Mateo 5 - Somi He Ɔ

Yoku nɔ fiɛmi

¹ Benɛ Yesu na asafo ɔ, e kuɔ kɛ ya yoku ɔ nɔ, nɛ e ya hi si. E kaseli ɔmɛ ba e ngɔ,

² nɛ e bɔni mɛ ni tsɔɔmi ke:

Buajɔmi nitsɛ

³ “A gbaa ninɛmɛ nɛ le kaa mumi mi ohiafohi ji mɛ ɔ: se a nɔ ji hiɔwe matsɛ yemi ɔ nɛ.

⁴ “A gbaa ninɛmɛ nɛ yeɔ kɔmɔ ɔ: se Mawu maa jɔɔ a bua.

⁵ “A gbaa ninɛmɛ nɛ he jɔ ɔ; se a ma na nɔ nɛ Mawu wo si ɔ.

⁶ “A gbaa ninɛmɛ nɛ a suɔmi nya ni ji kaa a pee nɔ nɛ Mawu suɔ ɔ: se Mawu ma ha a maa to kɛ bua jɔmi.

⁷ “A gbaa ninɛmɛ nɛ naa ni kpahi mɔbɔ ɔ, se Mawu maa na mɛ mɔbɔ.

⁸ “A gbaa ninɛmɛ nɛ a tsui mi tsɔ ɔ; se a maa na Mawu.

⁹ “A gbaa ninɛmɛ nɛ kpataa a: se a ma tsɛ mɛ Mawu bimɛ.

¹⁰ “A gbaa ninɛmɛ nɛ a waa mɛ yi mi ejakaa a peɔ Mawu suɔmi nya ni ɔ: se a nɔ ji hiɔwe matsɛ yemi ɔ nɛ.

¹¹ “A gbaa nyɛ ke nihi jɛ nyɛ nɛ a wa nyɛ yi mi nɛ a ngɔ nya kɛ tu munyu yaya tsuaa munyu yaya ngɔ si nyɛ ejakaa ye kaseli ji nyɛ ɔ.

¹² Nyɛ nya nɛ nyɛ bua nɛ jɔ; ejakaa hiɔwo ngua ngɛ ha nyɛ ngɛ hiɔwe; ejakaa ja a wa gbali nɛ sɛ nyɛ hlami ɔ yi mi.”

Ngo kɛ la

¹³ “Nyɛ ji ngo kɛ ha adesahi tsuo. Se ke ngo nya nyu gbo ɔ, mɛni a kɛ maa wo lɛ ngo ekohu? E he be senami hu, ja a tsɛ pue he nɛ nimli naa nɔ.

¹⁴ “Nyɛ ji la ha je ɔ tsuo. Ma nɛ a bɔ ngɛ yoku nɔ ɔ, e be nyɛe maa laa.

¹⁵ Jeha nɛ ɔ hu, nɔ ko su we kane kɛ mɛ́ sowe sisi: se mohu e kɛ maa kane tso nɔ, nɛ e tsoo haa nihi nɛ ngɛ we ɔ mi tsuo kulaa.

¹⁶ Ja nɔuu nyɛ ha nyɛ la nɛ tso ngɛ nimli a hɛ mi konɛ a na nyɛ ni peemi ni kpakpa amɛ nɛ ɛ wo nyɛ tsɛ nɛ ngɛ hiɔwe ɔ hɛ mi nyami.

Mlaa he nitsɔɔmi

¹⁷ “Nyɛ ko susu kaa imi Yesu i ba Mose mlaa aloo gbali ɔmɛ a tsɔɔmi ɔmɛ gumi; i bɛ mɛ gumi, se i ba nɛ ma ba gbe nya.

¹⁸ Niinɛ, i ngɛ nyɛ dee ke: Be abɔ nɛ hiɔwe kɛ zugba ngɛ lolo nɛ ɔ ɔ, kpɔ kake loo ngu nyafii pe kulaa be mlaa a mi jee ja a gbe nihi tsuo kulaa nya.

¹⁹ Lɔ ɔ he ɔ, nɔ tsuaa nɔ nɛ ma tɔ kita nɛ ɔmɛ a kpɛti nyafii kake nɔ, nɛ e maa tsɔɔ ni kpahi ke a pee ja a, e maa pee nyafii pe kulaa ngɛ hiɔwe matsɛ yemi ɔ mi; se nɔ tsuaa nɔ nɛ yeɔ mlaa a nɔ nɛ e tsɔɔ ni kpahi hu ke a pee ja a, e maa pee nɔ ngua ngɛ hiɔwe matsɛ yemi ɔ mi.

²⁰ I ngɛ nyɛ dee ke: Ke nyɛ dami ɔ pa we mlaa tsɔɔli ɔmɛ kɛ Farisifo ɔmɛ a nɔ ɔ, nyɛ be hiɔwe matsɛ yemi ɔ mi sɛe kulaa.”

Mukliimifumi he nitsɔɔmi

²¹ “Tse nyɛ nu kaa a de blematsɛmɛ ɔmɛ ke: ‘koo gbe nɔmlɔ, se nɔ tsuaa nɔ nɛ maa gbe nɔmlɔ ɔ, a kɛ lɛ maa ba kojolɔ ɔ hɛ mi.’

²² Se i ngɛ nyɛ dee ke: nɔ tsuaa nɔ nɛ muklii mi fuɔ e nyɛmi (yaka a), a kɛ lɛ maa ba kojolɔ ɔ hɛ mi; nɛ nɔ tsuaa nɔ nɛ deɔ e nyɛmi ke: ‘Yaka nɔmlɔ’ ɔ, a kɛ lɛ maa ba gua ngua a hɛ mi; nɛ nɔ tsuaa nɔ nɛ tsɛɛ e nyɛmi ke kuasia nɛ he be senami ɔ, e maa ye abosiami a je la a mi yami fɔ?

²³ Lɔ ɔ he ɔ ke o kɛ o nike ni ma Mawu hami ngɛ bɔ sami latɛ ɔ hɛ mi, nɛ o kai ngɛ lejɛ ɔ kaa o nyɛmi kɛ mo kpɛti ngɛ sane ko ɔ,

²⁴ si o nike ni ɔ ngɛ lejɛ ɔ ngɛ bɔ sami latɛ ɔ hɛ mi, nɛ o ya nɔuu nɛ o kɛ o nyɛmi ɔ ya kpata lolo, konɛ o kpale ba nɛ o kɛ o nike ni ɔ ba ha Mawu.

²⁵ “O kɛ o pɛbilɔ ɔ nɛ tsa mla benɛ nyɛ ngɛ blɔ ɔ nɔ kɛ yaa a, ke pi ja a, nyɛ lejɛ ɔ sumi nɔuu ɔ e maa ngɔ mo ngɔ ha kojolɔ ɔ, nɛ lɛ hu e maa ngɔ mo ngɔ ha tsɔlɔ ɔ, nɛ a maa wo mo tsu mi.

²⁶ Niinɛ, i ngɛ mo dee ke: O be lejɛ ɔ jee kɛ yaa si o maa wo nyagbe pɛsɛwa a.”

Gbapuɛmi he nitsɔɔmi

²⁷ “Tse nyɛ nu kaa a de blematsɛmɛ ɔmɛ ke: ‘Ko puɛ gba!’

²⁸ Se i ngɛ nyɛ e nɔ dee: Nɔ tsuaa nɔ nɛ hyɛɛ yo nɛ e he peɔ lɛ akɔnɔ ɔ, e yeɔ fɔ ejakaa e kɛ lɛ puɛ gba momo ngɛ e tsui mi.

²⁹ Ke o hiɛ ɔ nɔ hɛngmɛ haa o peɔ yayami ɔ, hia nɛ o sake ngɔ fɔ he; ejakaa e hi ha mo kaa o nɔmlɔ tso ɔ he nɔ́ ko laa pe nɔ nɛ a ma sake o nɔmlɔ tso mluku ɔ tsuo ngɔ fɔ abosiami a je la a mi.

³⁰ Nɛ ke o hiɛ ɔ nine haa o peɔ yayami ɔ, poo, nɛ o sake ngɔ fɔ he; ejakaa e hi ma mo kaa o laa o nine kake pe nɔ́ nɛ a maa ngɔ o nɔmlɔ tso mluku ɔ tsuo ngɔ wo abosiami a je la a mi.”

Gbamipomi he nitsɔɔmi

³¹ “A de hulɔ ke: ‘Nɔ tsuaa nɔ nɛ fieɔ e yo ɔ, sa nɛ e ha lɛ hemi womi.’

³² Se imi lɛɛ, i ngɛ nyɛ dee ke: Nɔ tsuaa nɔ nɛ fieɔ e yo nɛ pi ajuama bɔmi he ʼi ɔ, lɛɛ e yeɔ fɔ kaa e haa yo ɔ bɔɔ ajuama ke e ya gba ekohu; nɛ nyumu nɛ ya ngɔɔ lɛ ɔ hu puɛɔ gba.”

Kitakami he nitsɔɔmi

³³ “Tse nyɛ nu hulɔ kaa a de blematsɛmɛ ɔmɛ ke: ‘Ko ka kita gu, se mohu ye o kita amɛ a nɔ ha Nyɔmtsɛ ɔ.’

³⁴ Se imi lɛɛ i ngɛ nyɛ dee ke: Nyɛ ko ka kita kulaa! Nyɛ ko ka hiɔwe, ejakaa Mawu matsɛ sɛ ʼi,

³⁵ loo zugba, ejakaa Mawu nane si sɛ ʼi, loo Yerusalem, ejakaa e ji matsɛ ngua a ma.

³⁶ Ko ka o yi tete, ejakaa o be nyɛe yi bwɔmi kake, ehiɔ loo eyumu, maa pee.

³⁷ Ke nyɛ ke: ‘Ee’ ɔ, e pee: ‘Ee;’ nɛ ke nyɛ ke: ‘Dɛbi’ ɔ, e pee: ‘Dɛbi’; nɔ́ kpa ko nɛ pe enɛ ɔ ɔ, je abosiami dɛ mi.”

Peemi kɛ nanemitomi he nitsɔɔmi

³⁸ “Tse nyɛ nu nɛ a de ke: ‘Hɛngmɛ ngɛ hɛngmɛ nane mi,’ (kɛ) ‘lungu ngɛ lungu nane mi.’

³⁹ Se imi lɛɛ i ngɛ nyɛ dee ke: Nɔ nɛ maa pee nyɛ yayami ɔ, nyɛ ko pee lɛ ngɔ to nane mi; se ke nɔ ko gba o hiɛ ɔ nɔ tue mi ɔ, plɛ kake ɔ hu ha lɛ.

⁴⁰ Nɛ ke nɔ ko ngɔ mo kɛ ya kojomi he nɛ e ya sama mo ngɛ o gugue tade he ɔ, ha nɛ e ngɔ o hiɔwe tade ɔ hulɔ.

⁴¹ Nɛ ke nɔ ko nyɛ o nɔ ke o kɛ lɛ nɛ ya si tomi nya kake ɔ, o kɛ lɛ nɛ ya enyɔ.

⁴² Ha nɔ nɛ ngɛ mo nɔ́ bae ɔ, nɛ nɔ nɛ ngɛ hlae nɛ o pa lɛ nɔ́ ko ɔ, koo nyɛ lɛ he.”

Henyɛli a suɔmi

⁴³ “Tse nyɛ nu nɛ a de ke: ‘Suɔ o huɛ nɛ o nyɛ o henyɛlɔ.’

⁴⁴ Se imi lɛɛ, i ngɛ nyɛ dee ke: Nyɛɛ suɔ nyɛ henyɛli, nyɛɛ sɔle ha nihi nɛ waa nyɛ yi mi ɔ,

⁴⁵ enɛ ɔ ma ha nyɛ ma plɛ nyɛ tsɛ nɛ ngɛ hiɔwe ɔ bimɛ, ejakaa e haa e pu jee ngɛ nimli yayamihi kɛ nimli kpakpahi a nɔ, nɛ e haa hiɔmi nɛɛ haa dali kɛ yayami peeli.

⁴⁶ Se ke nyɛ suɔ ninɛmɛ nɛ suɔ nyɛ ɔ, mɛni hiɔwo nyɛ ngɛ? Anɛ to tsuli ɔmɛ tete pee we ja nɔuu lo?

⁴⁷ Nɛ ke nyɛ ngaa nyɛ nyɛmimɛ kɛkɛ ɔ, anɛ nyɛ pee nɔ́ ko tsɔ pe bɔ nɛ sa peemi lo? Anɛ wɔ jali ɔmɛ tete pee we ja nɔuu lo?

⁴⁸ Lɔ ɔ he ɔ nyɛɛ hi kɛ pi si, kaa bɔ nɛ nyɛ tsɛ nɛ ngɛ hiɔwe ɔ hu hi kɛ pi si ɔ.”