Marko 7 - Somi He Ɔ

Blematsɛmɛ ɔmɛ a tsɔɔmihi

¹ Farisifo ɔmɛ kɛ mlaa tsɔɔli ɔmɛ a ti ni komɛ nɛ je Yerusalem ba a bua a he nya kɛ ba Yesu ngɔ.

² A na kaa e kaseli ɔmɛ a ti ni komɛ yeɔ ni kɛ he blemi dɛ nɛ ji dɛ nɛ a fɔ we.

³ Ejakaa Farisifo ɔmɛ kɛ Yudafo ɔmɛ tsuo ɔ, ja a kɛ nyu fɔ a dɛ saminya loko a yeɔ ni; (a peɔ enɛ ɔ) kɛ yeɔ nikɔtɔma amɛ a blema tsɔɔmi ɔmɛ a nɔ.

⁴ Nɛ ke a je jua nɔ kɛ ba a, ja a du loko a yeɔ ni. Nɛ ni kpahi fuu hu ngɛ nɛ a to ha mɛ nɛ a peɔ ngɛ kplu kɛ buɛhi kɛ ayawahi a he fɔmi he.

⁵ Lɔ ɔ he ɔ Farisifo ɔmɛ kɛ mlaa tsɔɔli ɔmɛ bi Yesu ke: “Mɛni he je nɛ o kaseli ɔmɛ yi nikɔtɔma amɛ a blema tsɔɔmi ɔmɛ anɔ nɛ a kɛ dɛ nɛ a fɔ we yeɔ ni ɔ?”

⁶ Se e he nɔ nɛ e de mɛ ke: “Niinɛ Yesaia gba ngɛ nyɛ osatotsɛmɛ nɛ ɔmɛ a he, kaa bɔ nɛ a ngma a ke: ‘Ma nɛ ɔ, a nya a kɛ puaa mi, se a tsui tsɛ e he kɛ je ye he kɛ ho lokoo ya.

⁷ Se yaka gu a jaa mi ɔ nɛ, ejakaa a tsɔɔ tsɔɔmihi nɛ ji nimli a kitahi.’ ”

⁸ “Mawu kita a lɛɛ nyɛ je he, nɛ nimli a blema tsɔɔmi ɔmɛ a nɔ nyɛ yeɔ.”

⁹ Nɛ e de mɛ ke: “Nyɛ pee saminya kaa nyɛ kua Mawu kita a konɛ nyɛɛ ye nyɛ blema tsɔɔmi ɔ nɔ.

¹⁰ Ejakaa Mose de ke: ‘Buu o tsɛ kɛ o nyɛ;’ kɛ: ‘Nɔ nɛ gbiɛɛ e tsɛ loo e nyɛ ɔ, a maa gbe lɛ!’

¹¹ Se nyɛɛ lɛɛ nyɛ ke: ‘Ke nɔ ko de e tsɛ loo e nyɛ ke: Nɔ́ nɛ jinɛ o ko na kɛ je ye dɛ mi ɔ, Korban’ (nɔ́ nɛ a kɛ ke Mawu) ɔ,

¹² lɛɛ nyɛ ha we nɛ e pee nɔ ko ha e tsɛ loo e nyɛ kulaa hu;

¹³ nɛ nyɛɛ kɛ nyɛ blema tsɔɔmi ɔmɛ nɛ nyɛ tsɔɔ ɔ gu Mawu munyu ɔ. Nɛ nihi nɛ ngɛ kaa enɛ ɔmɛ fuu nyɛ peɔ.”

Nihi nɛ bleɔ nɔmlɔ

¹⁴ Kɛkɛ nɛ Yesu tsɛ asafo ɔ tsuo kɛ ba e ngɔ nɛ e de mɛ ke: “Nyɛ tsuo nyɛɛ bu mi tue konɛ nyɛɛ nu sisi!

¹⁵ Nɔ́ ko nɔ́ ko be nɛ jee kpo nɔ blɔ sɛɛ nɔmlɔ mi nɛ ma nyɛ lɛ ma yble, se nɔ́ nɛ bleɔ nɔmlɔ ji nɔ́ nɛ jee e mi. [

¹⁶ Ke nɔ ko ngɛ tue nɛ e kɛ maa nu ɔ, e nu.]

¹⁷ Nɛ benɛ e je asafo ɔ ngɔ kɛ ba we mi ɔ, ekaseli ɔmɛ bi lɛ abɛ ɔ sisi.

¹⁸ E de mɛ ke: “Anɛ kikɛ nɛ ɔ nyɛ hu nyɛ nui nihi a sisi? Nyɛ nɛ kaa nɔ tsuaa nɔ nɛ jee kpo nɔ blɔ sɛɛ nɔmlɔ mi ɔ nyɛ we lɛ blemi,

¹⁹ ejakaa tsa pi e tsui mi nɛ e sɛɛ, se mohu e muklii mi e yaa, nɛ e ya jee kpo ngɛ agbotso mi.” (Yesu de enɛ ɔ kɛ tsɔɔ kaa) ngma tsuaa ngma he tsɔ.

²⁰ Nɛ e ya nɔ nɛ e de ke: “Nɔ́ nɛ jee nɔmlɔ mi ɔ, lɔ ɔ nɔuu lɛ bleɔ lɛ.

²¹ Ejakaa mi mi je nɛ ji nimli a tsui mi ɔ, lejɛ ɔ juɛmi yayahi jee: gba puɛmi, ajuama bɔmi, nɔ gbemi,

²² jumi, hɛ kɔmi, je mi yaya bami, sisimi, ya homi, ninye, musu bɔmi, he womi, kuasiahi a sane yemi —

²³ ni yaya nɛ ɔmɛ kulaa a, mi mi je a jee nɛ a kɛ bleɔ nɔmlɔ.”

Yo ko hemi kɛ yemi

²⁴ Nɛ Yesu si lejɛ ɔ nɛ e pue nɔ kɛ ho Tiro kɛ Zidon ni ɔmɛ a mi ya. E ya sɛ we ko mi, nɛ e sume kaa a le, se e nyɛ we e he nɛ e laa.

²⁵ E lejɛ ɔ sumi nɔuu kɛkɛ nɛ yo ko nɛ mumi yayami ngɛ e biyo wayoo ko mi ɔ nu e he nɛ e ba kpla si ngɛ e nane nya.

²⁶ Se yo ɔ, maje yo ji lɛ, nɛ he nɛ e je ji Foinike ngɛ Siria. E ba kpa Yesu pɛɛ nɛ e hia mumi yayami ɔ kɛ je e biyo ɔ mi.

²⁷ Se Yesu de lɛ ke: “Ha bimɛ ɔmɛ nɛ a tɔ lolo. E dɛ kaa a ngɔɔ bimɛ ɔmɛ abolo ɔ sakee pueɔ si ha gbe bimɛ.”

²⁸ Se yo ɔ he nɔ nɛ e ke: “Mawetsɛ e ngɛ mi ja mohu, se tse gbe bi ɔmɛ nɛ ngɛ okplɔɔ ɔ sisi ɔ hu yeɔ bimɛ ɔmɛ a bibli ɔ eko!”

²⁹ Yesu de lɛ ke: “O munyu nɛ ɔ he je ɔ, yaa! Mumi yayami ɔ je e mi.”

³⁰ Yo ɔ pue nɔ kɛ ho e we mi ya, nɛ e ya na e biyo ɔ nɛ fɔɔ si ngɛ sa nɔ nɛ mumi yayami ɔ je e mi.

Yesu tsa amuɛti tuekpokulɔ ko

³¹ Yesu kpale e se ekohu kɛ je Tiro kpo ɔmɛ a mi kɛ po mi ngɛ Zidon, nɛ e gu Dekapoli kpo ɔmɛ a mi kɛ ba Galilea Wo ɔ nya.

³² Nɛ ni komɛ kɛ tuekpokulɔ ko nɛ amuɛti hu ji lɛ ba e ngɔ, nɛ a kpa lɛ pɛɛ konɛ e ngɔ e ninehi ngɔ fɔ e nɔ.

³³ Nɛ Yesu kɛ lɛ je asafo ɔ kpɛti kɛ ya se, nɛ e kɛ e nine nguɛhi wo e tue puɔ ɔmɛ a mi, nɛ e la lada kɛ sa nyumu ɔ lilɛ he.

³⁴ Nɛ e hyɛ hiɔwe, nɛ e ye kɔmɔ ngɛ e mumi mi, nɛ e de amuɛti tuekpokulɔ ɔ ke: “Hefata!” e sisi ji: “Bli!”

³⁵ Nɛ amlɔ ɔ, e tue ɔmɛ bli, nɛ e lilɛ kpa amɛ pɛne, nɛ e nyɛ munyu tu pɛpɛɛpɛ.

³⁶ Nɛ Yesu wo mɛ si veveeve ke a ko de nɔ ko; se si abɔ nɛ e ngɛ mɛ si woe ɔ, si abɔ nɛ a ngɛ jajee ji kɔlɔ ɔ nɛ.

³⁷ Nɛ a nya kpɛ a he nitsɛ nitsɛ nɛ a de ke: “E pee nihi kulaa saminya! E ha tuekpokuli nuɔ nɔ, nɛ amuɛtihi hu tuɔ munyu.”