Mateo 15 - Somi He Ɔ

Blematsɛmɛ a tsɔɔmi

¹ Kɛkɛ nɛ mlaa tsɔɔli kɛ Farisifo ɔmɛ nɛ je Yerusalem ɔ ba Yesu ngɔ ba de ke:

² “Mɛni he je nɛ o kaseli ɔmɛ tɔɔ nikɔtɔmɛ amɛ a kɔ ɔmɛ a nɔ ɔ? Ejakaa a fɔ we a dɛ loko a yeɔ ni.”

³ Se e he nɔ nɛ e de mɛ ke: “Mɛni he je nɛ nyɛ hu nyɛɛ kɛ nyɛ blema kɔ ɔmɛ tɔɔ Mawu kita a nɔ ɔ?

⁴ Ejakaa Mawu ke: ‘Buu o tsɛ kɛ e nyɛ,’ nɛ: ‘Nɔ nɛ gbiɛɛ e tsɛ loo e nyɛ ɔ, a maa gbe lɛ!’

⁵ Se nyɛɛ lɛɛ nyɛ deɔ ke: Nɔ tsuaa nɔ nɛ ma de e tsɛ loo e nyɛ ke: ‘Nɔ́ nɛ jinɛ o ma na ngɛ ye dɛ mi ɔ, i kɛ ke Mawu’ ɔ, lɛɛ e ko pa bu e tsɛ loo e nyɛ hu.

⁶ Nɛ nyɛ blema kɔ ɔmɛ a he ɔ, nyɛ kua Mawu kita a.

⁷ Osatotsɛmɛ! Niinɛ nɛ Yesaia gba ngɛ nyɛ he ke:

⁸ ‘Ma nɛ ɔ kɛ a nya buu mi; Se a tsui tsɛ̃ e he kɛ je ye he kɛ ho lokoo ya.

⁹ Se yakatsuaa a jaa mi ɔ nɛ, Ejakaa a tsɔɔ tsɔɔmihi nɛ ji nimli a kitahi.’ ”

Nihi nɛ bleɔ nɔmlɔ

¹⁰ Nɛ Yesu tsɛ asafo ɔ kɛ ba nɛ e de mɛ ke: “Nyɛɛ bu tue nɛ nyɛɛ nu sisi!

¹¹ Pi nɔ́ nɛ yaa nɔ nya mi ɔ nɛ bleɔ nɔmlɔ; se mohu nɔ nɛ jee nɔ nya mi ɔ, lɔ ɔ lɛ bleɔ nɔmlɔ.”

¹² Kɛkɛ nɛ e kaseli ɔmɛ ba e ngɔ ba de lɛ ke: “O le kaa benɛ Farisifo ɔmɛ nu kikɛmɛ a munyu nɛ ɔ ɔ, e pee mɛ tai ɔ?”

¹³ Se e he nɔ ke: “Tso tsuaa tso nɛ pi ye hiɔwe Tsɛ ɔ nɛ ma a, a maa hia.

¹⁴ Nyɛ ko di a se! Hɛ yuyuili nɛ tsɔɔ hɛ yuyuili a blɔ ji mɛ; nɛ ke hɛ yuyuilɔ ngɛ hɛ yuyuilɔ blɔ tsɔe ɔ, mɛ ni enyɔ ɔ tsuo a maa nɔ muɔ mi.”

¹⁵ Nɛ Petro he nɔ nɛ e de lɛ ke: “Tsɔɔ wɔ abɛ nɛ ɔ sisi!”

¹⁶ Nɛ Yesu ke: “Anɛ nyɛ hu nyɛ li ni kɛ mwɔɔ?

¹⁷ Anɛ nyɛ kpa we si kaa nɔ́ tsuaa nɔ́ nɛ yaa nɔ nya mi ɔ, muklii mi e sɛɛ nɛ a jeɔ woɔ agbotso mi lo?

¹⁸ Se nihi nɛ jee nya mi jee kpo ɔ, tsui mi a jee nɛ kɔlɔ ɔmɛ lɛ bleɔ nɔ ɔ nɛ.

¹⁹ Ejakaa tsui mi nɛ susumi yayahi, nɔmlɔ gbemi, gba puɛmihi, ajuama bɔmihi, jumihi, lakpa odase yemihi kɛ musu bɔmihi jee.

²⁰ Enɛ ɔmɛ ji nihi nɛ bleɔ nɔmlɔ; se dɛ nɛ a fɔ we loko a yeɔ ni ɔ, lɔ ɔ ble we nɔ.”

Yo ko hemi kɛ yemi

²¹ Nɛ Yesu je lejɛ ɔ nɛ e pue nɔ kɛ ho Tiro kɛ Zidon ni ɔmɛ a mi ya.

²² Nɛ oʼɛ, Kanaanyo ko nɛ je lejɛ ɔ ni ɔmɛ a mi nɔuu ɔ ba kpa ngmlaa wo lɛ ke: “Naa mi mɔbɔ, Nyɔmtsɛ, David Bi; ye bi yo ngɛ nɔ nae kɛ mumi yayami.”

²³ Se e pui e nya mi. Nɛ ekaseli ɔmɛ ba ba kpa lɛ pɛɛ, nɛ a de lɛ ke: “Wo lɛ blɔ nɛ e ho, se e ngɛ ngmlaa kpae kɛ ngɛ wa se nyɛɛ!”

²⁴ Se e he nɔ ke: “Israel we tohi nɛ laa amɛ a ngɔ kɛkɛ a tsɔ mi.”

²⁵ Se yo ɔ ba ba kpla si ngɛ e hɛ mi nɛ e ke: “Mawetsɛ, pee he eko ha mi!”

²⁶ Se e he nɔ ke: “E dɛ kaa a ngɔɔ bimɛ abolo ɔ sakee fɔɔ he haa gbehi a bimɛ.”

²⁷ Se e ke: “Mawetsɛ, e ngɛ mi ja mohu; se tse gbehi a bimɛ ɔmɛ hu yeɔ bibli nɛ pueɔ a nyɔmtsɛ ɔmɛ a kplɔɔ ɔ sisi ɔ eko!”

²⁸ Kɛkɛ nɛ Yesu he nɔ nɛ e de lɛ ke: “Oo, yo, o hemi kɛ yemi kle! A pee ha mo kaa bɔ nɛ o ngɛ hlae ɔ!” Nɛ a tsa e bi yo ɔ ngɛ jamɛ a ngmlɛfia a nɔ nɔuu.

Yesu tsa nihi fuu

²⁹ Nɛ Yesu je lejɛ ɔ kɛ ba Galilea Wo ɔ nya. Nɛ e kuɔ kɛ ya yoku ɔ nɔ nɛ e ya hi si ngɛ lejɛ ɔ.

³⁰ Nɛ asafo babauu ba e ngɔ nɛ a hɛɛ nihi nɛ a hule kɛ hɛ yuyuili kɛ amuɛtihi kɛ glɔtsɛmɛ kɛ ni kpahi fuu; nɛ a kɛ mɛ ba pue Yesu nane nya; nɛ e tsa mɛ.

³¹ Nɛ asafo ɔmɛ a nya kpɛ a he, benɛ a na kaa amuɛti ɔmɛ ngɛ munyu tue, nɛ glɔtsɛmɛ ɔmɛ a he mi wa mɛ, nɛ nihi nɛ a hule ɔmɛ ngɛ nyɛɛ, nɛ hɛ yuyuili ɔmɛ ngɛ nɔ hyɛe ɔ, nɛ a wo Israel Mawu ɔ hɛ mi nyami.

Yesu ha nimli akpe eywiɛ niyeni

³² Yesu tsɛ e kaseli ɔmɛ kɛ ba nɛ e ke: “Ye muklii mi ngɛ mi sae ngɛ asafo ɔmɛ a he, kaa mwɔnɛ ji ligbi etɛ nɛ a kɛ mi hi si, nɛ a be nɔ́ ko nɛ a maa ye; nɛ i sume kaa ma wo mɛ blɔ kɛ hwɔ nɛ eko ɔ klibi ya po mɛ ngɛ blɔ ɔ nɔ.”

³³ Nɛ e kaseli ɔmɛ bi lɛ ke: “Jije wa ma na abolo nɛ hiɛ fuu ngɛ ngɛ nga nɛ ɔ nɔ, bɔ nɛ maa su asafo babauu nɛ ɔ nya?”

³⁴ Nɛ Yesu bi mɛ ke: “Abolo enyɛmɛ nyɛ ngɛ?” A de lɛ ke: “Kpaago, kɛ lo tsɔwi bɔɔ ko.”

³⁵ Nɛ e fa asafo ɔmɛ ke a hi si ngɛ zugba mi.

³⁶ Nɛ e kukuɔ abolo kpaago ɔ kɛ lo ɔmɛ, nɛ e na si, nɛ e kuɔ mi, nɛ e ngɔ ha e kaseli ɔmɛ nɛ e kaseli ɔmɛ kɛ ha asafo ɔ.

³⁷ Nɛ mɛ tsuo a ye nɛ a tɔ; nɛ a kukuɔ bibli nɛ piɛ ɔ kusii kpaago nɛ a hyi tɔtɔɔtɔ.

³⁸ Nɛ nihi nɛ ye ɔ a nya ji nyumuhi akpe eywiɛ, e slɔ yi kɛ jokuɛwi.

³⁹ Nɛ benɛ e wo asafo ɔ blɔ ɔ, e sɛ lɛ mi, nɛ e ba Magdala ni ɔmɛ a mi.