Romabi 14 - Somi He Ɔ

Koo kojo o nyɛmi

¹ Nɔ nɛ gbɔjɔ ngɛ hemi kɛ yemi mi ɔ, nyɛ he lɛ atuu, se nyɛ ko kojo e susumi ɔmɛ.

² Nɔ ko ngɛ hemi kɛ yemi nɛ e kɛ yeɔ nɔ tsuaa nɔ; se nɔ nɛ gbɔjɔ ɔ, pui kɛkɛ e yeɔ.

³ Nɔ nɛ yeɔ ɔ, e ko gbe nɔ nɛ yi ɔ he guɛ; nɛ nɔ nɛ yi ɔ, e ko kojo nɔ nɛ yeɔ ɔ, ejakaa Mawu ngɔ lɛ.

⁴ Moo lɛɛ mɛnɔ ji mo nɛ o kojoɔ nɔ kpa sɔmɔlɔ? Lɛ nitsɛ e nyɔmtsɛ ɔ e daa si aloo e nɔɔ si haa; se a ma ha e maa da si, ejakaa Mawu ngɛ he wami nɛ e ma ha e da si.

⁵ Nɔ ko buu ligbi ko pe eko, nɛ nɔ ko hu buu ligbi tsuaa ligbi pɛpɛɛpɛ. Nɔ tsuaa nɔ nɛ na lɛ nitsɛ e juɛmi ɔ nɔ he wami.

⁶ Nɔ nɛ buu ligbi ɔ, Nyɔmtsɛ ɔ e buu haa; nɛ nɔ nɛ yeɔ ni ɔ, Nyɔmtsɛ ɔ eyeɔ haa, ejakaa e naa Mawu si. Nɛ nɔ nɛ yi ni ɔ, Nyɔmtsɛ ɔ e yi ha, nɛ e naa Mawu si hulɔ.

⁷ Ejakaa wa ti nɔ ko hɛ ka we hi lɛ nitsɛ e he.

⁸ Se ke wa hɛ ngɛ ɔ, Nyɔmtsɛ ɔ wa hɛ ngɛ kɛ ha; nɛ ke wa gbo hu, Nyɔmtsɛ ɔ wa gbo kɛ ha. Lɔ ɔ he ɔ wa hɛ ngɛ jio, wa gbo jio, Nyɔmtsɛ ɔ nihi ji wɔ.

⁹ Ejakaa enɛ ɔ he je nɛ Kristo gbo nɛ e te si nɛ e hɛ ngɛ benɛ pee nɛ e plɛ ni gbogboehi kɛ ninɛmɛ nɛ a hɛ ngɛ kulaa a Nyɔmtsɛ.

¹⁰ Se moo lɛɛ mɛni he je nɛ o kojoɔ o nyɛmi? Aloo mo hu mɛni he je nɛ o gbee o nyɛmi he guɛ? Ejakaa wɔ tsuo kulaa wa maa da Kristo kojomi sɛ ɔ hɛ mi.

¹¹ Ejakaa a ngma ke: “Nyɔmtsɛ ɔ ke: Akɛnɛ ye hɛ ngɛ nɛ ɔ ɔ, Nakutso tsuaa nakutso ma kpla si ha mi; Nɛ lilɛ tsuaa lilɛ maa jaje Mawu ngɔ tsɔɔ.”

¹² Lɛɛ lɔ ɔ he ɔ wa ti nɔ tsuaa nɔ maa bu lɛ nitsɛ e he akɔtaa ngɛ ha Mawu.

Ko ha nɛ onyɛmi nɛ gbee si

¹³ Lɔ ɔ he ɔ, nyɛ ko ha nɛ waa kojo wa he hu; se enɛ ɔ mohu nyɛɛ kojo, kaa nɔ ko ko to tɛmi nɔ́ loo kpangmi ko ngɔ ha e nyɛmi.

¹⁴ I le, nɛ jeha nɛ hu i ngɛ nɔ he wami ngɛ Nyɔmtsɛ Yesu mi, kaa nɔ́ ko nɔ́ ko be nɛl ɛ nitsɛ e ji he blemi nɔ́ ja nɔ nɛ buu nɔ́ ko kaa he blemi nɔ́ ɔ, lɛ nɛ e plɛɛ he blemi nɔ́ kɛ haa.

¹⁵ Se ke niyeni ko he je nɛ o haa o nyɛmi yeɔ kɔmɔ ɔɔ lɛɛ tsa pi suɔmi nya nɛ o ngɛ o je mi bae ngɛ ɔ hu. O kɛ o niyeni ɔ ko kpata nɔ nɛ Kristo ba gbo ha lɛ ɔ hɛ mi.

¹⁶ Lɔ ɔ he ɔ, nyɛ ko ha nɛ a tu nyɛ nɔ kpakpa a he munyu yaya.

¹⁷ Ejakaa Mawu matsɛ yemi ɔ, e pi ni yemi kɛ ni numi, se mohu e ji dami kɛ he jɔmi kɛ Mumi Klɔuklɔu mi bua jɔmi.

¹⁸ Ejakaa nɔ nɛ sɔmɔɔ Kristo ngɛ enɛ ɔmɛ a mi ɔ, Mawu naa e he tsui, nɛ e saa nimli a hɛ mi hulɔ.

¹⁹ Lɔ ɔ he ɔ jeha nɛ, nyɛ ha waa di he jɔmi nihi kɛ nihi nɛ waa kɛ ma ha wa nyɛmimɛ a nane maa nu si ɔ mohu a se.

²⁰ Ko puɛ Mawu ni tsumi ɔ ngɛ niyeni ko he. Nihi tsuo he tsɔ lɛɛ, se kɛ ɔ, e ji yayami ha nɔ nɛ yeɔ kɛ toɔ kpangmi ɔ.

²¹ E hi kaa o yi lo nɛ jeha nɛ hu o nui wai loo nɔ́ ko nɛ maa to o nyɛmi kpangmi loo nɛ e ma ha e nane ma kpata aloo nɛ e ma ha e kɔni mi maa jɔ.

²² Moo lɛɛ o ngɛ hemi kɛ yemi. Kɛ to ha mo nitsɛ o he ngɛ Mawu hɛ mi. A gbaa nɔ nɛ kojo we lɛ nitsɛ e he ngɛ nɔ́ nɛ e buu kaa e hi ɔ mi ɔ.

²³ Se nɔ nɛ yi mi tɛ̃ lɛ ɔ, ke e ye ɔ, e yeɔ fɔ, mɛni he je ɔ, e ji hemi kɛ yemi mi; nɛ nɔ́ tsuaa nɔ́ nɛ ji hemi kɛ yemi mi ɔ, yayami ʼi.