Romabi 8 - Somi He Ɔ

Mumi mi wami

¹ Lɔ ɔ he ɔ jeha nɛ fɔ ko fɔ ko be nɛ a kɛ maa bu nihi nɛ ngɛ Kristo mi ɔ.

² Ejakaa mlaa nɛ ji wami kɛ mumi mlaa a nɛ ngɛ Kristo Yesu mi ɔ kpɔ mi ngɛ yayami kɛ gbenɔ mlaa a dɛ mi.

³ Ejakaa nɔ́ nɛ mlaa a nyɛ we nɛ e pee ngɛ gbedemi nɛ he lo ɔ gbede he je ɔ, Mawu tsɔ lɛ nitsɛ e bi ɔ ngɛ su nɛ ngɛ kaa yayami he lo su mi, nɛ ngɛ yayami he hulɔ, konɛ e bu yayami ɔ fɔ ngɛ he lo ɔ mi,

⁴ konɛ a gbe mlaa a dami ɔ nya ngɛ wa mi, wɔ nihi nɛ wa nyɛɛ we ngɛ he lo nya, se mohu mumi nya wa nyɛɛ ngɛ ɔ.

⁵ Ejakaa nihi nɛ hii si ngɛ he lo nya a, he lo nihi a he a susuu, se nihi nɛ hii si ngɛ mumi nya a susuu mumi mi nihi a he.

⁶ Ejakaa he lo juɛmi ɔ lɛɛ gbenɔ ʼi, se mumi juɛmi ɔ, wami kɛ he jɔmi ʼi.

⁷ Ejakaa he lo juɛmi ɔ Mawu nyɛmi ʼi, ejakaa e bɛ e he si ha we Mawu mlaa a, nɛ pohu e be nyɛe tete.

⁸ Nihi nɛ hii si ngɛ he lo mi ɔ be nyɛe nɛ a sa Mawu hɛ mi.

⁹ Se ke e ngɛ mi kaa Mawu Mumi hii nyɛ mi ɔ, lɔ ɔ lɛɛ nyɛ be he lo ɔ sisi, se mohu mumi ɔ sisi nyɛ ngɛ. Ke nɔ ko be Kristo Mumi ɔ, lɛɛ tsa pi Kristo nɔ́ ji lɛ.

¹⁰ Se ke Kristo ngɛ nyɛ mi ɔ, nɔmlɔ tso ɔ gbo ngɛ yayami he lɛɛ, se mumi ɔ ji wami ngɛ dami he.

¹¹ Se ke nɔ nɛ tle Yesu si kɛ je gbeje ɔ Mumi ɔ hii nyɛ mi ɔ, nɔ nɛ tle Kristo si kɛ je gbeje ɔ ma ha nyɛ nɔmlɔ tsohi nɛ ma gbo ɔ hu yi ma na wami ngɛ e Mumi nɛ hii nyɛ mi ɔ he.

¹² Lɔ ɔ he ɔ, mamimɛ, hiɔtsɛmɛ ji wɔ, se pi he lo hiɔ nɛ wa hɛɛ nɛ wa maa hi si ngɛ he lo nya.

¹³ Ejakaa ke he lo nya nyɛ hii si ngɛ ɔ, nyɛ ma gbo. Se ke nyɛɛ kɛ Mumi ɔ gbee he lo ɔ ni tsumi ɔmɛ ɔ, nyɛ yi ma na wa.

¹⁴ Ejakaa nihi abɔ nɛ Mawu Mumi ɔ kpakaa mɛ ɔ, mɛ ji Mawu bimɛ.

¹⁵ Ejakaa pi nyɔguɛ yemi mumi nɛ nyɛ na nɛ nyɛ ma pa ye gbeye, se mohu nyɛ na bimɛ a plɛmi mumi, nɔ́ mi nɛ wa kpaa ngmlaa ngɛ ke: “Abba,” Tsaatsɛ! ɔ.

¹⁶ Mawu Mumi ɔ nitsɛ kɛ wa mumi ɔ yeɔ odase kaa Mawu bimɛ ji wɔ.

¹⁷ Nɛ ke bimɛ ji wɔ ɔ, lɛɛ we ni yeli hu ji wɔ, Mawu we ni yeli kɛ Kristo nyɛmimɛ we ni yeli, ke e ngɛ mi kaa waa kɛ lɛ naa amanehlu ɔ, konɛ a wo waa kɛ lɛ hɛ mi nyami hulɔ.

Hwɔɔ se nyami

¹⁸ Ejakaa i susuu kaa mwɔnɛ mwɔnɛ amanehlu nɛ ɔmɛ kɛ nyami nɛ hwɔɔ se a ma je kpo ha wɔ ɔ sɔɛ.

¹⁹ Ejakaa adebɔ ni ɔmɛ a blɔ hyemi kpikpimaa a ngɛ Mawu bimɛ ɔmɛ wa kpo jemi ɔ mlɛe.

²⁰ Ejakaa a ngɔ adebɔ ni ɔmɛ ngɔ wo yakayaka ni a sisi, pi ngɛ mɛ nitsɛmɛ a suɔmi nya, se mohu ngɛ nɔ nɛ ba mɛ si ɔ he, ngɛ hɛ kɛ nɔ fɔmi mi,

²¹ ejakaa adebɔ ni ɔmɛ hu maa ye a he kɛ maa je puemi nyɔguɛ yemi ɔ mi kɛ maa ya Mawu bimɛ ɔmɛ a nyami he yemi ɔ mi.

²² Ejakaa wa le kaa adebɔ ni ɔmɛ tsuo kɛ wɔ ngɛ kɛmɛe nɛ a kɛ wɔ ngɛ kɔɔe kɛ ba su mwɔnɛ mwɔnɛ.

²³ Nɛ tsa pi mɛ kɛkɛ, se mohu wɔ nitsɛmɛ tete, wɔ ninɛmɛ nɛ wa na Mumi ɔ kekle yiblii ɔmɛ, wɔ nitsɛmɛ hu wa laa zanue ngɛ wa mi, nɛ wa hyɛɛ bimɛ a plɛmi nɛ ji wa nɔmlɔ tso kpɔmi ɔ blɔ.

²⁴ Ejakaa hɛ kɛ nɔ fɔmi nya a he wa yi wami ngɛ. Hɛ kɛ nɔ fɔmi nɛ a naa a, e pi hɛ kɛ nɔ fɔmi. Ejakaa mɛnɔ hɛ hii nɔ́ nɛ a naa a nɔ?

²⁵ Se ke nɔ́ nɛ wa nɛ́ ɔ nɔ wa hɛ ngɛ ɔ, lɛɛ wa kɛ tsui si tomi hyɛɛ lɛ blɔ.

²⁶ Ja nɔuu Mumi ɔ hu yeɔ buaa wa gbedemi ɔ; ejakaa bɔ nɛ sa kaa wa ko sɔle kɛ bi nɔ nɛ da a, wa li; se Mumi ɔ nitsɛ kɛ kɔmɔ yemi nɛ a be nyɛe maa kale daa mi haa wɔ.

²⁷ Se Mawu nɛ hlaa tsuihi a mi ɔ le nɔ́ nɛ ji Mumi ɔ juɛmi ɔ, ejakaa e daa mi haa ni klɔuklɔu ɔmɛ bɔ nɛ sa Mawu hɛ mi.

²⁸ Se wa le kaa, nihi tsuo mi ɔ, Mawu yeɔ buaa nihi nɛ suɔ lɛ ɔ konɛ e hi ha mɛ, mɛ ninɛmɛ nɛ a tsɛ mɛ ngɛ e yi mi tomi nya a.

²⁹ Ejakaa nihi nɛ e le mɛ momo ɔ, mɛ e je ngɔ to konɛ a subai nɛ hi kaa e bi ɔ nɔ ɔ, konɛ Bi ɔ e pee nyɛmimɛ fuu a kpɛti bi nɔkɔtɔma.

³⁰ Nihi nɛ e je ngɔ to ɔ, mɛ nɔuu e tsɛ; nɛ nihi nɛ e tsɛ ɔ, mɛ nɔuu nguɔ e wo; nɛ nihi nɛ e wo nguɔ ɔ, mɛ nɔuu a hɛ mi nyami e wo.

Mawu suɔmi ngɛ Kristo Yesu mi

³¹ Lɛɛ kɛ wa ma de kɛɛ ngɛ ni nɛ ɔmɛ a he mɔ? Ke Mawu ngɛ wa se ɔ, mɛnɔ maa te si ngɔ wo wɔ?

³² Mawu nɛ kamaa we wɔ elɛ nitsɛ e Bi ɔ, se mohu e ngɔ lɛ ngɔ ha ngɛ wɔ tsuo wa nane mi ɔ, anɛ e be nihi tsuo kulaa ngɔe ngɔ piɛ e he kɛ ke wɔ lo?

³³ Mɛnɔ maa po nihi nɛ Mawu hla amɛ a nya? Mawu ji nɔ nɛ woɔ nguɔ.

³⁴ Mɛnɔ ji nɔ nɛ buu fɔ ɔ? Yesu Kristo nɔ nɛ e gbo, se nɔ́ nɛ pe kɔlɔ ɔ, nɔ nɛ a tle lɛ si hulɔ, nɛ e ngɛ Mawu hiɛ ɔ nɔ, nɛ e pa daa mi haa wɔ.

³⁵ Mɛnɔ ma gba waa kɛ Kristo suɔmi ɔ mi? Amanehlu loo tsui pomi loo yi wami loo hwɔ loo he gu nyɛɛmi loo he gbeye womi loo klaate?

³⁶ Kaa bɔ nɛ a ngma ke: “O he ɔ, a gbee wɔ hluu je nami kɛ ya siɔ du bubui, A buu wɔ kaa tohi nɛ a yaa gbe mɛ.”

³⁷ Se kɛ̃ ɔ, enɛ ɔmɛ kulaa mi ɔ, wa guu nɔ nɛ suɔ wɔ ɔ nɔ yeɔ kunimi babauu.

³⁸ Ejakaa i ngɛ nɔ mi mami kaa gbenɔ jio, wami jio, hiɔwe bɔfohi jio, nɔ yeli jio, he wamihi jio, nihi nɛ ngɛ nɛ ɔmɛ jio, nihi nɛ maa ba amɛ jio,

³⁹ hiɔwe jio, sisi jio, aloo nihi nɛ a bɔ ɔmɛ a mi nɔ́ kpa ko jio, a be nyɛe ma gba waa kɛ Mawu suɔmi nɛ ngɛ Kristo Yesu, wa Nyɔmtsɛ ɔ, mi ɔ mi.