Romabi 16 - Somi He Ɔ

Paulo sɛmanemi munyuhi

¹ I ngɛ wa nyɛmi yo Foibe nɛ ji Kenkrea asafo ɔ sɔmɔlɔ ɔ yi jee kɛ ngɛ nyɛ hae,

² konɛ nyɛ he lɛ hɛ muɔ ngɛ Nyɔmtsɛ ɔ mi bɔ nɛ sa ni klɔuklɔu ɔmɛ, nɛ nyɛɛ piɛ e he ngɛ ni tsumi tsuaa ni tsumi nɛ nyɛ he maa hia lɛ ngɛ mi ɔ mi; ejakaa lɛ nitsɛ hu, e ji nihi fuu kɛ imi nitsɛ hu ye he piɛlɔ.

³ Nyɛ nga Priska kɛ Akwila, nɛ ji ye huɛmɛ ni tsuli ngɛ Kristo Yesu mi ɔ ha mi,

⁴ nihi nɛ kɛ a he wo gbenɔ mi ngɛ ye wami he, nɛ pi imi kɛkɛ nɛ i naa mɛ si, se mohu majeli ɔmɛ a mi asafo ɔmɛ kulaa hu ngɛ mɛ si nae.

⁵ Nyɛ nga asafo nɛ ngɛ a we ɔ hulɔ. Nyɛ nga ye suɔlɔ Epaineto nɛ ji kekleekle nɔ ngɛ Asia nɛ kɛ e he ha Kristo ɔ.

⁶ Nyɛ nga Maria nɛ gbo wa he dengme fuu ɔ.

⁷ Nyɛ nga Androniko kɛ Yunia, ye wekuli nɛ a wo i kɛ mɛ tsu mi, nɛ a ngɛ biɛ ngɛ bɔfo ɔmɛ akpɛti nɛ a sɛ ye hlami ngɛ Kristo mi ɔ.

⁸ Nyɛ nga Amplia, nɔ nɛ i suɔ ngɛ Nyɔmtsɛ ɔ mi ɔ.

⁹ Nyɛ nga Urbano nɛ ji wa huɛ ni tsulɔ ngɛ Kristo mi ɔ, kɛ ye suɔlɔ Staki.

¹⁰ Nyɛ nga Apele nɔ nɛ he nu si ngɛ Kristo mi ɔ. Nyɛ nga nihi nɛ je Aristobulo we mi bi ɔmɛ a kpɛti ɔ.

¹¹ Nyɛ nga ye wekuno Herodion ɔ. Nyɛ nga nihi nɛ je Marsiko we mi bi ɔmɛ a kpɛti nɛ a ngɛ Nyɔmtsɛ ɔ mi ɔ.

¹² Nyɛ nga Trifaina kɛ Trifosa nɛ bɔɔ mɔde ngɛ Nyɔmtsɛ ɔ mi ɔ. Nyɛ nga Persi, nɔ nɛ a suɔ nɛ e tsu ni fuu ngɛ Nyɔmtsɛ ɔ mi ɔ.

¹³ Nyɛ nga Rufo, nɔ nɛ a hla ngɛ Nyɔmtsɛ ɔ mi ɔ nɛ e nyɛ pee mi bi hulɔ ɔ.

¹⁴ Nyɛ nga Asinkrito, Felgon, Herma, Patroba, Herme kɛ nyɛmimɛ nɛ kɛ mɛ ngɛ ɔ.

¹⁵ Nyɛ nga Filogo kɛ Yulia, Nerea kɛ e nyɛmi yo ɔ, kɛ Olimpa kɛ ni klɔuklɔu ɔmɛ nɛ kɛ mɛ ngɛ ɔ kulaa.

¹⁶ Nyɛɛ kɛ nya he fiɔmi klɔuu nɛ nga nyɛ he. Kristo asafo ɔ tsuo biɔ nyɛ.

Nyagbe nitsɔɔmi

¹⁷ Jeha nɛ, mamimɛ, i kpa nyɛ pɛɛ nɛ nyɛ hɛ nɛ hi nihi nɛ jee tsɔɔmi nɛ nyɛ kase ɔ se nɛ a kɛ mi gbamihi kɛ kpangmi tomi nihi baa amɛ a he, nɛ nyɛɛ hɛ nyɛ he kɛ je a he.

¹⁸ Ejakaa nihi nɛ ngɛ kikɛ ɔ, pi wa Nyɔmtsɛ Yesu Kristo nɛ a sɔmɔɔ, se mohu mɛ nitsɛmɛ a muklii; nɛ a kɛ nya mi dɔkɔɔ kɛ sisimi munyuhi mlɔɔ nihi nɛ li yayami ɔmɛ a tsui.

¹⁹ Se nyɛɛ lɛɛ, nyɛ tue bumi ɔ nihi tsuo nu he, lɔ ɔ he ɔ i na nyɛ he bua jɔmi. Se i suɔ kaa nyɛɛ pee nyɛ he ni leli ngɛ nɔ kpakpa blɔfami; se nɔ yayami blɔfami ɔ, nihi nɛ a li nɔ́ ko.

²⁰ Se e be kɛe nɛ he jɔmi Mawu ɔ maa naa Satan nɔ kulaa ngɛ nyɛ nane si. Wa Nyɔmtsɛ Yesu Kristo dloomi ɔ kɛ nyɛ nɛ hi si!

²¹ Ye huɛ ni tsulɔ Timoteo kɛ ye wekuli Lukio kɛ Yason kɛ Sosipatre biɔ nyɛ.

²² Imi Tortio hu nɛ i ngma kikɛmɛ a womi nɛ ɔ i biɔ nyɛ ngɛ Nyɔmtsɛ ɔ mi.

²³ Gaio nɛ ji i kɛ asafo ɔ kulaa wetsɛ ɔ biɔ nyɛ. Erasto nɛ ji ma sika tolɔ ɔ, kɛ wa nyɛmi Kwarto biɔ nyɛ.

²⁴ [Wa Nyɔmtsɛ Yesu Kristo dloomi ɔ kɛ nyɛ tsuo kulaa nɛ hi si! Amen.]

Nyagbe yijemi sɔlemi

²⁵ Se nɔ nɛ ma nyɛ ma ha nɛ nyɛ fi si wawɛɛ ngɛ Sane Kpakpa a kɛ Yesu Kristo fiɛmi ɔ nya, ngɛ laami sane nɛ a ngɔ laa kɛ je neneene lokoo ɔ kpo jemi nya a,

²⁶ nɔ́ nɛ jeha nɛ je ngɔ tsɔɔ paa ngɛ neneene Mawu ɔ kita nya a, nɛ a gu gbali ɔmɛ a ngmami ɔmɛ a nɔ wo nɔ ta tsɔɔ majeli ɔmɛ kulaa konɛ a bu hemi kɛ yemi ɔ tue —

²⁷ lɛ Mawu nɛ ji ni lelɔ kake too ɔ, a ngɔ nyami ngɔ ha ngɛ Yesu Kristo mi kɛ ya neneene! Amen.