Marko 15 - Somi He Ɔ

Yesu ngɛ Pilato hɛ mi

¹ Mɔtu mla a, osɔfo nikɔtɔma amɛ kɛ ma nikɔtɔma amɛ kɛ mlaa tsɔɔli ɔmɛ kɛ gua ngua a tsuo ya da nɛ a fi Yesu nɛ a kpaka lɛ kɛ ya ha Pilato

² Nɛ Pilato bi lɛ ke: “Mo ji Yudafo ɔmɛ a matsɛ ɔ lo?” Nɛ e he nɔ nɛ e de lɛ ke: “Ja o de ɔ nɛ.”

³ Nɛ osɔfo nikɔtɔma amɛ po e nya fuu.

⁴ Lɔ ɔ he ɔ Pilato bi lɛ ekohu ke: “O be he nɔ́ ko dee lo? Hyɛ o nya sɔuu nɛ a ngɛ poe!”

⁵ Se Yesu de we nɔ ko hu, nɛ Pilato hɛ mi pee lɛ yaa.

A bu Yesu gbenɔ fɔ

⁶ Se daa ke e su nyami ligbi ɔ nɔ ɔ, e ngmɛɛ pamino kake nɛ a biɔ ɔ he haa mɛ.

⁷ Jamɛ a be ɔ mi ɔ, nɔ ko ngɛ nɛ a tsɛɛ lɛ Baraba nɛ a wo lɛ tsu mi kɛ atua tsɔli kpa komɛ nɛ gbe nɔmlɔ ngɛ atua tsɔmi ɔ mi.

⁸ Kɛkɛ nɛ asafo ɔ ba ba bɔni lɛ pɛɛ kpami ke e pee kaa bɔ nɛ e peɔ daa a ngɔ ha mɛ.

⁹ Se Pilato he nɔ nɛ e de mɛ ke: “Nyɛ suɔ kaa ma ngmɛɛ Yudafo ɔmɛ a matsɛ ɔ he ha nyɛ lo?”

¹⁰ Ejakaa e le kaa ninyɛ he je nɛ esɔfo nikɔtɔma amɛ nu lɛ kɛ ba ha lɛ ɔ nɛ.

¹¹ Se osɔfo nikɔtɔma amɛ wo aafo ɔ yi mi ke a ha e ngmɛɛ Baraba mohu he ngɔ ha mɛ.

¹² Nɛ Pilato he nɔ nɛ e de mɛ ekohu ke: “Lɛɛ mɛni nyɛ ngɛ hlae nɛ ma pee nɔ nɛ nyɛ tsɛɛ lɛ Yudafohi a matsɛ ɔ he mɔ?

¹³ Se a kpa huhui ekohu ke: “Sɛu lɛ!”

¹⁴ Nɛ Pelato bi mɛ ke: “Se mɛni yayami po e pee?” Se a kpa huhui wawɛɛ pe kekle ɔ ke: “Sɛu lɛ!”

¹⁵ Se akɛnɛ Pilato ngɛ hlae nɛ e sa asafo ɔ hɛ mi he je ɔ, e ngmɛɛ Baraba he ha mɛ; nɛ Yesu ɔ lɛɛ e fia lɛ kplibi, nɛ e ngɔ lɛ ha nɛ a ya sɛu lɛ.

Aslaafo ɔmɛ ye Yesu he fɛu

¹⁶ Nɛ aslaafo ɔmɛ kpaka Yesu kɛ ho amlaalo mɔ ɔ mi ya, nɛ a tsɛ aslaafohi asafo ɔ tsuo kɛ ba kpe.

¹⁷ Nɛ a wo lɛ tade tsu ko, nɛ a pee mio jlasi ko kɛ fi e yi.

¹⁸ Nɛ abɔni lɛ ngami kɛ: “Wa nga mo oo, Yudafohi a matsɛ.

¹⁹ Nɛ a kɛ paplo fia e yi kpɛti, nɛ a la lada ngɔ pue e nɔ, nɛ a kpla si nɛ a ja lɛ.

²⁰ Nɛ benɛ a ye e he fɛu se ɔ, a je e tade tsu ɔ ngɛ e he, nɛ a ngɔ lɛ nitsɛ e tade ɔmɛ ngɔ wo lɛ, nɛ a kpaka lɛ kɛ ho nɛ a ya sɛu lɛ.

Yesu sɛumi kɛ e gbenɔ

²¹ Nɛ aslaafo ɔmɛ nyɛ Simon Kireneno ko nɛ je ngmɔ si kɛ bee nɛ ji Aleksandro kɛ Rufo mɛ a tsɛ ɔ nɔ ke e wo Yesu sɛumi tso ɔ.

²² Nɛ a kpaka lɛ kɛ ya he ko nɛ a tsɛɛ lejɛ ɔ Golgota, e sisi ji Yikoklodonya.

²³ Nɛ a ha lɛ wai nɛ a kɛ mire (tsopa) futu mi ke e nu; se e kua.

²⁴ Nɛ benɛ a sɛu lɛ ɔ, a dla e tade ɔmɛ a mi, nɛ a fɔ nɔ sɔ, nɔ́ nɛ mo nɔ o maa ngɔ.

²⁵ Se mɔtu ngmlɛ nɛɛ mi a sɛu lɛ ɔ nɛ.

²⁶ Nɛ a ngma sane nɛ a kɛ fɔ e nɔ ɔ ngɛ e yi je ke: “Yudafo ɔmɛ a matsɛ ɔ”.

²⁷ Nɛ a sɛu awiyeli enyɔ piɛ e he, nɔ kake ngɛ e hiɛ ɔ nɔ nɛ nɔ kake ngɛ e muɔ nɔ.

²⁸ [Nɛ ngmami ɔ nɛ de ke: “Nɛ a bu lɛ ngɔ si yayami peeli a nɔ”] ɔ ba mi.

²⁹ Nɛ nihi nɛ bee ɔ tu musu bɔmi munyuhi kɛ si Yesu, nɛ a mimiɛ a yi nɛ a ke: “Ei, mo nɛ o kuɔ sɔlemi tsu nɛ okpaleɔ maa lɛ ligbi etɛ ɔ,

³⁰ jee seumi tso ɔ nɔ kɛ kple si nɛ o he mo nitsɛ o yi wami!”

³¹ Ja nɔuu osɔfo nikɔtɔma amɛ kɛ mlaa tsɔɔli ɔmɛ hu ye e he fɛu ngɛ a kpɛti ke: “E he ni kpahi a yi wami, se lɛ nitsɛ e nɔ ɔ lɛɛ e nyɛ we nɛ e he;

³² Kristo, Israel matsɛ ɔ, e je sɛumi tso ɔ nɔ kɛ kple si koo, konɛ waa na nɛ wa he ye!” Nɛ nihi nɛ a sɛu ngɔ piɛ e he ɔ hu ye e he fɛu.

³³ Nɛ benɛ su ngmlɛ nyɔngma kɛ enyɔ ɔ, diblii wo ngɛ zugba a tsuo nɔ kɛ ya si ngmlɛ etɛ mi.

³⁴ Nɛ ngmlɛ etɛ mi ɔ, Yesu kpa ngmlaa kɛ gbi wawɛɛ ke: “Eloi, Eloi, lama sabaktani?” E sisi ji: “Ye Mawu, Ye Mawu, mɛ he je nɛ o kua mi?”

³⁵ Nɛ benɛ nihi nɛ daa si ngɛ lejɛ ɔmɛ a ti ni komɛ nu ɔ, a ke: “Oʼɛ, e ngɛ Elia tsɛe.”

³⁶ Nɛ nɔ ko sa fo nɛ e ya ngɔ wosuma kɛ sɔ da nɛ kua mi, nɛ e kɛ ma paplo nya ha lɛ ke e nu nɛ e ke: “Nyɛ ha waa mlɛ nɛ waa hyɛ kaa Elia ma ba je lɛ lo?”

³⁷ Nɛ Yesu kpa ngmlaa wawɛɛ nɛ e ngɔ e nya.

³⁸ Nɛ sɔlemi tsu ɔ mi pomi bo ɔ mi gba kɛ je hiɔwe kɛ ba ma si.

³⁹ Se benɛ aslaafohi lafa a nyatsɛ ɔ nɛ daa si ngɛ e hanɔ ɔ na kaa e kpa ngmlaa kikɛ nɛ e ngɔ e nya a, e ke: “Niinɛ kaa kikɛmɛ a nɔmlɔ nɛ ɔ ɔ, Mawu bi ʼi!”

⁴⁰ Nɛ yi komɛ hu ngɛ lejɛ ɔ nɛ daa si ngɛ se banee ngɛ hyɛe; a ti ni komɛ ji Maria Magdalena, kɛ Maria, Yakobo wayo kɛ Yosemɛ a nyɛ ɔ, kɛ Salome,

⁴¹ nihi nɛ benɛ e ngɛ Galilea nɛ a nyɛɛ e se nɛ a sɔmɔɔ lɛ ɔ, kɛ yi kpa komɛ fuu nɛ kɛ lɛ ba Yerusalem ɔ.

Yesu pumi

⁴² Nɛ benɛ su gbɔkuɛ ɔ, akɛnɛ e ji he dlami ligbi nɛ nyɛɛ Hejɔɔmi Ligbi ɔ hɛ mi he ɔ,

⁴³ Yosef nɛ je Arimatia, nɛ ji gua ngua a mi nɔ ko nɛ ngɛ biɛ nɛ lɛ hu e ngɛ Mawu matsɛ yemi ɔ blɔ hyɛe ɔ, ba nɛ e kɛ kã pue nɔ kɛ ya Pilato ngɔ, nɛ e ya bi Yesu gbogboe ɔ.

⁴⁴ Se Pilato hɛ mi pee lɛ yaa kaa e gbo momo; nɛ e tsɛ aslaafohi lafa a yatse ɔ nɛ e bi lɛ ke e gbo kɛ lo?

⁴⁵ Nɛ benɛ e nu kɛ je aslaafohi lafa a nyatsɛ ɔ nya a, e kɛ gbogbo ɔ ke Yosef.

⁴⁶ Nɛ Yosef ya he kploba, nɛ e ba je lɛ kɛ kple si nɛ e kɛ kploba a ha e he, nɛ e kɛ lɛ ya fɔ yɔkɔ nɛ a kpɛ ngɛ tɛ sa mi ɔ mi, nɛ e kpɛne tɛ ko kɛ tsi muɔ ɔ nya.

⁴⁷ Nɛ Maria Magdalena kɛ Maria, Yose nyɛ ɔ ngɛ hyɛe he nɛ a kɛ lɛ fɔ ɔ.