Romabi 2 - Somi He Ɔ

Mawu kojomi

¹ Lɔ ɔ he ɔ mo, nɔ tsuaa nɔ nɛ o kojoɔ ɔ, o be nya jemi ko; ejakaa nɔ he nɛ o kojoɔ nɔ kpa ngɛ ɔ, o kɛ buu mo nitsɛ o he fɔ; ejakaa mo nɛ o kojoɔ nihi ɔ, jamɛ a ni ɔmɛ nɔuu o tsuɔ.

² Wa le kaa Mawu fɔ bumi ɔ sa nihi nɛ tsuɔ jamɛ a ni ɔmɛ pɛ.

³ Se mo nɔmlɔ nɛ o kojoɔ nihi nɛ tsuɔ jamɛ a ni nɛ ɔmɛ nɛ o peɔ ja nɔuu ɔ, anɛ o susuu kaa moo lɛɛ o he maa je Mawu kojomi ɔ mi lo?

⁴ Aloo pe o ngɛ e mi mi himi kɛ e nɔ he tsui nami kɛ e tsui si tomi babauu ɔ he guɛ gbee, se o li kaa Mawu mi mi jɔmi ɔ pe e ngɛ o he piɛe nɛ o pia o he lo?

⁵ Se o kɛ o tsui wami kɛ o he nɛ o pia we ɔ ngɛ mi mi fumi nyɛ buae ngɔ ha mo nitsɛ o he ngɔ to mi mi fumi kɛ Mawu dami kojomi kpo jemi ligbi ɔ.

⁶ Ejakaa e maa wo nɔ tsuaa nɔ hiɔ bɔ nɛ sa e ni tsumi ɔmɛ:

⁷ Nihi nɛ kɛ kpakpa peemi kɛ tsui si tomi hlaa hɛ mi nyami kɛ bu kɛ si himi nɛ puɛ we ɔ, Mawu ma ha mɛ neneene wami.

⁸ Se nihi nɛ suɔ pɛ nɛ a bui anɔkuale ɔ tue, se a buɔ ni yayahi mohu tue ɔ, a nɔ ji mi mi fumi kɛ mi mi la.

⁹ Dengme kɛ he hiami maa ba nɔmlɔ tsuaa nɔmlɔ nɛ tsuɔ ni yaya nɛ ɔmɛ a nɔ, Yuda no nɔ kekle kɛ Hela no hu nɔ.

¹⁰ Se hɛ mi nyami kɛ bu kɛ he jɔmi maa ba nɔ tsuaa nɔ nɛ tsuɔ ni kpakpahi ɔ nɔ, Yuda no kekle kɛ Hela no hulɔ.

¹¹ Ejakaa Mawu hlɛ nimli a mi.

¹² Ejakaa nihi abɔ nɛ be Mlaa nɛ a pee yayami ɔ, a maa laa hulɔ nɛ a be mlaa; nɛ nihi abɔ nɛ gu mlaa a nɔ pee yayami ɔ, Mlaa a nɔuu a kɛ maa kojo mɛ.

¹³ Ejakaa pi mlaa nuli ɔmɛ ji dali ngɛ Mawu hɛ mi, se mlaa nɔ yeli mohu ji ninɛmɛ nɛ a maa bu kaa dali.

¹⁴ Ejakaa, ke maje li a bimɛ nɛ be mlaa a kɛ a fɔmi mi su ɔ tsuɔ Mlaa a nya ni ɔ, mɛ nihi nɛ a be mlaa a, a ji mlaa ha mɛ nitsɛmɛ a he;

¹⁵ kɔlɔ ɔ a kɛ tsɔɔ kaa a ngma Mlaa a ni tsumi ɔ ngɛ a tsui mi, nɛ a he nile hu yeɔ odase, nɛ a susumi ɔmɛ poo a nya aloo a jeɔ a nya

¹⁶ ngɛ ligbi nɛ Mawu maa gu Yesu Kristo nɔ kɛ kojo nimli a laami mi ni ɔmɛ ngɛ ye Sane Kpakpa a nya a.

Yudafo ɔmɛ kɛ Mlaa a

¹⁷ Se ke moo lɛɛ a tsɛɛ mo Yuda no, nɛ o hɛ ngɛ Mlaa a nɔ, nɛ o fiaa fɔɔ Mawu nɔ,

¹⁸ nɛ o le e suɔmi nya ni ɔmɛ, nɛ o le nihi nɛ hi, ejakaa a je Mlaa a mi kɛ tsɔɔ mo,

¹⁹ nɛ o buu o he kaa o ji hɛ yuyuili a blɔ tsɔɔlɔ kɛ nihi nɛ ngɛ diblii mi ɔmɛ a la,

²⁰ kɛ nihi nɛ li ni a tsɔselɔ, kɛ bimwɔwi a tsɔɔlɔ, nɔ nɛ hɛɛ nile kɛ anɔkuale nɛ ngɛ Mlaa a mi ɔ su ɔ,

²¹ jeha nɛ ɔ mo nɛ o tsɔɔ ni kpahi a ni ɔ, o tsɔɔ we mo nitsɛ o he lo? O fiɛɔ ke “a ko ju,” se o ju we lo?

²² O deɔ ke “a ko bɔ ajuama,” se o bɔɛ ajuama lo? O nyɛɛ amagahi, se o ju we a sɔlemi we nihi lo?

²³ Mo nɛ o kɛ Mlaa a fia a, o kɛ Mlaa a nɔ tɔmi ɔ gbee Mawu he guɛ.

²⁴ Ejakaa nyɛ he ɔ, a tuɔ Mawu biɛ ɔ he musu bɔmi munyuhi ngɛ majeli ɔmɛ a kpɛti, kaa bɔ nɛ a ngma a.

²⁵ Se ke o yeɔ Mlaa a nɔ ɔ, jinɛ nɔ pomi he ngɛ se nami; se ke o pee o he Mlaa a nɔ tɔlɔ ɔ, o pomi ɔ plɛ mɔmlɔtɔ.

²⁶ Se ke mɔmlɔtɔsɛ yeɔ Mlaa a blɔnya amɛ a nɔ ɔ, anɛ a be e mɔmlɔtɔ ɔ bue kaa pomi lo?

²⁷ Fɔmi mi mɔmlɔtɔsɛ nɛ yeɔ Mlaa a nɔ ɔ maa kojo mo nɛ o gu ngmami okadi kɛ nɔ pomi nɔ kɛ pee o he mlaa nɔ tɔlɔ ɔ.

²⁸ Ejakaa pi nɔ nɛ a naa lɛ kaa Yuda no kɛkɛɛkɛ ɔ ji Yuda no, nɛ jeha nɛ ɔ hu pi kpo nɔ nɔ nɛ ngɛ he lo mi ɔ ji pomi;

²⁹ se mohu nɔ nɛ ji Yudafo no ngɛ mi mi je ɔ lɛ ji Yuda no; nɛ tsui mi nɔ pomi nɛ ngɛ mumi mi, nɛ pi ngmami okadi mi ɔ, ji nɔ pomi nɛ e yi jemi ɔ ji nimli a ngɔ, se mohu Mawu ngɔ e jee.