Romabi 9 - Somi He Ɔ

Mawu hla Israel

¹ Anɔkuale i ngɛ dee ngɛ Kristo mi, i yi lakpa, nɛ ye he ni lemi hu yeɔ mi odase ngɛ Mumi Klɔuklɔu ɔ mi,

² kaa i ngɛ kɔmɔ yee babauu, nɛ ye tsui yeɔ daa.

³ Ejakaa i na nɛ jinɛ a je mi ngɛ Kristo he kaa musutsɛ ngɛ ye nyɛmimɛ nɛ ji ye wekuli ngɛ he lo blɔfami ɔmɛ a nane mi,

⁴ nihi nɛ ji Israelbi nɛ a nɔ ji bimɛ a plɛmi ɔ kɛ nyami ɔ kɛ somi ɔ, kɛ mlaa hami kɛ jami ɔ kɛ si womi ɔ,

⁵ ninɛmɛ nɛ a nɔ́ nɛ ji tsɛmɛ ɔmɛ, nihi a mi hu nɛ Kristo tete je ngɛ he lo blɔfami ɔ, lɛ nɛ ji Ope ngɛ nihi kulaa nɔ, Mawu nɛ a gbaa kɛ yaa neneene ɔ. Amen.

⁶ Se pi kaa Mawu munyu ɔ pee yaka. Ejakaa tsa pi nihi nɛ je Israel mi ɔ tsuo ji Israel;

⁷ nɛ jeha nɛ hu, pi kaa nɛ Abraham nina ji mɛ ɔ he je ɔ, bimɛ ji mɛ tsuo kulaa, se mohu: “Nihi nɛ je Isak mi ɔ, a ma tsɛ mɛ o nina.”

⁸ Lɔ ɔ ji kaa, tsa pi he lo nya bimɛ ɔmɛ ji Mawu bimɛ, se si womi bimɛ ɔmɛ mohu a buu kaa nina.

⁹ Ejakaa si womi munyu ɔ ji nɛ ɔ nɛ: “Hiɛ ɔ jeha nya kpemi ɔ ma ba, nɛ Sara ma na bi nyumu.”

¹⁰ Se pi enɛ ɔ kɛkɛ, se mohu wa tsɛ Isak kake ɔ nɔuu nɛ Rebeka kɛ na muklii.

¹¹ Se benɛ a na we nɛ a fɔ bimɛ, nɛ jeha nɛ a tsu we nɔ kpakpa loo nɔ yaya ko ɔ, benɛ pee nɛ Mawu yi mi nɛ e to ngɛ e hlami nya a nɛ ma si,

¹² nɛ e ko je ni tsumihi a mi, se mohu e je nɔ nɛ tsɛɛ nɔ ɔ, Mawu de lɛ ke: “Nɔkɔtɔma a ma sɔmɔ jokuɛ ɔ.”

¹³ Kaa bɔ nɛ a ngma a ke: “Yakob ɔ, i suɔ lɛ, se Esau ɔ, i nyɛ lɛ” ɔ.

¹⁴ Lɛɛ kɛ wa ma de kɛɛ? Anɛ Mawu yeɔ sane ko nɛ dɛ lo? Dɛbi!

¹⁵ Ejakaa Mawu de Mose ke: “Nɔ nɛ i naa lɛ mɔbɔ ɔ, lɛ nɔuu mɔbɔ ma na, nɛ nɔ nɛ ye mi mi saa mi haa lɛ ɔ, lɛ nɔuu ye mi mi maa sa mi ha.”

¹⁶ Lɔ ɔ he ɔ jeha nɛ pi nɔmlɔ suɔmi nya aloo e mɔdebɔmi nya, se mohu Mawu nɛ naa mɔbɔ ɔ sane ʼi.

¹⁷ Ejakaa ngami ɔ de Farao ke: “Enɛ ɔ nɔuu he je nɛ i tle mo si konɛ ma je ye he wami kpo kɛ gu o nɔ, konɛ a wo ye biɛ ta ngɛ zugba a kulaa nɔ.”

¹⁸ Lɔ ɔ he je ɔ, nɔ nɛ e suɔ ɔ, e naa lɛ mɔbɔ; nɛ nɔ nɛ e suɔ hu ɔ, e wluaa e tsui.

Mawu mimifumi kɛ e mɔbɔnami

¹⁹ Se jeha nɛ o ma bi mi ke: “Mɛni he je Mawu piaa nɔ mɔ?” Ejakaa mɛnɔ ma nyɛ e yi mi tomi ɔ nya maa ku?

²⁰ Se mɛnɔ ji mo, mo nɔmlɔ, nɛ o kɛ Mawu tsuaa nuku? Anɛ buɛ ɔ ma de nɔ nɛ puɛ lɛ ɔ ke: “Mɛni he je o puɛ mi kikɛ” ɔ lo?

²¹ Aloo buɛpuɛlɔ ɔ be he wami ngɛ zu ɔ nɔ, kaa e kɛ zu kake nɛ a pɔtɔ ɔ nɔuu eko maa puɛ nɔ́ ko nɛ hɛ mi ngɛ nyami, nɛ e kɛ eko hu maa puɛ nɔ́ ko nɛ hɛ mi be nyami lo?

²² Se ke Mawu suɔ kaa e je e mi mi fumi kpo ngɔ tsɔɔ nɛ e ha a le e he wami ɔ, se kɛ̃ ɔ, e toɔ e tsui si babauu kɛ hɛɛ mi mi la womi nihi nɛ sa hɛ mi kpatami ɔ,

²³ nɛ jeha nɛ hu ke e haa a leɔ e hɛ mi nyami hiɛmi ɔ hu ngɛ e mɔbɔ nami nihi nɛ e dla ngɔ to ha hɛ mi nyami ɔ, mɛni o ma de?

²⁴ Se jã e tsɛ wɔ hulɔ, pi ninɛmɛ nɛ je Yudafo ɔmɛ a kpɛti ɔ kɛkɛ, se nihi nɛ je majeli ɔmɛ a kpɛti ɔ hulɔ.

²⁵ Kaa bɔ nɛ e de ngɛ Hosea womi ɔ mi ke: “Ma tsɛ ninɛmɛ nɛ pi ye nihi ɔ ke ye nihi, Nɛ ma nɛ a sume lɛ ɔ ke ma nɛ a suɔ.

²⁶ Nɛ e maa ba mi kaa, He nɛ a de mɛ ngɛ ke: ‘Pi ye ma ji nyɛ’ ɔ, Lejɛ ɔ nɔuu a ma tsɛ mɛ Mawu hɛkalɔ ɔ bimɛ ngɛ.”

²⁷ Se Yesaia kpa ngmlaa ngɛ Israel he ke: “Ke Israelbi ɔmɛ a yibɔ ngɛ kaa wo nya zia a, nihi nɛ piɛ ɔmɛ kɛkɛ a yi wami a ma he.

²⁸ Ejakaa sane kpiti Nyɔmtsɛ ɔ maa ye ngɛ zugba a nɔ.”

²⁹ Nɛ kaa bɔ nɛ Yesaia de ngɔ to momo ɔ ke: “E ji e ya pee kaa tahi a Nyɔmtsɛ ɔ piɛ́ nina ko ngɔ hi wɔ jinɛ, wa ngɛ kaa Sodoma, nɛ wa plɛ kaa Gomora pɛ.”

Israel kɛ Sane Kpakpa a

³⁰ Lɛɛ kɛ wa ma de kɛɛ? Lɔ ɔ ji majeli a bimɛ nɛ di dami se ɔ na dami nɛ ji dami nɛ je hemi kɛ yemi mi ɔ;

³¹ se Israel mohu nɛ dii dami mlaa a se ɔ, e nine sui dami mlaa a nɔ.

³² Mɛni he je? Ejakaa a gui hemi kɛ yemi nɔ kɛ hla we, se mohu kaa nihi nɛ guu ni tsumihi a nɔ kɛ hlaa.

³³ Ejakaa a tɛ tɛmi tɛ ɔ, kaa bɔ nɛ a ngma a ke: “Oʼɛ, i kɛ tɛ kɛ nane kpatami tɛ sa ko Ngɛ si mae ngɛ Zion, Nɛ nɔ tsuaa nɔ nɛ heɔ e nɔ yeɔ ɔ, Zo be lɛ gbee.”