Marko 3 - Somi He Ɔ

Nyumu nɛ nine kake gbo ɔ

¹ Nɛ Yesu ba kpe he ɔ ekohu. Nyumu ko ngɛ lejɛ ɔ nɛ e nine kake gbo.

² Ni komɛ ngɛ lejɛ ɔ nɛ ngɛ lɛ hwɔe kaa e ma tsa lɛ ngɛ Hejɔɔmi Ligbi ɔ nɔ lo, konɛ a ya po e nya.

³ Yesu de nɔ nɛ nine gbo ɔ ke: “Tee si nɛ o ba da kpɛti!”

⁴ Nɛ e bi ni ɔmɛ ke: “Anɛ e da kaa a peɔ kpakpa loo a peɔ yayami ngɛ Hejɔɔmi Ligbi ɔ nɔ, kaa a heɔ nɔmlɔ yi wami, aloo a gbee lɛ?” Se mɛɛ lɛɛ a pɛ̃ a nya mi.

⁵ Yesu kɛ abofu hyɛ a hɛ mi kɛ kpe; se lɛ be ɔ mi nɔuu ɔ, e dɔ lɛ kaa a tsui wa kikɛ; kɛkɛ nɛ e de nyumu ɔ ke: “Kpa o nine ɔ mi!” E kpa mi nɛ a tsa e nine ɔ.

⁶ Lɔ ɔ he ɔ Farisifo ɔmɛ je kpo, nɛ amlɔ ɔ a kɛ Herodebi ɔmɛ ya so e yi nɔ bɔ nɛ a maa pee ha nɛ a kpata e hɛ mi.

Asafo jiji ɔ ngɛ wo ɔ nya

⁷ Yesu kɛ e kaseli ɔmɛ sa a he si kɛ ho Galilea Wo ɔ nya ya, nɛ nimli asafo babauu nɛ je Galilea kɛ Yudea

⁸ kɛ Yerusalem kɛ Idumea zugba a nɔ kɛ Yordan se kɛ Tiro kɛ Zidon ni ɔmɛ a mi tsuo nyɛɛ e se. Nimli kpekpemi nɛ ɔ ba Yesu ngɔ ejakaa a nu nihi nɛ e ngɛ pee ɔmɛ a he.

⁹ Nimli ɔmɛ a hiemi he ɔ, Yesu de e kaseli ɔmɛ nɛ a dla lɛ ko ha lɛ, kone asafo ɔ ko fifia lɛ.

¹⁰ E tsa nihi fuu he je ɔ nihi nɛ hiɔhi hɛɛ mɛ tsuo bu kɛ ba e ngɔ kone a ba ta e he.

¹¹ Nɛ be tsuaa be nɛ mumi yayami ɔmɛ maa na lɛ ɔ, a tsɔɔ nɔɔ si ngɛ e hɛ mi nɛ a kpaa ngmlaa ke: “Mo ji Mawu Bi ɔ nɛ!”

¹² Nɛ Yesu bɔɔ mɛ kɔkɔ ke a ko je lɛ si.

Yesu hla kaseli nyɔngma kɛ enyɔ

¹³ Nɛ Yesu ya yoku ɔ nɔ nɛ e tsɛ nihi nɛ lɛ nitsɛ e ngɛ hlae ɔ, nɛ a ba e ngɔ.

¹⁴ Nɛ e hla a kpɛti ni nyɔngma kɛ enyɔ kone a kɛ lɛ ba hi si nɛ e tsɔ mɛ fiɛmi

¹⁵ nɛ a na he wami nɛ a kɛ hia mumi yayamihi.

¹⁶ Ni nyɔngma kɛ enyɔ nɛ e hla a ji nɛ ɔmɛ nɛ: Simon, nɔ nɛ e wo lɛ Petro ɔ;

¹⁷ Yakobo kɛ Yohane, Zebedeo bimɛ nyumu ɔmɛ nɛ e wo mɛ Boanerges (e sisi ji oslaba bimɛ) ɔ;

¹⁸ Andrea kɛ Filipo kɛ Bartolomeo kɛ Mateo kɛ Toma kɛ Yakobo, Alfeo bi ɔ, kɛ Tadeo kɛ Simon, ma he dɔlɔ ɔ,

¹⁹ kɛ Yuda Iskariot, nɔ nɛ tsɔɔ e se blɔ ɔ.

Yesu kɛ Beelzebul

²⁰ Jeha nɛ ɔ Yesu ba we mi. Nihi fuu ba bua a he nya ekohu bɔ nɛ lɛ kɛ e kaseli ɔmɛ na we a dɛ ha ni yemi po.

²¹ Benɛ e wekuli nu he ɔ, a ho konɛ a ya nu lɛ, ejakaa hihi ngɛ dee ke: “E yi mi ngɛ puɛe!”

²² Mlaa tsɔɔli komɛ nɛ je Yerusalem ba a ngɛ dee ke: “Beelzebul (mumi yayami) ngɛ e mi.” Ni kpa komɛ hu ke: “Mumi yayamihi a tsɛ ɔ he wami nya e kɛ hiaa mɛ ɔ nɛ.”

²³ Lɔ ɔ he ɔ Yesu tsɛ ni ɔmɛ kɛ ba e ngɔ nɛ e de mɛ ngɛ abɛhi a mi ke: “Kɛ Satan maa pee kɛ hia Satan kɛɛ?

²⁴ Ke ma ko gba wo lɛ nitsɛ e he ɔ, jamɛ a ma a be nyɛe si dami.

²⁵ Ke we ko gba wo lɛ nitsɛ e he ɔ, jamɛ a we ɔ be nyɛe si dami.

²⁶ Nɛ ke Satan te si wo lɛ nitsɛ e he nɛ e gba e mi ɔ, e be nyɛe si dami, se mohu e nyagbe ji kɔlɔ ɔ nɛ.

²⁷ Nɔ ko be nyɛe he walɔ ko we mi maa sɛ nɛ e ya ha e nihi, kaa ja e fi lɛ kekle, lɔ ɔ loko e ma nyɛ e we mi nihi maa ha.

²⁸ Nyɛ kadi enɛ ɔ faii kaa: A kɛ nimli a he yayamihi tsuo maa pa mɛ, kɛ musu bɔmi munyuhi kulaa nɛ a maa tu.

²⁹ Se nɔ nɛ tuɔ musu bɔmi munyu kɛ siɔ Mumi Klɔuklɔu ɔ, a kɛ be lɛ pae gblegbleegblee kɛ maa ya neneene, ejakaa e pee yayami nɛ a kɛ pɛ́.”

³⁰ (Yesu de enɛ ɔ ejakaa ni komɛ ke: “Mumi yayami ngɛ e mi.”)

Yesu nyɛ kɛ e nyɛmimɛ ɔmɛ

³¹ Kɛkɛ nɛ Yesu nyɛ kɛ e nyɛmimɛ ɔmɛ nɛ ba a ba da we ɔ se, nɛ a tsɔ kɛ ba e ngɔ nɛ a ba tsɛ lɛ.

³² Asafo ɔ hii si ngɛ e he, nɛ a de lɛ ke: “Oʼɛ, o nyɛ kɛ o nyɛmimɛ ɔmɛ daa si ngɛ we ɔ se ngɛ mo hlae.”

³³ Yesu he nɔ nɛ e de mɛ ke: “Mɛnɔ ji ye nyɛ, nɛ mɛnɔmɛ ji ye nyɛmimɛ ɔmɛ?”

³⁴ E hyɛ ninɛmɛ nɛ hii si ngɛ e he ɔmɛ a hɛ mi kɛ kpe, nɛ e ke: “Ne ye nyɛ kɛ ye nyɛmimɛ ɔmɛ!

³⁵ Ejakaa nɔ tsuaa nɔ nɛ peɔ Mawu suɔmi nya ni ɔ, lɛ nɔuu ji ye nyɛmi nyumu kɛ ye nyɛmi yo kɛ ye nyɛ.”