Marko 12 - Somi He Ɔ

Wai ngmɔ ɔ mi apaatsɛmɛ ɔmɛ a he abɛ ɔ

¹ Nɛ Yesu ya nɔ nɛ e kɛ mɛ tu munyu ngɛ abɛhi a mi ke: “Nyumu ko pee wai ngmɔ, nɛ e po piɛ wo he; e tsua wai tɛ muɔ, nɛ e ma mɔ ngɛ mi, nɛ e kɛ ha huli apaa yemi, nɛ e doma.

² Benɛ e su wai yiblii lami be ɔ, e tsɔ tsɔlɔ ko kɛ ya apaatsɛmɛ ɔmɛ a ngɔ, konɛ a ya ngɔ e blɔfami nɔ ngɛ a dɛ kɛ ba.

³ Se a nu tsɔlɔ ɔ nɛ a fia lɛ kpa, nɛ a wo lɛ blɔ kɛ e dɛ gu.

⁴ E kpale tsɔ tsɔlɔ kpa ko hu kɛ ya a ngɔ; nɛ a ywia e yi nɛ a pue e hɛ mi si.

⁵ Jeha nɛ ɔ hu e tsɔ nɔ kpa ko ekohu nɛ lɛɛ a gbe lɛ; kɛ ni kpa komɛ hulɔ; a fia ni komɛ kpa, nɛ a gbe ni komɛ.

⁶ Jeha nɛ ɔ e ngɛ nɔ kake nɛ piɛ, e binyumu nɛ e suɔ. Nyagbe ɔ, e tsɔ lɛ a ngɔ nɛ e ke: ‘A ma gbo ye bi ɔ zo.’

⁷ Se kikɛmɛ a paatsɛmɛ nɛ ɔmɛ de a he ke: Ni yelɔ ɔ ji nɛ ɔ nɛ; nyɛ ha waa gbe lɛ, nɛ gbo si ni ɔmɛ maa pee wa nɔ.

⁸ Nɛ a nu lɛ nɛ a gbe lɛ, nɛ a wo lɛ kɛ je wai ngmɔ ɔ mi sake fɔ he.

⁹ “Lɔ ɔ he je ɔ, mɛni wai ngmɔtsɛ ɔ maa pee? E maa ba kpata apaatsɛmɛ ɔmɛ a hɛ mi, nɛ e kɛ wai ngmɔ ɔ ma ha ni kpa komɛ.

¹⁰ Anɛ nyɛ kane we kikɛmɛ a ngmami nɛ ɔ: ‘Tɛ ɔ nɛ tsu fiali ɔmɛ kua a, Kɔlɔ ɔ nɔuu lɛ plɛ kɔ nya tɛ

¹¹ Nyɔmtsɛ ɔ dɛ mi enɛ ɔ je, Nɛ e ngɛ nyakpɛ ngɛ wa hɛngmɛ mi?’ ”

¹² Yudafo ɔmɛ a nikɔtɔma amɛ ngɛ lɛ hlae nɛ a nu, ejakaa a le kaa a he nɛ e bu kikɛmɛ a abɛ nɛ ɔ nɛ, se a ngɛ asafo ɔ gbeye yee. Nɛ a si lɛ nɛ a je.

Oniatsumi he sanebimi

¹³ Nɛ a tsɔ Farisifo ɔmɛ kɛ Herodebi ɔmɛ a ti ni komɛ kɛ ba Yesu ngɔ konɛ a ba da lɛ ngɛ munyu tutui mi.

¹⁴ Nɛ benɛ a ba a, a ba de lɛ ke: “Tsɔɔlɔ, wa le kaa anɔkualetsɛ ji mo, nɛ o yi nɔ hɛ mi munyu tumi gbeye, ejakaa o hyɛ we nimli a hɛ mi, mohu o tsɔɔ Mawu blɔ ɔ ngɛ anɔkuale mi. Anɛ e da blɔ kaa a tsuɔ onia haa Kaisare aloo e dɛ? Wa ha aloo wa ko ha?”

¹⁵ Se nɛ e na a osato peemi ɔ, e de mɛ ke: “Mɛni he je nɛ nyɛ ngɛ mi kae? Nyɛɛ kɛ sika ko nɛ ba nɛ ma hyɛ.”

¹⁶ Nɛ a kɛ ba. Nɛ e bi mɛ ke: “Mɛnɔ foni ji nɛ ɔ, nɛ mɛnɔ biɛ a ngma ngɛ nɔ ɔ?” A de lɛ ke: “Kaisare nɔ ʼi.”

¹⁷ Nɛ Yesu he nɔ nɛ e de mɛ ke: “Nyɛɛ kɛ Kaisare nihi nɛ ha Kaisare, nɛ nyɛɛ kɛ Mawu nihi nɛ ha Mawu.” Nɛ e he pee mɛ nyakpɛ kɛ be nɔ.

Ni gbogboehi a sitemi he sanebimi

¹⁸ Nɛ Sadukifohi nɛ deɔ ke ni gboggboehi a si temi ko be hu ba e ngɔ nɛ a ba bi lɛ ke:

¹⁹ “Tsɔɔlɔ, Mose ngma ha wɔ ke: ‘Ke nɔ ko nyɛmi gbo nɛ e si e yo nɛ e si we bi ɔ́, e nyɛmi ɔ nɛ ngɔ e yo ɔ nɛ e fɔ bimɛ ngɔ ha e nyɛmi ɔ.’

²⁰ Jeha nɛ ɔ, nyɛmimɛ kpaago hi si, nɛ nɔkɔtɔma a ngɔ yo, nɛ e gbo nɛ e si we bi.

²¹ Nɔ nɛ ji enyɔ ɔ hu ngɔ yo ɔ, nɛ e gbo, nɛ lɛ hu e si we bi ko ngɛ e se; nɛ nɔ nɛ ji etɛ ɔ hu ja nɔuu kɛ.

²² Ni kpaago ɔ tsuo kɛ yo ɔ hi si, nɛ a si we bimɛ ngɛ a se. Nɛ mɛ tsuo a se ɔ, yo ɔ hu ba gbo.

²³ Lɔ ɔ ni gbogboehi a sitemi ɔ mi, benɛ a maa te si ɔ, a ti mɛnɔ yo e maa pee, ejakaa ni kpaago ɔ tsuo kɛ lɛ hi si?”

²⁴ Yesu he nɔ nɛ e de mɛ ke: “Anɛ pi ngmami ɔ kɛ Mawu he wami nɛ nyɛ li ɔ he nɛ nyɛ ngɛ tɔe nɛ ɔ lo?

²⁵ Ejakaa benɛ a maa te si kɛ maa je gbeje ɔ, a be yo ngɔe nɛ pohu a be gbae; se mohu a ma plɛ kaa hiɔwe bɔfohi.

²⁶ Se kaa ni gbogboehi maa te si ekohu ɔ, anɛ nyɛ kane we ngɛ Mose womi ɔ mi, bɔ nɛ Mawu de lɛ ngɛ mio tso ɔ he sane ɔ mi ke: ‘Imi lɛɛ, Abraham Mawu kɛ Isak Mawu kɛ Yakob Mawu ji mi’ ɔ?

²⁷ Enɛ tsɔɔ kaa, Mawu ɔ pi ni gbogboehi a Mawu ji lɛ, se hɛkali a Mawu ji lɛ. Nyɛ ngɛ tɔe babauu.”

Kita ngua a

²⁸ Nɛ mlaa tsɔɔli ɔmɛ a ti nɔ kake nɛ nu kaa a ngɛ lɛ sanehi, bie ɔ hu ba, nɛ benɛ e na kaa Yesu ha mɛ heto saminya a e bi lɛ ke: “Te nɔ nɛ ji kita amɛ kulaa a ti kekleekle nɔ́ hu?”

²⁹ Yesu he lɛ nɔ ke: “Kekleekle nɔ ji: ‘Bu tue, Israel, Nyɔmtsɛ wa Mawu ɔ, lɛ ji Nyɔmtsɛ kake,

³⁰ nɛ suɔ Nyɔmtsɛ o Mawu ɔ kɛ o tsui tsuo kɛ o klaa tsuo kɛ o juɛmi tsuo!’

³¹ Kita nɛ ji enyɔ ɔ ji: Suɔ o nyɛmi nɔmlɔ kaa mo nitsɛ o he.’ Kita ko be nɛ pe enɛ ɔmɛ.”

³² Mlaa tsɔɔlɔ ɔ de lɛ ke: “Saminya, tsɔɔlɔ; o tu anɔkuale kaa Mawu kake pɛ lɛ ngɛ, nɛ nɔ kpa ko be, ja lɛ kɛkɛ ɔ;

³³ kaa o maa suɔ Mawu kɛ o tsui tsuo kɛ o juɛmi tsuo kɛ o klaa tsuo kɛ o he wami tsuo kɛ o nyɛmi nɔmlɔ kaa mo nitsɛ o he ɔ, e pe sami bɔhi kɛ bɔhi tsuo kulaa.”

³⁴ Nɛ benɛ Yesu na kaa e ha lɛ heto ngɛ ni lemi nya a, e de lɛ ke: “O kɛ Mawu matsɛ yemi ɔ kpɛti kɛ we.” Enɛ ɔ se ɔ, nɔ ko kɛ́ lɛ sane ko bimi hu.

Mesia a he sanebimi

³⁵ Nɛ benɛ Yesu ngɛ ni tsɔɔe ngɛ sɔlemi we ɔ, e wo e nya nɔ nɛ e bi ke: “Kɛ pee kɛɛ nɛ mlaa tsɔɔli ɔmɛ deɔ ke Kristo ɔ David bi ji lɛ ɔ?

³⁶ Ejakaa David nitsɛ de ngɛ Mumi Klɔuklɔu ɔ nya ke: ‘Nyɔmtsɛ ɔ de ye Nyɔmtsɛ ɔ ke: Hii ye hiɛ ɔ nɔ, Kɛ yaa su be nɛ ma ngɔ o henyɛli ɔmɛ ngɔ pee o nane si sɛ.’

³⁷ Ke David nitsɛ tsɛɛ lɛ Nyɔmitsɛ ɔ, lɛɛ kɛ pee kɛɛ nɛ e ji e bi mɔ?” Nɛ nihi fuu bu lɛ tue kɛ bua jɔmi.

Yesu bɔ kɔkɔ ngɛ mlaatsɔɔli ɔmɛ a he

³⁸ Nɛ Yesu de mɛ ngɛ e ni tsɔɔmi ɔ mi ke: “Nyɛɛ hyɛ nɛ hi ngɛ mlaa tsɔɔli nɛ suɔ tade wuyawuya womi kɛ si slami kɛ jua nɔ ngami ɔmɛ a he.

³⁹ Ninɛmɛ nɛ suɔ nikɔtɔmahi a sihi hehi ngɛ kpe he, kɛ okplɔɔ yi himi ngɛ niyeni si,

⁴⁰ nɛ mii yalɔyi a wehi, nɛ he tsɔɔmi he ɔ a sɔlee sɔlemi gagaagahi. Ni nɛ ɔmɛ a fɔbu maa pe nine.”

Yalɔyo ɔ onia a

⁴¹ Nɛ Yesu ya hi sikato he ɔ hanɔ, nɛ e ngɛ hyɛe bɔ nɛ ni ɔmɛ kɛ sika ngɛ daka a mi woe ɔ. Nɛ niatsɛmɛ babauu kɛ fuu ba wo mi.

⁴² Nɛ yalɔyo ko hu ba nɛ e kɛ kaplɛ enyɔ nɛ sui pɛsɛwa ba wo mi.

⁴³ Nɛ Yesu tsɛ e kaseli ɔmɛ kɛ ba nɛ e de mɛ ke: “I ngɛ nyɛ dee anɔkuale mi ke: “Kikɛmɛ a yalɔyo ohiafo nɛ ɔ kɛ fuu ba wo mi pe ni ɔmɛ tsuo nɛ kɛ eko ba wo daka a mi ɔ.

⁴⁴ Ejakaa ni ɔmɛ tsuo ɔ, nɔ́ nɛ a na nɛ be nɔ ɔ eko a kɛ ba wo mi; se nɔ nɛ ɔ lɛɛ, nɔ́ nɛ e ngɛ ngɛ e hia mi nɛ e kɛ ngɛ e he lɛɛ ɔ tsuo e kɛ ba wo mi nɛ ɔ nɛ.”