Mateo 7 - Somi He Ɔ

Kojomi

¹ “Nyɛ ko kojo konɛ a ko kojo nyɛ?

² Ejakaa kojomi nɛ nyɛɛ kɛ kojoɔ ɔ, a kɛ maa kojo nyɛ, nɛ susumi nɔ nɛ nyɛɛ kɛ susuu ɔ, a kɛ ma susu ha nyɛ.

³ Se mɛni he je o naa ngu nyafii nɛ ngɛ o nyɛmi hɛngmɛ nɔ ɔ, nɛ mo nitse o hɛngmɛ nɔ plai ɔ lɛɛ o nɛ ɔ?

⁴ Aloo kɛ maa pee kɛ nɛ o ma de o nyɛmi ke: ‘Ha ma je ngu nyafii ɔ ngɛ o hɛngmɛ nɔ,’ be mi nɛ plai ngɛ mo nitse o hɛngmɛ nɔ ɔ?

⁵ Osatotsɛ, je plai ɔ ngɛ mo nitse o hɛngmɛ nɔ kekle, nɛ lɔ ɔ loko o maa hyɛ nɔ paa nɛ o ma je ngu nyafii ɔ ngɛ o nyɛmi ɔ hɛngmɛ nɔ.

⁶ “Nyɛ ko ngɔ nɔ́ nɛ ji klɔuklɔu ɔ ngɔ ha gbehi; jeha nɛ ɔ hu nyɛ ko sake nyɛ juinehi ngɔ pue kpotoohi a hɛ mi nɛ a ba naa nɔ ngɛ a nane si, nɛ a plɛ a hɛ mi nɛ a ba tsɔtskɔɔ nyɛ mi.”

Nyɛ bi, nyɛ hla, nyɛ si

⁷ “Nyɛ bi, nɛ a ma ha nyɛ; nyɛ hla nɛ nyɛ maa na; nyɛ si, nɛ a ma bli ha nyɛ.

⁸ Ejakaa nɔ tsuaa nɔ nɛ biɔ ɔ, e nine suu nɔ; nɛ nɔ nɛ hlaa a, e naa; nɛ nɔ nɛ siɔ ɔ, a bliɔ haa lɛ.

⁹ Nyɛ ti mɛnɔ nɛ ke e bi bi lɛ abolo nɛ e ma ha lɛ tɛ?

¹⁰ Aloo ke e bi lɛ wo mi lo, nɛ e ma ha lɛ sinɔ?

¹¹ Lɛɛ ke nyɛ nɛ nyɛ ji nimli yayamihi ɔ nyɛ le bɔ nɛ nyɛ peɔ ngɔɔ ni kpakpahi ngɔ haa nyɛ bimɛ ɔ, enyɛmɛ nɔuu nɛ nyɛ tsɛ nɛ ngɛ hiɔwe ɔ be ni kpakpahi ngɔe kɛ ha nihi nɛ biɔ lɛ ɔ?

¹² “Lɔ ɔ he ɔ, nɔ́ tsuaa nɔ́ nɛ nyɛ hlaa kaa nihi nɛ pee ngɔ ha nyɛ ɔ, nyɛ hu nyɛɛ pee ja nɔuu ngɔ ha mɛ, ejakaa enɛ ɔ ji mlaa a kɛ gbali ɔmɛ.”

Agbo tokofii ɔ

¹³ “Nyɛɛ sɛ agbo tokofii ɔ mi! Ejakaa agbo nɛ bli kɛ blɔ gbajaa ji nɔ nɛ kɛ nɔ yaa hemi kpatami mi ɔ nɛ, nɛ nihi babauu lɛ sɛɛ mi.

¹⁴ Se agbo tokofii kɛ blɔ nɛ hɛ ji nɔ nɛ kɛ nɔ yaa wami mi ɔ nɛ, nɛ nihi bɔɔ ji nihi nɛ naa kɔlɔ ɔ.”

Tso kɛ e yiblii

¹⁵ “Nyɛɛ hyɛ saminya ngɛ osato gbali ɔmɛ a he, ejakaa a ngɔɔ to he womi ngɔ haa a he kɛ baa nyɛ ngɔ, se a mi mi je ɔ ogbetee ni hali ji mɛ.

¹⁶ A yiblii ɔmɛ nyɛ ma kɛ le mɛ. Anɛ a tsɔɔ wai yiblii ngɛ mio tsohi a nɔ, aloo a tsɔɔ ngmɔkɔ ngɛ sezlehi anɔ?

¹⁷ Ja nɔuu tso tsuaa tso nɛ ji tso kpakpa a woɔ yiblii kpakpahi; se tso yaya woɔ yiblii yayahi.

¹⁸ Tso kpakpa be yiblii yaya nyɛe maa wo nɛ jeha nɛ ɔ hu tso yaya be yiblii kpakpahi nyɛe maa wo.

¹⁹ Tso tsuaa tso nɛ wui yiblii kpakpahi ɔ, a maa hɛ nɛ a maa ngɔ ngɔ wo la mi?

²⁰ Lɔ ɔ he ɔ a yiblii ɔmɛ nyɛɛ kɛ maa le mɛ.”

I li nyɛ kulaa

²¹ “Pi nɔ tsuaa nɔ nɛ deɔ mi ke: ‘Nyɔmtsɛ, Nyɔmtsɛ’ ɔ nɛ maa sɛ hiɔwe matsɛ yemi ɔ mi; se mohu nɔ nɛ peɔ Tsaatsɛ nɛ ngɛ hiɔwe ɔ suɔmi nya ni ɔ.

²² Nihi fuu ma de mi ngɛ jamɛ a ligbi ɔ nɔ ke: ‘Nyɔmtsɛ, Nyɔmtsɛ, anɛ pi mo o biɛ ɔ mi nɛ wa gba ngɛ, nɛ o biɛ ɔ mi wa hia numi yayamihi ngɛ, nɛ o biɛ ɔ mi wa pee he wami nihi fuu ngɛ lo?’

²³ Nɛ lɔ ɔ lɛɛ ma gba mi ma de me ke: ‘I li nyɛ kulaa, nyɛɛ je ye nɔ, nyɛ nihi nɛ nyɛ tsuɔ nihi nɛ dɛ blɔ!’ ”

Tsumali enyɔ ɔ

²⁴ “Lɔ ɔ he ɔ, nɔ tsuaa nɔ nɛ nuɔ ye munyu nɛ ɔmɛ nɛ e yeɔ nɔ ɔ, ma ngɔ lɛ ngɔ to ga lelɔ nɛ ma e tsu ngɛ tɛ sa nɔ ɔ he.

²⁵ Nɛ hiɔmi nɛ, nɛ pahi hia, nɛ kɔɔhiɔ fia, nɛ a si tsu ɔ, se e hule we ejakaa a to sisi ngɛ tɛ sa nɔ.

²⁶ Nɛ nɔ tsuaa nɔ nɛ nuɔ ye munyu nɛ ɔmɛ nɛ e yi nɔ ɔ, a maa ngɔ lɛ ngɔ to nyumu kuasia nɛ ma e tsu ngɛ zia nɔ ɔ he.

²⁷ Nɛ hiɔmi nɛ, nɛ pahi hia, nɛ kɔɔhiɔ fia, nɛ a si tsuɔ ɔ, nɛ e hule, nɛ e hulemi ɔ kle.”

He blɔ nɛ Yesu ngɛ

²⁸ Nɛ e ba mi kaa benɛ Yesu gbe munyu nɛ ɔmɛ a nya a, ni ɔmɛ a he nya si mɛ ngɛ e ni tsɔɔmi ɔ he;

²⁹ ejakaa e tsɔɔ mɛ ni kaa nɔ ko nɛ ngɛ he blɔ, se pi kaa a mlaa tsɔɔli ɔmɛ.