Mateo 27 - Somi He Ɔ

Yesu ngɛ Pilato hɛ mi

¹ Benɛ je na a, osɔfo nikɔtɔma amɛ kɛ ma nikɔtɔma amɛ tsuo so Yesu yi nɔ, konɛ a gbe lɛ.

² Nɛ a fi e nine nɛ a kpaka lɛ kɛ ho ya ha amlaalo Pontio Pilato.

Yuda gbenɔ

³ Benɛ Yuda, nɔ nɛ tsɔɔ Yesu se blɔ ɔ, na kaa a bu Yesu fɔ ɔ, e pia e he, nɛ e kpale sika yi nyingmi etɛ ɔ ya ha osɔfo nikɔtɔma amɛ kɛ nikɔtɔma amɛ ekohu,

⁴ nɛ e ke: “I pee yayami kaa i tsɔɔ muɔ nɛ yayami ko be e he ɔ se blɔ.” Se mɛ lɛɛ a ke: “Lɔ ɔ pi wa he sane ko; mo nitsɛ hyɛ nɔ!”

⁵ Nɛ e ya sake sika a ngɔ pue si ngɛ sɔlemi we ɔ, nɛ e pue nɔ kɛ ho nɛ e ya wo e kuɛ kpa.

⁶ Osɔfo nikɔtɔma amɛ ya kukuɔ sika hiɔ ɔ, nɛ a ke: “E dɛ́ kaa a kɛ woɔ nito he ɔ; ejakaa muɔ yi ni ʼi.”

⁷ Nɛ a ya da nɛ a kɛ he buɛ puɛlɔ ɔ abɔɔ ɔ, konɛ a pu nibwɔhi ngɛ lejɛ ɔ.

⁸ Lɔ ɔ he ɔ a tsɛɛ jamɛ a abɔɔ ɔ Muɔ abɔɔ kɛ mwɔnɛ.

⁹ Kɔlɔ ɔ ha gbalɔ Yeremia munyu ɔ ba mi ke: “Nɛ a ngɔ sika hiɔ yi nyingmi etɔ ɔ, nɛ ji jua nɛ Israelbi ɔmɛ wo ɔ,

¹⁰ nɛ a kɛ he buɛ puɛlɔ ɔ abɔɔ ɔ, kaa bɔ nɛ Nyɔmtsɛ ɔ de mi ɔ.”

Pilato bi Yesu munyu

¹¹ Nɛ a kɛ Yesu ba da amlaalo ɔ hɛ mi, nɛ amlaalo ɔ bi lɛ ke: “Mo ji Yudafo ɔmɛ a matsɛ ɔ lo?” Nɛ Yesu de lɛ ke: “Ja o de ɔ nɛ.”

¹² Se benɛ osɔfo nikɔtɔma amɛ kɛ nikɔtɔma amɛ ngɛ e nya poe ɔ, pe je we nya.

¹³ Kɛkɛ nɛ Pilato bi lɛ ke: “Anɛ o nui sanehi sɔuu nɛ a kɛ ngɛ o nɔ puee nɛ ɔ?”

¹⁴ Se e pui e nya mi kulaa; nɛ amlaalo ɔ nya kpɛ e nitsɛ nitsɛ?

A bu Yesu gbenɔ fɔ

¹⁵ Se daa, ke e su nyami ligbi ɔ nɔ ɔ, amlaalo ɔ ngmɛɛ pamino kake nɛ asafo ɔ suɔ he haa mɛ.

¹⁶ Se lɛ be ɔ mi ɔ, a ngɛ pamino ku ko nɛ a tsɛɛ lɛ Baraba.

¹⁷ Lɔ ɔ he ɔ, benɛ asafo ɔ ba bua a he nya a, Pilato bi mɛ ke: “Mɛnɔ he nyɛ suɔ kaa ma ngmɛɛ ha nyɛ: Baraba, loo Yesu nɛ a tsɛɛ lɛ Kristo ɔ?”

¹⁸ Ejakaa Pilato le kaa ninye he nɛ a ngɔ lɛ ha a nɛ.

¹⁹ Se benɛ Pilato hii si ngɛ kojomi sɛ ɔ nɔ ɔ, e yo tsɔ kɛ ha e ngɔ ba de lɛ ke: “O kɛ dalɔ nɛ ɔ ko ye sane ko; ejakaa e he je ɔ, ye he hia mi babauu ngɛ nlami mi mwɔnɛ.”

²⁰ Se osɔfo nikɔtɔma amɛ kɛ nikɔtɔma amɛ wo asafo ɔmɛ a yi mi ke, a bi Baraba mohu, nɛ a gbe Yesu.

²¹ Lɔ ɔ he ɔ amlaalo ɔ he nɔ nɛ e de mɛ ke: “Mɛ ni enyɔ ɔmɛ akpɛti mɛnɔ he nyɛ suɔ kaa ma ngmɛɛ ha nyɛ?” Nɛ a ke: “Baraba.”

²² Pilato bi mɛ ke: “Lɛɛ mɛni ma pee Yesu nɛ a tsɛɛ lɛ Kristo ɔ he mɔ?” Mɛ tsuo a ke: “Ha nɛ a sɛu lɛ!”

²³ Nɛ amlaalo ɔ bi ke: “Mɛni yayami e pee?” Se enɛ ɔ mohu ha a kpa ngmlaa wawɛɛ ke: “Ha nɛ a sɛu lɛ!”

²⁴ Se benɛ Pilato na kaa e nyɛ we he nɔ́ ko nɛ e pee, se mohu basabasa ngɛ hlae nɛ maa te si ɔ, e ngɔ nyu nɛ se fɔ e dɛ ngɛ asafo ɔ hɛ mi, nɛ e ke: “Imi lɛɛ i yi dalɔ nɛ ɔ muɔ he musu; nyɛ, nyɛ sane ʼi!”

²⁵ Nɛ ma a tsuo he nɔ ke: “E muɔ nɛ ba waa kɛ wa bimɛ a nɔ!”

²⁶ Kɛkɛ nɛ e ngmɛɛ Baraba he ngɔ ha mɛ; se Yesu ɔ, e ha a fia lɛ kplibi nɛ e ngɔ lɛ ngɔ ha nɛ a ya sɛu.

Aslaafo ɔmɛ ye Yesu he fɛu

²⁷ Kɛkɛ nɛ amlaalo ɔ aslaafo ɔmɛ ngɔ Yesu kɛ ho kojomi he ɔ ya, nɛ a ya bua aslaafohi a kuu ɔ tsuo nya kɛ ba e he;

²⁸ nɛ a je e he tade ɔmɛ, nɛ a ngɔ tade tsu klɔii ko ngɔ wo lɛ;

²⁹ nɛ a pee mio jlasi ngɔ fi e yi, nɛ a kɛ paplo ha lɛ nɛ e hɛɛ ngɛ e hiɛ ɔ nine mi, nɛ a kpla si ngɛ e hɛ mi nɛ a ye e he fɛu ke: “Wa nga mo oo, Yudafohi a matsɛ!”

³⁰ Nɛ a la lada ngɔ pue e nɔ, nɛ a he paplo ɔ ngɛ e dɛ nɛ a ngɔ fia e yi kpɛti.

³¹ Nɛ benɛ a ye e he fɛu ta a, a je tade klɔii ɔ ngɛ e he, nɛ a ngɔ lɛ nitse e tade ɔmɛ ngɔ wo lɛ, nɛ a kpaka lɛ kɛ ho konɛ a ya sɛu.

Yesu sɛumi

³² Se benɛ a yaa a, a na nyumu Kireneno ko nɛ a tsɛɛ lɛ Simon, nɛ a nyɛ e nɔ ke e wo e sɛumi tso ɔ.

³³ Nɛ benɛ a su he nɛ a tsɛɛ lejɛ ɔ Golgota nɛ e sisi ji “Yikoklodonya” a,

³⁴ a ngɔ wai nɛ a kɛ duɔ futu mi ha lɛ ke e nu; se benɛ e tso hyɛ ɔ, e sume kaa e nuu.

³⁵ Nɛ benɛ a sɛu lɛ ɔ, a fɔ sɔ kɛ dla e tade ɔmɛ.

³⁶ Nɛ a hi si ngɛ lejɛ ɔ nɛ a bu e he.

³⁷ Nɛ a ngma sane nɛ a kɛ fɔ e nɔ ɔ ngɔ mɛtɛ e yi je ke: “Yesu Yudafo ɔmɛ a matsɛ ɔ ji nɛ ɔ nɛ!”

³⁸ Lɛ be ɔ mi ɔ, a sɛu ojo fiali enyɔ ngɔ piɛ e he; nɔ kake ngɛ e hiɛ ɔ nɔ, nɛ nɔ kake hu ngɛ e muɔ nɔ?

³⁹ Nihi nɛ bee ɔ tu musu bɔmi munyuhi ngɔ si lɛ, nɛ a hwanya a yi,

⁴⁰ nɛ a ke: “Mo nɛ o kuɔ sɔlemi we ɔ nɛ o kpaleɔ fia ligbi etɛ ɔ, he mo nitsɛ o yi wami! Ke Mawu bi ji mo ɔ, jee seumi tso ɔ nɔ kple si koo!”

⁴¹ Ja nɔuu osɔfo nikɔtɔma amɛ kɛ mlaa tsɔɔli ɔmɛ kɛ nikɔtɔma amɛ ye e he fɛu de ke:

⁴² “Ni kpahi a yiwami e he, se lɛ nitsɛ e nɔ ɔ e nyɛ we nɛ e he. Ke Israel matsɛ ɔ ji lɛ ɔ, ha nɛ e je sɛumi tso ɔ nɔ heja nɛ ɔ kɛ kple si, nɛ wa ma he lɛ ngɔ ye.

⁴³ E ke Mawu nɔ e hɛ ngɛ: Ha nɛ e je lɛ koo, ke e ngɛ e he tsui ɔ; ejakaa e de ke: ‘Mawu bi ji mi.’ ”

⁴⁴ Ja nɔuu awi yeli ɔmɛ nɛ a sɛu ngɔ piɛ e he ɔ hu bɔ lɛ ahlua.

Yesu gbenɔ

⁴⁵ Se kɛ je piani ngmlɛ nyɔngma kɛ enyɔ kɛ ya su ngmlɛ etɛ ɔ, diblii wo ngɛ zugba a tsuo nɔ.

⁴⁶ Se ngmlɛ etɛ mi ɔ, Yesu kpa ngmlaa kɛ gbi wawɛɛ ke: “Eli, Eli, lama sabaktani?” E sisi ji: “Ye Mawu, ye Mawu, mɛni he je o kua mi?”

⁴⁷ Se benɛ nihi nɛ daa si ngɛ lejɛ ɔ a kpɛti ni komɛ nu ɔ, a ke: “Elia nɔ nɛ ɔ ngɛ tsɛe ɔ nɛ.”

⁴⁸ Nɛ amlɔ ɔ a ti nɔ kake sa fo nɛ e ya ngɔ wosuma, nɛ e kɛ sɔ da nɛ kua mi, nɛ e ngɔ ma paplo nya ha lɛ ke e nu.

⁴⁹ Se nihi nɛ piɛ ɔ de lɛ ke: “Mlɛ! Ha waa hyɛ kaa Elia maa ba ba je lɛ lo?”

⁵⁰ Nɛ Yesu kpa ngmlaa ekohu kɛ gbi wawɛɛ, nɛ e ngɔ e nya.

⁵¹ Nɛ oʼɛ, sɔlemi tsu ɔ mi pomi bo ɔ mi gba enyɔ kɛ je hiɔwe kɛ ba ma si, nɛ zugba mimiɛ, nɛ tɛ sahi a mi gba;

⁵² nɛ yɔkɔhi a nya bli, nɛ klɔuklɔubihi nɛ hwɔ mahɛ ɔmɛ a nɔmlɔ tsohi fuu te si;

⁵³ nɛ e sitemi ɔ se ɔ, a je kpo kɛ je a muɔ ɔmɛ a mi, nɛ a ya ma klɔuklɔu ɔ mi ya je a he kpo ngɔ tsɔɔ nihi fuu.

⁵⁴ Se benɛ aslaafohi lafa a nyatsɛ ɔ kɛ nihi nɛ kɛ lɛ ngɛ Yesu he bue ɔ, na zugba mimiɛmi ɔ kɛ nihi nɛ a pee ɔ, a ye gbeye wawɛɛ, nɛ a ke: “Niinɛ, Mawu bi ji nɛ ɔ nɛ!”

⁵⁵ Se yihi fuu ngɛ lejɛ ɔ nɛ daa si ngɛ se lokoo ngɛ hyɛe; mɛ ji ninɛmɛ nɛ nyɛɛ Yesu se kɛ je Galilea nɛ a sɔmɔɔ lɛ ɔ nɛ;

⁵⁶ a kpɛti ni komɛ ji Maria Magdalena, kɛ Maria nɛ ji Yakobo kɛ Yose nyɛ ɔ, kɛ Zebedeo bimɛ ɔmɛ a nyɛ ɔ.

Yesu pumi

⁵⁷ Benɛ su gbɔkuɛ ɔ, niatsɛ ko nɛ je Arimatia nɛ a tsɛɛ lɛ Yosef ɔ ba, nɛ lɛ hu Yesu kaseli ɔmɛ a ti nɔ kake ji lɛ;

⁵⁸ lɛ lɛ e ya Pilato ngɔ ya kpa lɛ pɛɛ konɛ e ngɔ Yesu gbogboe ɔ ngɔ ha lɛ. Kɛkɛ nɛ Pilato fã ke a ngɔ nɔ gbogboe ɔ ngɔ ha lɛ.

⁵⁹ Nɛ Yosef ngɔ nɔ gbogboe ɔ, nɛ e ngɔ kploba falefale ngɔ blaa lɛ,

⁶⁰ nɛ e kɛ lɛ ya fɔ lɛ nitse e yɔkɔ he nɛ e ha a kpɛ ngɛ tɛsa mi ɔ mi, nɛ e kpɛne tɛ kpetekpleenyɛ kɛ tsi yɔkɔ ɔ nya, nɛ e pue nɔ kɛ ho.

⁶¹ Se Maria Magdalena kɛ Maria kpã ko ɔ ngɛ lejɛ ɔ, a hii si ngɛ yɔkɔ ɔ he.

Yesu yɔkɔ ɔ he bumi

⁶² Se hedlami-kɛ-tomi ligbi ɔ nɔ je na a, osɔfo nikɔtɔma amɛ kɛ Farisifo ɔmɛ a nya ba bua ngɛ Pilato ngɔ,

⁶³ a ke: “Nyɔmtsɛ, wa kai kaa benɛ sisilɔ nɛ ɔ hɛ ngɛ ɔ, e ke: ‘Ligbi nɛ ji ligbi etɛ ɔ e ma te si ekohu.’

⁶⁴ Lɔ ɔ he ɔ fã nɛ a ya bu yɔkɔ ɔ he saminya kɛ maa su ligbi nɛ ji ligbi etɛ ɔ, konɛ e kaseli ɔmɛ ko ba ju lɛ kɛ ho, nɛ a ya de ma a ke: ‘E te si kɛ je gbeje;’ nɛ sekpɛ sisimi ɔ ba pee yayami pe kekle nɔ ɔ.”

⁶⁵ Pilato de mɛ ke: “Oʼɛ, aslaafohi, nyɛɛ ya nɛ nyɛ ya bu bɔ nɛ nyɛ ma nyɛ.”

⁶⁶ Kɛkɛ nɛ a pue nɔ kɛ ho, nɛ a ya sɔu yɔkɔ ɔ nya, nɛ a ha aslaafo ɔmɛ bu he.