Marko 2 - Somi He Ɔ

Yesu tsa nɔ ko nɛ hule pue si

¹ Be bɔɔ ko se ɔ, Yesu kpale e se kɛ ba Kapernaum, nɛ a nu e he kaa e ngɛ we mi.

² Nihi fuu ba bua a he nya bɔ nɛ a nɛ́ blɔ ngɛ agbo ɔ nya tete. Benɛ Yesu ngɛ fiee kɛ ngɛ ni ɔmɛ tsɔɔe ɔ,

³ a kɛ nɔ ko nɛ hule pue si nɛ ni eywiɛ tloo lɛ ba.

⁴ Se asafo ɔ he ɔ, a nɛ blɔ nɛ a kɛ lɛ ba su Yesu ngɔ. Lɔ ɔ he ɔ, a ya hia tsu ɔ nɛ e ngɛ mi ɔ yi mi ngɛ he nɛ e ngɛ ɔ tutuutu, nɛ bene a gbu puɔ ɔ, a siu hiɔtsɛ ɔ kɛ sa nɛ e hwuɔɔ si ngɛ nɔ ɔ kɛ gu lejɛ ɔ.

⁵ Yesu na a hemi kɛ yemi ɔ hiemi nɛ e de hiɔtsɛ ɔ ke: “Ye bi, a ngɔ o he yayami ɔmɛ ngɔ ke mo!”

⁶ Se mlaa tsɔɔli komɛ nɛ hii si ngɛ lejɛ ɔ susu ngɛ a tsui mi ke:

⁷ “Mɛni e ngɛ dee nɛ ɔ? E ngɛ musu bɔe. Nɔ ko be nyɛe e kɛ yayami maa ke, kaa ja Mawu kɛkɛ.”

⁸ Amlɔ ɔ Yesu kpa a tsui mi susumi ɔ si, lɔ ɔ he ɔ e bi mɛ ke: “Mɛni he je nɛ nyɛ ngɛ ni nɛ ɔmɛ susue ngɛ nyɛ tsui mi?

⁹ Te e mi nɔ́ nɛ demi yee nɛɛ, kaa a ma de nɔ nɛ hule pue si ɔ ke: ‘A ngɔ o he yayami ɔmɛ ngɔ ke mo,’ loo kaa a ma de ke: ‘Tee si, wo o sa a nɛ o nyɛɛ?’ ɔ.

¹⁰ Ma tsɔɔ nyɛ jeha nɛ ɔ kaa Nɔmlɔ Bi ɔ ngɛ he blɔ ngɛ zugba a nɔ kaa e kɛ yayamihi kee.” Lɔ ɔ he ɔ e de hiɔtsɛ ɔ ke:

¹¹ “I ngɛ mo dee ke: Tee si, wo o sa a nɛ o ya we mi!”

¹² A ngɛ lɛ hyɛe nɔuu nɛ nyumu ɔ te si, e hlue e sa a, nɛ e je kpo. Mɛ tsuo a nya kpɛ a he, nɛ a je Mawu yi ke: “Wa nɛ́ enɛ ɔ eko gblee!”

Yesu tsɛ Levi

¹³ Yesu kpale e se ekohu kɛ ho Galilea Wo ɔ nya ya. Asafo ɔ tsuo ba e ngɔ, nɛ e bɔni mɛ ni tsɔɔmi.

¹⁴ Nɛ benɛ e bee ɔ, e na onia tsulɔ ko nɛ a tsɛɛ lɛ Levi nɛ ji Alfeo bi ɔ nɛ e hii si ngɛ e ni tsumi he ɔ. Yesu de lɛ ke: “Ba nyɛɛ ye se!” Levi te si nɛ e nyɛɛ e se.

¹⁵ Pee se ɔ, Yesu ngɛ ni yee ngɛ Levi we ɔ mi. Onia tsuli kɛ yayami peeli fuu hu nyɛɛ e se nɛ a piɛ e kaseli ɔmɛ a he kɛ ngɛ ni ɔ yee.

¹⁶ Mlaa tsɔɔli ɔmɛ ekomɛ nɛ ji Farisifo ɔmɛ na kaa Yesu kɛ kikɛmɛ a nimli nɛ ɔmɛ ngɛ ni yee; lɔ ɔ he ɔ, a bi e kaseli ɔmɛ ke: “Mɛni he je nɛ nyɛ nyɔmtsɛ ɔ kɛ onia tsuli kɛ yayami peeli ngɛ ni yee ngɛ nue nɛ ɔ?”

¹⁷ Yesu nu nɛ e ha mɛ heto ke: “Ninɛmɛ nɛ ngɛ he wami ɔ tsopatsɛ he hia we mɛ, se ninɛmɛ nɛ ngɛ gboe ɔ mohu. I bɛ́ dali a tsemi se mohu yayami peeli.”

Hwɔhami he sane

¹⁸ Ligbi ko ɔ, Yohane Baptisilɔ ɔ kaseli kɛ Farisifo ɔmɛ a kaseli ɔmɛ ngɛ hwɔ hae. Ni komɛ ba Yesu ngɔ ba bi lɛ ke: “Mɛni he je nɛ Yohane kɛ Farisifo ɔmɛ a kaseli ɔmɛ haa hwɔ, se o kaseli ɔmɛ lɛɛ a hɛ́ hwɔ ɔ?”

¹⁹ Yesu ha mɛ heto ke: “Anɛ nyɛ hyɛɛ blɔ kaa yo kpeemi he biali ɔmɛ, loo ayɛflo he nimli ɔmɛ maa ha hwɔ? Kusiɛ! Be abɔ nɛ ayɛflo huno ɔ kɛ mɛ ngɛ nɛ ɔ, a be hwɔ hae.

²⁰ Se be maa ba nɛ a maa ngɔ ayɛflo huno ɔ kɛ maa je a ngɔ; lɛ be ɔ loko a maa ha hwɔ.

²¹ “Nɔ ko ngɔɛ bo nya he kɛ ta we tade momo mi. Ke e pee ja a, bo nya he ɔ ma hia tade momo ɔ, nɛ e ma ha puɔ ɔ ma blii.

²² Jeha nɛ ɔ hu, nɔ ko ngɔɛ wai he ngɔ wui lohwe he womi tɔ momohi a mi. Ke e pee ja a, lɛɛ wai he ɔ ma pɛ lohwe he womi tɔ ɔmɛ, nɛ wai ɔ ma pue si, nɛ lohwe he womi tɔ ɔmɛ ma puɛ. Dɛbi! Wai he ɔ, lohwe he womi tɔ hehi a mi a kɛ woɔ!”

Hejɔɔmi Ligbi ɔ he sane

²³ E ba mi kaa Yesu ya gu blɛfo ngmɔ komɛ a mi Hejɔɔmi Ligbi ko nɔ. E kaseli ɔmɛ kɛ lɛ nyɛɛ, nɛ a bɔni blɛfo ɔ kpɔmi.

²⁴ Lɔ ɔ he ɔ Farisifo ɔmɛ de Yesu ke: “Hyɛ! Nɔ́ nɛ o kaseli ɔmɛ ngɛ pee ngɛ Hejɔɔmi Ligbi ɔ nɔ nɛ ɔ siɔ wa Mlaa a.”

²⁵ Yesu ha heto ke: “Anɛ nyɛ kane we nɔ́ nɛ David pe ligbi ko benɛ hwɔ ye lɛ nɛ e hia nɔ́ ko nɛ e ye ɔ; hwɔ ye lɛ kɛ nihi nɛ e kɛ nyɛɛ ɔ,

²⁶ lɔ ɔ he ɔ e sɛ Mawu we ɔ, nɛ e ya ye abolo nɛ a kɛ maa Mawu hɛ mi ɔ. Enɛ ɔ ba mi ngɛ osɔfo nɔkɔtɔma Abiatar yi nɔ. Ngɛ wa Mlaa a nya a, osɔfo ɔmɛ pɛ lɛ a ngɛ he blɔ nɛ a yeɔ abolo nɛ ɔ — se David ye eko nɛ e ha e ni ɔmɛ tete eko nɛ a ye.”

²⁷ Nɛ Yesu de mɛ ke: “Nɔmlɔ he nɛ a to Hejoɔɔmi Ligbi ɔ nɛ, se pi Hejɔɔmi Ligbi ɔ he nɛ a bɔ nɔmlɔ.

²⁸ Lɔ ɔ he ɔ, Hejɔɔmi Ligbi ɔ po Nyɔmtsɛ ji Nɔmlɔ Bi ɔ nɛ.”