Mateo 9 - Somi He Ɔ

Yesu tsa hulemi hiɔtsɛ ko

¹ Kɛkɛ nɛ Yesu sɛ lɛ mi, nɛ e po wo ɔ, nɛ e ba lɛ nitsɛ e ma a mi.

² Nɛ oʼɛ, a kɛ nɔ ko nɛ ngɛ hulemi hiɔ nue nɛ fɔɔ si ngɛ sa nɔ ba e ngɔ. Nɛ benɛ Yesu na a hemi kɛ yemi ɔ, e de hiɔtsɛ ɔ ke: “Bi, ha o tsui nɛ nɔ o mi, a kɛ o he yayami ɔmɛ pa mo!”

³ Nɛ oʼɛ, mlaa tsɔɔli ɔmɛ a ti ni kome de ngɛ a mi ke: “Musu nɔ nɛ ɔ ngɛ bɔe nɔ nɛ.”

⁴ Nɛ benɛ Yesu na a juɛmi ɔ, e ke: “Mɛni he je nɛ nyɛ ngɛ ni yayahi susue ngɛ nyɛ tsui mi nɛɔ?

⁵ Jeha nɛ ɔ nɔ́ nɛ a ma de ke: ‘A kɛ o he yayami ɔmɛ pa mo’ ɔ, aloo nɔ́ nɛ a ma de ke: ‘Tee si nɛ o nyɛɛ’ ɔ, te e mi nɔ́ nɛ demi wɛ hu?

⁶ Se benɛ pee nɛ nyɛ na le kaa Nɔmlɔ Bi ɔ ngɛ he blɔ ngɛ zugba a nɔ kaa e ngɔɔ yayamihi ngɔ paa a,” e de hiɔtsɛ ɔ ke: “Tee si, wo o sa a nɛ o ya o we mi!”

⁷ Nɛ e te si kɛ ho e we mi ya.

⁸ Se benɛ asafo ɔ na a, a nya kpɛ a he, nɛ a wo Mawu hɛ mi nyami kaa e ngɔ kikɛmɛ a he blɔ ha nimli.

Yesu tsɛ Mateo

⁹ Benɛ Yesu je lejɛ ɔ kɛ yaa a, e na nyumu ko nɛ a tsɛɛ lɛ Mateo nɛ e hii si ngɛ onia tsumi he ɔ, nɛ e de lɛ ke: “Nyɛɛ ye se!” Nɛ e te si nɛ e nyɛɛ e se.

¹⁰ Nɛ e ba mi kaa benɛ Yesu hii si ngɛ niyeni si ngɛ we ɔ mi ɔ, oʼɛ, onia tsuli kɛ yayami peeli babauu ba nɛ a kɛ lɛ kɛ e kaseli ɔmɛ ba ye ni.

¹¹ Benɛ Farisifo ɔmɛ na a, a bi e kaseli ɔmɛ ke: “Mɛni he je nyɛ tsɔɔlɔ ɔ kɛ onia tsuli kɛ yayami peeli ngɛ ni yee nɛ ɔ?”

¹² Se benɛ Yesu nu ɔ, e de mɛ ke: “Nihi nɛ ngɛ he wami ɔ tsopatsɛ he hia we mɛ, se mohu nihi nɛ ngɛ gboe ɔ.

¹³ Nyɛɛ ya nɛ nyɛ ya kase enɛ ɔ sisi: ‘Mɔbɔ nami i ngɛ hlae, se pi bɔ sami!’ Ejakaa i bɛ dali a tsemi, se mohu yayami peeli nɛ a tsake a tsui.”

Hwɔhami he sane

¹⁴ Kɛkɛ nɛ Yohane kaseli ɔmɛ ba e ngɔ ba de ke: “Mɛni he je waa kɛ Farisifo ɔmɛ pɔɔ hwɔ hami, nɛ o kaseli ɔmɛ lɛɛ a hɛ́ hwɔ ɔ?”

¹⁵ Nɛ Yesu de mɛ ke: “Anɛ yo kpeemi ɔ he biali ɔmɛ ma nyɛ maa ye kɔmɔ be abɔ nɛ ayɛflo huno ɔ kɛ mɛ ngɛ ɔ lo? Se be maa ba mo nɛ a maa ngɔ ayɛflo huno ɔ kɛ maa je a kpɛti kɛ ho, nɛ lɔ ɔ loko a maa ha hwɔ.”

¹⁶ “Nɔ ko ngɔɛ bo nya he kɛ ta we tade momo mi; ejakaa nɔ́ nɛ a kɛ ta a nɛ jinɛ a kɛ tsi puɔ ɔ, yeɔ tade ɔ, nɛ puɔ ɔ bliɔ mohu pe kekle ɔ.

¹⁷ Jeha nɛ ɔ a ngɔɛ wai he wui lohwe he womi tɔ momohi a mi; lɔ ɔ lɛɛ lohwe he womi tɔ ɔmɛ ma pɛ, nɛ wai ɔ ma pue si, nɛ lohwe he womi tɔ ɔmɛ ma puɛ; se wai he ɔ, lohwe he womi tɔ hehi a mi mohu a kɛ woɔ, nɛ enyɔ kulaa puɛ we.”

Ma nɔkɔtɔma bi yo ɔ kɛ Yo nɛ ta Yesu tade ɔ he ɔ

¹⁸ Benɛ Yesu ngɛ munyu nɛ ɔmɛ tue kɛ ngɛ mɛ tsɔɔe ɔ, oʼɛ, nɔkɔtɔma ko ba ba kpla si ngɛ e hɛ mi nɛ e de lɛ ke: “Ye biyo je mi amlɔ nɛ ɔ; se ba nɛ o ba ngɔ o nine ngɔ fɔ e nɔ, nɛ e hɛ maa tsɛ.”

¹⁹ Nɛ Yesu te si nɛ e kɛ e kaseli ɔmɛ nyɛɛ nyumu ɔ se.

²⁰ Nɛ oʼɛ, yo ko nɛ ngɛ muɔdɛmi hiɔ nue jeha nyɔngma kɛ enyɔ ɔ ba je e se je nɛ e ta e tade ɔ nya a he.

²¹ Ejakaa e de ngɛ e mi ke: “Ke i na e tade ɔ he ta kɛkɛ ɔ ye he maa wa mi.”

²² Yesu plɛ e he, nɛ benɛ e na lɛ ɔ, e ke: “Biyo, ha otsui nɛ nɔ o mi, o hemi kɛ yemi ɔ he o yiwami!” Nɛ yo ɔ he wa lɛ jamɛ a ngmlɛfia a nɔ nɔuu.

²³ Nɛ benɛ Yesu ba nɔkɔtɔma a we ɔ mi nɛ e na bɛ kpali kɛ nihi fuu nɛ a ngɛ hoo pee ɔ,

²⁴ e de mɛ ke: “Nyɛɛ je hiɛ ɔ, yiheyo ɔ gbo we, se mahɛ kɛkɛ e ngɛ hwɔe.” Nɛ a muɔ lɛ.

²⁵ Nɛ benɛ a fie ni ɔmɛ ɔ, e sɛ tsu ɔ mi nɛ e pɛtɛ yiheyo ɔ nine si kɛkɛ nɛ yiheyo ɔ te si.

²⁶ Nɛ kikɛmɛ a sane nɛ ɔ gbɛ fia lejɛ ɔ zugba a tsuo nɔ.

Yesu tsa hɛyuyuili enyɔ

²⁷ Nɛ benɛ Yesu le jejɛ ɔ kɛ bee ɔ hɛ yuyuili enyɔ nyɛɛ e se nɛ a ngɛ ngmlaa kpae ke: “Moo na wɔ mɔbɔ, David Bi!”

²⁸ Nɛ benɛ e sɛ we ɔ mi ɔ, hɛ yuyuili ɔmɛ ba e ngɔ; nɛ Yesu bi mɛ ke: “Nyɛ heɔ yeɔ kaa ma nyɛ enɛ ɔ ma pee lo?” A de lɛ ke: “Ee, Mawetsɛ!”

²⁹ Kɛkɛ nɛ e ta a hɛngmɛ ɔmɛ a he nɛ e ke: “Bɔ nɛ nyɛ heɔ yeɔ ɔ, a pee ja ngɔ ha nyɛ;”

³⁰ nɛ a hɛngmɛ ɔmɛ bli. Nɛ Yesu bɔ mɛ kɔkɔ ke: “Nyɛɛ hyɛ nɛ nɔ ko ko le enɛ ɔ!”

³¹ Se mɛɛ lɛɛ, benɛ a je lejɛ ɔ, a ya je e yi ngɛ lejɛ ɔ ni ɔmɛ a mi tsuo.

Yesu tsa amuɛti ko

³² Benɛ ni nɛ ɔmɛ ngɛ kpo jee ɔ, oʼɛ, a kɛ amuɛti ko nɛ mumi yayami ngɛ e mi ba e ngɔ.

³³ Nɛ benɛ e hia mumi yayami ɔ, amuɛti ɔ tu munyu. Nɛ asafo ɔ he nya si mɛ nɛ a ke: “A nɛ́ kikɛmɛ a nɔ́ ko hyɛ ngɛ Israel!”

³⁴ Se Farisifo ɔmɛ de ke: “Mumi yayami ɔmɛ a tsɛ ɔ hewami nya e hiaa muni yayami ɔmɛ ɔ nɛ.”

Yesu mukliimisami

³⁵ Nɛ Yesu kpa ma amɛ kɛ kɔpe ɔmɛ tsuo a nɔ nɛ e tsɔɔ ni ngɛ a kpe he ɔmɛ nɛ e fiɛɔ matsɛ yemi ɔ he sane kpakpa a, nɛ e tsaa hiɔ tsuaa hiɔ kɛ dengme tsuaa dengme.

³⁶ Se benɛ e na nihi babauu ɔ, e muklii mi sa lɛ ngɛ a he, ejakaa pɔ tɔ mɛ nɛ a dɛ yaa kaa tohi nɛ be hyɛlɔ.

³⁷ Kɛkɛ nɛ e de e kaseli ɔmɛ ke: “Ni kpami ɔ hiɛ se mohu ni tsuli ɔmɛ pi.

³⁸ Lɔ ɔ he ɔ nyɛ kpa ni kpami nyɔmtsɛ ɔ pɛɛ konɛ e wo ni tsuli blɔ kɛ ba e ni kpami ɔ mi.”