Mateo 20 - Somi He Ɔ

Wai ngmɔ ɔ mi nitsuli ɔmɛ

¹ “Hiɔwe matsɛ yemi ɔ ngɛ kaa nyumu we tsɛ ko nɛ je kpo makɛ mla nɛ e ya bɔ ni tsuli apaa kɛ ya e wai ngmɔ mi.

² Nɛ benɛ e kɛ ni tsuli ɔmɛ ye nya cedi kake ligbi kake ɔ, e wo mɛ blɔ kɛ ho e wai ngmɔ ɔ mi ya.

³ Nɛ kɛ ma mɔtu ngmlɛ nɛɛ mi ɔ, e je kpo ekohu nɛ e ya na ni kpahi komɛ nɛ a daa si yaka ngɛ jua a nɔ;

⁴ nɛ e de ni nɛ ɔmɛ hu ke: ‘Nyɛ hu nyɛɛ ya wai ngmɔ ɔ mi, nɛ nɔ́ nɛ sa a ma ha nyɛ.’

⁵ Nɛ a ho. Jeha nɛ ɔ kɛ ma ngmlɛ nyɔngma kɛ enyɔ kɛ ngmlɛ etɛ mi ɔ, e je kpo nɛ e ya pee ja nɔuu.

⁶ Nɛ kɛ ma gbɔkuɛ ngmlɛ enuɔ mi ɔ, e je kpo nɛ e ya na ni kpahi komɛ hu nɛ a daa si yaka gu, nɛ e bi mɛ ke: ‘Mɛni he je nɛ nyɛ daa si yaka gu ngɛ hiɛ ɔ je nami nɛ ɔ tsuo nɛ ɔ?’

⁷ A de lɛ ke: ‘Akɛnɛ nɔ ko bɔɛ wɔ apaa a he je.’ E de mɛ ke: ‘Nyɛɛ hu nyɛɛ ya wai ngmɔ ɔ mi.’

⁸ “Nɛ bene su gbɔkuɛ ɔ, wai ngmɔtsɛ ɔ de e tsɔlɔ nɔkɔtɔma a ke: ‘Tsɛ ni tsuli ɔmɛ nɛ o wo mɛ hiɔ, nɛ o bɔni kɛ je sekpɛtsɛmɛ ɔmɛ a nɔ kɛ ya su kekletsɛmɛ ɔmɛ a nɔ.’

⁹ Lɔ ɔ he ɔ, benɛ gbɔkuɛ ngmlɛ enuɔtsɛmɛ ɔmɛ ba a, mɛ tsuo a na cedi kakaaka.

¹⁰ Nɛ benɛ keklebi ɔmɛ ba a, a susu kaa a maa fɔ a nɔ ɔ nɔ; se mɛ hu a na cedi kakaaka.

¹¹ Se benɛ e su a dɛ ɔ, a pɛ ngɛ a nya he kɛ si we tsɛ ɔ,

¹² a ke: ‘Sekpɛtsɛmɛ nɛ ɔmɛ, ngmlɛfia kake kɛkɛ a tsu ni, nɛ o ha mɛ kɛ wɔ nɛ wa tsu ni je nami nɛ pɔ tɔ wɔ nɛ latsa tsa wɔ ɔ tsuo pɛ.’

¹³ Se e he nɔ nɛ e de a ti nɔ kake ke: ‘Ye huɛ, i pee we mo yayami ko; anɛ pi cedi kake nɛ i kɛ mo ye nya lo?

¹⁴ Ngɔɔ nɔ́ nɛ ji o nɔ́ ɔ nɛ o ho. Se i suɔ kaa ma ha sekpɛ nɔ nɛ ɔ kaa bɔ nɛ i ha mo mo ɔ kɛ̃,

¹⁵ Aloo i be he blɔ kaa i kɛ imi nitse ye nihi peɔ nɔ́ nɛ i suɔ lo? Anɛ ye mi mi jɔmi nɛ ɔ he je o hɛngmɛ tsu nɛ ɔ?’ ”

¹⁶ Kikɛ nɛ ɔ, “Sekpɛtsɛmɛ ma plɛ kekletsɛmɛ, nɛ kekletsɛmɛ ma plɛ sekpɛtsɛmɛ.”

Yesu tu e gbenɔ he munyu nɔ nɛ ji si etɛ

¹⁷ Nɛ benɛ Yesu yaa Yerusalem ɔ, e ngɔ e kaseli nyɔngma kɛ enyɔ ɔ kɛ ya se ngɛ blɔ ɔ kpɛti, nɛ e de mɛ ke:

¹⁸ “Oʼɛ, wa yaa Yerusalem, nɛ a maa ngɔ Nɔmlɔ Bi ɔ ngɔ wo osɔfo nikɔtɔmahi kɛ mlaa tsɔɔli ɔmɛ a dɛ mi, nɛ a maa bu lɛ gbenɔ fɔ.

¹⁹ Nɛ a maa ngɔ lɛ ngɔ ha majeli ɔmɛ, nɛ a ye e he fɛu, nɛ a fia lɛ kplibi nɛ a sɛu lɛ; nɛ ligbi nɛ ji ligbi etɛ ɔ a ma tle lɛ si ekohu.”

Nyɛ ko nɔbami

²⁰ Kɛkɛ nɛ Zebedeo bimɛ ɔmɛ a nyɛ kɛ e bimɛ nyumu ɔmɛ ba Yesu ngɔ ba kpla si nɛ e ba lɛ nɔ ko.

²¹ Nɛ Yesu bi lɛ ke: “Mɛni o ngɛ hlae?” Yo ɔ he nɔ ke: “De nɛ ye bimɛ enyɔ nɛ ɔmɛ a ti nɔ kake nɛ hi o hiɛ ɔ nɔ, nɛ nɔ kake hu nɛ hi o muɔ nɔ ngɛ o matsɛ yemi ɔ mi.”

²² Se Yesu he nɔ ke: “Nyɛ li nɔ nɛ nyɛ ngɛ bie ɔ. Anɛ nyɛ ma nyɛ kplu nɛ ma nu ɔ maa nu?” A de lɛ ke: “Wa ma nyɛ.”

²³ Nɛ e de mɛ ke: “Ye kplu ɔ nyɛ maa nu ji nɛ ɔ lɛɛ, se ye hiɛ ɔ nɔ kɛ ye muɔ nɔ himi ɔ, e pi ye nɔ nɛ i kɛ haa, se mohu nihi nɛ Tsaatsɛ ngɔ ha momo ɔ a nɔ ʼi.”

²⁴ Nɛ benɛ ni nyɔngma a nu ɔ, a muklii mi fu nyɛmimɛ enyɔ ɔmɛ.

²⁵ Lɔ ɔ he ɔ Yesu tsɛ mɛ kɛ ba e ngɔ, nɛ e de mɛ ke: “Nyɛ le kaa ma amɛ a nɔ ganɔ ɔmɛ yeɔ a nɔ, nɛ a kpɛti nimli ngua amɛ hu ngɛ he wami ngɛ a nɔ.

²⁶ E ko ba ja ngɛ nyɛ kpɛti; se nɔ tsuaa nɔ nɛ suɔ kaa e plɛ nɔmlɔ ngua ngɛ nyɛ kpɛti ɔ, le mohu e plɛ nyɛ sɔmɔlɔ.

²⁷ Nɛ nɔ tsuaa nɔ nɛ suɔ kaa e plɛ nɔkɔtɔma ngɛ nyɛ kpɛti ɔ, lɛ mohu e plɛ nyɛ tsɔlɔ.

²⁸ Kaa bɔ nɛ Nɔmlɔ Bi ɔ bɛ nɛ a sɔmɔ lɛ, se e ba sɔmɔmi mohu, nɛ e ngɔ e klaa a kɛ ha kaa kpɔmi nɔ kɛ ha nihi fuu ɔ.”

Yesu tsa hɛyuyuili enyɔ

²⁹ Nɛ benɛ a je Yeriko kɛ yaa a, asafo babauu nyɛɛ Yesu se.

³⁰ Nɛ oʼɛ nyumuhi hɛ yuyuili enyɔ hii si ngɛ blɔ ɔ tue, nɛ benɛ a nu kaa Yesu bee ɔ, a kpa ngmlɛɛ ke: “Naa wɔ mɔbɔ, Nyɔmtsɛ, David bi!”

³¹ Se asafo ɔ ke a yi ke a ma a nya; se a kpa ngmlaa pe kekle ɔ ke: “Naa wɔ mɔbɔ, Nyɔmtsɛ, David bi!”

³² Nɛ Yesu da si nɛ e tsɛ mɛ nɛ e ke: “Mɛni nyɛ ngɛ hlae nɛ ma pee ha nyɛ?”

³³ A de lɛ ke: “Nyɔmtsɛ, kaa a bli wa hɛngmɛ ɔmɛ!”

³⁴ Nɛ Yesu mi mi sa lɛ ngɛ a he, nɛ e ta a yɛngmɛ omɛ a he, nɛ amlɔ ɔ a hyɛ nɔ, nɛ a nyɛɛ e se.