Marko 13 - Somi He Ɔ

Sɔlemi we ɔ puemi he gbami

¹ Benɛ Yesu ngɛ kpo jee ngɛ sɔlemi we ɔ, e kaseli ɔmɛ a t inɔ kake de lɛ ke: “Tsɔɔlɔ, hyɛ tɛ komɛ a klemi kake kɛ tsuhi nɛ ngɛ nyakpɛ!”

² Nɛ Yesu he nɔ nɛ e de lɛ ke: “O ngɛ kikɛmɛ a tsu kpetekpleenyɛ nɛ ɔmɛ hyɛe? A be tɛ kake sie ngɛ eko nɔ nɛ a be tsitsɛɛe ngɔ fia si.”

Nɔnami kɛ yiwamihi

³ Nɛ bene e hii si ngɛ Nuyoku ɔ nɔ ngɛ sɔlemi we ɔ hanɔ ɔ, Petro kɛ Yakobo kɛ Yohane kɛ Andrea bi lɛ ngɛ se ke:

⁴ “Tsɔɔ wɔ be mi nɛ a maa pee ni nɛ ɔmɛ, nɛ ke ni nɛ ɔmɛ tsuo maa ba mi ɔ, mɛni ji a he okadi?”

⁵ Nɛ Yesu he nɔ nɛ e bɔni mɛ demi ke: “Nyɛɛ hyɛ saminya konɛ nɔ ko ko mlɔɔ nyɛ.

⁶ Nihi fuu maa ba ngɛ ye biɛ mi, nɛ a ma de ke: ‘Ami ji lɛ!’ nɛ a maa mlɔɔ nihi fuu.

⁷ Se ke nyɛ nu tahi kɛ ta sanehi a he ɔ, nyɛ ko hao, ejakaa ja a ba mi, se nyagbe ɔ sui lolo.

⁸ Ma maa te si ngɔ wo ma, nɛ matsɛ yemi maa te si ngɔ wo matsɛ yemi, nɛ zugba mimiɛmi maa ba ngɛ hehi slɔɔtohi, nɛ hwɔ maa ba. Enɛ ɔmɛ ji kɔɔmi ɔmɛ a sisi jemi.

⁹ “Se nyɛɛ lɛɛ nyɛɛ le nyɛ he nɔ hyemi, ejakaa a maa ngɔ nyɛ kɛ maa ya guahi a nɔ, nɛ a maa fia nyɛ kpa ngɛ kpe he ɔmɛ, nɛ a kɛ nyɛ maa da ganɔhi kɛ matsɛmɛ a hɛ mi ngɛ ye he, konɛ nyɛɛ ye odase ngɔ tsɔɔ mɛ.

¹⁰ Nɛ ja a fiɛ Sane Kpakpa a ngɔ tsɔɔ jejemawɛ tsuo lolo.

¹¹ Se ke a kpaka nyɛ kɛ ya ha a, nyɛ ko hao nyɛ he ngɔ to ngɛ nɔ́ nɛ nyɛ ma de he; se mohu nɔ́ nɛ a kɛ ma ha nyɛ ngɛ jamɛ a ngmlɛfia a nɔ ɔ, lɔ ɔ nyɛ de ɔ nɛ; ejakaa tsa pi nyɛ nɛ nyɛ ngɛ munyu ɔ tue ɔ, se mohu mumi Klɔuklɔu ɔ ʼi.

¹² Se nyɛmi maa ngɔ nyɛmi ngɔ ha gbenɔ, nɛ tsɛ hu kɛ bi ma ha; nɛ bimɛ maa te si ngɔ si a fɔli, nɛ a kɛ mɛ ma ha nɛ a gbe mɛ.

¹³ Nɛ nihi tsuo maa nyɛ nyɛ ngɛ ye biɛ ɔ he; se nɔ nɛ hɛɛ mi kɛ gbee nya a, a ma he e yi wami.”

Hehiami ngua a

¹⁴ “Se ke nyɛ na ma doku ninye ni ɔ kaa e maa si ngɛ he nɛ e sɛ kaa e maa a, (nɔ nɛ ngɛ kanee ɔ, e kɔ se,) lɔ ɔ lɛɛ nihi nɛ ngɛ Yudea a, a tu fo kɛ ya yoku ɔmɛ a nɔ;

¹⁵ nɛ nɔ nɛ ngɛ tsu yi mi ɔ, e ko kple si, aloo nɛ e sɛ we mi ya ngɔ nɔ́ ko;

¹⁶ nɛ nɔ nɛ ngɛ ngmɔ si ɔ, e ko kpale e se ba ngɔ e tade.

¹⁷ Se musu tloo yihi nɛ hɛɛ muklii kɛ ninɛmɛ nɛ ngɛ nyɔ hae ngɛ jamɛ a be ɔmɛ a mi.

¹⁸ Se nyɛɛ sɔle konɛ nyɛ fotumi ɔ nɛ ko ba ngɛ fiɛ be mi.

¹⁹ Se jamɛ a be ɔ mi ɔ, he hiami nɛ a nɛ́ e nɔ eko hyɛ kɛ je je nɛ Mawu bɔ ɔ sisije hluu kɛ ba su mwɔnɔmwɔnɔ maa ba, nɛ jeha nɛ ɔ hu a be e nɔ nae hu.

²⁰ Nɛ ja Nyɔmtsɛ ɔ po ligbi ɔmɛ a nɔ, ke pi jã a, lɛɛ a be he lo ko he lo ko yiwami hee; se nihi nɛ e hla amɛ a he ɔ, e po ligbi ɔmɛ a nɔ.

²¹ “Nɛ lɛ be ɔ mi ɔ, ke nɔ ko de nyɛ ke: ‘Hyɛ, Kristo ɔ ngɛ hiɛ ɔ!’ aloo ‘Hyɛ, e ngɛ lejɛ ɔ!’ ɔ, nyɛ ko he ye.

²² Ejakaa lakpa kristohi kɛ lakpa gbali maa te si nɛ a maa pee okadihi kɛ nyakpɛ nihi, konɛ, ke e maa hi ɔ, a mlɔɔ ninɛmɛ nɛ a hla a tete.

²³ Se Nyɛɛ lɛɛ nyɛɛ hyɛ saminya; i de nyɛ nɔ tsuaa nɔ ngɔ to.”

Nɔmlɔ Bi ɔ bami

²⁴ “Se jamɛ a be ɔmɛ a mi ɔ, ngɛ he hiami nɛ ɔ se ɔ, pu maa tsɔ diblii, nɛ nyɔhiɔ hu be kpee.

²⁵ Nɛ dodoehi ma tsɔ kɛ je hiɔwe ba fia si, nɛ a ma mimiɛ he wamihi nɛ ngɛ hiɔwe ɔ.

²⁶ Kɛkɛ ɔ, a maa na Nɔmlɔ Bi ɔ kaa e ma ngɛ bɔkuhi a mi kɛ he wami ngua kɛ nyami.

²⁷ Kɛkɛ ɔ, e maa tsɔ e bɔfo ɔmɛ nɛ a ma bua nihi nɛ e hla amɛ a nya kɛ maa je kɔɔhiɔ eywiɛ ɔmɛ a mi, kɛ je zugba nyagbe he kɛ ya si hiɔwe nyagbe he.”

Ngmɔkɔ tso ɔ he nikasemi

²⁸ “Nyɛɛ kase ngmɔkɔ tso ɔ he abɛ ɔ. Ke e su be nɛ e kɔni ɔmɛ tsɛ̃ nɛ e bɔ ba a, nyɛ le kaa latsa be ɔ su ta.

²⁹ Ja nɔuu nyɛ hu ke nyɛ na kaa kikɛmɛ a ni nɛ ɔmɛ ba mi ɔ, nyɛ na nɛ nyɛɛ le kaa be ɔ su agbohi a nya ta.

³⁰ Anɔkuale mi i ngɛ nyɛ dee ke, loko yi nɔ nɛ ɔ maa be ɔ, ja ni nɛ ɔmɛ tsuo ba mi lolo.

³¹ Hiɔwe kɛ zugba maa be kɛ ho, se ye munyu ɔmɛ be bee kɛ ho.”

Nɔ ko li ligbi ɔ lo ngmlɛfia a

³² Se jamɛ a ligbi ɔ loo ngmlɛfia a, nɔ ko li; hiɔwe bɔfo ɔmɛ li, nɛ Bi ɔ hu li, ja Tsɛ ɔ.

³³ Nyɛɛ hyɛ saminya, nyɛɛ fɔ nyɔ nɛ nyɛɛ sɔle, ejakaa nyɛ li be mi nɛ be ɔ maa su.

³⁴ E ngɛ kaa nyumu ko nɛ hia blɔ, nɛ e si e we, nɛ e ha e webi ɔmɛ he blɔ kɛ a ti nɔ tsuaa nɔ ni tsumi, nɛ e fã agbo nya hyɛlɔ ɔ ke e bu.

³⁵ Lɔ ɔ he ɔ, nyɛɛ huɔ, ejakaa nyɛ li be mi nɛ wetsɛ ɔ ma, eko ɔ gbɔkuɛ, nyɔ mi kpɛti, loo kungwɔ nɔ kpami be, loo mɔtu;

³⁶ konɛ e ko ba tlukaa nɛ e ba na nyɛ kaa nyɛ ngɛ mahɛ hwɔe.

³⁷ Nɔ́ nɛ i ngɛ nyɛ dee nɛ ɔ, nihi tsuo i ngɛ dee: Nyɛɛ huɔ!”