Mateo 16 - Somi He Ɔ

Okadi ko bimi

¹ Nɛ Farisifo ɔmɛ kɛ Sadukifo ɔmɛ ba ba da lɛ nɛ a bi lɛ ke e tsɔɔ mɛ hiɔwe okadi ko?

² Se e he nɔ nɛ e de mɛ ke: “Gbɔkuɛ mi ɔ nyɛ deɔ ke: ‘Je mi ma tsɔ, ejakaa hiɔwe tsu.’

³ Nɛ mɔtu ɔ nyɛ deɔ ke: ‘Mwɔnɛ hiɔmi maa nɛ; ejakaa hiɔwe tsu nɛ e hɛ mi ha.’ Osatotsɛmɛ, nyɛ le hiɔwe je nihi a mi bumi, se yi nɔ omɛ a he okadi ɔmɛ ɔ lɛɛ nyɛ nyɛ we nɛ nyɛɛ bu lo?

⁴ Yi nɔ bimɛ yayamihi kɛ gba puɛli ngɛ okadi hlae, se a be mɛ okadi ko hae, ja gbalɔ Yona okadi ɔ.” Nɛ e si mɛ nɛ e pue nɔ kɛ ho.

Farisifohi kɛ Sadukifo ɔmɛ a ma sasɛ ɔ

⁵ Nɛ benɛ e kaseli ɔmɛ yaa wo ɔ se ɔ, a hɛ je nɔ kaa a maa hɛɛ abolo.

⁶ Yesu de mɛ ke: “Nyɛɛ hyɛ nɛ nyɛ hɛ hi nyɛ he nɔ ngɛ Farisifohi kɛ Sadukifo ɔmɛ a mɛ sasɛ ɔ he!”

⁷ Se a tu he munyu ngɛ a kpɛti ke: “Abolo nɛ wa hɛɛ we ɔ he je!”

⁸ Se nɛ Yesu na le ja a, e ke: “Nyɛ nɛ nyɛ hemi kɛ yemi pi, mɛni he je nyɛ ngɛ munyu tue ngɛ nyɛ kpɛti kɛ abolo nɛ nyɛ hɛɛ we ɔ he je ɔ?

⁹ Nyɛ nɛ nihi a nya kɛ mwɔɔ, nɛ nyɛ pa kai we nimli akpe enuɔ ɔ kɛ abolo enuɔ ɔ kɛ kusiihi abɔ nɛ nyɛ kukuɔ ɔ?

¹⁰ Aloo nimli akpe eywiɛ ɔ kɛ abolo ‘kpaago ɔ kɛ kusiihi abɔ nɛ nyɛ kukuɔ ɔ?

¹¹ Kɛ ji lɛ kɛɛ ne nyɛ nɛ́ nya kaa pi abolo he je nɛ i ngɛ nyɛ dee ke nyɛ hɛ nɛ hi nyɛ he nɔ ngɛ Farisifohi kɛ Sadukifo ɔmɛ a ma sasɛ ɔ he ɔ?”

¹² Jeha nɛ ɔ a kɔ se kaa pi abolo ma sasɛ ɔ he je nɛ e ke, a hɛ nɛ hi a he nɔ ɔ, se mohu Farisifohi kɛ Sadukifo ɔmɛ a tsɔɔmi ɔ he je.

Petro ye Yesu he odase

¹³ Se benɛ Yesu ba Kaisaria Filipi ni ɔmɛ a mi ɔ, e bi e kaseli ɔmɛ ke: “Mɛnɔ nihi deɔ ke Nɔmlɔ Bi ɔ ji?”

¹⁴ Se a de lɛ ke: “Ni komɛ deɔ ke Yohane, Baptisilɔ ɔ ʼi, nɛ ni komɛ hu deɔ ke Elia ʼi, nɛ ni kpahi komɛ deɔ ke Yeremia aloo gbali ɔmɛ a ti nɔ kake ʼi.”

¹⁵ E bi mɛ ke: “Se nyɛɛ lɛɛ mɛnɔ nyɛ deɔ ke i ji?”

¹⁶ Petro he nɔ ke: “Mo ji Kristo ɔ, Mawu hɛ kalɔ ɔ, bi ɔ.”

¹⁷ Nɛ Yesu he nɔ nɛ e de lɛ ke: “A gbaa mo, Simon, Yona bi; ejakaa pi he lo kɛ muɔ nɛ je enɛ ɔ tsɔɔ mo, se mohu Tsaatsɛ nɛ ngɛ hiɔwe ɔ ʼi.

¹⁸ Nɛ imi hu i ngɛ mo dee ke: Mo ji Petro ɔ nɛ, nɛ kikɛmɛ a tɛ sa nɛ ɔ nɔ ma fia ye safo ɔ ngɔ ma, nɛ gbeje agbo ɔmɛ be nyɛe e nɔ maa ye.

¹⁹ Nɛ ma ngɔ hiɔwe matsɛ yemi ɔ nya safe ɔmɛ ngɔ ha mo; nɛ nɔ́ tsuaa nɔ́ nɛ o maa fi ngɛ zugba a nɔ ɔ, a maa fi ngɛ hiɔwe; nɛ nɔ́ tsuaa nɔ́ nɛ o maa pɛne ngɛ zugba a nɔ ɔ, a maa pɛne ngɛ hiɔwe.”

²⁰ Kɛkɛ nɛ e wo e kaseli ɔmɛ si veveeve ke a ko de nɔ ko ke lɛ ji Yesu, Kristo ɔ.

Yesu tu e gbenɔ kɛ e sitemi he munyu

²¹ Kɛ je jamɛ a be ɔ, nɛ Yesu bɔni e kaseli ɔmɛ tsɔɔmi kaa ja e ya Yerusalem nɛ e ya na amanehlu babauu ngɛ nikɔtɔma amɛ kɛ osɔfo nikɔtɔma amɛ kɛ mlaa tsɔɔli ɔmɛ a dɛ mi, nɛ a gbe lɛ, nɛ ligbi nɛ ji ligbi etɛ ɔ nɛ a tle lɛ si ekohu.

²² Nɛ Petro tsɛ lɛ kɛ ya se nɛ e bɔni lɛ kɔkɔ bɔmi ke: “Mawu nɛ ko ha nɛ enɛ ɔ nɛ ba o nɔ, Mawetsɛ, enɛ ɔ ya je ngɛ se lokoo!”

²³ Se Yesu plɛ e he nɛ e de lɛ ke: “Jee ye nɔ, Satan! O ngɛ ye nane kpatae; ejakaa o susuu we Mawu nihi a he, se nimli a nihi a he mohu o susuu.”

²⁴ Kɛkɛ nɛ Yesu de e kaseli ɔmɛ ke: “Ke nɔ ko suɔ kaa e nyɛɛ ye se ɔ, e kua e he nɛ e wo e sɛumi tso ɔ nɛ e nyɛɛ ye se?

²⁵ Ejakaa nɔ tsuaa nɔ nɛ hlaa kaa e baa e klaa yi ɔ, e maa laa lɛ; se nɔ tsuaa nɔ nɛ laa e klaa ngɛ ye he ɔ, e nine maa su nɔ.

²⁶ Ejakaa mɛni se nɔmlɔ ma na, ke e nine su je mluku ɔ tsuo nɔ, se e laa e klaa a? Aloo mɛni nɔmlɔ ma ngɔ ha nɛ e kɛ kpɔ e klaa?

²⁷ Ejakaa nɔmlɔ Bi ɔ maa ba ngɛ e tsɛ nyami ɔ mi kɛ e bɔfo ɔmɛ; nɛ lɛ be ɔ mi ɔ, e maa wo nɔ tsuaa nɔ hiɔ ngɛ e ni tsumi nya.

²⁸ Niinɛ, i ngɛ nyɛ dee ke: Ni kome ngɛ nihi nɛ daa si ngɛ hiɛ ɔ nɛ ɔ a kpɛti nɛ a be gboe kɛ yaa su be nɛ a maa na Nɔmlɔ Bi ɔ nɛ e ma ngɛ e matsɛ yemi ɔ mi.”