Mateo 14 - Somi He Ɔ

Yohane Baptisilɔ ɔ gbenɔ

¹ Jamɛ a be ɔ mi ɔ amlaalo Herode nu Yesu he sane;

² nɛ e de e sɔmɔli ɔmɛ ke: “Yohane, Baptisilɔ ʼi; lɛ nɛ te si kɛ je gbeje, lɔ ɔ he nɛ he wami ɔmɛ ngɛ ni tsue ngɛ e mi nɛ ɔ nɛ.”

³ Se Herode nu Yohane nɛ e fi lɛ, nɛ e wo lɛ tsu mi ngɛ Herodia, e nyɛmi Filipo yo ɔ he;

⁴ ejakaa Yohane de lɛ ke: “E dɛ́ kaa o ngɔɔ lɛ.”

⁵ Nɛ jinɛ e hla kaa e gbe lɛ, se e ya ye asafo ɔ gbeye, ejakaa a buu Yohane gbalɔ.

⁶ Benɛ a ngɛ Herode fɔmi ligbi yee ɔ, Herodia biyo ɔ ba do ngɛ ni ɔmɛ a hɛ mi, nɛ e pee Herode fɛu.

⁷ Lɔ ɔ he ɔ, e ka kita kɛ wo lɛ si ke nɔ́ tsuaa nɔ́ nɛ e ma bi lɛ ɔ e ma ha lɛ.

⁸ Nɛ e nyɛ wo lɛ ga nɛ e ba de ke: “Ngɔɔ Yohane, Baptiɔilɔ ɔ, yi ngɔ fɔ ka mi ha mi ngɛ hiɛ ɔ!”

⁹ Nɛ e dɔ matsɛ ɔ; se e kitahi nɛ e ka amɛ, kɛ nihi nɛ kɛ lɛ hii si ngɛ niyeni si ɔ he je ɔ, e fa ke a ngɔ ha lɛ.

¹⁰ Nɛ e tsɔ nɛ a ya po Yohane yi ngɛ tsu ɔ mi.

¹¹ Nɛ a ngɔ e yi ngɔ fɔ ka mi kɛ ba, nɛ a ngɔ ha yiheyo ɔ, nɛ e kɛ ya ha e nyɛ.

¹² Nɛ Yohane kaseli ɔmɛ ba nɛ a ba wo e gbogboe ɔ nɛ a ya pu, nɛ a ho nɛ a ya de Yesu.

Yesu ha nimli akpe enuɔ niyeni

¹³ Se benɛ Yesu nu ɔ, e gu lɛ mi kɛ je lejɛ ɔ kɛ ho nga nɔ he ko banee ya. Nɛ benɛ asafo ɔmɛ nu ɔ, a je ma amɛ a mi nɛ a nyɛɛ nane kɛ nyɛɛ e se.

¹⁴ Nɛ benɛ Yesu je kpo ɔ e ba na asafo babauu, nɛ e muklii mi sã lɛ ngɛ a he, nɛ e tsa a kpɛti hiɔtsɛmɛ ɔmɛ.

¹⁵ Nɛ benɛ su gbɔkuɛ ɔ, e kaseli ɔmɛ ba e ngɔ ba de lɛ ke: “Nga nɔ ji hiɛ ɔ, nɛ je ngɛ jɔe; je asafo ɔ blɔ nɛ a ya ma amɛ a mi nɛ a ya he niyeni.”

¹⁶ Se Yesu de mɛ ke: “E hia we kaa a ya, nyɛ nitsɛmɛ nyɛ ha mɛ ni nɛ a ye.”

¹⁷ Se a de lɛ ke: “Abolo enuɔ kɛ lo enyɔ pɛ wa ngɛ ngɛ hiɛ ɔ!”

¹⁸ Nɛ e de mɛ ke: “Nyɛ kɛ ba ha mi ngɛ hiɛ ɔ!”

¹⁹ Nɛ e fa asafo ke a hi si ngɛ nga a nɔ. Nɛ e kukuɔ abolo enuɔ kɛ lo enyɔ ɔ, nɛ e hyɛ hiɔwe nɛ e gbaa nɔ, nɛ e kuɔ mi, nɛ e ngɔ ha e kaseli ɔmɛ, nɛ e kaseli ɔmɛ ngɔ ha asafo ɔ.

²⁰ Nɛ mɛ tsuo a ye nɛ a tɔ, nɛ a kukuɔ bibli nɛ piɛ ɔ ngɔ wo kusii nyɔngma kɛ enyɔ mi nɛ a hyi tɔtɔɔtɔ.

²¹ Ninli nɛ ye ɔ maa su nyumuhi akpe enyɔ, e slɔ yihi kɛ jokuɛwi.

Yesu nyɛɛ wo hɛ mi

²² Nɛ amlɔ ɔ Yesu tsɛ̃ e kaseli ɔmɛ a yi se nɛ a sɛ lɛ mi nɛ a sɛ e hlami kɛ ya wo ɔ se je, konɛ e wo asafo ɔmɛ blɔ lolo.

²³ Nɛ benɛ e wo asafo ɔmɛ blɔ ɔ, e kuɔ yoku ɔ, lɛ e nɔ kake, nɛ e ya sɔle. Se benɛ je jɔ ɔ, lɛ e nɔ kake too e ngɛ lejɛ ɔ?

²⁴ Se lɛ ɔ su wo ɔ kpɛti mo, nɛ oslɔke ɔmɛ ngɛ lɛ ɔ hɛɛe, ejakaa e ngɛ kɔɔhiɔ kpee.

²⁵ Se makɛ ngmlɛ eywiɛ mi ɔ, Yesu nyɛɛ wo ɔ hɛ mi kɛ ba a ngɔ.

²⁶ Nɛ benɛ e kaseli ɔmɛ na lɛ nɛ e nyɛɛ wo ɔ hɛ mi ɔ, a tsui po, nɛ a de ke: “Kpade ʼi!” Nɛ a kɛ gbeye kpa ngmlaa.

²⁷ Se amlɔ ɔ, Yesu wo e nya nɔ nɛ e de mɛ ke: “Nyɛ na tsui, ami ʼi; nyɛ ko ye gbeye!”

²⁸ Se Petro he nɔ nɛ e de lɛ ke: “Mawetsɛ, ke mo ʼi ɔ, fa mi konɛ ma nyɛɛ nyu ɔ hɛ mi kɛ ba o ngɔ,”

²⁹ Nɛ Yesu de lɛ ke: “Ba!” Nɛ Petro je lɛ ɔ mi, nɛ e nyɛɛ nyu ɔ hɛ mi kɛ yaa Yesu ngɔ.

³⁰ Se benɛ e na kaa kɔɔhiɔ ɔ ngɛ fiae huu ɔ, e ye gbeye nɛ e bɔni mumi, nɛ e kpa ngmlaa ke: “Mawetsɛ, he mi!”

³¹ Nɛ amlɔ ɔ Yesu kpa e nine mi nɛ e pɛtɛ e he, nɛ e de lɛ ke: “Mo nɛ o hemi kɛ yemi pi, mɛni he je o je nguane?”

³² Nɛ benɛ a sɛ lɛ ɔ mi ɔ, kɔɔhiɔ ɔ jɔɔ fiami.

³³ Nɛ nihi nɛ ngɛ lɛ ɔ mi ɔ ba ba ja lɛ de ke: “Niinɛ, Mawu bi ji mo!”

Yesu tsa hiɔtsɛmɛ ngɛ Genesarɛt

³⁴ Nɛ benɛ a po wo ɔ, a ba Genesarɛt zugba a nɔ.

³⁵ Nɛ benɛ lejɛ ɔ tsɛmɛ na kaa Yesu ʼi ɔ, a tsɔ kɛ ya lejɛ ɔ ni ɔmɛ a mi tsuo, nɛ a ya ngɔ hiɔtsɛmɛ tsuo kɛ ba e ngɔ;

³⁶ nɛ a ba kpa lɛ pɛɛ wawɛɛ kaa e ha a na e tade ɔ nya a he kɛkɛ nɛ a ta: nɛ nihi abɔ nɛ ta he ɔ tsuo he wa mɛ kulaa.