Marko 16 - Somi He Ɔ

Yesu sitemi

¹ Nɛ benɛ Hejɔɔmi Ligbi ɔ be ɔ, Maria Magdalena kɛ Yakobo nyɛ Maria kɛ Salome ya he tsopa kɛ e he via konɛ a ba nɛ a kɛ ba kpa Yesu gbogboe ɔ.

² Nɛ otsi ɔ kekleekle ligbi ɔ nɔ mɔtu mla, pu si temi be ɔ, a ba muɔ ɔ nya.

³ Nɛ a bi a he ke: “Mɛnɔ ma kpɛne tɛ ɔ kɛ je muɔ ɔ nya ha wɔ?”

⁴ Se benɛ a yaa wo a hɛ nɔ ɔ, a na kaa a kpɛne tɛ ɔ kɛ ho se ya, ejakaa e kle saminya.

⁵ Nɛ benɛ a sɛ yɔkɔ ɔ mi ɔ, a na niheyo ko nɛ hii si ngɛ nɔ hiɛ ɔ nɔ je nɛ e wo tade hiɔ gagaaga; nɛ a hɛli si.

⁶ Se e de mɛ ke. “Nyɛ ko ye gbeye! Nyɛ ngɛ Yesu Nazareno nɛ a sɛu ɔ hlae; e te si, e be hiɛ ɔ; oʼɛ, he nɛ a kɛ lɛ fɔ ɔ ji nɛ ɔ nɛ!

⁷ Jeha nɛ ɔ nyɛɛ ya nɛ nyɛ ya de e kaseli ɔmɛ kɛ Petro, ke e ngɛ nyɛ hlami sɛe kɛ yaa Galilea; lejɛ ɔ nyɛ maa na lɛ ngɛ, kaa bɔ nɛ e de nyɛ ɔ.”

⁸ Nɛ a je kpo oya nɛ a tu fo kɛ je yɔkɔ ɔ he; a nu sawale nɛ a nya kpɛ a he; a de we nɔ ko nɔ́ ko, ejakaa a ngɛ gbeye yee. [

Yesu je e he kpo tsɔɔ Maria Magdalena

⁹ Benɛ Yesu te si mɔtu mla ngɛ otsi ɔ kekleekle ligbi ɔ nɔ ɔ, nɔ kekleekle nɛ e je e he kpo tsɔɔ ji Maria Magdalena, nɔ nɛ mi nɛ pe hia mumi yayamihi kpaago kɛ je ɔ.

¹⁰ Nɛ lɛ e ya nɛ e ya sɛɛ ngɔ ha nihi nɛ kɛ lɛ hi si nɛ a ngɛ kɔmɔ yee nɛ a ngɛ ya foe ɔ.

¹¹ Se mɛɛ lɛɛ, benɛ a nu kaa Yesu hɛ ngɛ nɛ e na lɛ ɔ, a he we lɛ yi.

Yesu je e he kpo tsɔɔ kaseli enyɔ

¹² Ni nɛ ɔmɛ a se ɔ, Yesu je e he kpo ngɛ su kpa mi tsɔɔ a ti ni enyɔ, benɛ a ngɛ si slae kɛ yaa ngmɔ si ɔ.

¹³ Ni nɛ ɔmɛ kpale a se kɛ ho ya de nihi nɛ piɛ ɔ, se a he we mɛ tete po yi.

Yesu je e he kpo tsɔɔ kaseli nyɔngma kɛ kake ɔ

¹⁴ Pee se ɔ e je e he kpo tsɔɔ ni nyɔngma kɛ kake ɔ nitsɛ, benɛ a hii si ngɛ niye ni he ɔ, nɛ e ka a hɛ mi ngɛ hemi nɛ a he we yi kɛ a tsui wami ɔ he, ejakaa a he we nihi nɛ na lɛ ngɛ e sitemi ɔ se ɔ yi.

¹⁵ Nɛ e de mɛ ke: “Nyɛɛ ya je ɔ tsuo kulaa mi nɛ nyɛ ya fiɛ Sane Kpakpa a ngɔ tsɔɔ nɔ tsuaa nɔ nɛ a bɔ ɔ.

¹⁶ Nɔ nɛ heɔ yeɔ nɛ a baptisi lɛ ɔ, a ma he e yi wami, se nɔ nɛ he we yi ɔ, a maa bu lɛ fɔ.

¹⁷ Se okadihi nɛ maa nyɛɛ ninɛmɛ nɛ heɔ yeɔ ɔmɛ a se ji nɛ ɔmɛ nɛ: Ye biɛ mi ɔ, sa maa hia mumi yayamihi; a maa tu munyu hehi;

¹⁸ a ma wo sinɔhi a nɔ; nɛ ke a nu nɔ́ ko nɛ gbee nɔ ɔ, e be mɛ yayami ko pee; a kɛ a ninehi ma pue hiɔtsɛmɛ a nɔ, nɛ a he maa wa mɛ.

Yesu hiɔweyami

¹⁹ Kɛkɛ ɔ, benɛ Mawetsɛ Yesu kɛ mɛ tu munyu se ɔ, a ngɔ lɛ kɛ ho hiɔwe ya nɛ we ya hi si ngɛ Mawu hiɛ ɔ nɔ.

²⁰ Kaseli ɔmɛ ho nɛ a ya fiɛ ngɛ he tsuaa he, nɛ Nyɔmtsɛ ɔ kɛ mɛ tsu ni, nɛ e wo munyu ɔ he wami kɛ okadihi nɛ piɛ he ɔ.] [ 9 Yi ɔmɛ ya Petro kɛ e huɛmɛ ɔmɛ a ngɔ nɛ a ya bɔ mɛ kpiti nihi kulaa nɛ a de mɛ ɔ. 10 Enɛ ɔ se ɔ, Yesu nitsɛ gu e kaseli ɔmɛ a nɔ ha nɛ munyu klɔuklɔu nɛ ngɛ daa nɛ haa neneene wami ɔ gbɛ fia kɛ je beleku kɛ ya si bonyoku.]