Mateo 12 - Somi He Ɔ

Hejɔɔmi Ligbi ɔ he sane

¹ Jamɛ a be ɔ mi ɔ Yesu ya gu blɛfo mgmɔhi a mi ngɛ Hejɔɔmi Ligbi ɔ nɔ; nɛ hwɔ ye e kaseli ɔmɛ, nɛ a bɔni blɛfo ɔ kpɔmi kɛ kpemi.

² Se benɛ Farisifo ɔmɛ na a, a de lɛ ke: “Oʼɛ, o kaseli ɔmɛ ngɛ nɔ nɛ a ngmɛ́ blɔ kaa a peɔ ngɛ Hejɔɔmi Ligbi ɔ nɔ ɔ pee.”

³ Se e de mɛ ke: “Anɛ nyɛ kane we nɔ nɛ David pee benɛ hwɔ ye lɛ kɛ nihi nɛ kɛ lɛ ngɛ ɔ?

⁴ Bɔ nɛ e sɛ Mawu we ɔ nɛ e ya ye hɛ mi mami abolo nɛ e dɛ blɔ kaa lɛ loo nihi nɛ kɛ lɛ ngɛ ɔ yeɔ ɔ, kaa ja osɔfɔ ɔmɛ kɛkɛ ɔ?

⁵ Aloo nyɛ kane we ngɛ Mlaa a mi kaa Hejɔɔmi Ligbi ɔmɛ a nɔ ɔ, osɔfohi bleɔ Hejɔɔmi Ligbi ɔ ngɛ sɔlemi we ɔ nɛ a yi fɔ ɔ?

⁶ Jeha nɛ ɔ i ngɛ nyɛ dee ke: nɔ́ nɛ pe sɔlemi we ɔ ngɛ hiɛ ɔ.

⁷ Se kaa nyɛ le nɔ́ nɛ ji: ‘Mɔbɔ nami i hlaa se pi bɔ’ ɔ sisi jinɛ, nyɛ be ninɛmɛ nɛ yi fɔ ɔ fɔ bue.

⁸ Ejakaa Hejɔɔmi Ligbi ɔ nyɔmtsɛ ji Nɔmlɔ Bi ɔ.”

Nyumu ko nɛ nine kake gbo ɔ

⁹ Nɛ e je lejɛ ɔ nɛ e ya sɛ a kpe he ɔ.

¹⁰ Nɛ oʼɛ, nyumu ko ngɛ lejɛ ɔ nɛ e nine kake gbo. Nɛ a bi lɛ ke: “Anɛ e da blɔ kaa a tsaa nɔ ngɛ Hejɔɔmi Ligbi ɔ nɔ lo?” A de enɛ ɔ benɛ pee nɛ e ya po e nya?

¹¹ Se e de mɛ ke: “Nyɛ ti mɛnɔ nɛ ngɛ to kake, nɛ ke e ya nɔ muɔ mi ngɛ Hejɔɔmi Ligbi ɔ nɔ ɔ, nɛ e be e he pɛtɛe nɛ e je lɛ?

¹² Anɛ nɔmlɔ he jua wɛ babauu pi to lo? Lɔ ɔ he ɔ e da blɔ kaa a peɔ kpakpa ngɛ Hejɔɔmi Ligbi ɔ nɔ.”

¹³ Kɛkɛ nɛ e de nyumu ɔ ke: “Kpa o nine ɔ mi!” Nɛ e kpa mi, nɛ e kɛ kake ɔ sɔ.

¹⁴ Enɛ ɔ he ɔ Farisifo ɔmɛ je kpo ya so e yi nɔ, bɔ nɛ a maa pee nɛ a kpata e hɛ mi.

Mawu tsɔlɔ nɛ e hia

¹⁵ Se benɛ Yesu kpa enɛ ɔ si ɔ, e sa e he si kɛ je lejɛ ɔ. Nɛ nihi babauu nyɛɛ e se, nɛ e tsa mɛ tsuo,

¹⁶ nɛ e bɔ mɛ kɔkɔ ke a ko ha nɛ a nu e he;

¹⁷ benɛ pee nɛ nɔ nɛ gbalɔ “Yesaia de ɔ nɛ ba mi ke:

¹⁸ “Oʼɛ, ye tsɔlɔ nɛ i hla a, Ye suɔlɔ nɛ ye klaa naa e he tsui ɔ, I kɛ ye mumi ɔ maa to e nɔ, Nɛ e maa fiɛ kojomi ngɔ tsɔɔ majeli ɔmɛ.

¹⁹ E be pɛe, nɛ e be ngmlaa kpae hulɔ, Nɛ nɔ ko be e gbi nue ngɛ magbɛ ɔmɛ a nɔ

²⁰ Gla nɛ a kɔ ɔ, e be kue, Nɛ kane mi tako nɛ ngɛ tsoe suhi ɔ e be gbee, Kɛ maa su be nɛ e ma ha kojomi maa su kunimi yemi mi.

²¹ Nɛ e biɛ ɔ nɔ majeli ɔmɛ maa ngɔ a hɛ ngɔ fɔ.”

Yesu kɛ Beelzebul

²² Kɛkɛ nɛ a kɛ nɔ ko nɛ mumi yayami ngɛ e mi nɛ ji hɛ yuyuilɔ kɛ amuɛti tsuo ɔ ba e ngɔ; nɛ e tsa lɛ, nɛ hɛ yuyuilɔ nɛ ji amuɛti hulɔ ɔ tu munyu nɛ e hyɛ nɔ.

²³ Nɛ asafo ɔ tsuo nyɛ kpɛ a he nɛ a de ke: “Anɛ pi David bi ɔ ji nɛ ɔ?”

²⁴ Se benɛ Farisifo ɔmɛ nu ɔ, a ke: “Pi yaka nɛ nɔ nɛ ɔ ngɛ mumi yayamihi hiae ɔ, se mumi yayamihi a tsɛ Beelzebul ɔ he wami nyɛ ʼi.”

²⁵ Se nɛ Yesu na a juɛmi ɔ, e de mɛ ke: “Matsɛ yemi tsuaa matsɛ yemi nɛ gbaa woɔ lɛ nitsɛ e he ɔ, e ywia; nɛ ma tsuaa ma aloo we tsuaa we nɛ gbaa woɔ lɛ nitse e he ɔ, e dɛ si.

²⁶ Nɛ ke satan hia satan a, e gba wo lɛ nitse e he; lɛɛ kɛ e matsɛ yemi ɔ maa pee kɛ da si kɛɛ?

²⁷ Nɛ ke imi ɔ, Beelzebul he wami nya i hiaa mumi yayamihi ngɛ ɔ, nyɛ bimɛ nyumu ɔmɛ ɔ, mɛnɔ he wami nya a hiaa mɛ ngɛ? Lɔ ɔ he ɔ mɛ nɔuu a maa kojo nyɛ.

²⁸ Se ke imi lɛɛ, Mawu Mumi ɔ nya i hiaa mumi yayami ɔmɛ ngɛ ɔ, lɔ ɔ lɛɛ pe Mawu matsɛ yemi ɔ na nyɛ nɛ ɔ nɛ.

²⁹ “Kɛ maa pee kɛɛ nɛ nɔ ko ma nyɛ he walɔ we mi nɛ e sɛ nɛ e ya ha e nihi, kaa ja e fi he walɔ ɔ lolo loko e ma nyɛ e we ɔ mi ni ha.

³⁰ “Nɔ nɛ be ye blɔfami ɔ, e te si ngɔ wo mi; nɛ nɔ nɛ kɛ mi bua we nya a, e ngɛ gbɛe kɛ ngɛ fiae.

³¹ Lɔ ɔ he ɔ, i ngɛ nyɛ dee ke: A maa ngɔ yayami kɛ musu bɔmi tsuo ngɔ pa nimli: se Mumi ɔ he musu bɔmi ɔ, a kɛ be nimli pae.

³² Nɛ ɔ tsuaa nɔ nɛ maa tu munyu ko ngɔ si Nɔmlɔ Bi ɔ, a kɛ maa pa lɛ; se nɔ tsuaa nɔ nɛ maa tu munyu ngɔ si Mumi Klɔuklɔu ɔ, a kɛ be lɛ pae ngɛ je nɛ ɔ mi aloo je nɛ maa ba a mi.”

Tso kɛ e yiblii

³³ “Nyɛ ha tso ɔ nɛ pee kpakpa nɛ e wo yiblii kpakpahi; aloo nyɛ ha tso ɔ nɛ pee tso yaya nɛ e wo yiblii yayahi; ejakaa tso yiblii a kɛ leɔ tso.

³⁴ Nyɛ sinɔhi a nina! Kɛ maa pee kɛɛ nɛ nyɛ nɛ nyɛ ji nimli yayamihi ɔ, nyɛ ma nyɛ munyu kpakpa maa tu? Ejakaa nɔ́ nɛ hyi tsui kɛ be nɔ ɔ, lɔ ɔ nɔuu nya deɔ.

³⁵ Nɔmlɔ kpakpa jeɔ ni kpakpahi kɛ jee e tsui mi juetli kpakpa a mi; nɛ nɔmlɔ yayami hu jeɔ ni yayahi kɛ jee e tsui mi juetli yaya a mi.

³⁶ “Se i ngɛ nyɛ dee ke, yaka munyu tsuaa yaka munyu nɛ nimli tuɔ ɔ, a maa bu he akɔɔtaa ngɛ kojomi ligbi ɔ nɔ.

³⁷ Ejakaa o munyu ɔmɛ a mi a maa je kɛ wo mo nguɔ, nɛ o munyu ɔmɛ a mi a maa je kɛ bu mo fɔ.”

Farisifo ɔmɛ ngɛ okadi hlae

³⁸ Kɛkɛ nɛ mlaa tsɔɔli kɛ Farisifo ɔmɛ a ti ni komɛ he nɔ nɛ a de ke: “Tsɔɔlɔ, wa ngɛ o nine nya okadi ko hlae nɛ waa hyɛ.”

³⁹ Se Yesu he nɔ nɛ e de mɛ ke: “Yi nɔ bi yayahi kɛ gba puɛli ngɛ okadi hlae; se a be mɛ okadi ko hae, kaa ja gbalɔ Yona okadi ɔ.

⁴⁰ Ejakaa bɔ nɛ Yona ye nyɔ kɛ pia ligbi etɛ ngɛ wo mi lo ngua a muklii mi ɔ, jã Nɔmlɔ Bi ɔ maa ye nyɔ kɛ pia ligbi etɛ ngɛ zugba a muklii mi.

⁴¹ Ninive nyumu ɔmɛ maa te si ngɔ wo kikɛ yi nɔ bi nɛ ɔmɛ ngɛ kojomi ɔ mi, nɛ a maa bu mɛ fɔ; ejakaa a tsake a tsui ngɛ Yona fiɛmi ɔ nya; nɛ oʼɛ, nɔ́ nɛ pe Yona ngɛ hiɛ ɔ.

⁴² Leneyi (Wo yi je) manye ɔ maa te si ngɔ wo kikɛmɛ a yi nɔ bi nɛ ɔmɛ ngɛ kojomi ɔ mi, nɛ e maa bu mɛ fɔ; ejakaa e je zugba a nyagbe he ba bu Salomo ni lemi ɔ tue; nɛ oʼɛ, nɔ́ nɛ pe Salomo ngɛ hiɛ ɔ.”

Mumi yayami ɔmɛ a sekpalemi

⁴³ “Se mumi yayami ɔ, ke e je nɔmlɔ mi ɔ, e ya nyɛɛ he gbigblihi hlaa he jɔɔmi, se e nɛ́ eko.

⁴⁴ Nɛ e deɔ ke: ‘Ma kpale ye se kɛ ya ye we he nɛ i je ɔ.’ Nɛ ke ba a, e naa kaa e fɔɔ si gu, nɛ a bɛɛ mi, nɛ a dla mi.

⁴⁵ Kɛkɛ ɔ, e yaa nɛ e ya ngɔɔ mumi kpahi kpaago nɛ ji mumi yayamihi pe lɛ kɛ piɛɛ e he; nɛ a baa ba hii lejɛ ɔ; nɛ jamɛ a nɔmlɔ ɔ nyagbe si himi ɔ plɛɔ yayami pe kekle nɔ ɔ. Ja nɔuu e maa ba mi ngɛ yi nɔ yaya nɛ ɔ hu he.”

Yesu nyɛ kɛ enyɛmimɛ nyumu ɔmɛ

⁴⁶ Yesu kɛ asafo ɔmɛ ngɛ nɔ ngɛ munyu tue nɔuu kɛkɛ nɛ oʼɛ, e nyɛ kɛ e nyɛmimɛ ɔmɛ ba da agbo ɔ nya; a ngɛ hlae nɛ a kɛ lɛ maa tu munyu?

⁴⁷ Nɛ nɔ ko ba de lɛ ke: “Oʼɛ, o nyɛ kɛ o nyɛmimɛ ɔmɛ daa si ngɛ agbo ɔ nya ngɛ hlae nɛ a kɛ mo maa tu munyu.”

⁴⁸ Se e he nɔ nɛ e de nɔ nɛ ba de lɛ ɔ ke: “Mɛnɔ ji ye nyɛ, nɛ mɛnɔmɛ ji ye nyɛmimɛ ɔmɛ?”

⁴⁹ Nɛ e je e nine ngɔ tsɔɔ e kaseli ɔmɛ nɛ e ke: “Ne, ye nyɛ kɛ ye nyɛmimɛ ɔmɛ!

⁵⁰ Ejakaa nɔ tsuaa nɔ nɛ peɔ Tsaatsɛ nɛ ngɛ hiɔwe ɔ suɔmi nya ni ɔ, lɛ nɔuu ji ye nyɛmi nyumu kɛ ye nyɛmi yo kɛ ye nyɛ.”