Mateo 18 - Somi He Ɔ

Mɛnɔ ji nɔmlɔ ngua pe kulaa

¹ Jamɛ a ngmlɛfia a mi nɔuu ɔ, kaseli ɔmɛ na Yesu ngɔ nɛ a ba bi lɛ ke: “Mɛnɔ ji nɔmlɔ ngua pe kulaa ngɛ hiɔwe matsɛ yemi ɔ mi?”

² Lɔ ɔ he ɔ Yesu tsɛ jokuɛ nyafii ko kɛ ba e ngɔ, nɛ e kɛ lɛ da a kpɛti,

³ nɛ e ke: “Niinɛ, i ngɛ nyɛ dee ke: Ke nyɛ tsakee we nɛ nyɛ plɛ kaa jokuɛ tsɔwi ɔ, nyɛ be hiɔwe matsɛ yemi ɔ mi sɛe kulaa.

⁴ Lɔ ɔ he je ɔ, nɔ tsuaa nɔ nɛ baa e he si kaa jokuɛ nɛ ɔ, lɛ ji nɔmlɔ ngua pe kulaa ngɛ hiɔwe matsɛ yemi ɔ mi.

⁵ Nɛ nɔ tsuaa nɔ nɛ ngɔɔ jokuɛ nyafii kake kaa nɔ nɛ ɔ ngɛ ye biɛ mi ɔ, e ngɔɔ mi.”

Nanekpatami he kɔkɔbɔmi

⁶ “Se nɔ nɛ kpataa tsɔwi nɛ ɔmɛ a ti nɔ kake nɛ heɔ ye nɔ yeɔ ɔ nane ɔ, afani nɛ a kɛ teji wɛ muɔ e kuɛ nɛ a ngɔ lɛ wo wo mi.

⁷ Musu tloo je ɔ ngɛ nane kpatami sanehi a he! Ejakaa nane kpatami sane ɔmɛ maa bɛ kɛ̃ mohu; se musu tloo nɔmlɔ nɛ nane kpatami ɔ guu e nɔ kɛ baa a!

⁸ “Ke o nine loo o nane ngɛ o nane kpatae ɔ, poo ngɛ o he nɛ o sake ngɔ fɔ he; afani nɛ o kɛ nine popoe loo nane popoe sɛ wami mi pe nɛ o ngɛ nine enyɔ loo nane enyɔ nɛ a ma sake mo ngɔ fɔ neneene la a mi.

⁹ Nɛ ke o hɛngmɛ ngɛ o nane kpatae ɔ, hia nɛ o sake ngɔ fɔ he; afani nɛ o kɛ hɛngmɛ kake sɛ wami mi pe nɛ o ngɛ hɛngmɛ enyɔ nɛ a ma sake mo ngɔ fɔ gehena la a mi.”

To nɛ laa a he abɛ ɔ

¹⁰ “Nyɛɛ hyɛ saminyɛ konɛ nyɛ ko gbe ni tsɔwi nɛ ɔmɛ a ti nɔ kake he guɛ; ejakaa i ngɛ nyɛ dee ke, a bɔfohi nɛ ngɛ hiɔwe ɔ hyɛɛ Tsaatsɛ nɛ ngɛ hiɔwe ɔ hɛ mi daa.” [

¹¹ Se Nɔmlɔ Bi ɔ ba nɔ nɛ laa a yi wami hemi.]

¹² “Kɛ nyɛ susuu kɛɛ, ke nɔ ko ngɛ to lafa nɛ a kpɛti kake laa blɔ ɔ, anɛ e be nyingmi nɛɛ kɛ nɛɛ ɔ sie ngɛ yoku ɔmɛ a nɔ nɛ e ya nɛ e ya hla nɔ nɛ laa blɔ ɔ lo?

¹³ Se ke e ba mi kaa e na lɛ ɔ, niinɛ, i ngɛ nyɛ dee ke, e bua jɔɔ e he ngɛ lɔ ɔ he pe nyingmi nɛɛ kɛ nɛɛ ɔ nɛ laa we blɔ ɔ.

¹⁴ Ja nɔuu nɛ nyɛ tsɛ nɛ ngɛ hiɔwe ɔ sume kaa tsɔwi nɛ ɔmɛ a kpɛti kake laa.”

Nyɛmi nɛ peɔ yayami

¹⁵ “Ke o nyɛmi ko tɔ o nɔ ɔ, yaa nɛ o ya tsɔɔ lɛ e tɔmi ɔ, o kɛ lɛ ni enyɔ kɛkɛ. Ke e bu mo tue ɔ, nyɛmi pee nyɛmi.

¹⁶ Se ke e bui mo tue ɔ, ngɔɔ nɔ kake loo ni enyɔ ngɔ piɛ o he, konɛ odaseyeli enyɔ loo etɛ a munyu nya a, sane tsuaa sane nya nɛ ma si.

¹⁷ Se ke mɛ hu e bui mɛ tue ɔ, ya de asafo ɔ; nɛ ke e tue gbo ngɛ asafo ɔ hu nɔ ɔ, buu lɛ kaa wɔ jalɔ kɛ onia tsulɔ.”

Fimi kɛ pɛnemi

¹⁸ “Niinɛ, i ngɛ nyɛ dee ke: Nɔ tsuaa nɔ nɛ nyɛ maa fi ngɛ zugba a nɔ ɔ, a maa fi ngɛ hiɔwe; nɛ nɔ tsuaa nɔ nyɛ maa pɛne ngɛ zugba a nɔ ɔ, a maa pɛne ngɛ hiɔwe.

¹⁹ “Jeha nɛ ɔ hu, i ngɛ nyɛ dee ke, ke nyɛ kpɛti ni enyɔ so ngɛ zugba nɛ ɔ nɔ ngɛ sane tsuaa sane nɛ a biɔ ɔ he ɔ, Tsaatsɛ nɛ ngɛ hiɔwe ɔ maa pee ha mɛ.

²⁰ Ejakaa he nɛ ni enyɔ loo ni etɛ bua a he nyɛ ngɛ, ngɛ ye biɛ mi ɔ, i ngɛ a kpɛti ngɛ lejɛ ɔ.”

Sɔmɔlɔ nɛ kɛ nɔ́ ki ɔ he abɛ

²¹ Kɛkɛ nɛ Petro ba Yesu ngɔ nɛ e ba bi lɛ ke: “Mawetsɛ, si enyɛmɛ ye nyɛmi nɛ tɔ ye nɔ nɛ ma kɛ pa lɛ? Kɛ ya su si kpaago lo?”

²² Yesu de lɛ ke: “I de we mo ke kɛ ya su si kpaago; se mohu si kpaago totoe nyingmi kpaago?

²³ Lɔ ɔ he ɔ hiɔwe matsɛ yemi ɔ ngɛ kaa matsɛ ko nɛ hlaa kaa e kɛ e sɔmɔli ba bu akɔɔtaa.

²⁴ Nɛ benɛ e bɔni bumi ɔ, akɛ nɔ ko nɛ hɛɛ lɛ hiɔ cedi akpe nyɔngma ba e ngɔ.

²⁵ Se akɛnɛ e nɛ nɔ́ ko nɛ e kɛ maa wo lɛ ɔ, e nyɔmtsɛ ɔ fa ke a jua lɛ kɛ e yo kɛ e bimɛ kɛ nihi tsuo kulaa nɛ e ngɛ ɔ, nɛ a kɛ wo hiɔ ɔ.

²⁶ Kɛkɛ nɛ sɔmɔlɔ ɔ kpla si nɛ e kpa lɛ pɛɛ ke: ‘Nyɔmtsɛ, moo to o tsui si ha mi, nɛ ma wo mo hiɔ ɔ tsuo!’

²⁷ Nɛ sɔmɔlɔ nɛ ɔ nyɔmtsɛ ɔ muklii mi sa lɛ nɛ e ngmɛɛ e he, nɛ e kɛ hiɔ ɔ ke lɛ.

²⁸ “Se benɛ jamɛ a sɔmɔlɔ ɔ je kpo ɔ, e ya na e huɛmɛ sɔmɔli ɔmɛ a ti nɔ kake nɛ hɛɛ lɛ hiɔ cedi lafa; nɛ e nu lɛ́ nɛ e mia e kuɔ si, nɛ e ke: ‘Wo mi hiɔ nɛ o hɛɛ mi ɔ!’

²⁹ Kɛkɛ nɛ e huɛ sɔmɔlɔ ɔ kpla si kpa lɛ pɛɛ ke: ‘To o tsui si ha mi, nɛ ma wo mo hiɔ ɔ tsuo kulaa.’

³⁰ Se lɛɛ e kplɛɛ we; se mohu e ya wo lɛ tsu mi kɛ yaa su be nɛ e maa wo lɛ hiɔ ɔ.

³¹ Se benɛ e huɛmɛ sɔmɔli ɔmɛ na nɔ́ nɛ a pee ɔ, e dɔ mɛ wawɛɛ nɛ a ba sɛɛ nɔ́ nɛ a pee ɔ tsuo ngɔ ha a nyɔmtsɛ ɔ.

³² Kɛkɛ nɛ e nyɔmtsɛ ɔ ha a ya tsɛ lɛ kɛ ba nɛ e de lɛ ke: ‘Sɔmɔlɔ yayami! Akɛnɛ o kpa mi pɛɛ he je ɔ i ngɔ kikɛmɛ a hiɔ nɛ ɔ tsuo ngɔ ke mo;

³³ anɛ jinɛ mo hu pi o blɔ nya ji kaa o naa o huɛ sɔmɔlɔ ɔ mɔbɔ, bɔ nɛ imi hu i na mo mɔbɔ ɔ lo?’

³⁴ Nɛ e nyɔmtsɛ ɔ muklii mi fu, nɛ e kɛ lɛ ha nɛ a pii lɛ kɛ maa su be nɛ e maa wo lɛ hiɔ ɔ tsuo kulaa.

³⁵ Ja nɔuu Tsaatsɛ nɛ ngɛ hiɔwe ɔ hu ma ngɔ pee nyɛ, ke nyɛ ti nɔ tsuaa nɔ ngɔɛ e nyɛmi nɔ tɔmi ngɔ ki lɛ kɛ ji e tsui mi ɔ.”