛ ɔ ɔ anɔkuale ʼi. Lɔ ɔ he ɔ, kã a hɛ mi veveeve, konɛ a he nɛ wa ngɛ hemi kɛ yemi ɔ mi,

¹⁴ nɛ a ko bu Yudafohi a nyazia amɛ kɛ nimli nɛ kpaleɔ kɛ jee anɔkuale ɔ mi ɔ a kita amɛ tue.

¹⁵ Nihi nɛ a he tsɔ ɔ, nihi kulaa he tsɔ ha mɛ; se nihi nɛ a he tsɔ we kɛ nihi nɛ he we yi ɔ, nɔ́ ko nɔ́ ko be nɛ he tsɔ ha mɛ, se mohu a yi mi kɛ a he nile kulaa mi sɛ mu.

¹⁶ A deɔ ke a le Mawu, se a kɛ a ni tsumihi kuaa lɛ, nɛ a ji musutsɛmɛ, kɛ tue gboli, nihi nɛ hi ha ni tsumi kpakpa ko kulaa.