Romabi 13 - Somi He Ɔ

Blɔnyanitsumi ngɛ ma mi

¹ Nɔ tsuaa nɔ nɛ ba e he si ngɔ ha nɔ yeli nɛ yeɔ nɔ ɔ. Ejakaa he blɔ ko be nɛ e ji Mawu ngɔ; se he blɔhi nɛ ngɛ ɔ Mawu nɛ to.

² Lɔ ɔ he ɔ, nɔ tsuaa nɔ nɛ tee si siɔ he blɔ ɔ, Mawu blɔ nya tomi ɔ e ngɛ si tee kɛ ngɛ woe ɔ nɛ; nɛ nihi nɛ tee si ja a ma na a kojomi.

³ Ejakaa nɔ yeli ɔmɛ ɔ tsa pi tsumi kpakpahi a he gbeye nɛ a woɔ, se ni tsumi yayahi mohu. Anɛ o suɔ nɛ o ko ye nɔ yelɔ ɔ gbeye lo? Lɛɛ pee nɔ kpakpa, nɛ o ma na yi jemi kɛ maa je e dɛ mi;

⁴ ejakaa Mawu sɔmɔlɔ ji lɛ ngɛ o he, konɛ e hi ha mo. Se ke o pee nɔ́ nɛ ji nɔ́ yayami ɔ, yee gbeye! Ejakaa tsa pi yaka nɛ e hɛɛ hiɔ ɔ; se e ji Mawu sɔmɔlɔ nɛ kɛ mi mi fumi yeɔ lue ngɛ nɔ nɛ tsuɔ ni yayahi ɔ nɔ.

⁵ Lɔ ɔ he ɔ, e sa kaa a baa he si, pi ngɛ Mawu abofu ɔ kɛkɛ he, se mohu ngɛ he ni lemi he hulɔ.

⁶ Enɛ he je hulɔ nɛ nyɛ tsuɔ onia a nɛ. Ejakaa Mawu tsɔli ji mɛ, nɛ kikɛmɛ a sɔmɔmi nɛ ɔ nɔuu he nɛ a ngɛ ɔ nɛ.

⁷ Lɔ ɔ he ɔ bɔ nɛ ji nɔ tsuaa nɔ blɔ nya a, nyɛɛ pee ha lɛ; onia tsumi jio, ma onia womi jio, gbeye yemi jio, nɔ bumi jio.

Nyɛmimɛ a suɔmi

⁸ Nyɛ ko hɛɛ nɔ ko nɔ ko hiɔ, kaa ja suɔmi nɛ nyɛɛ kɛ maa suɔ nyɛ sibi ɔ. Ejakaa nɔ nɛ suɔ e nyɛmi ɔ, e ye Mlaa a nɔ ta.

⁹ Ejakaa nɔ́ nɛ a de ke: “Koo bɔ ajuama! Koo gbe nɔmlɔ! Koo ju! Koo ye lakpa odase! O hɛ ko kɔ nɔ́ ko nɔ!” ɔ, enɛ ɔmɛ kulaa, kɛ ekpa komɛ hu nɛ ngɛ ɔ, hɔ kikɛmɛ a munyu nɛ ji: “Suɔ o nyɛmi kaa bɔ nɛ o suɔ mo nitsɛ o he” ɔ mi.

¹⁰ Suɔmi pee we e nyɛmi nɔ yayami ko, lɔ ɔ he je ɔ, suɔmi pɛ ji Mlaa a nɔ yemi.

¹¹ Enɛ ɔ se ɔ wa le be ɔ kaa jeha nɛ ngmlɛfia nɛ waa kɛ maa te si kɛ je mahɛ mi ɔ su; ejakaa jeha nɛ wa yi wami hemi ɔ na wɔ pe kekle benɛ wa he ye ɔ.

¹² Nyɔ ɔ be ta, na je nami na wɔ. Lɔ ɔ he ɔ nyɛ ha nɛ waa ngmɛɛ diblii mi ni tsumi ɔmɛ a he, nɛ waa wo la ta hwumi ni ɔmɛ.

¹³ Nyɛ ha nɛ waa ba wa je mi saminya bɔ nɛ sa piani, pi ngɛ yakayaka fiɛmi kɛ da demi mi; pi ngɛ ajuama bɔmi kɛ ya homi mi; pi ngɛ pɛ kɛ hunga jemi mi;

¹⁴ se mohu nyɛɛ wo Nyɔmtsɛ Yesu Kristo, nɛ nyɛ ko ha he lo ɔ he susumi ɔ ba plɛ he lo ɔ se dimi.