Luka 6 - Somi He Ɔ

Hejɔɔmi ligbi ɔ he sane

¹ Hejɔɔmi Ligbi ko nɔ ɔ, Yesu ya gu blɛfo ngmɔhi a mi nɛ e kaseli ɔmɛ sake blɛfo tso mumu ɔ nɛ a hlue nɛ a kpe.

² Farisifo ɔmɛ ekomɛ bi mɛ ke: “Mɛni he je nyɛ ngɛ nɔ́ nɛ e dɛ blɔ kaa a peɔ ngɛ Hejɔɔmi Ligbi ɔ nɔ pee nɛ ɔ?”

³ Nɛ Yesu ha mɛ heto ke: “Anɛ nyɛ kane we nɔ nɛ David pee, benɛ hwɔ ye lɛ kɛ nihi nɛ piɛ e he ɔ,

⁴ bɔ nɛ e sɛ Mawu we ɔ nɛ e ya kukuɔ abolo nɛ a kɛ maa Mawu hɛ mi nɛ e dɛ blɔ kaa a yeɔ kaa ja osɔfo ɔmɛ kɛkɛ ɔ, nɛ e ye nɛ e kɛ e ko ha nihi nɛ piɛ e he ɔ hulɔ ɔ?”

⁵ Nɛ e de mɛ ke: “Hejɔɔmi Ligbi ɔ tete nyɔmtsɛ ji Nɔmlɔ Bi ɔ nɛ.”

Nyumu nɛ nine kake gbo ɔ

⁶ Jeha nɔ, Hejɔɔmi Ligbi kpa ko hu nɔ ɔ, Yesu ya kpe he ɔ nɛ e ya tsɔɔ ni. Nɛ nyumu ko ngɛ lejɛ ɔ nɛ e hiɛ ɔ nine gbo.

⁷ Se Mlaatsɔɔli ɔmɛ kɛ Farisifo ɔmɛ huɔ lɛ kaa e ma tsa hiɔ ngɛ Hejɔɔmi Ligbi ɔ nɔ lo, konɛ a na nɔ́ ko nɛ a da nɔ kɛ ya po e nyɛ.

⁸ Se Yesu le a susumi ɔmɛ nɛ e de nyumu nɛ nine gbo ɔ ke: “Tee si ba da kpɛti!” Nɛ e te si ba da si.

⁹ Kɛkɛ nɛ Yesu de mɛ ke: “Ma bi nyɛ nɔ́ ko; anɛ e da blɔ ngɛ Hejɔɔmi Ligbi ɔ nɔ kaa a peɔ kpakpa loo yayami, kaa a heɔ nɔ yiwami loo a kpataa e hɛ mi?”

¹⁰ Nɛ e hyɛ mɛ tsuo a hɛ mi kɛ kpe, nɛ e de nyumu ɔ ke: “Kpa o nine ɔ mi!” E pee ja, nɛ a tsa e nine ɔ.

¹¹ Se mɛɛ lɛɛ a gli nɛ a bɔni Yesu he ga tomi bɔ nɛ a maa pee lɛ ha.

Yesu hla bɔfohi nyɔngma kɛ enyɔ

¹² Jeha nɛ ɔ, e ba mi ngɛ jamɛ a be ɔmi kaa Yesu pue nɔ kɛ ho yoku ɔ nɔ ya nɛ e ya sɔle, nɛ e fɔ nyɔ kɛ sɔle kɛ tsɛ Mawu.

¹³ Nɛ benɛ je na a, e tsɛ e kaseli ɔmɛ kɛ ba e ngɔ nɛ e hla a kpɛti ni nyɔngma kɛ enyɔ, ninɛmɛ nɛ e tsɛ mɛ bɔfohi hulɔ ɔ:

¹⁴ Simon nɔ nɛ e wo lɛ Petro hulɔ ɔ, kɛ e nyɛmi Andrea; Yakobo kɛ Yohane, Filipo kɛ Bartolomeo;

¹⁵ Mateo kɛ Toma; Yakobo, Alfeo bi ɔ, kɛ Simon, nɔ nɛ a tsɛɛ Zelote (Hɛdɔlɔ) ɔ;

¹⁶ Yuda, Yakobo nyɛmi ɔ, kɛ Yuda Iskariot, nɔ nɛ ba plɛ seblɔtsɔɔlɔ ɔ.

Yesu tsɔɔ ni nɛ e tsa nihi

¹⁷ Nɛ Yesu kɛ mɛ kple si kɛ ba, nɛ a ba da he ko gbajaa kɛ e kaseli asafo ɔ, kɛ nihi fuu nɛ je Yudea tsuo kɛ Yerusalem kɛ Tiro kɛ Zidon wo nya ma amɛ a mi nɛ ma lɛ tue bumi kɛ a hiɔhi a tsami ɔ,

¹⁸ kɛ nihi nɛ mumi yayamihi ngɛ mɛ haoe ɔ, nɛ e tsa mɛ.

¹⁹ Nɛ asafo mluku ɔ tsuo ngɛ hlae nɛ a ta e he, ejakaa hewami ngɛ e mi jee kɛ ngɛ mɛ tsuo tsae.

Buajɔmi kɛ kɔmɔyemi

²⁰ Kɛkɛ nɛ Yesu plɛ e hɛ ngɔ tsɔɔ e kaseli ɔmɛ nɛ e ke: “A gbaa nyɛ, ohiafo ɔmɛ; ejakaa nyɛ nɔ́ ji Mawu matsɛyemi ɔ nɛ.

²¹ “A gbaa nyɛ nihi nɛ hwɔ ngɛ nyɛ yee amlɔ nɛ ɔ; ejakaa a ma ha nyɛ maa tɔ. “A gba nyɛ nihi nɛ nyɛ ngɛ ya foe amlɔ nɛ ɔ; ejakaa nyɛ maa muɔ.

²² “A gbaa nyɛ, ke nihi nyɛ nyɛ, nɛ a kɛ nyɛ po tako mi, nɛ a jɛ nyɛ, nɛ a po nyɛ biɛ mi kaa biɛ yaya ngɛ Nɔmlɔ Bi ɔ he ɔ.

²³ Nyɛ nya ngɛ jamɛ a ligbi ɔ nɔ nɛ nyɛɛ tuu kɛ buajɔmi ejakaa oʼɛ, nyɛ hiɔwo ngɛ hiɔwe; ejakaa ja nɔuu a tsɛmɛ ɔmɛ pee gbali ɔmɛ.

²⁴ “Se nyɛ niatsɛmɛ ɔmɛ ɔ, musu tloo nyɛ; ejaka nyɛ na nyɛ buawomi momo.’

²⁵ “Musu tloo nyɛ, nyɛ nihi nɛ nyɛ tɔ amlɔ nɛ ɔ; ejakaa hwɔ maa ye nyɛ. Musu tloo nyɛ, nyɛ nihi nɛ nyɛ ngɛ muɔe amlɔ nɛ ɔ; ejakaa nyɛ maa ye kɔmɔ nɛ nyɛ ma fo ya.

²⁶ “Musu tloo nyɛ ke nihi tsuo tu nyɛ he munyu kpakpa a, ejakaa ja nɔuu a tsɛmɛ ɔmɛ pee lakpa gbali ɔmɛ!”

Henyɛli a suɔmi

²⁷ “Se nyɛ nihi nɛ nyɛ ngɛ tue bue nɛ ɔ, i ngɛ nyɛ dee ke: Nyɛɛ suɔ nyɛ henyɛli; nyɛɛ pee nihi nɛ nyɛɛ nyɛ ɔ kpakpa.

²⁸ Nyɛɛ gbaa nihi nɛ gbiɛɛ nyɛ; nyɛɛ sɔle ha nihi nɛ waa nyɛ yi mi.

²⁹ Nɔ nɛ ma gba o tue kake mi ma a, plɛ kake ɔ hu ngɔ ha lɛ; nɛ nɔ nɛ ma kpɔ o nɔ bɔ ɔ, koo nyɛ lɛ o gugue tade ɔ hu he.

³⁰ Nɔ tsuaa nɔ nɛ baa mo nɔ́ ko ɔ, ha lɛ; nɛ nɔ nɛ ma kpɔ o nihi ɔ, ko bi lɛ hu.

³¹ Nɛ bɔ nɛ nyɛ hlaa kaa nihi nɛ pee ngɔ ha nyɛ ɔ, nyɛ hu nyɛɛ pee ja nɔuu ngɔ ha mɛ.

³² “Nɛ ke nyɛ suɔ nihi nɛ suɔ nyɛ ɔ, mɛni sina nyɛ ngɛ? Ejakaa yayami peeli hu suɔ nihi nɛ suɔ mɛ.

³³ Nɛ ke nyɛ peɔ kpakpa ha nihi nɛ peɔ nyɛ kpakpa a, mɛni sina nyɛ ngɛ? Ejakaa yayami peeli hu peɔ ja nɔuu.

³⁴ Nɛ ke nyɛɛ kɛ nihi pa nihi nɛ nyɛ hɛ ngɛ nɔ kaa a ma ha nyɛ ekohu ɔ, mɛni sina nyɛ ngɛ? Ejakaa yayami peeli hu kɛ nihi paa yayami peeli konɛ a na ja bɔ nɔuu.

³⁵ Mohu nyɛɛ suɔ nyɛ henyɛli, nɛ nyɛɛ pee kpakpa nɛ nyɛɛ pa nɛ nyɛ ko hyɛ nɔ́ ko blɔ kulaa, nɛ nyɛ hiɔwo maa hiɛ, nɛ nyɛ ma plɛ Hiɔweno ɔ bimɛ, ejakaa e muklii mi jɔɔ haa tlumuhi kɛ nimli yayamihi.

³⁶ Nyɛɛ na mɔbɔ, kaa bɔ nɛ Nyɛ Tsɛ ɔ hu naa mɔbɔ ɔ.”

Kojomi yaya

³⁷ “Nyɛ ko kojo konɛ a ko kojo nyɛ; nyɛ ko bu fɔ, konɛ a ko bu nyɛ fɔ; nyɛ kɛ pa, nɛ a kɛ maa pa nyɛ.

³⁸ Nyɛ ha, nɛ a ma ha nyɛ; susumi nɔ́ kpakpa nɛ a nyɛ nɔ nɛ a mimiɛ nɛ e hyi kɛ be nɔ nihi ma ngɔ pue nyɛ tɛ nɔ; ejakaa susumi nɔ́ nɛ nyɛɛ kɛ susuu ɔ, lɔɔ a maa kpale ngɔ susu ha nyɛ.”

³⁹ Nɛ Yesu bu mɛ abɛ ko hu ke: “Anɛ hɛyuyuilɔ ma nyɛ tsɔɔ hɛyuyuilɔ blɔ lo? Anɛ pi muɔ mi nɛ mɛ ni enyɔ ɔ tsuo a maa ya nɔ?

⁴⁰ Kaselɔ pa we e tsɔɔlɔ; se nɔ tsuaa nɔ nɛ a tsɔse lɛ kɛ pi si ɔ maa pee kaa e tsɔɔlɔ.

⁴¹ “Mɛ he je o naa ngu nyafii nɛ ngɛ o nyɛmi hɛngmɛ nɔ ɔ, nɛ plai nɛ ngɛ mo nitse o hɛngmɛ nɔ ɔ lɛɛ o yo we ɔ?

⁴² Kɛ maa pee kɛɛ nɛ o ma nyɛ de o nyɛmi ke: ‘Mami, ha ma je ngu nyafii nɛ ngɛ o hɛngmɛ nɔ ɔ,’ benɛ o nɛ plai nɛ ngɛ mo nitse o hɛngmɛ nɔ ɔ? osatotsɛ, je plai ɔ ngɛ mo nitsɛ o hɛngmɛ nɔ kekle, nɛ lɔ ɔ loko o maa na paa nɛ o je ngu nyafii ɔ ngɛ o nyɛmi ɔ hɛngmɛ nɔ.

Tso kɛ e yiblii

⁴³ “Ejakaa tso kpakpa ko be nɛ woɔ yiblii yaya, nɛ jeha nɔ hu tso yaya ko hu be nɛ woɔ yiblii kpakpa.

⁴⁴ Ejakaa tso tsuaa tso nitsɛ yiblii a kɛ leɔ lɛ: Ejakaa a la we ngmɔkɔ ngɛ zezlehi a nɔ, nɛ pohu a la we wai yiblii ngɛ mio tsohi a nɔ.

⁴⁵ Nɔmlɔ kpakpa jeɔ nɔ́ kpakpa kɛ jee e tsui mi juetli kpakpa a mi, nɛ nɔmlɔ yayami hu jeɔ nɔ́ yaya kɛ jee e tsui mi juetli yaya a mi, ejakaa nɔ́ nɛ hyi nɔmlɔ tsui kɛ be nɔ ɔ, lɔ ɔ e nya deɔ.”

Tsumali enyɔ ɔ

⁴⁶ “Se mɛ he je nyɛ tsɛɛ mi: ‘Nyɔmtsɛ, Nyɔmtsɛ,’ nɛ nyɛ pee we nihi nɛ i deɔ ɔ?

⁴⁷ Nɔ tsuaa nɔ nɛ baa ye ngɔ nɛ e nuɔ ye munyu ɔmɛ nɛ e yeɔ nɔ ɔ, ma tsɔɔ nyɛ bɔ nɛ e ngɛ ha:

⁴⁸ E ngɛ kaa nyumu ko nɛ benɛ e maa ma tsu ɔ, e tsua si voo nɛ e to sisi ngɛ tɛ sa nɔ; nɛ benɛ pa hia a, e si tsu ɔ, se e nyɛ we lɛ nɛ e hule, mɛni he je ɔ, a to sisi ngɛ tɛ sa nɔ.

⁴⁹ Se nɔ nɛ nuɔ nɛ e yi nɔ ɔ, e ngɛ kaa nyumu ko nɛ ma tsu ngɛ zugba hɛ mi nɛ a tui sisi; nɛ pa a si lɛ, nɛ amlɔ ɔ e hule, nɛ jamɛ a tsu ɔ hulemi ɔ kle.”