Romabi 7 - Somi He Ɔ

Gbasihimi nɔhyɛmi nɔ

¹ Mamimɛ, tse nyɛ nihi nɛ nyɛ le Mlaa a le kaa Mlaa a yeɔ nɔmlɔ nɔ ngɛ e wami be ɔ kulaa mi lo?

² Ejakaa yo nɛ ngɛ huno ɔ, mlaa fi lɛ ngɔ mɛtɛ e huno nɛ hɛ ngɛ ɔ he; se ke e huno ɔ gbo ɔ, e kɛ e huno ɔ mlaa a be sane ko hu.

³ Lɔ ɔ he ɔ jeha nɛ, ke e huno ɔ ngɛ je mi nɛ e ya gba nɔ kpa a, a tsɛɛ lɛ yo gba puɛlɔ. Se ke e huno ɔ gbo ɔ, lɛɛ e ye e he kɛ je mlaa a mi, nɛ ke e ya gba nyumu kpa a, e pi yo gba puɛlɔ hu.

⁴ Mamimɛ, ja nɔuu nyɛ hu a kɛ Kristo nɔmlɔ tso ɔ gbe nyɛ ngɔ ha Mlaa a, konɛ nyɛ plɛ nɔ kpa na ji nɔ nɛ a tle lɛ si kɛ je gbeje ɔ nihi, konɛ waa wo yiblii ha Mawu.

⁵ Ejakaa bene wa ngɛ he lo mi ɔ, yayamihi a he hɛdɔ ɔmɛ guu mlaa a nɔ tsuɔ ni ngɛ wa he ni ɔmɛ a mi, nɛ waa kɛ wo yiblii ha gbenɔ.

⁶ Se jeha nɛ waa kɛ Mlaa a be sane ko hu, ejakaa wa gbo ngɔ ha nɔ nɛ hɛɛ wami ɔ, bene pee nɛ wa sɔmɔ ngɛ mumi nɛ plɛ ehe ɔ mi, se pi ngɛ Mlaa momo ɔ nya.

Mlaa kɛ yayami

⁷ Lɛɛ kɛ wa ma de kɛɛ? Anɛ Mlaa a yayami ʼi lo? Dɛbi! Se mohu ke pi Mlaa a he jinɛ i li yayami. Ejakaa jinɛ i li nɔ́ nɛ ji hɛ̃kɔ, ke pi Mlaa a nɛ de ke: “O hɛ ko kɔ nihi a nɔ.”

⁸ Se kita a nɔ yayami gu kɛ na he blɔ nɛ e kɛ tsɛ akɔnɔ nihi tsuo wo ye mi; ejakaa ke Mlaa be ɔ, yayami hu gbo.

⁹ I hi si hyɛ nɛ i be mlaa, se bene kita a ba a, yayami ɔ hɛ tsɛ ekohu.

¹⁰ Se imi lɛɛ i gbo, nɛ i na kaa kita a nɛ a kɛ ha mi ngɛ wami he ɔ, kɔlɔ ɔ nɔuu lɛ tsɛ gbenɔ ngɔ ha mi.

¹¹ Ejakaa yayami gu kita a nɔ na he blɔ nɛ e kɛ sisi mi nɛ e kɛ lɔ ɔ nɔuu gbe mi.

¹² Lɔ ɔ he ɔ, Mlaa a ngɛ klɔuklɔu, nɛ Kita a hu ngɛ klɔuklɔu nɛ e da nɛ e hi.

¹³ Lɛɛ nɔ́ kpakpa a plɛ gbenɔ ha mi lo? Dɛbi! Se mohu bene pee nɛ yayami ɔ nɛ je si kaa yayami he ɔ, e kɛ nɔ́ kpakpa a nɔuu tsɛ gbenɔ ngɔ ha mi, konɛ yayami ɔ nɛ gu kita a nɔ nɛ e plɛ yayami nɛ be nɔ.

Nɔmlɔ mi suhi enyɔ

¹⁴ Wa le kaa Mlaa a mumi mi nɔ́ ʼi; se imi lɛɛ he lo nɔmlɔ ji mi, nɛ a jua mi ngɔ ha yayami.

¹⁵ Nɔ nɛ i tsuɔ ɔ i li; ejakaa nɔ́ nɛ i suɔ ɔ, pi lɔ ɔ nɛ i peɔ, se nɔ́ nɛ i nyɛɛ mohu ɔ, kɔlɔ ɔ i peɔ.

¹⁶ Se ke nɔ́ nɛ i sume ɔ nɔuu i peɔ ɔ, i kplɛɔ kaa Mlaa a hi.

¹⁷ Lɛɛ jeha nɛ pi imi nɛ i tsuɔ kɔlɔ ɔ hu, se mohu yayami nɛ hii ye mi ɔ lɛ tsuɔ.

¹⁸ Ejakaa i le kaa ye mi, lɔ ɔ ji ye he lo ɔ mi ɔ, nɔ́ ko kpakpa ko be lejɛ ɔ; ejakaa suɔmi ɔ i ngɛ eko mohu, se kpakpa peemi lɛ bɔ mi.

¹⁹ Ejakaa nɔ́ kpakpa nɛ i suɔ ɔ, i pee we, se nɔ́ yayami nɛ i sume ɔ, kɔlɔ ɔ mohu i peɔ.

²⁰ Se ke nɔ́ nɛ i sume ɔ kɛ̃ i peɔ ɔ, lɛɛ tsa pi imi nɛ i peɔ kɔlɔ ɔ hu, se mohu yayami nɛ ngɛ ye mi ɔ lɛ peɔ.

²¹ Lɛɛ i naa mlaa nɛ ɔ kaa imi nɛ i suɔ kaa ma pee nɔ́ nɛ hi ɔ, yayami mohu mɛtɛ ye he.

²² Ejakaa ye mi blɔ nɔmlɔ ɔ bua jɔɔ ngɛ Mawu Mlaa a he.

²³ Se i naa mlaa muno ko ngɛ ye nɔmlɔ tso he ni ɔmɛ a mi nɛ kɛ ye juɛmi mlaa a hwuɔ ta, nɛ e ngɔɔ mi nyɔguɛ ngɔ haa yayami mlaa a nɛ ngɛ ye nɔmlɔ tso he ni ɔmɛ a mi ɔ.

²⁴ Nɔmlɔ nɛ ni ngɛ mɔbɔ ji mi; mɛnɔ lɛ ma je mi kɛ maa je kikɛmɛ a gbenɔ nɔmlɔ tso nɛ ɔ dɛ mi?

²⁵ Sina ha Mawu kɛ gu wa Nyɔmtsɛ Yesu Kristo nɔ. Jeha nɛ imi nɔuu i kɛ ye juɛmi sɔmɔɔ Mawu mlaa a lɛɛ, se i kɛ ye he lo sɔmɔɔ yayami mlaa.