Marko 10 - Somi He Ɔ

Gbamipomi he nitsɔɔmi

¹ Kɛkɛ nɛ Yesu si lejɛ ɔ nɛ e pue nɔ kɛ ho Yudea ni ɔmɛ a mi kɛ Yordan se blɔ ya. Nihi fuu ba ba bua a he nya ekohu ngɛ e he, nɛ e tsɔɔ mɛ ni ekohu kaa bɔ nɛ e pɔɔ peemi ɔ.

² Nɛ Farisifo ɔmɛ ekomɛ ba e ngɔ, nɛ a da lɛ nɛ a bi lɛ ke: “Anɛ wa Mlaa a ngmɛɛ blɔ kaa nyumu fieɔ e yo lo?”

³ Se e he nɔ nɛ e bi mɛ ke: “Mɛni kita Mose wo nyɛ ɔ?”

⁴ A ke: “Mose ha he blɔ kaa a ngma hemi womi nɛ a fie lɛ.”

⁵ Yesu de mɛ ke: “Nyɛ tsui wami he je nɛ Mose ngma kita nɛ ɔ ha nyɛ ɔ nɛ;

⁶ se kɛ je je mi bɔmi sisije ɔ, nyumu kɛ yo Mawu bɔ.

⁷ Enɛ ɔ he je ɔ, nyumu ma si e tsɛ kɛ e nyɛ, nɛ e maa pɛtɛ e yo he, nɛ mɛ ni enyɔ ɔ tsuo a maa pee he lo kake;

⁸ lɛɛ jeha nɛ ɔ ɔ, a pi ni enyɔ hu, se he lo kake.

⁹ Lɔ ɔ he ɔ, nɔ́ nɛ Mawu ngɔ tsa a, a ko ha nɔmlɔ nɛ gba mi.”

¹⁰ Nɛ benɛ a su we ɔ mi ɔ, e kaseli ɔmɛ bi lɛ jamɛ a sane ɔ nɔuu ekohu.

¹¹ Nɛ e de mɛ ke: “Nɔ tsuaa nɔ nɛ fieɔ e yo nɛ e ya ngɔɔ nɔ kpa a, e puɛ gba.

¹² Nɛ ke yo kua e huno nɛ e ya gba nɔ kpa a, e puɛ gba.”

Yesu gbaa jokuɛwi

¹³ Nɛ ni komɛ ngɔ jokuɛ tsɔwi kɛ ba Yesu ngɔ konɛ e ta a he; se kaseli ɔmɛ wo a hɛ la.

¹⁴ Se benɛ Yesu na a, e tsui fia, nɛ e de e kaseli ɔmɛ ke: “Nyɛ ha jokuɛ ɔmɛ nɛ a ba ye ngɔ, nɛ nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ ji Mawu matsɛ yemi ɔ nɛ.

¹⁵ Niinɛ, i ngɛ nyɛ dee ke: Nɔ tsuaa nɔ nɛ he we Mawu matsɛ yemi ɔ kaa jokuɛ nyafii ɔ, e be mi sɛe kulaa.”

¹⁶ Nɛ e fua mɛ atuu, nɛ e ngɔ e ninehi ngɔ pue a nɔ, nɛ e gbaa mɛ.

Nyumu niatsɛ ɔ

¹⁷ Nɛ benɛ e je kpo kɛ ma blɔ ɔ nɔ ɔ, nɔ ko sa fo kɛ ba na lɛ nɛ e ba kpla si ngɛ e hɛ mi, nɛ e bi lɛ ke: “Tsɔɔlɔ kpakpa, mɛni ma pee nɛ ma na neneene wami?”

¹⁸ Nɛ Yesu bi lɛ ke: “Mɛni he je o ngɛ mi tsɛe ke nɔ kpakpa? Nɔ kpakpa ko be kaa ja Mawu nɔ kake.

¹⁹ Tse o le kita amɛ: ‘Koo gbe nɔmlɔ, ko puɛ gba, koo ju, koo ye lakpa odase, koo sisi nɔ, buu o tsɛ kɛ o nyɛ!’ ”

²⁰ Se nyumu ɔ he nɔ nɛ e de lɛ ke: “Tsɔɔlɔ, i ye enɛ ɔmɛ tsuo a nɔ kɛ je ye jokuɛwi a si.”

²¹ Nɛ Yesu hyɛ lɛ nɛ e tsui nu lɛ, nɛ e de lɛ ke: “E piɛ mo nɔ́ kake. Yaa nɛ o ya jua niki tsuo nɛ o ngɛ ɔ nɛ o kɛ ha ohiafohi, nɛ o ma na juetli ngɛ hiɔwe; nɛ o ba nɛ o ba nyɛɛ ye se.”

²² Se nyumu ɔ hɛ mi tsake ngɛ munyu ɔ he, nɛ e pue nɔ kɛ ho kɛ dɔmi, ejakaa e ngɛ nihi fuu.

²³ Yesu hyɛ e he kɛ kpe, nɛ e de e kaseli ɔmɛ ke: “Nyɛ na bɔ nɛ e wa ha niatsɛmɛ kaa a maa sɛ Mawu matsɛ yemi ɔ mi!”

²⁴ Kaseli ɔmɛ a he mi po ngɛ e munyu ɔmɛ a he. Se Yesu tsa nɔ nɛ e de mɛ ke: “Bimɛ, tse nyɛ na bɔ nɛ e wa ha nihi nɛ ngɔɔ a hɛ ngɔ fɔɔ a nihi a nɔ ɔ kaa a maa sɛ Mawu matsɛ yemi ɔ mi!

²⁵ E wɛ́ hi afukpɔngɔ kaa e maa gu abui hɛngmɛ mi kaa bɔ nɛ e waa haa niatsɛ kaa e maa sɛ Mawu matsɛ yemi ɔ mi ɔ.”

²⁶ A he mi po saminya, nɛ a bi a he ke: “Lɛɛ mɛnɔ yi wami a ma nyɛ ma he mɔ?”

²⁷ Nɛ Yesu hyɛ mɛ nɛ e ke: “Nimli a blɔfami ɔ a be nyɛe maa pee, se pi ngɛ Mawu blɔfami; ejakaa Mawu blɔfami ɔ lɛɛ a nyɛɔ nihi kulaa peɔ.”

²⁸ Kɛkɛ nɛ Petro je nya ke: “Hyɛ, wɔɔ lɛɛ wa si nihi tsuo kulaa nɛ wa ba nyɛɛ o se.”

²⁹ Yesu ke: “Niinɛ, i ngɛ nyɛ dee ke: Nɔ ko be nɛ e si we loo nyɛmimɛ nyumuhi loo nyɛmimɛ yihi loo tsɛ loo nyɛ loo yo loo bimɛ loo zugbahi ngɛ imi kɛ sane kpakpa a he,

³⁰ nɛ e be wehi kɛ nyɛmimɛ nyumuhi kɛ nyɛmimɛ yihi kɛ nyɛmɛ kɛ bimɛ kɛ zugbahi kɛ yi wami hu totoe lafa nae ngɛ be nɛ ɔ mi lokoo kɛ neneene wami hulɔ ngɛ je nɛ maa ba a mi.

³¹ Se kekletsɛmɛ fuu maa pee se kpɛli, nɛ se kpɛli maa pee kekletsɛmɛ.”

Yesu tu e gbenɔ he munyu nɔ́ nɛ ji si etɛ

³² Jeha nɛ ɔ a ngɛ blɔ nɔ kɛ yaa Yerusalem, nɛ Yesu nyɛɛ a hɛ mi; kaseli ɔmɛ a he nua si mɛ, nɛ ninɛmɛ nɛ nyɛɛ se ɔ ngɛ gbeye yee. Nɛ e ngɔ ni nyɔngma kɛ enyɔ ɔ ekohu kɛ ya se nɛ e bɔni mɛ nɔ́ nɛ maa ba e nɔ ɔ demi ke:

³³ “Oʼɛ, wa yaa Yerusalem, nɛ a maa ngɔ Nɔmlɔ Bi ɔ ngɔ wo osɔfo nikɔtɔma amɛ kɛ mlaa tsɔɔli ɔmɛ a dɛ mi, nɛ a maa bu lɛ gbenɔ fɔ, nɛ a maa ngɔ lɛ ngɔ ha majeli ɔmɛ;

³⁴ ni nɛ ɔmɛ maa ye e he fɛu, nɛ a maa la lada ngɔ pue e nɔ, nɛ a maa fia lɛ kplibi, nɛ a maa gbe lɛ; nɛ ligbi etɛ se ɔ, e maa te si ekohu.”

Yakobo kɛ Yohane nibimi ɔ

³⁵ Nɛ Yakobo kɛ Yohane, Zebedeo bimɛ ɔmɛ, ba Yesu ngɔ ba de lɛ ke: “Tsɔɔlɔ, wa maa suɔ nɛ o pee nɔ́ ko ha wɔ.”

³⁶ Nɛ e bi mɛ ke: “Mɛni nyɛ suɔ kaa ma pee ha nyɛ?”

³⁷ a de lɛ ke: “Ha wɔ he blɔ konɛ wa ti nɔ kake nɛ hi o hiɛ ɔ nɔ, nɛ nɔ kake hu nɛ hi o muɔ nɔ ngɛ o nyami ɔ mi.”

³⁸ Yesu de mɛ ke: “Nyɛ li nɔ́ nɛ nyɛ ngɛ bie ɔ; anɛ nyɛ ma nyɛ ɛye kplu ɔ nɛ ma nu ɛ maa nu, aloo nyɛ ma nyɛ nɛ a baptisi nyɛ kɛ baptisimi nɛ a kɛ maa baptisi mi ɔ lo?”

³⁹ Nɛ a ke: “Wa ma nyɛ.” Se Yesu de mɛ ke: “Kplu ɔ nɛ ma nu ɔ nyɛ ma nyɛ maa nu, nɛ baptisimi nɛ a kɛ maa baptisi mi ɔ a kɛ maa baptisi nyɛ lɛɛ,

⁴⁰ se ye hiɛ ɔ nɔ kɛ ye muɔ nɔ himi ɔ, pi ye nɔ nɛ i kɛ haa, se mohu nihi nɛ a dla to ha amɛ a nɔ ʼi.”

⁴¹ Benɛ ni nyɔngma a nu ɔ, a muklii mi fu Yakobo kɛ Yohane.

⁴² Lɔ ɔ he ɔ Yesu tsɛ mɛ kɛ ba e ngɔ, nɛ e de mɛ ke: “Nyɛ le kaa nihi nɛ a buu mɛ ma amɛ a nɔ yeli ɔ yeɔ a nɔ kaa nyɔmtsɛmɛ, nɛ a kpɛti nimli ngua amɛ ngɛ a nɔ he wami.

⁴³ Se nyɛɛ lɛɛ nyɛ blɔ be jã; se mohu nɔ tsuaa nɔ nɛ hlaa nɛ e pee nɔmlɔ ngua ngɛ nyɛ kpɛti ɔ e pee e he nyɛ sɔmɔlɔ;

⁴⁴ nɛ nɔ nɛ hlaa nɛ e pee nɔkɔtɔma ngɛ nyɛ kpɛti ɔ, e pee e he ni ɔmɛ a tsɔlɔ.

⁴⁵ Ejakaa Nɔmlɔ Bi ɔ hu bɛ́ nɛ a sɔmɔ lɛ, se mohu e ba sɔmɔ konɛ e ngɔ e klaa ngɔ ha kaa kpɔmi nɔ ngɛ nihi fuu a he.”

Yesu tsa Bartimeo hɛyuyuilɔ ɔ

⁴⁶ Nɛ a ba Yeriko, nɛ benɛ Yesu kɛ e kaseli ɔmɛ kɛ asafo gidiglɛmɛ je lejɛ ɔ kɛ yaa a, Bartimeo, hɛyuyuilɔ ɔ nɛ ji Timeo bi ɔ, hii si ngɛ gbɛjegbɛ ɔ tue ngɛ nɔ bae.

⁴⁷ Nɛ benɛ e nu kaa Yesu Nazareno ɔ ʼi ɔ, e bɔni ngmlaa kpami ke: “Yesu David, bi naa mi mɔbɔ!”

⁴⁸ Nihi fuu ke e yi ke e pee kɔ. Se e kpa ngmlaa wawɛɛ mohu pe kekle ɔ ke: “David bi, naa mi mɔbɔ!”

⁴⁹ Yesu da si, nɛ e ke: “Nye tsɛ lɛ kɛ ba!” Nɛ a tsɛ hɛyuyuilɔ ɔ, nɛ a de lɛ ke: “Na tsui, tee si, e ngɛ mo tsɛe!”

⁵⁰ Nɛ e sake e tade nɔha a ngɔ fɔ he, nɛ e te si pam, nɛ e ba Yesu ngɔ.

⁵¹ Yesu bi lɛ ke: “Mɛni o ngɛ hlae kaa ma pee ha mo?” Nɛ hɛyuyuilɔ ɔ de lɛ ke: “Rabuni, (Nyɔmtsɛ) i ngɛ hlae nɛ ma hyɛ nɔ ekohu.”

⁵² Nɛ Yesu de lɛ ke: “Yaa, o hemi kɛ yemi tsa mo!” Nɛ amlɔ ɔ nɔuu ɔ, e hyɛ nɔ ekohu, nɛ e nyɛɛ Yesu se ngɛ blɔ ɔ nɔ.