Luka 7 - Somi He Ɔ

Yesu tsa Roma aslaafohi lafa a nyatsɛ ko wenyumu

¹ Benɛ Yesu tu munyu ɔmɛ tsuo ngɔ wo ma a tue mi se ɔ, e sɛ Kapernaum.

² Jeha nɛ ɔ Roma aslaafohi lafa a nyatsɛ ko wenyumu nɛ e suɔ saminya ngɛ hiɔ nue nɛ e miɔ nɛ e ma gbo.

³ Nɛ benɛ e nu Yesu he ɔ, e tsɔ Yudafo ɔmɛ a nikɔtɔmahi komɛ kɛ ba e ngɔ nɛ a bakpa lɛ pɛɛ ke e ba nɛ e ba tsa e wenyumu ɔ.

⁴ Benɛ a ba Yesu ngɔ ɔ, a kpa lɛ pɛɛ wawɛɛ ke: “Nɔ nɛ o maa pee enɛ ɔ ngɔ ha a, e sa lɛ;

⁵ ejakaa e suɔ wa ma a, nɛ kpe he ɔ, lɛ nɔuu lɛ e ma ha wɔ.”

⁶ Nɛ Yesu kɛ mɛ ho. Nɛ benɛ e piɛ bɔɔ nɛ e maa su we ɔ mi ɔ, aslaafohi lafa a nyatsɛ ɔ tsɔ e huɛmɛ kɛ ba e ngɔ nɛ a ba de lɛ ke: “Nyɔmtsɛ, koo hao o he, ejakaa i sɛ nɔ nɛ o sɛɛ e kue mi;

⁷ lɔ ɔ he hu nɛ i bui ye he kaa e sa mi kaa i baa o ngɔ ɔ nɛ, se mohu tu munyu kɛkɛ nɛ a ma tsa ye wenyumu ɔ.

⁸ Ejakaa imi po nɛ i ji nɔmlɔ nɛ a yeɔ e nɔ ɔ, i ngɛ aslaafohi ngɛ ye sisi, nɛ ke i de nɔ nɛ ɔ ke: ‘Yaa’ a, e yaa; nɛ ke i de nɔ kpa hu ke: ‘Ba’ a, e baa; nɛ ke i de ye tsɔlɔ ke: ‘Pee enɛ ɔ’ ɔ, e peɔ.”

⁹ Se benɛ Yesu nu ni nɛ ɔmɛ ɔ, e hɛ mi pee lɛ yaa, nɛ e plɛ̃ e he nɛ e de asafo nɛ nyɛɛ e he ɔ ke: “I ngɛ nyɛ dee ke, Israel mi tete po i nɛ hemi kɛ yemi nɛ kle kaa enɛ ɔ lolo.”

¹⁰ Nɛ benɛ tsɔli ɔmɛ kpale a se kɛ ba we ɔ mi ɔ, a ba na e wenyumu ɔ nɛ e na hewami.

Yesu tle yalɔyo ko bi nyumu ko si

¹¹ Nɛ je na nɔ ɔ, e ba mi kaa Yesu pue nɔ kɛ ho ma ko nɛ a tsɛɛ Nain ɔ mi ya, nɛ e kaseli ɔmɛ a ti nihi fuu kɛ asafo babauu kɛ lɛ nyɛɛ.

¹² Nɛ benɛ e su ma a agbo ɔ nyɛ tã a, oʼɛ a tloo nɔ gbogboe ko kɛ ngɛ kpo jee nɛ e nyɛ bi kake pɛ ji lɛ, nɛ yalɔyo ji yo ɔ, nɛ ma a mi bihi fuu piɛ e he.

¹³ Nɛ benɛ Nyɔmtsɛ ɔ na lɛ ɔ, e mi mi sa lɛ ngɛ e he, nɛ e de lɛ ke “Ko fo ya!”

¹⁴ Nɛ e ba nɛ e ba pɛtɛ daka a he nɛ nihi nɛ tloo ɔ da si. Nɛ Yesu ke: “Niheyo, i ngɛ mo de ke: Tee si!”

¹⁵ Nɛ nɔ nɛ gbo ɔ te si hi si, nɛ e bɔni munyu tumi; nɛ e ngɔ lɛ ha e nyɛ.

¹⁶ Nɛ gbeye nu mɛ tsuo, nɛ a wo Mawu hɛ mi nyami ke: “Gbalɔ kpetekpleenyɛ te si ngɛ wa kpɛti, nɛ Mawu ba slaa e ma a.”

¹⁷ Nɛ Yesu he sane nɔ jije ngɛ Yudea kɛ lejɛ ɔ ni ɔmɛ a mi tsuo.

Tsɔli nɛ je Yohane Baptisilɔ ɔ ngɔ ɔ

¹⁸ Nɛ Yohane kaseli ɔmɛ ya sɛɛ ni nɛ ɔmɛ tsuo ha lɛ, nɛ Yohane tsɛ e kaseli ɔmɛ a ti ni enyɔ,

¹⁹ nɛ e tsɔ mɛ Yesu ngɔ ke: “Mo ji nɔ nɛ ma a, aloo waa hyɛ nɔ kpa blɔ?”

²⁰ Se benɛ nyumu ɔmɛ ba Yesu ngɔ ɔ, a ke: “Yohane Baptisilɔ ɔ tsɔ wɔ o ngɔ ke: ‘Anɛ mo ji nɔ nɛ ma a, aloo waa hyɛ nɔ kpa blɔ’ ”

²¹ Lɛ ngmlɛfia a nɔ nɔuu ɔ, e tsa nihi fuu a hiɔhi kɛ a hehiamihi kɛ mumi yayamihi, nɛ nihi fuu hu nɛ hɛ̃ yu ɔ, e ha a hyɛ nɔ.

²² Nɛ Yesu ha tsɔli ɔmɛ heto ke: “Nyɛɛ ya nɛ nyɛ ya sɛɛ ha Yohane nihi nɛ nyɛ na nɛ nyɛ nu ɔ, kaa hɛyuyuili ngɛ nɔ hyɛe, nihi nɛ hule ngɛ nyɛɛe, tsitsɛmɛ a he ngɛ tsɔe, tuekpokuli ngɛ nɔ nuɛ, ni gbogboehi ngɛ si tee, nɛ a ngɛ Sane Kpakpa a fiɛe kɛ ngɛ ohiafohi tsɔɔe;

²³ nɛ a gbaa nɔ nɛ ye he sane be e nane kpatae ɔ.

²⁴ Benɛ Yohane tsɔli ɔmɛ je se ɔ, Yesu bɔni Yohane he munyu tumi kɛ asafo ɔmɛ tsɔɔmi ke: “Mɛni nyɛ je kpo ya hyɛ ngɛ ngɛ a nɔ ɔ? Glã nɛ kɔɔhiɔ ngɛ mimiɛe lo?

²⁵ Aloo mɛni hyɛmi ya nyɛ ho? Nɔmlɔ nɛ woɔ tade bɔdɔɔ? oʼɛ, nihi nɛ woɔ tade nɛ ngɛ fɛo nɛ a yeɔ ni kpakpahi ɔ, matsɛmɛ a wehi a mi a hii

²⁶ Aloo mɛni hyɛmi ya nyɛ ho? Gbalɔ lo? Ee, i ngɛ nyɛ de ke, nɔ nɛ pa gbalɔ tete.

²⁷ Nɔ nɛ ɔ he ji bɔ nɛ a ngma ngɛ ke: ‘Oʼɛ i ngɛ ye tsɔlɔ ɔ tsɔe kɛ sɛ o hlami, nɔ nɛ ma dla o blɔ ɔ ngɔ to mo ɔ.’

²⁸ I ngɛ nyɛ dee ke: Nihi nɛ yihi fɔ ɔmɛ a kpɛti ɔ, gbalɔ ko be nɛ pã Yohane; se nɔ nɛ ji nyafii ngɛ Mawu matsɛyemi ɔ mi ɔ pã lɛ.”

²⁹ Nɛ ma a tsuo nɛ nu ɔ kɛ onia tsuli ɔmɛ bu Mawu bemi akɛnɛ a kɛ Yohane Baptisilɔ ɔ baptisimi ɔ baptisi mɛ ɔ.

³⁰ Se Farisifo ɔmɛ kɛ mlaatsɔɔli ɔmɛ kua Mawu yi mi tomi nɛ e ngɛ ngɛ a he ɔ, akɛnɛ a ha we nɛ Yohane nɛ baptisi mɛ ɔ.

³¹ “Jeha nɛ ɔ mɛni he ma ngɔ kikɛmɛ a yinɔbi nɛ ɔmɛ ngɔ to mɔ, nɛ a ngɛ kaa mɛni?

³² A ngɛ kaa jokuɛwi nɛ hii si ngɛ jua nɔ, nɛ a ngɛ a sibi tsɛe ngɛ dee ke: ‘Wa kpã bɛ ha nyɛ, nɛ nyɛ dui; wa je ya ha nyɛ, nɛ nyɛ fo we.’

³³ Ejakaa Yohane, baptisilɔ ɔ ba, nɛ e yi abolo, nɛ e nui wai, nɛ nyɛ ke: ‘Mumi yayami ngɛ e mi.’

³⁴ Nɔmlɔ Bi ɔ ba nɛ e yeɔ ni nɛ e nuu nɔ́ ko, nɛ nyɛ ke: ‘Oʼɛ, nyumu jiklɔɔtsɛ kɛ danulɔ, onia tsuli kɛ yayami peeli a huɛ;’

³⁵ Nɛ a bu Mawu ni lemi ɔ bemi ngɛ e bimɛ ɔmɛ tsuo a nya.”

Yesu ngɛ Simon Farisifono ɔ we ɔ mi

³⁶ Nɛ Farisifono ko tsɛ lɛ konɛ e kɛ lɛ ba ye ni. Nɛ e ya Farisifono ɔ we ɔ mi, nɛ e ya hi si ngɛ niyeni ɔ he.

³⁷ Nɛ oʼɛ, yo ko nɛ ji yayami peelɔ ngɛ ma a mi ɔ, benɛ e na le kaa e ngɛ ni yee ngɛ Farisifono ɔ we ɔ mi ɔ, e hɛɛ alabastro tɔ kɛ e mi tsopa kɛ e he via kɛ ba.

³⁸ Nɛ e ba da Yesu nane he ngɛ e se je, nɛ e fo ya, nɛ vo nyu ɔ pue e nane ɔmɛ a nɔ, nɛ e kɛ e yi bwɔmi tsu, nɛ e fiɔ e nane ɔmɛ a he, nɛ e kɛ tsopa kɛ e he via a kpa he.

³⁹ Se benɛ Farisifono ɔ nɛ tsɛ Yesu ni yemi ɔ na a, e de ngɛ e mi ke: “Nɔmlɔ nɛ ɔ gbalɔ ji lɛ jinɛ e maa le nɔ́ nɔmlɔ kɛ nɔ́ yo nɛ ngɛ e he tae nɛ ɔ kaa yayami peelɔ ji lɛ.”

⁴⁰ Yesu he nɔ nɛ e de lɛ ke: “Simon, i ngɛ sane ko nɛ ma de mo.” Nɛ Simon ke: “Tsɔɔlɔ, de!”

⁴¹ “Ni fliilɔ ko ngɛ hiɔtsɛmɛ enyɔ; nɔ kake hɛɛ lɛ cedi lafa enuɔ, nɛ nɔ kake hu nyingmi enuɔ.

⁴² Se akɛnɛ a be nɔ́ ko nɛ a kɛ maa wo ɔ, e ngɔ ke mɛ ni enyɔ ɔ tsuo. A ti mɛnɔ lɛ maa suɔ lɛ wawɛɛ?”

⁴³ Simon ha heto ke: “I susu kaa nɔ nɛ e ngɔ fuu ngɔ ke ɔ.” Nɛ Yesu de lɛ ke: “O bua he saminya.”

⁴⁴ Kɛkɛ nɛ e plɛ e hɛ mi ha yo ɔ, nɛ e de Simon ke: “O ngɛ kikɛmɛ a yo nɛ ɔ hyɛe? I ba sɛ o we ɔ mi nɛ ɔ, o hi mi nyu nɛ ma kɛ fɔ ye nane he, se yo nɛ ɔ kɛ vo nyu fɔ ye nane he, nɛ e kɛ e yi bwɔmi tsu.

⁴⁵ Ye nya hu o fiɔ we he; se kikɛmɛ a yo nɛ ɔ, kɛ je nɛ i ba nɛ ɔ tsuo nɛ ɔ ɔ, e jɔɔ we ye nane he fiɔmi.

⁴⁶ Nu hu o kɛ kpa we ye yi mi; se kikɛmɛ a yo nɛ ɔ ngɔ tsopa kɛ e he via kɛ kpa ye nane he.

⁴⁷ Lɔ ɔ he ɔ, i ngɛ mo dee ke: E he yayamihi nɛ hiɛ ɔ, a kɛ pa lɛ, ejakaa e suɔmi ɔ kle, se nɔ nɛ a ngɔ nyafii ngɔ pa a, e suɔmi ɔ klee we.”

⁴⁸ Kɛkɛ nɛ Yesu de yo ɔ ke: “A ngɔ o he yayami ɔmɛ ngɔ pa mo!”

⁴⁹ Kɛkɛ nɛ nihi nɛ kɛ lɛ hii si ngɛ niyemi ɔ si ɔ bɔni demi ngɛ a yi mi ke: “Mɛnɔ po ji nɛ ɔ nɛ e ngɔɔ yayami ngɔ paa nɛ ɔ?”

⁵⁰ Se Yesu de yo ɔ ke: “O hemi kɛ yemi ɔ he o yiwami, yaa ngɛ hejɔmi mi!”