Mateo 26 - Somi He Ɔ

A so Yesu yi nɔ

¹ Benɛ Yesu gbe munyu nɛ ɔmɛ kulaa tumi nya a, e de e kaseli ɔmɛ ke:

² “Nyɛ le kaa e piɛ ligbi enyɔ nɛ a yeɔ Hetsɔmi ɔ, nɛ a ma je Nɔmlɔ Bi ɔ ngɔ ha nɛ a sɛu lɛ.”

³ Lɛ be ɔ mi ɔ, osɔfo nikɔtɔma amɛ kɛ mlaa tsɔɔli ɔmɛ kɛ ma nikɔtɔma amɛ ya bua a he nya ngɛ osɔfo nɔkɔtɔma nɛ a tsɛɛ lɛ Kaiafa a mɔ ɔ mi.

⁴ Nɛ a ya so bɔ nɛ a maa pee nɛ a nu Yesu ga mi nɛ a gbe lɛ;

⁵ se a ke: “Pi ngɛ Hejɔɔmi ligbi ɔ nɔ, konɛ basabasa peemi nɛ ko ba ma a mi.”

A pɔ Yesu nu ngɛ Betania

⁶ Benɛ Yesu ngɛ Betania ngɛ Simon, tsitsɛ ɔ, we ɔ mi ɔ,

⁷ yo ko hɛɛ alabastro tɔ kɛ e mi nu kɛ e he via nɛ he jua wa kɛ ba e kasa nya, nɛ benɛ e hii si ngɛ niyeni si ɔ, e plɛ ngɔ pue e yi mi.

⁸ Se benɛ e kaseli ɔmɛ na a, a mi mi wo la nɛ a de ke: “Kɛ ji yaka ni puɛmi nɛ ɔ sisi kɛɛ?

⁹ Ejakaa nu kɛ e he via nɛ ɔ, jinɛ a ma nyɛ jua sika fuu nɛ a ngɔ ha ohiafohi.”

¹⁰ Se benɛ Yesu na enɛ ɔ ɔ, e de mɛ ke: “Mɛni he je nyɛ ngɛ yo ɔ nya dooe? E tsu nitsumi saminya ha mi.

¹¹ Ejakaa ohiafo ɔmɛ ɔ, nyɛɛ kɛ mɛ ngɛ daa, se imi lɛɛ, pi daa nɛ i kɛ nyɛ maa hi si.

¹² Ejakaa nu kɛ e he via nɛ ɔ nɛ e plɛ ngɔ pue ye nɔmlɔ tso ɔ nɔ nɛ ɔ, e pee ngɔ to ye pumi.

¹³ Niinɛ, i ngɛ nyɛ dee ke: He tsuaa he nɛ a maa fiɛ Sane Kpakpa nɛ ɔ ngɛ, ngɛ je mi tsuo ɔ, a maa wo nɔ́ nɛ yo nɛ ɔ pee nɛ ɔ hu tã ma ngɔ kai lɛ.”

Yuda kplɛɛ kaa e maa tsɔɔ Yesu se blɔ

¹⁴ Kɛkɛ nɛ ni nyɔngma kɛ enyɔ ɔmɛ a kpɛti nɔ kake nɛ a tsɛɛ lɛ Yuda Iskariot ɔ pue nɔ kɛ ho osɔfo nikɔtɔma amɛ a ngɔ ya,

¹⁵ nɛ e ya de mɛ ke: “Mɛni nyɛ ma ha mi, nɛ ma je lɛ ngɔ wo nyɛ dɛ mi?” Nɛ a kane sika hiɔ yi nyingmi etɛ ngɔ ha lɛ.

¹⁶ Nɛ kɛ je jamɛ a be ɔ nɔ ɔ, e hla e he blɔ konɛ e ngɔ lɛ ngɔ wo a dɛ mi.

Yesu kɛ e kaseli ɔmɛ ye Hetsɔmi niyeni ɔ

¹⁷ Se akpiti nyami ligbi ɔmɛ a mi kekle ligbi ɔ nɔ ɔ, kaseli ɔmɛ ba Yesu ngɔ ba bi lɛ ke: “Jije o suɔ kaa wa ya dla ha mo nɛ o ya ye Hetsɔmi ɔ ngɛ?”

¹⁸ Nɛ e ke: “Nyɛɛ ya ma a mi nɛ nyɛ ya de asimasi ke: ‘Tsɔɔlɔ ɔ ke: Ye be ɔ su ta; o we ɔ mi i kɛ ye kaseli ɔmɛ maa ye Hetsɔmi ɔ ngɛ.’ ”

¹⁹ Nɛ e kaseli ɔmɛ ya pee bɔ nɛ Yesu de mɛ ɔ, nɛ a dla Hetsɔmi ni ɔ ngɔ to.

²⁰ Se benɛ e su gbɔkuɛ ɔ, e kɛ ni nyɔngma kɛ enyɔ ɔ ya hi si ngɛ niyeni ɔ he.

²¹ Nɛ benɛ a ngɛ ni ɔ yee ɔ, e ke: “Niinɛ, i ngɛ nyɛ dee ke: Nyɛ ti nɔ kake maa tsɔɔ ye se blɔ.”

²² Nɛ e dɔ mɛ saminyɛ, nɛ a bɔni lɛ bimi kakaaka ke: “Nyɔmtsɛ, imi lo?”

²³ Se e he nɔ ke: “Nɔ nɛ nine nɛ kɛ ye nine kpee ngɛ ka a mi ɔ, lɛ nɔuu lɛ e maa tsɔɔ ye se blɔ ɔ nɛ.

²⁴ Nɔmlɔ Bi ɔ ma gbo kaa bɔ nɛ a ngma ngɛ e he ɔ mohu; se musu tloo jamɛ a nɔmlɔ ɔ nɛ tsɔɔ Nɔmlɔ Bi ɔ se blɔ ɔ; afani nɛ a na we a nɛ a fɔ jamɛ a nɔmlɔ ɔ.”

²⁵ Nɛ Yuda e se blɔ tɔsslɔ ɔ, he nɔ ke: “Anɛ imi lo, Rabi?” E de lɛ ke: “Ja o de ɔ nɛ!”

Nyɔmitsɛ niyeni ɔ sisitomi

²⁶ Se benɛ a ngɛ ni ɔ yee ɔ, Yesu kɛ̃ abolo, nɛ e gbaa nɔ nɛ e kuɔ mi, nɛ e ngɔ ha e kaseli ɔmɛ nɛ e ke: “Nyɛ he nɛ nyɛɛ ye! Enɛ ɔ ji ye nɔmlɔ tso ɔ nɛ.”

²⁷ Nɛ e wo kplu ɔ, nɛ e na si, nɛ e ngɔ ha mɛ nɛ e ke: “Nyɛ tsuo kulaa nyɛɛ nu enɛ ɔ eko!

²⁸ Ejakaa enɛ ɔ ji ye muɔ nɛ ji somi ɔ nɔ ɔ nɛ a plɛ pue si ngɛ nihi fuu a he ha yayami pami.

²⁹ Se i ngɛ nyɛ dee ke: Kɛ je nɛ ɔ nɔ kɛ yaa nɛ ɔ ɔ, i be wai tso yiblii nɛ ɔ eko nue hu, kɛ maa su ligbi nɛ i kɛ nya maa nu lɛ ehe ngɛ Tsaatsɛ matsɛ yemi ɔ mi.”

³⁰ Nɛ benɛ a la yi jemi la ko ɔ, a je kpo kɛ ho Nuyoku ɔ nɔ ya.

Yesu gba Petro kuami ngɔ to

³¹ Kɛkɛ nɛ Yesu de mɛ ke: “Nyɔ nɛ ɔ mi ɔ, ye he sane ma ha nyɛ tsuo nyɛ nane ma kpata; ejakaa a ngma ke: ‘Ma fia tohyɛlɔ ɔ nɔ, nɛ to asafo ɔ maa gbɛ fia.’

³² Se ye si temi ɔ se ɔ, ma sɛ nyɛ hlami kɛ maa ya Galilea.”

³³ Se Petro he nɔ nɛ e de lɛ ke: “Ke ni ɔmɛ tsuo a nane ma kpata a, imi lɛɛ ye nane be kpatae gblegbleegblee.”

³⁴ Yesu de lɛ ke: “Niinɛ, i ngɛ mo dee ke: Nyɔ nɛ ɔ mi nɔuu, loko kungwɔ ma kpã nɔ ɔ, o ma kpa ngɛ ye si etɛ.”

³⁵ Petro de lɛ ke: “Ke i kɛ mo ma gbo tete po ɔ, i be kpae ngɛ o se!” Jã nɔuu kaseli ɔmɛ tsuo hu de.

Yesu ya sɔle ngɛ Getsemane

³⁶ Jeha nɛ ɔ Yesu kɛ mɛ ba he ko nɛ tsɛɛ lejɛ ɔ Getsemane; nɛ e de e kaseli ɔmɛ ke: “Nyɛɛ hi si ngɛ hiɛ ɔ, konɛ ma ya nɛ ma ya sɔle.”

³⁷ Nɛ e ngɔ Petro kɛ Zebedeo bimɛ nyumuhi enyɔ ɔ ngɔ piɛ e he nɛ e ywlɛ ho e he nɛ e hao.

³⁸ Kɛkɛ nɛ e de mɛ ke: “Ye klaa ngɛ haoe kɛ maa su gbenɔ mi po; nyɛɛ hi si ngɛ hiɛ ɔ nɛ nyɛɛ kɛ mi nɛ fɔ nyɔ!”

³⁹ Nɛ e ya e hɛ mi bɔɔ nɛ e ngɔ e hɛ mi ngɔ bu si, nɛ e sɔle ke: “Tsaatsɛ, ke e maa hi ɔ, ha nɛ kplu nɛ ɔ be ye he kɛ ho; se kɛ̃ ɔ, pi bɔ nɛ imi i suɔ, se mohu bɔ nɛ mo o suɔ.”

⁴⁰ Nɛ benɛ e ba kaseli ɔmɛ a ngɔ ɔ, e na kaa a hwɔ mahɛ; nɛ e de Petro ke: “Anɛ nyɛ nyɛ we nɛ nyɛɛ kɛ mi nɛ fɔ nyɔ ngmlɛfia kake pɛ lo?

⁴¹ Nyɛɛ fɔ nyɔ nɛ nyɛɛ sɔle, konɛ nyɛ ko sɛ ka mi; mumi ɔ ngɛ kplɛɛ e mohu, se he lo ɔ gbede.”

⁴² E pue nɔ kɛ ho ekohu nɔ nɛ ji si enyɔ, nɛ e ya sɔle ke: “Tsaatsɛ, ke kplu nɛ ɔ be nyɛe ye he bemi kɛ ho kaa ja i nu ɔ, a pee bɔ nɛ o suɔ.”

⁴³ Nɛ benɛ e ba a, e na kaa a hwɔ mahɛ ekohu; ejakaa nyɔ gbe mɛ.

⁴⁴ Nɛ e kpale si mɛ kɛ ho ekohu, nɛ e ya sɔle nɔ nɛ ji si etɛ, nɛ e tu jamɛ a munyu ɔ nɔuu.

⁴⁵ Kɛkɛ nɛ e ba e kaseli ɔmɛ a ngɔ, nɛ e de mɛ ke: “Nyɛɛ lɛɛ nyɛ he mi jɔ nyɛ nɛ nyɛ ngɛ mahɛ hwɔe nɛ ɔ? Oʼɛ, ngmlɛfia a su ta, nɛ a maa ngɔ Nɔmlɔ Bi ɔ ngɔ wo yayami peeli a dɛ mi.

⁴⁶ Nyɛɛ te si, nyɛ ha waa ho; oʼɛ, nɔ nɛ maa tsɔɔ ye se blɔ ɔ su si ta.”

Yesu numi

⁴⁷ Nɛ benɛ e ngɛ munyu ɔ tue kɛ mwɔ ɔ, oʼɛ, Yuda, ni nyɔngma kɛ enyɔ ɔmɛ a kpɛti nɔ kake ɔ, ba, nɛ asafo fuu nɛ je osɔfo nikɔtɔma amɛ kɛ ma nikɔtɔma amɛ a ngɔ ɔ kɛ lɛ nyɛɛ, nɛ a hɛɛ klaate kɛ tsokpotihi.

⁴⁸ Se nɔ nɛ ngɛ e se blɔ tsɔɔe ɔ to mɛ okadi ke: “Nɔ nya he nɛ ma fiɔ ɔ, lɛ ʼi; nyɛɛ nu lɛ!”

⁴⁹ Nɛ amlɔ ɔ e ba Yesu ngɔ ba de ke: “He manye, Rabi,” nɛ e fiɔ e nya he.

⁵⁰ Se Yesu de lɛ ke: “Huɛ, pee nɔ́ nɛ o ma peemi ɔ.” Kɛkɛ nɛ ni ɔmɛ ba tua Yesu nɛ a nu lɛ.

⁵¹ Nɛ oʼɛ, nihi nɛ kɛ Yesu ngɛ ɔ a ti nɔ kake kpa e nine mi nɛ e hia klaate nɛ e kɛ ja osɔfo nɔkɔtɔma a tsɔlɔ, nɛ e po e tue.

⁵² Kɛkɛ nɛ Yesu de lɛ ke: “Ngɔɔ o klaate ɔ ngɔ to e to he; ejakaa nihi tsuo nɛ hiaa klaate ɔ, klaate nɔuu a kɛ ma kpata a hɛ mi.

⁵³ Aloo o susu kaa i be nyɛe Tsaatsɛ pɛɛ ma kpa nɛ amlɔ nɛ ɔ nɔuu e ma ha mi hiɔwe bɔfohi pe asafo nyɔnmga kɛ enyɔ nɛ a ba fã ye he?

⁵⁴ Se lɔ ɔ lɛɛ kɛ maa pee kɛɛ nɛ ngmami ɔmɛ maa ba mi, kaa ja a pee kikɛ ɔ nɔuu?”

⁵⁵ Jamɛ a ngmlɛfia a nɔ nɔuu ɔ, Yesu de asafo ɔ ke: “Imi numi nyɛ ba kaa a nuu ojo fialɔ ko ke klaate kɛ tsokpotihi nɛ ɔ? I hii sɔlemi we ɔ daa nɛ i tsɔɔ ni, nɛ nyɛ nui mi.

⁵⁶ Se a pee enɛ ɔ tsuo konɛ nihi nɛ gbali ɔmɛ ngma a nɛ ba mi.” Kɛkɛ nɛ kaseli ɔmɛ tsuo tu fo si lɛ.

Yesu ngɛ gua a hɛ mi

⁵⁷ Se ninɛmɛ nɛ nu Yesu ɔ kpaka lɛ kɛ ho Kaiafa, osɔfo nɔkɔtɔma a, ngɔ ya, he nɛ mlaa tsɔɔli ɔmɛ kɛ nikɔtɔma amɛ bua a he nyɛ ngɛ ɔ.

⁵⁸ Petro nyɛɛ e se ngɛ lokoo kɛ ba osɔfo nɔkɔtɔma a mɔ ɔ mi, nɛ e ya sɛ lejɛ ɔ nɛ e kɛ sɔmɔli ɔmɛ ya hii si, konɛ e hyɛ bɔ nɛ nyagbe ɔ maa ba ha.

⁵⁹ Osɔfo nikɔtɔma amɛ kɛ nikɔtɔma amɛ kɛ gua a tsuo hla lakpa odase ngɛ Yesu he, konɛ a gbe lɛ;

⁶⁰ se a nɛ eko, pohu lakpa odase yeli fuu ba, se kɛ ɔ a nɛ eko. Pee se ɔ, lakpa odase yeli enyɔ ba

⁶¹ nɛ a ba de ke: “Nɔ nɛ ɔ de ke: ‘Ma nyɛ Mawu Sɔlemi we ɔ ma kuɔ, nɛ ma fia lɛ ligbi etɛ.’ ”

⁶² Nɛ osɔfo nɔkɔtɔma a te si nɛ e bi lɛ ke: “O be odase nɛ ni nɛ ɔmɛ ngɛ yee ngɛ o he ɔ nya jee?”

⁶³ Se Yesu pɛ̃ e nya mi. Nɛ osɔfo nɔkɔtɔma a he nɔ nɛ e de lɛ ke: “I na Mawu hɛ kalɔ ɔ kaa, ke mo ji Kristo, Mawu bi ɔ, de wɔ!”

⁶⁴ Yesu de lɛ ke: “Jã o de ɔ nɛ! Se i ngɛ nyɛ dee ke: Kɛ je be nɛ ɔ kɛ yaa a, nyɛ maa na Nɔmlɔ Bi ɔ kaa e hii si ngɛ he wami ɔ hiɛ ɔ nɔ, nɛ e ma ngɛ hiɔwe bɔku ɔmɛ a mi.”

⁶⁵ Kɛkɛ nɛ osɔfo nɔkɔtɔma a gba e tadehi nɛ e ke: “E bɔ musu! Mɛni wa pa ngɛ odase yeli hlae ya pee ekohu oʼɛ, jeha nɛ ɔ nyɛ nu e musu bɔmi ɔ!

⁶⁶ Kɛ nyɛ susu kɛɛ?” A he nɔ nɛ a ke: “E sa gbenɔ!”

⁶⁷ Kɛkɛ nɛ a la lada ngɔ pue e hɛ mi, nɛ a gba lɛ mahi; nɛ ni komɛ hu fia lɛ ni,

⁶⁸ nɛ a ke: “Kristo, gbaa tsɔɔ wɔ, mɛnɔ ji nɔ nɛ gbe mo ɔ?”

Petro kua Yesu

⁶⁹ Se Petro hii si ngɛ se lokoo ngɛ kpo ɔ kpɛti; nɛ sɔmɔlɔ yo ko ba e ngɔ ba de lɛ ke: “Mo hu tse o kɛ Yesu, Galiliano ɔ lɛ ngɛ!”

⁷⁰ Se e kua ngɛ mɛ tsuo a hɛ mi, nɛ e ke: “I li nɔ́ nɛ o ngɛ dee nɛ ɔ.”

⁷¹ Se benɛ e te si kɛ ho kue ɔ si ya a, sɔmɔlɔ yo kpa ko hu na lɛ, nɛ e de nihi nɛ ngɛ lejɛ ɔ ke: “Nɔ nɛ ɔ hu kɛ Yesu Nazareno ɔ lɛ ngɛ.”

⁷² Nɛ e kua ekohu kɛ kitakami ke: “I li nɔmlɔ ɔ.”

⁷³ Se pee se bɔɔ ɔ, nihi nɛ daa si ngɛ lejɛ ɔ ba de Petro ke: “Anɔkuale ji kaa, a ti nɔ kake ji mo; ejakaa o munyu tete ngɛ mo si jee!”

⁷⁴ Kɛkɛ nɛ e bɔni gbiɛmi kɛ kita kami ke: “I li nɔmlɔ ɔ!” Nɛ amlɔ ɔ kungwɔ kpa nɔ.

⁷⁵ Nɛ Petro kai Yesu munyu nɛ e tu lɛ ke: “Loko kungwɔ ma kpa nɔ ɔ, o ma kpa ngɛ ye se si etɛ” ɔ. Nɛ e je kpo ya fo ya wawɛɛ.