Romabi 10 - Somi He Ɔ

¹ Mamimɛ, nɔ́ nɛ ye tsui hlaa kɛ pɛɛ nɛ i kpaa Mawu haa Israel ji kaa a he a yi wami.

² Ejakaa i ngɛ he odase yee kaa a hɛ dɔɔ ngɛ Mawu he mohu, se pi ngɛ ni lemi nya.

³ Ejakaa a li Mawu dami ɔ, se mɛ nitsɛmɛ a dami mohu a hlaa nɛ a ngɔ ma si he je ɔ, a bɛ́ a he si hi Mawu dami ɔ.

⁴ Ejakaa Kristo ji Mlaa a nyagbe, nɛ lɛ ji dami kɛ ha nɔ tsuaa nɔ nɛ heɔ yeɔ ɔ. Yiwamihemi ngɛ kɛ ha nɔ tsuaa nɔ

⁵ Ejakaa Mose ngma ngɛ dami nɛ je Mlaa mi ɔ he ke: “Nɔmlɔ nɛ yeɔ enɛ ɔmɛ a nɔ ɔ yi ma na wa ngɛ mi.”

⁶ Se bɔ nɛ dami nɛ je hemi kɛ yemi mi ɔ deɔ ji nɛ ɔ nɛ: “Ko de ngɛ o tsui mi ke: ‘Mɛnɔ maa kuɔ kɛ ya hiɔwe?’ (lɔ ɔ ji, konɛ e ya ngɔ Kristo kɛ kple si);

⁷ aloo: ‘Mɛnɔ ma kple si kɛ ya sisi muɔ nɛ ɔ mi?’ ” (lɔ ɔ ji, konɛ e ya ngɔ Kristo kɛ je gbeje kɛ ba).

⁸ Se mohu kɛ e deɔ kɛɛ? Mawu munyu ɔ na mo ngɛ o nya mi kɛ o tsui mi tsuo; (kɔlɔ ɔ nɔuu ji hemi kɛ yemi munyu nɛ wa fiɛɛ ɔ nɛ).

⁹ Ke o kɛ o nya jaje ke Yesu ji Nyɔmtsɛ, nɛ o he ye ngɛ o tsui mi kaa Mawu tle lɛ si kɛ je gbeje ɔ, a ma he o yi wami.

¹⁰ Ejakaa tsui a kɛ heɔ yeɔ kɛ yaa dami mi, nɛ nya a kɛ jajeɔ kɛ yaa yi wami hemi mi.

¹¹ Ejakaa ngmami ɔ deɔ ke: “Nɔ tsuaa nɔ nɛ heɔ e nɔ yeɔ ɔ, zo be lɛ gbee.”

¹² Ejakaa slɔɔto ko be Yuda no kɛ Hela no kpɛti; ejakaa Nyɔmtsɛ kake mɛ kulaa a ngɛ, nɛ niatsɛ hu ji lɛ ha nihi tsuo nɛ kpaa ngmlaa kɛ tsɛɛ lɛ ɔ.

¹³ Ejakaa nɔ tsuaa nɔ nɛ ma kpa ngmlaa kɛ tsɛ Nyɔmtsɛ ɔ biɛ ɔ, a ma he e yi wami.

¹⁴ Se kɛ maa pee kɛɛ nɛ a ma kpa ngmlaa kɛ tsɛ nɔ nɛ a he we lɛ yi ɔ? Nɛ kɛ maa pee kɛɛ nɛ a ma he nɔ nɛ a nui e he sane ɔ ngɔ ye? Nɛ jeha nɛ hu, kɛ maa pee kɛɛ nɛ a maa nu ke fiɛlɔ ko be ɔ?

¹⁵ Nɛ kɛ maa pee kɛɛ nɛ a maa fiɛ ke a tsɔ we mɛ ɔ? Kaa bɔ nɛ a ngma a ke: “Hyɛ bɔ nɛ he jɔmi sane kpakpa fiɛli nɛ fiɛɛ ni kpakpa amɛ a nanehi ngɛ fɛu ha!”

¹⁶ Se kɛ̃ ɔ, pi nihi tsuo nɛ bu sane kpakpa a tue. Ejakaa Yesaia deɔ ke: “Nyɔmtsɛ, mɛnɔ he wa sane ɔ ye?”

¹⁷ Lɔ ɔ he ɔ hemi kɛ yemi ɔ, sane tue bumi mi e jee, nɛ sane tue bumi hu guu Mawu munyu ɔ nɔ kɛ baa.

¹⁸ Se i ngɛ bie ke: “Anɛ numi nɛ a nui lo?” Niinɛ kaa a gbi jije kɛ ho zugba mluku ɔ tsuo nɔ ya, nɛ a munyu ɔ su je mi nyagbe he ɔmɛ.

¹⁹ I ngɛ bie ekohu ke: “Anɛ Israel li lo?” Mose sɛ hlami de ke: “Ma ha nyɛ maa je ma nɛ pi ma ko he hunga; Nɛ i kɛ ma ko nɛ li nɔ́ ko maa wo nyɛ mi mi la.”

²⁰ Nɛ Yesaia kɛ kã de ke: “I ha nihi nɛ hla we mi ɔ na mi, Nɛ i je ye he kpo tsɔɔ nihi nɛ bi we ye si ɔ.”

²¹ Se Israel ɔ, e de mɛ ke: “Daa je nami i tsɛɛ ye nine mi haa Ma tue gboli kɛ sane nya jeli.”