Romabi 6 - Somi He Ɔ

Kristo mi wami kɛ yayami mi gbenɔ

¹ Lɛɛ kɛ wa ma de kɛɛ? Waa hi yayami ɔ mi konɛ Mawu dloomi nɛ hiɛ lo?

² Dɛbi! Wɔ nɛ wa gbo ngɔ ha yayami ɔ, kɛ maa pee kɛɛ nɛ wa hɛ maa tsa nɔ hi ngmengmle ngɛ e mi?

³ Aloo nyɛ li kaa wa ti nihi abɔ nɛ a baptisi ngɔ wo Kristo Yesu mi ɔ, e gbenɔ ɔ mi a baptisi wɔ ngɔ wo lo?

⁴ Lɔ ɔ he ɔ, a kɛ baptisimi nɛ a baptisi wɔ ngɔ wo e gbenɔ ɔ mi ɔ pu waa kɛ lɛ tsuo, konɛ kaa bɔ nɛ a tle Yesu si kɛ je gbeje ngɛ Tsɛ ɔ hɛ mi nyɛmi nya a, ja nɔuu kɛ wɔ hu waa nyɛɛ ngɛ wami nɛ plɛ ehe mi.

⁵ Ejakaa ke waa kɛ lɛ pee kake ngɛ e gbenɔ nɛ e gbo ɔ mi ɔ, lɔ ɔ lɛɛ waa kɛ lɛ maa pee kake ngɛ e si temi ɔ mi hulɔ.

⁶ Wa le enɛ ɔ kaa a sɛu wa nɔmlɔ tso momo ɔ ngɔ piɛ e he konɛ yayami nɔmlɔ tso ɔ hɛ mi nɛ kpata nɛ wa ko sɔmɔ yayami hu.

⁷ Ejakaa ke nɔ ko gbo ɔ, e kɛ yayami gba mi.

⁸ Ke waa kɛ Kristo gbo ɔ, wa heɔ yeɔ kaa waa kɛ lɛ ma na wami hulɔ,

⁹ ejakaa wa le kaa nɛ a tle Kristo si kɛ je gbeje nɛ ɔ ɔ, e be gboe hu; gbenɔ be e nɔ nyɔmtsɛ yee hu.

¹⁰ Ejakaa nɛ e gbo ɔ, yayami e gbo ha si kake pɛ; se nɛ e hɛ ngɛ nɛ ɔ ɔ, Mawu e hɛ ngɛ ha.

¹¹ Ja nyɛ hu nyɛɛ bu nyɛ he kaa nihi nɛ a gbo ha yayami nɛ a hɛ ngɛ kɛ ha Mawu ngɛ Yesu Kristo wa Nyɔmtsɛ ɔ mi.

¹² Lɔ ɔ he ɔ nyɛ ko ha yayami nɛ ye nyɛ nɔmlɔ tso nɛ ma gbo ɔ nɔ tsɛ nɛ nyɛ bu lɛ tue ngɛ e kɔnɔ ɔmɛ a mi.

¹³ Nɛ jeha nɛ ɔ nyɛ ko ngɔ nyɛ he ni ɔmɛ ngɔ ha yayami kaa ni yayami ɔmɛ a tahwumi nihi, se mohu nyɛɛ ngɔ nyɛ he ngɔ ha Mawu kaa ninɛmɛ nɛ a hɛ tsɛ kɛ je gbeje, nɛ nyɛɛ kɛ nyɛ he ni ɔmɛ nɛ pee dami tahwumi nihi ngɔ ha Mawu.

¹⁴ Ejakaa yayami be nyɛ nɔ he wami nae, ejakaa pi mlaa sisi nɛ nyɛ ngɛ, se mohu dloomi sisi nyɛ ngɛ.

Dami mi nyɔguɛhi

¹⁵ Lɛɛ kɛ ji lɛ kɛɛ? Waa pee yayami akɛnɛ wa be Mlaa sisi se dloomi mohu sisi wa ngɛ ɔ lo? Dɛbi!

¹⁶ Anɛ nyɛ li kaa nɔ nɛ nyɛ ngɔɔ nyɛ he ngɔ peɔ nyɔguɛhi haa nɛ nyɛ buɔ lɛ tue ɔ, lɛ nɔuu e nyɔguɛhi ji nyɛ nɛ nyɛ buɔ lɛ tue ɔ lo? — yayami nɛ kɛ nɔ yaa gbenɔ mi ɔ jio, loo tuebumi nɛ kɛ nɔ yaa dami mi ɔ jio.

¹⁷ Se sina ha Mawu kaa jinɛ sa a yayami nyɔguɛhi ji nyɛ, se jeha nɛ ɔ nyɛ je nyɛ tsui tsuo mi kɛ bu kikɛmɛ a tsɔɔmi nɛ a ngɔ nyɛ ngɔ wo mi nɛ ɔ tue.

¹⁸ A kpɔ nyɛ kɛ je yayami dɛ mi nɛ nyɛ ye nyɛ he nɛ nyɛ plɛ dami nyɔguɛhi.

¹⁹ Bɔ nɛ nɔmlɔ tuɔ munyu i ngɛ tue nɛ ɔ nɛ, ngɛ nyɛ he lo gbedemi ɔ he. Ejakaa kaa bɔ nɛ nyɛ ngɔ nyɛ he ni ɔmɛ ngɔ pee hiemi nihi kɛ mlaa tɔmi nyɔguɛhi kɛ sɛ mlaa tɔmi mi ɔ, ja nɔuu kɛ jeha nɛ ɔ nyɛɛ ngɔ nyɛ he ni ɔmɛ ngɔ pee dami nyɔguɛhi kɛ ha klɔuklɔu peemi.

²⁰ Be mi nɛ nyɛ ji yayami nyɔguɛhi ɔ, nyɛ ye nyɛ he kɛ je dami ɔ dɛ mi.

²¹ Lɛɛ mɛni yiblii nyɛ wo ngɛ lɛ be ɔ mi? Yiblii nɛ zo gbe nyɛ ngɛ he jeha nɛ; ejakaa kɔlɔ ɔmɛ a nyagbe ji gbenɔ.

²² Se jeha nɛ ɔ, nɛ a kpɔ nyɛ kɛ je yayami dɛ mi nɛ nyɛ plɛ Mawu nyɔguɛhi nɛ ɔ, nyɛɛ wo yiblii ha klɔuklɔu peemi nɛ we nyagbe ji neneene wami ɔ.

²³ Ejakaa yayami dɛ mi hiɔwe ɔ gbenɔ ʼi; se Mawu dloomi nike ni ɔ neneene wami ʼi ngɛ Kristo Yesu wa Nyɔmtsɛ ɔ mi.