Luka 3 - Somi He Ɔ

Yohane Baptisilɔ ɔ fiɛmi

¹ Jeha nɛ ɔ, Kaisare Tiberio matsɛ yemi jeha nɛ ji nyɔngma kɛ enuɔ ɔ mi, benɛ Pontio Pilato ngɛ amlaalo yee ngɛ Yudea, nɛ Herode ngɛ amlaalo nɔkɔtɔma yee ngɛ Galilea, nɛ e nyɛmi Filipo hu ngɛ matsɛ ngua yee ngɛ Iturea kɛ Trakɛniti zugba amɛ a nɔ, nɛ Lisania ngɛ amlaalo nɔkɔtɔma yee ngɛ Abileene,

² nɛ Anna kɛ Kaiafa ngɛ osofɔ nikɔtɔmahi yee ɔ, Mawu munyu ba Zakaria bi Yohane ngɔ ngɛ nga a nɔ.

³ Nɛ e kpa Yordan kpo ɔmɛ tsuo a mi nɛ e fiɛ baptisimi nɛ a kɛ naa tsui tsakemi kɛ yayami pami;

⁴ kaa bɔ nɛ a ngma ngɛ gbalɔ Yesaia womi ɔ mi ke: “Nɔ ko ngɛ ngmlaa kpae ngɛ nga a nɔ ke: ‘Nyɛ dla Nyɔmtsɛ ɔ blɔ ɔ, Nyɛ ha e blɔ ngua amɛ nɛ a da tlɔmɔɔ.

⁵ A maa tsi dɔgba tsuaa dɔgba, Nɛ a ma ha yoku tsuaa yoku Kɛ kpongu tsuaa kpongu maa ba si, Nɛ a ma ha nihi nɛ kpɛ ɔmɛ maa da, Nɛ blɔ nɛ nɔ ngɛ googãgoogã a maa sɔ;

⁶ Nɛ he lo tsuo kulaa maa na Mawu yiwami hemi ɔ.’ ”

⁷ Kɛkɛ nɛ e de asafo ɔmɛ nɛ ba e ngɔ nɛ e baptisi mɛ ɔ ke: “Sinɔhi a nina, mɛnɔ tu munyu tsɔɔ nyɛ ke nyɛɛ tu muklii mi fumi nɛ ma a nya fo?

⁸ Lɔ ɔ he ɔ, nyɛɛ wo yiblii nɛ sa tsui tsakemi; nɛ nyɛ ko bɔni demi ngɛ nyɛ yi mi ke: ‘Wa tsɛ ji Abraham,’ ejakaa i ngɛ nyɛ dee ke, Mawu ma nyɛ ma tle bimɛ a si kɛ je tɛ nɛ ɔmɛ a mi ngɔ ha Abraham.

⁹ Se jeha nɛ ɔ hu, gbiɛ ɔ fɔɔ si ngɛ tso ɔmɛ a sipoku ɔmɛ a nɔ momo; lɔ ɔ he ɔ, tso tsuaa tso nɛ wui yiblii kpakpahi ɔ, a maa po nɛ a ma sake ngɔ fɔ la mi.”

¹⁰ Nɛ asafo ɔmɛ bi lɛ ke: “Lɛɛ mɛni waa pee mɔ?”

¹¹ Nɛ e he nɔ nɛ e de mɛ ke: “Nɔ nɛ ngɛ hiɔwe tade enyɔ ɔ, e kɛ nɔ nɛ be eko ɔ nɛ dla; nɛ nɔ nɛ ngɛ ngma hu, e pee ja nɔuu.”

¹² Nɛ onia tsuli hu ba konɛ a baptisi mɛ, nɛ a bi lɛ ke: “Tsɔɔlɔ, mɛni waa pee?”

¹³ Nɛ e de mɛ ke: “Nyɛ ko he pe bɔ nɛ a to ha nyɛ ɔ.”

¹⁴ Nɛ aslaafohi hu ba bi lɛ ke: “Nɛ wɔ hu, mɛni waa pee?” Nɛ e de mɛ ke: “Nyɛ ko hɛɛ nɔ ko soisoi, nɛ nyɛ ko po nɔ ko nya yaka gu; nɛ nyɛ ha nyɛ hiɔwo nɛ sa nyɛ hɛ mi.”

¹⁵ Se benɛ ma a tsuo hɛ ngɛ nɔ, nɛ ni ɔmɛ tsuo ngɛ susue ngɛ a tsui mi ngɛ Yohane he kaa be nɛ ɔ mi ɔ lɛ ji Kristo ɔ,

¹⁶ Yohane he nɔ nɛ e de ni ɔmɛ tsuo ke: “Imi lɛɛ, nyu i kɛ baptisi nyɛ; se nɔ ko nɛ he wa pe mi ma, nɛ i sɛ nɔ nɛ pɛneɔ e tokotahi a nya kpa, lɛ e kɛ Mumi Klɔuklɔu kɛ la maa baptisi nyɛ,

¹⁷ nɔ nɛ hɛɛ e nɔ mi sami tsine ngɛ e dɛ, nɛ e maa bɛɛ zugba a fitsofitso, nɛ e ma bua ngma a nya ngɔ to e gba a mi, se tsakati ɔ, e kɛ la nɛ gbo we maa sã.”

¹⁸ Nɛ e de ni kpa komɛ fuu hu kɛ wo mɛ ga, kɛ fiɛ Sane Kpakpa a tsɔɔ mɛ,

¹⁹ Se amlaalo nɔkɔtɔma Herode ɔ, akɛnɛ Yohane ka e hɛ mi ngɛ e nyɛmi Filipo yo Herodia a he, kɛ ni yayahi tsuo nɛ lɛ Herode ɔ pee he je ɔ,

²⁰ e kpale pee enɛ ɔ ngɔ si nɔ kaa e nu Yohane ngɔ wo tsu mi.

Yesu baptisimi

²¹ E ba mi kaa benɛ a baptisi ni ɔmɛ tsuo ɔ, a baptisi Yesu hulɔ; nɛ benɛ e ngɛ sɔlee ɔ, hiɔwe nya bli

²² nɛ Mumi Klɔuklɔu ɔ kple si kɛ su nɛ ngɛ kaa okpo kɛ ba e nɔ. Nɛ gbi ko je hiɔwe de ke: “Mo ji ye suɔmi bi ɔ nɛ, mo o he ye tsui ngɛ!”

Yesu Wekukpa

²³ Nɛ benɛ Yesu je e ni tsumi sisi ɔ, e ye maa pee jeha nyingmi etɛ, nɛ bɔ nɛ a susuu ɔ, e ji Yosef bi, Heli bi,

²⁴ Matat bi, Levi bi, Melki bi, Yanai bi Yosef bi,

²⁵ Matatia bi, Amos bi, Nahum bi, Esli bi, Nagai bi,

²⁶ Maat bi, Matatia bi, Semein bi, Yosek bi, Yoda bi,

²⁷ Yohanan bi, Resa bi, Zerubabel bi, Shealtiel bi, Neri bi,

²⁸ Melki bi, Adi bi, Kosam bi, Elamadam bi, Er bi,

²⁹ Yoshua bi, Eliezer bi, Yorim bi, Matat bi, Levi bi,

³⁰ Simeon bi, Yuda bi, Yosef bi, Yonam bi, Eliakim bi,

³¹ Melea bi, Mena bi, Matata bi, Natan bi, David bi,

³² Ishai bi, Obed bi, Boaɛ bi, Salmon bi, Nahashon bi,

³³ Aminadab bi, Admin bi, Arni bi, Hezron bi, Perez bi, Yuda bi,

³⁴ Yakob bi, Isak bi, Abraham bi, Tera bi, Nahor bi.

³⁵ Serug bi, Reu bi, Peleg bi, Eber bi, Shela bi,

³⁶ Kainan bi, Arpakshad bi, Shem bi, Noa bi, Lamek bi,

³⁷ Metusela bi, Henok bi, Yared bi, Mahalalel bi, Kainan bi,

³⁸ Enos bi, Set bi, Adam bi, Mawu bi.