Mateo 17 - Somi He Ɔ

Yesu nɔmlɔ tso su tsake

¹ Ligbi ekpa se ɔ, Yesu ngɔ Petro kɛ Yakobo kɛ e nyɛmi Yohane, nɛ e kɛ mɛ ya yoku nɛ ya hiɔwe ko nɔ, mɛ pɛ.

² Nɛ e nɔmlɔ tso su tsake ngɛ a hɛ mi, nɛ e hɛ mi kpɛ kaa pu, nɛ e tade ɔmɛ hiɛ kaa pu la.

³ Nɛ oʼɛ, Mose kɛ Elia ba je a he kpo tsɔɔ mɛ, nɛ a kɛ lɛ ngɛ munyu tue.

⁴ Nɛ maa je Petro nya a, e de Yesu ke: “Nyɔmtsɛ, e hi ha wɔ kaa waa hi hiɛ ɔ; ke o suɔ ɔ, ma pee bo tsuhi etɛ ngɛ hiɛ ɔ, o nɔ kake, kɛ Mose nɔ kake, kɛ Elia nɔ kake.”

⁵ Benɛ a ngɛ munyu ɔ tue kɛ mwɔɔ ɔ, oʼɛ, bɔku hleii ko ba ha a nɔ, nɛ oʼɛ, gbi je bɔku ɔ mi de ke: “Nɔ nɛ ɔ ji ye suɔmi bi nɛ i naa e he tsui ɔ nɛ; nyɛɛ bu lɛ tue!”

⁶ Nɛ benɛ e kaseli ɔmɛ nu ɔ, a kɛ a hɛ mi bu si, nɛ a ye gbeye wawɛɛ.

⁷ Nɛ Yesu ba nɛ e ba pɛtɛ a he nɛ e ke: “Nyɛɛ te si, nyɛ ko ye gbeye!”

⁸ Se benɛ a wo a hɛ nɔ ɔ, a nɛ́ nɔ ko kaa ja Yesu nɔ kake pɛ.

⁹ Nɛ benɛ a ngɛ yoku ɔ kplee ɔ Yesu wo mɛ si veveeve ke: “Nyɛ ko sɛɛ ni nami nɛ ɔ ha nɔ ko, ja Nɔmlɔ Bi ɔ te si kɛ je gbeje lolo.”

¹⁰ Nɛ e kaseli ɔmɛ bi lɛ ke: “Mɛni he je mɔ nɛ mlaa tsɔɔli ɔmɛ deɔ ke, ja Elia ba lolo ɔ?”

¹¹ Se Yesu he nɔ nɛ e de mɛ ke: “Elia ma niinɛ, nɛ e maa to nihi tsuo blɔ nɔ ekohu.

¹² Se i ngɛ nyɛ dee ke, Elia ba mo, nɛ a yo we lɛ, se mohu a pee lɛ nɔ́ tsuaa nɔ́ nɛ a suɔ. Ja nɔuu Nɔmlɔ Bi ɔ hu maa na amanehlu ngɛ a dɛ mi.”

¹³ Kɛkɛ nɛ kaseli ɔmɛ kɔ se kaa Yohane, baptisilɔ ɔ, he munyu e kɛ mɛ ngɛ tue ɔ nɛ.

Yesu tsa jokuɛ nyumuyo ko nɛ mumi yayami ngɛ e mi

¹⁴ Nɛ benɛ a su asafo ɔ ngɔ ɔ, nyumu ko ba e ngɔ, nɛ e ba kpla si ngɛ e hɛ mi,

¹⁵ nɛ e ke: “Nyɔmtsɛ, naa ye bi nyumu ɔ mɔbɔ, se e ngɛ kɔkɔ nue nɛ e ngɛ nɔ nae wawɛɛ; ejakaa bɔɔ kɛ bɔɔ e ya nɔ la mi, nɛ bɔɔ kɛ bɔɔ e ya nɔ nyu mi.

¹⁶ Nɛ i kɛ lɛ ba o kaseli ɔmɛ a ngɔ, se a nyɛ we lɛ nɛ a tsa.”

¹⁷ Se Yesu he nɔ nɛ e ke: “Oo yi nɔ bi nɛ he we yi nɛ be a hanɔ! Mɛni be i kɛ nyɛ maa hi si kɛ ya su? Mɛni be nɔuu ma to ye tsui si ha nyɛ kɛ ya su? Nyɛɛ kɛ lɛ nɛ ba ye ngɔ ngɛ hiɛ ɔ.”

¹⁸ Nɛ Yesu nga e yi, nɛ mumi yayami ɔ je e mi kɛ je kpo, nɛ jokuɛ ɔ he wa lɛ ngɛ jamɛ a ngmlɛfia a nɔ nɔuu.

¹⁹ Kɛkɛ nɛ Yesu kaseli ɔmɛ ba e ngɔ ngɛ se, nɛ a ke: “Mɛni he je nɛ wɔɔ lɛɛ wa nyɛ we lɛ nɛ waa hia a?”

²⁰ Se Yesu de mɛ ke: “Nyɛ hemi kɛ yemi nɛ pi ɔ he je. Ejakaa niinɛ, i ngɛ nyɛ dee ke: Ke nyɛ ngɛ hemi kɛ yemi nɛ ngɛ kaa sinapi wu ɔ, nyɛ ma de yoku nɛ ɔ ke: ‘Hia ngɛ hiɛ ɔ kɛ ya lejɛ ɔ.’ Nɛ e maa hia; nɛ nɔ ko be nɛ nyɛ be nyɛe maa pee. [

²¹ Se kikɛmɛ a henɔ nɛ ɔ, a nyɛ we lɛ hiami kaa ja sɔlemi kɛ hwɔ hami nya kɛkɛ.”]

Yesu tu e gbenɔ kɛ e sitemi he munyu ekohu

²² Benɛ a ngɛ si kpae ngɛ Galilea a, Yesu de mɛ ke: “A maa ngɔ Nɔmlɔ Bi ɔ ngɔ wo nimli a dɛ mi,

²³ nɛ a maa gbe lɛ, nɛ ligbi nɛ ji ligbi etɛ ɔ, a ma tle lɛ si.” Nɛ e dɔ mɛ wawɛɛ.

Sɔlemi we ɔ he oniatsumi

²⁴ Benɛ a ba Kapernaum ɔ, onia tsuli ɔmɛ ba Petro ngɔ nɛ a ba bi lɛ ke: “Anɛ nyɛ tsɔɔlɔ ɔ ha we jeha onia a lo?”

²⁵ E ke: “E hãa.” Nɛ benɛ e ba we mi ɔ, Yesu sɛ hlami bi lɛ ke: “Kɛ o susuu kɛɛ, Simon? Zugba a nɔ matsɛmɛ ɔmɛ ɔ, mɛnɔmɛ a dɛ a heɔ too loo onia ngɛ? Ngɛ mɛ nitsɛmɛ a bimɛ a dɛ aloo ma se tsɛmɛ a dɛ?”

²⁶ Petro de lɛ ke: “Ngɛ ma se tsɛmɛ a dɛ.” Yesu de lɛ ke: “Lɛɛ bimɛ ɔmɛ yeɔ a he mɔ.

²⁷ Se benɛ pee nɛ wa ko tsɔ a nya a, yaa wo ɔ nya nɛ o ya fɔ gbowe, nɛ kekleekle lo nɛ ma ba mi gbowe ɔ, sa lɛ, nɛ ke o pa e nya mi ɔ, o maa na sika nɛ nya suu yi enyɔ; je nɛ o ngɔ ha mɛ, ha i kɛ mo tsuo.”