Mateo 28 - Somi He Ɔ

Yesu sitemi

¹ Hejɔɔmi ligbi ɔ nyagbe, benɛ je bɔni nami kɛ ma otsi ɔ kekleekle ligbi ɔ nɔ ɔ, Maria Magdalena kɛ Maria kpa ko ɔ ba yɔkɔ ɔ slaami.

² Nɛ oʼɛ, zugba mimiɛ wawɛɛ, ejakaa Nyɔmtsɛ ɔ bɔfo je hiɔwe kple si, nɛ e ba kpɛne tɛ ɔ kɛ je muɔ ɔ nya kɛ ya se, nɛ e ho hi nɔ.

³ Nɛ e hɛ mi kpɛ kaa slaba la, nɛ e tade ɔ hu hiɛ futafuta kaa snoo.

⁴ Gbeye nɛ nu buli ɔmɛ he je ɔ, a he do blibliibli nɛ a plɛ kaa ni gbogboehi.

⁵ Se bɔfo ɔ de yi ɔmɛ ke: “Nyɛɛ lɛɛ nyɛ ko ye gbeye, ejakaa i le kaa nyɛ ngɛ Yesu nɔ nɛ a sɛu ɔ hlae;

⁶ e be hiɛ ɔ, ejakaa e te si, kaa bɔ nɛ e de ɔ. Nyɛɛ ba nɛ nyɛ ba hyɛ he nɛ Nyɔmtsɛ ɔ fɔ si ngɛ ɔ.

⁷ Nɛ nyɛɛ ya esɔ esɔ nɛ nyɛ ya de e kaseli ɔmɛ ke e te si kɛ je gbeje; nɛ oʼɛ, e ngɛ nyɛ hlami sɛe kɛ yaa Galilea; lejɛ ɔ nyɛ maa na lɛ ngɛ; oʼɛ; i de nyɛ.”

⁸ Nɛ a pue nɔ kɛ je nɔpu he ɔ esɔ esɔ kɛ gbeye kɛ nyami babauu, nɛ a hɛɛ fo konɛ a ya sɛɛ ha e kaseli ɔmɛ.

⁹ Nɛ benɛ yi ɔmɛ yaa nɛ a ya sɛɛ ha e kaseli ɔmɛ ɔ, oʼɛ, Yesu kɛ mɛ ba kpe nɛ e ke: “I ngaa nyɛ!” Nɛ a ba nu e nane, nɛ a kpla si nɛ a ja lɛ.

¹⁰ Kɛkɛ nɛ Yesu de mɛ ke: “Nyɛ ko ye gbeye; nyɛɛ ya nɛ nyɛ ya de ye nyɛmimɛ ɔmɛ konɛ a ya Galilea; se lejɛ ɔ a maa na mi ngɛ.”

Nikɔtɔma amɛ ha buli ɔmɛ nyɔ mi mi

¹¹ Se benɛ a yaa a, oʼɛ, buli ɔmɛ a ti ni komɛ ba ma a mi, nɛ a ba sɛɛ nihi nɛ a pee ɔ tsuo kulaa ngɔ tsɔɔ osɔfo nikɔtɔma amɛ.

¹² Nɛ benɛ a kɛ nikɔtɔma amɛ bɔ gua nɛ a ya da a, a ha aslaafo ɔmɛ sika fuu,

¹³ a ke: “Nyɛ de ke nyɔ mi, benɛ wa hwɔ mahɛ ɔ, lɛ be ɔ mi e kaseli ɔmɛ ba nɛ a ba ju lɛ kɛ ho.

¹⁴ Nɛ ke amlaalo ɔ nu he ɔ, wɔ nitsɛmɛ wa maa mlɔɔ e hɛ mi, konɛ nyɛ ko na sane.”

¹⁵ Kɛkɛ nɛ aslaafo ɔmɛ he sika a, nɛ a pee bɔ nɛ a tsɔɔ mɛ ɔ. Nɛ kikɛmɛ a sane nɛ ɔ gbɛ fia ngɛ Yudafo ɔmɛ a kpɛti kɛ ba si mwɔnɛ ɔ.

Yesu je e he kpo tsɔɔ e kaseli ɔmɛ

¹⁶ Kɛkɛ nɛ e kaseli nyɔngma kɛ kake ɔ pue nɔ kɛ ho Galilea yoku ɔ nɔ ya he nɛ Yesu tsɔɔ mɛ ɔ.

¹⁷ Benɛ a na lɛ ɔ a kpla si nɛ a ja lɛ; se ni komɛ je nɔ́.

¹⁸ Nɛ Yesu ba nɛ e kɛ mɛ ba tu munyu ke: “A ngɔ he blɔ tsuo ngɔ ha mi ngɛ hiɔwe kɛ zugba a nɔ.

¹⁹ Lɔ ɔ he ɔ rnyɛɛ ya nɛ nyɛ ya pee majemaje tsuo ye kaseli, nyɛɛ baptisi mɛ ngɔ wo Tsɛ ɔ kɛ Bi ɔ kɛ Mumi Klɔuklɔu ɔ biɛ mi,

²⁰ nɛ nyɛɛ tsɔɔ mɛ nɛ a ye nihi tsuo kulaa nɛ i de nyɛ ɔ nɔ. Nɛ oʼɛ, i kɛ nyɛ ngɛ daa kɛ yaa su je mi nyagbe.”