Marko 5 - Somi He Ɔ

Yesu tsa nyumu ko nɛ mumi yayami ngɛ e mi

¹ Kɛkɛ nɛ a ba Galilea Wo ɔ se ngɛ Gerasebi ɔmɛ a zugba a nɔ.

² Si nɛ Yesu kple pɛ kɛkɛ nɛ nyumu ko nɛ mumi yayami ngɛ e mi je yɔkɔ ɔmɛ a mi kɛ lɛ ba kpe.

³ Kikɛmɛ a nyumu nɛ ɔ, yɔkɔhi a mi e hii nɛ nɔ ko nyɛ we lɛ kɔsɔkɔsɔ nɛ e wo hu,

⁴ ejakaa a ka lɛ pã, nɛ a wo lɛ kɔsɔkɔsɔhi si abɔ, se be tsuaa be nɛ a maa wo lɛ ɔ, e tsɔɔ kɔsɔkɔsɔ ɔmɛ nɛ e kuɔ pa amɛ nɛ nɔ ko nɔ ko nyɛ we e he jɔɔmi:

⁵ nyɔ kɛ pia tsuo ɔ, yɔkɔ ɔmɛ kɛ yoku ɔmɛ a mi e hii, nɛ e kpaa ngmlaa, nɛ e kɛ tɛ poo e he.

⁶ Se benɛ e na Yesu ngɛ lokoo ɔ, e tu fo kɛ ba e ngɔ, nɛ e ba kpla si ngɛ e hɛ mi,

⁷ nɛ e kpa ngmlaa wawɛɛ ke: “Yesu, Mawu nɛ ngɛ hiɔwe lokoo ɔ bi, mɛni o ngɛ hlae ngɛ ye dɛ? I na Mawu kaa ko pii mi!”

⁸ (E de enɛ ɔ) ejakaa Yesu ke: “Jee nɔmlɔ nɛ ɔ mi, mo mumi yayami!”

⁹ Kɛkɛ nɛ Yesu bi lɛ ke: “O biɛ nɛɛ?” Nyumu ɔ he nɔ ke: “Ye biɛ ji Asafo, ejakaa wa he hiɛ!

¹⁰ Nɛ e kpa Yesu pɛɛ hluu ke e ko fie mɛ kɛ je lejɛ ɔ ni ɔmɛ a mi.

¹¹ Kpotoohi a kuu ngua ko ngɛ lejɛ ɔ ngɛ ni yee ngɛ yoku ɔ he.

¹² Nɛ mumi yayami ɔmɛ kpa Yesu pɛɛ ke: “Ha waa ya kpotoo ɔmɛ a kpɛti nɛ wa ya sɛ a mi.”

¹³ Nɛ e ngmɛ mɛ blɔ. Mumi yayami ɔmɛ je nyumu ɔ mi nɛ a ya sɛ kpotoo ɔmɛ a mi. Kuu ngua a tsuo, (maa pee akpe enyɔ) sa fo kɛ kple si kɛ ya pue wo ɔ mi nɛ a gbo.

¹⁴ Kɛkɛ nɛ kpotoo hyɛli ɔmɛ tu fo nɛ a ya sɛɛ ngɛ ma a mi kɛ ngmɔ ɔmɛ a si. Nɛ ni ɔmɛ je kpo ba hyɛ nɔ́ nɛ ba a.

¹⁵ A ba Yesu ngɔ nɛ a ba na nyumu nɛ jinɛ mumihi asafo ngɛ e mi ɔ nɛ e hii si nɛ e wo tade nɛ e hɛ mi tsɔ lɛ; nɛ e pee mɛ gbeye.

¹⁶ Nihi nɛ na a sɛɛ nɔ́ nɛ ba nyumu nɛ mumi yayamihi hi e mi ɔ nɔ ɔ kɛ kpotoo ɔmɛ a he sane ɔ ha mɛ.

¹⁷ Nɛ a kpa Yesu pɛɛ ke e je a kpo ɔmɛ a nɔ.

¹⁸ Nɛ benɛ Yesu ngɛ lɛ ɔ mi sɛe ɔ, nyumu nɛ jinɛ mumi yayami hi e mi ɔ kpa lɛ pɛɛ nɛ e ha e kɛ lɛ nɛ hi si.

¹⁹ Se Yesu kplɛɛ we; mohu e de lɛ ke: “Kpale o se nɛ o ya we mi kɛ o wekuli a ngɔ nɛ o ya sɛɛ ni nguahi nɛ Nyɔmtsɛ ɔ pee ha mo ɔ, kɛ mɔbɔ nɛ e na mo ɔ ha mɛ!”

²⁰ Lɔ ɔ he ɔ nyumu ɔ pue nɔ kɛ ho nɛ e ya bɔni ni nguahi nɛ Yesu pee ha lɛ ɔ fiɛmi ngɛ Deɔapoli (Ma Nyɔngma), nɛ e pee mɛ tsuo nyakpɛ.

Yairo bi yo ɔ kɛ yo nɛ ta Yesu tade he ɔ

²¹ Yesu kpale e se kɛ lɛ kɛ ya wo ɔ se, nɛ nihi babauu ba bu e he ngɛ wo ɔ nya.

²² Kɛkɛ nɛ kpe he ɔ nikɔtɔma amɛ a ti nɔ kake nɛ a tsɛɛ lɛ Yairo ɔ ba, nɛ benɛ e na Yesu ɔ, e kpla si ngɛ e nane nya,

²³ nɛ e fa kue ha lɛ wawɛɛ ke: “Ye biyo wayoo miɔ nɛ e ma gbo, he je ɔ ba nɛ o kɛ o ninehi ba pue e nɔ konɛ e na he wami nɛ e yi nɛ na wa.”

²⁴ Nɛ Yesu kɛ lɛ ho. Nihi, fuu kɛ lɛ nyɛɛ nɛ a fifia lɛ.

²⁵ Yo ko nɛ muɔ demi hiɔ hɛɛ lɛ jeha nyɔngma kɛ enyɔ ji nɛ ɔ,

²⁶ nɛ e na nɔ́ nitsɛ ngɛ tsopatsɛmɛ fuu a dɛ mi, nɛ e puɛ e dɛ mi nihi kulaa, se nɔ́ nane mi nɛ hiɔ ɔ ko fani ha lɛ ɔ, e nɔ mohu se e ngɛ puee ɔ,

²⁷ benɛ e nu Yesu he ɔ, e ba je e se je ngɛ ni ɔmɛ a kpɛti, nɛ e ta e tade ɔ he;

²⁸ ejakaa e ke: “Ke i na e tade ɔ he ta kɛkɛ ɔ, ye he maa wa mi.”

²⁹ E ta e tade ɔ he, nɛ amlɔ ɔ muɔ demi ɔ se po, nɛ e nu he ngɛ e he womi mi kaa a tsa e hiɔ ɔ.

³⁰ Nɛ amlɔ ɔ Yesu nu he ngɛ e mi kaa he wami ko je e mi, nɛ e plɛ e he ngɛ ni ɔmɛ a kpɛti nɛ e bi ke: “Mɛnɔ ta ye tade ɔ he ɔ?”

³¹ E kaseli ɔmɛ ha lɛ heto ke: “O ngɛ hyɛe kaa asafo ɔ ngɛ mo fifiae nɛ o pa ngɛ bie ke: Mɛnɔ ta ye he ɔ?”

³² Se Yesu bɔni e he hyemi kone e na nɔ nɛ pee ja a.

³³ Se akɛnɛ yo ɔ le nɔ́ nɛ a pee ha lɛ he je ɔ, e kɛ gbeye yemi kɛ he domi ba nɔ si ngɛ e hɛ mi, nɛ e de lɛ anɔkuale ɔ tsuo.

³⁴ Yesu de lɛ ke: “Biyo, o hemi kɛ yemi tsa mo; yaa ngɛ he jɔmi mi, nɛ o hiɔ ɔ nɛ jɔ.

³⁵ Benɛ Yesu ngɛ nɔ ngɛ munyu ɔ tue ɔ, Yairo we mi bi ɔmɛ a ti ni komɛ ba ba de lɛ ke: “O biyo ɔ gbo; mɛni he je o pa ngɛ tsɔɔlɔ ɔ nya dooe?”

³⁶ Se benɛ Yesu nu munyu nɛ a tu ɔ, e de Yairo ke: “Koo ye gbeye; he ye kɛkɛ!”

³⁷ Nɛ e ha we nɛ nɔ ko nɔ ko nɛ nyɛɛ e se, ja Petro kɛ Yakobo kɛ Yohane, Yakobo nyɛmi ɔ kɛkɛ.

³⁸ A ba Yairo we ɔ mi nɛ Yesu ba na hoo peemi kɛ nihi nɛ ngɛ ya foe nɛ ngɛ kɔmɔ yee fuu ɔ.

³⁹ Nɛ benɛ e sɛ we ɔ mi ɔ, e de mɛ ke: “Mɛni he je nɛ nyɛ ngɛ hoo pee nɛ nyɛ ngɛ ya foe kikɛ nɛ ɔ? Jokuɛ ɔ gbo we, mahɛ kɛkɛ e ngɛ hwɔe!”

⁴⁰ Nɛ a muɔ lɛ. Se lɛɛ e fie ni ɔmɛ tsuo kɛ je kpo, nɛ e ngɔ jokuɛ ɔ tsɛ kɛ e nyɛ kɛ nihi nɛ piɛ e he ɔ kɛ ho he nɛ jokuɛ ɔ hwɔɔ si ngɛ ɔ ya.

⁴¹ E nu e nine si nɛ e de lɛ ke: “Talita kuum!” E sisi ji; “Jokuɛyo, i ngɛ mo dee ke: Tee si!”

⁴² Nɛ amlɔ ɔ, jokuɛ ɔ te si nɛ e bɔni si slami; (e ye jeha nyɔngma kɛ enyɔ.) Nɛ ni ɔmɛ a nya kpɛ a he nitsɛnitsɛ.

⁴³ Se Yesu wo mɛ si veveeve ke a ko ha nɔ ko nɛ le enɔ; nɛ e fã ke a ha jokuɛ ɔ nɔ ko nɛ e ye.